Utshovঅধ্যায় 18
18.1
বৈশংপায়ন উবাচ
মহায়োগী ততঃ প্রাহ কৃষ্ণদ্বৈপায়নো মুনিঃ
পঠস্ব পুত্র ভদ্রং তে প্রীয়তাং তে মহেশ্বরঃ
18.2
পুরা পুত্র ময়া মেরৌ তপ্যতা পরমং তপঃ
পুত্রহেতোর্মহারাজ স্তব এষোঽনুকীর্তিতঃ
18.3
লব্ধবানস্মি তান্কামানহং বৈ পাণ্ডুনন্দন
তথা ত্বমপি শর্বাদ্ধি সর্বান্কামানবাপ্স্যসি
18.4
চতুঃশীর্ষস্ততঃ প্রাহ শক্রস্য দয়িতঃ সখা
আলম্বায়ন ইত্যেব বিশ্রুতঃ করুণাত্মকঃ
18.5
ময়া গোকর্ণমাসাদ্য তপস্তপ্ত্বা শতং সমাঃ
অয়োনিজানাং দান্তানাং ধর্মজ্ঞানাং সুবর্চসাম্
18.6
অজরাণামদুঃখানাং শতবর্ষসহস্রিণাম্
লব্ধং পুত্রশতং শর্বাত্পুরা পাণ্ডুনৃপাত্মজ
18.7
বাল্মীকিশ্চাপি ভগবান্যুধিষ্ঠিরমভাষত
বিবাদে সাম্নি মুনিভির্ব্রহ্মঘ্নো বৈ ভবানিতি
উক্তঃ ক্ষণেন চাবিষ্টস্তেনাধর্মেণ ভারত
18.8
সোঽহমীশানমনঘমস্তৌষং শরণং গতঃ
মুক্তশ্চাস্ম্যবশঃ পাপাত্ততো দুঃখবিনাশনঃ
আহ মাং ত্রিপুরঘ্নো বৈ যশস্তেঽগ্র্যং ভবিষ্যতি
18.9
জামদগ্ন্যশ্চ কৌন্তেয়মাহ ধর্মভৃতাং বরঃ
ঋষিমধ্যে স্থিতস্তাত তপন্নিব বিভাবসুঃ
18.10
পিতৃবিপ্রবধেনাহমার্তো বৈ পাণ্ডবাগ্রজ
শুচির্ভূত্বা মহাদেবং গতবাঞ্শরণং নৃপ
18.11
নামভিশ্চাস্তুবং দেবং ততস্তুষ্টোঽভবদ্ভবঃ
পরশুং চ দদৌ দেবো দিব্যান্যস্ত্রাণি চৈব মে
18.12
পাপং ন ভবিতা তেঽদ্য অজেয়শ্চ ভবিষ্যসি
ন তে প্রভবিতা মৃত্যুর্যশস্বী চ ভবিষ্যসি
18.13
আহ মাং ভগবানেবং শিখণ্ডী শিববিগ্রহঃ
যদবাপ্তং চ মে সর্বং প্রসাদাত্তস্য ধীমতঃ
18.14
অসিতো দেবলশ্চৈব প্রাহ পাণ্ডুসুতং নৃপম্
শাপাচ্ছক্রস্য কৌন্তেয় চিতো ধর্মোঽনশন্মম
তন্মে ধর্মং যশশ্চাগ্র্যমায়ুশ্চৈবাদদদ্ভবঃ
18.15
ঋষির্গৃত্সমদো নাম শক্রস্য দয়িতঃ সখা
প্রাহাজমীঢং ভগবান্বৃহস্পতিসমদ্যুতিঃ
18.16
বসিষ্ঠো নাম ভগবাংশ্চাক্ষুষস্য মনোঃ সুতঃ
শতক্রতোরচিন্ত্যস্য সত্রে বর্ষসহস্রিকে
বর্তমানেঽব্রবীদ্বাক্যং সাম্নি হ্যুচ্চারিতে ময়া
18.17
রথন্তরং দ্বিজশ্রেষ্ঠ ন সম্যগিতি বর্ততে
সমীক্ষস্ব পুনর্বুদ্ধ্যা হর্ষং ত্যক্ত্বা দ্বিজোত্তম
অয়জ্ঞবাহিনং পাপমকার্ষীস্ত্বং সুদুর্মতে
18.18
এবমুক্ত্বা মহাক্রোধাত্প্রাহ রুষ্টঃ পুনর্বচঃ
প্রজ্ঞয়া রহিতো দুঃখী নিত্যং ভীতো বনেচরঃ
দশ বর্ষসহস্রাণি দশাষ্টৌ চ শতানি চ
18.19
নষ্টপানীয়য়বসে মৃগৈরন্যৈশ্চ বর্জিতে
অয়জ্ঞীয়দ্রুমে দেশে রুরুসিংহনিষেবিতে
ভবিতা ত্বং মৃগঃ ক্রূরো মহাদুঃখসমন্বিতঃ
18.20
তস্য বাক্যস্য নিধনে পার্থ জাতো হ্যহং মৃগঃ
ততো মাং শরণং প্রাপ্তং প্রাহ যোগী মহেশ্বরঃ
