UtshovChapter 26
26.1
युधिष्ठिर उवाच
तीर्थानां दर्शनं श्रेयः स्नानं च भरतर्षभ
श्रवणं च महाप्राज्ञ श्रोतुमिच्छामि तत्त्वतः
Yudhishthira uvacha
Tirthanam darshanam shreyah snanam cha bharatarshabha
Shravanam cha mahapragya shrotumichchhami tattvatah
26.2
पृथिव्यां यानि तीर्थानि पुण्यानि भरतर्षभ
वक्तुमर्हसि मे तानि श्रोतास्मि नियतः प्रभो
Prithivyam yani tirthani punyani bharatarshabha
Vaktumarhasi me tani shrotasmi niyatah prabho
26.3
भीष्म उवाच
इममङ्गिरसा प्रोक्तं तीर्थवंशं महाद्युते
श्रोतुमर्हसि भद्रं ते प्राप्स्यसे धर्ममुत्तमम्
Bhishma uvacha
Imamangirasa proktam tirthavansham mahadyute
Shrotumarhasi bhadram te prapsyase dharmamuttamam
26.4
तपोवनगतं विप्रमभिगम्य महामुनिम्
पप्रच्छाङ्गिरसं वीर गौतमः संशितव्रतः
Tapovanagatam vipramabhigamya mahamunim
Paprachchhangirasam vira gautamah sanshitavratah
26.5
अस्ति मे भगवन्कश्चित्तीर्थेभ्यो धर्मसंशयः
तत्सर्वं श्रोतुमिच्छामि तन्मे शंस महामुने
Asti me bhagavankashchittirthebhyo dharmasanshayah
Tatsarvam shrotumichchhami tanme shansa mahamune
26.6
उपस्पृश्य फलं किं स्यात्तेषु तीर्थेषु वै मुने
प्रेत्यभावे महाप्राज्ञ तद्यथास्ति तथा वद
Upasprishya phalam kim syatteshu tirtheshu vai mune
Pretyabhave mahapragya tadyathasti