18.21
অজরশ্চামরশ্চৈব ভবিতা দুঃখবর্জিতঃ
সাম্যং সমস্তু তে সৌখ্যং যুবয়োর্বর্ধতাং ক্রতুঃ
18.22
অনুগ্রহানেবমেষ করোতি ভগবান্বিভুঃ
পরং ধাতা বিধাতা চ সুখদুঃখে চ সর্বদা
18.23
অচিন্ত্য এষ ভগবান্কর্মণা মনসা গিরা
ন মে তাত যুধিশ্রেষ্ঠ বিদ্যয়া পণ্ডিতঃ সমঃ
18.24
জৈগীষব্য উবাচ
মমাষ্টগুণমৈশ্বর্যং দত্তং ভগবতা পুরা
যত্নেনাল্পেন বলিনা বারাণস্যাং যুধিষ্ঠির
18.25
গার্গ্য উবাচ
চতুঃষষ্ট্যঙ্গমদদাত্কালজ্ঞানং মমাদ্ভুতম্
সরস্বত্যাস্তটে তুষ্টো মনোয়জ্ঞেন পাণ্ডব
18.26
তুল্যং মম সহস্রং তু সুতানাং ব্রহ্মবাদিনাম্
আয়ুশ্চৈব সপুত্রস্য সংবত্সরশতায়ুতম্
18.27
পরাশর উবাচ
প্রসাদ্যাহং পুরা শর্বং মনসাচিন্তয়ং নৃপ
মহাতপা মহাতেজা মহায়োগী মহায়শাঃ
বেদব্যাসঃ শ্রিয়াবাসো ব্রহ্মণ্যঃ করুণাত্মকঃ
18.28
অপি নামেপ্সিতঃ পুত্রো মম স্যাদ্বৈ মহেশ্বরাৎ
ইতি মত্বা হৃদি মতং প্রাহ মাং সুরসত্তমঃ
18.29
ময়ি সংভবতস্তস্য ফলাত্কৃষ্ণো ভবিষ্যতি
সাবর্ণস্য মনোঃ সর্গে সপ্তর্ষিশ্চ ভবিষ্যতি
18.30
বেদানাং চ স বৈ ব্যস্তা কুরুবংশকরস্তথা
ইতিহাসস্য কর্তা চ পুত্রস্তে জগতো হিতঃ
18.31
ভবিষ্যতি মহেন্দ্রস্য দয়িতঃ স মহামুনিঃ
অজরশ্চামরশ্চৈব পরাশর সুতস্তব
18.32
এবমুক্ত্বা স ভগবাংস্তত্রৈবান্তরধীয়ত
যুধিষ্ঠির মহায়োগী বীর্যবানক্ষয়োঽব্যয়ঃ
18.33
মাণ্ডব্য উবাচ
অচৌরশ্চৌরশঙ্কায়াং শূলে ভিন্নো হ্যহং যদা
তত্রস্থেন স্তুতো দেবঃ প্রাহ মাং বৈ মহেশ্বরঃ
18.34
মোক্ষং প্রাপ্স্যসি শূলাচ্চ জীবিষ্যসি সমার্বুদম্
রুজা শূলকৃতা চৈব ন তে বিপ্র ভবিষ্যতি
আধিভির্ব্যাধিভিশ্চৈব বর্জিতস্ত্বং ভবিষ্যসি
18.35
পাদাচ্চতুর্থাত্সংভূত আত্মা যস্মান্মুনে তব
ত্বং ভবিষ্যস্যনুপমো জন্ম বৈ সফলং কুরু
18.36
তীর্থাভিষেকং সফলং ত্বমবিঘ্নেন চাপ্স্যসি
স্বর্গং চৈবাক্ষয়ং বিপ্র বিদধামি তবোর্জিতম্
18.37
এবমুক্ত্বা তু ভগবান্বরেণ্যো বৃষবাহনঃ
মহেশ্বরো মহারাজ কৃত্তিবাসা মহাদ্যুতিঃ
সগণো দৈবতশ্রেষ্ঠস্তত্রৈবান্তরধীয়ত
18.38
গালব উবাচ
বিশ্বামিত্রাভ্যনুজ্ঞাতো হ্যহং পিতরমাগতঃ
অব্রবীন্মাং ততো মাতা দুঃখিতা রুদতী ভৃশম্
18.39
কৌশিকেনাভ্যনুজ্ঞাতং পুত্রং বেদবিভূষিতম্
ন তাত তরুণং দান্তং পিতা ত্বাং পশ্যতেঽনঘ
18.40
শ্রুত্বা জনন্যা বচনং নিরাশো গুরুদর্শনে
নিয়তাত্মা মহাদেবমপশ্যং সোঽব্রবীচ্চ মাম্
18.41
পিতা মাতা চ তে ত্বং চ পুত্র মৃত্যুবিবর্জিতাঃ
ভবিষ্যথ বিশ ক্ষিপ্রং দ্রষ্টাসি পিতরং ক্ষয়ে
18.42
অনুজ্ঞাতো ভগবতা গৃহং গত্বা যুধিষ্ঠির
অপশ্যং পিতরং তাত ইষ্টিং কৃত্বা বিনিঃসৃতম্
18.43
উপস্পৃশ্য গৃহীত্বেধ্মং কুশাংশ্চ শরণাদ্গুরূন্
তান্বিসৃজ্য চ মাং প্রাহ পিতা সাস্রাবিলেক্ষণঃ
18.44
প্রণমন্তং পরিষ্বজ্য মূর্ধ্নি চাঘ্রায় পাণ্ডব
দিষ্ট্যা দৃষ্টোঽসি মে পুত্র কৃতবিদ্য ইহাগতঃ
18.45
বৈশংপায়ন উবাচ
এতান্যত্যদ্ভুতান্যেব কর্মাণ্যথ মহাত্মনঃ
প্রোক্তানি মুনিভিঃ শ্রুত্বা বিস্ময়ামাস পাণ্ডবঃ
18.46
ততঃ কৃষ্ণোঽব্রবীদ্বাক্যং পুনর্মতিমতাং বরঃ
যুধিষ্ঠিরং ধর্মনিত্যং পুরুহূতমিবেশ্বরঃ
18.47
আদিত্যচন্দ্রাবনিলানলৌ চ; দ্যৌর্ভূমিরাপো বসবোঽথ বিশ্বে
ধাতার্যমা শুক্রবৃহস্পতী চ; রুদ্রাঃ সসাধ্যা বরুণো বিত্তগোপঃ
18.48
ব্রহ্মা শক্রো মারুতো ব্রহ্ম সত্যং; বেদা যজ্ঞা দক্ষিণা বেদবাহাঃ
সোমো যষ্টা যচ্চ হব্যং হবিশ্চ; রক্ষা দীক্ষা নিয়মা যে চ কেচিৎ
18.49
স্বাহা বষড্ব্রাহ্মণাঃ সৌরভেয়া; ধর্মং চক্রং কালচক্রং চরং চ
যশো দমো বুদ্ধিমতী স্থিতিশ্চ; শুভাশুভং মুনয়শ্চৈব সপ্ত
18.50
অগ্র্যা বুদ্ধির্মনসা দর্শনে চ; স্পর্শে সিদ্ধিঃ কর্মণাং যা চ সিদ্ধিঃ
গণা দেবানামূষ্মপাঃ সোমপাশ্চ; লেখাঃ সুয়ামাস্তুষিতা ব্রহ্মকায়াঃ
18.51
আভাস্বরা গন্ধপা দৃষ্টিপাশ্চ; বাচা বিরুদ্ধাশ্চ মনোবিরুদ্ধাঃ
শুদ্ধাশ্চ নির্বাণরতাশ্চ দেবাঃ; স্পর্শাশনা দর্শপা আজ্যপাশ্চ
18.52
চিন্তাগতা যে চ দেবেষু মুখ্যা; যে চাপ্যন্যে দেবতাশ্চাজমীঢ
সুপর্ণগন্ধর্বপিশাচদানবা; যক্ষাস্তথা পন্নগাশ্চারণাশ্চ
18.53
সূক্ষ্মং স্থূলং মৃদু যচ্চাপ্যসূক্ষ্মং; সুখং দুঃখং সুখদুঃখান্তরং চ
সাংখ্যং যোগং যত্পরাণাং পরং চ; শর্বাজ্জাতং বিদ্ধি যত্কীর্তিতং মে
18.54
তত্সংভূতা ভূতকৃতো বরেণ্যাঃ; সর্বে দেবা ভুবনস্যাস্য গোপাঃ
আবিশ্যেমাং ধরণীং যেঽভ্যরক্ষ;ন্পুরাতনীং তস্য দেবস্য সৃষ্টিম্
18.55
বিচিন্বন্তং মনসা তোষ্টুবীমি; কিংচিত্তত্ত্বং প্রাণহেতোর্নতোঽস্মি
দদাতু দেবঃ স বরানিহেষ্টা;নভিষ্টুতো নঃ প্রভুরব্যয়ঃ সদা
18.56
ইমং স্তবং সংনিয়ম্যেন্দ্রিয়াণি; শুচির্ভূত্বা যঃ পুরুষঃ পঠেত
অভগ্নয়োগো নিয়তোঽব্দমেকং; স প্রাপ্নুয়াদশ্বমেধে ফলং যৎ
18.57
বেদান্কৃত্স্নান্ব্রাহ্মণঃ প্রাপ্নুয়াচ্চ; জয়েদ্রাজা পৃথিবীং চাপি কৃত্স্নাম্
বৈশ্যো লাভং প্রাপ্নুয়ান্নৈপুণং চ; শূদ্রো গতিং প্রেত্য তথা সুখং চ
18.58
স্তবরাজমিমং কৃত্বা রুদ্রায় দধিরে মনঃ
সর্বদোষাপহং পুণ্যং পবিত্রং চ যশস্বিনম্
18.59
যাবন্ত্যস্য শরীরেষু রোমকূপাণি ভারত
তাবদ্বর্ষসহস্রাণি স্বর্গে বসতি মানবঃ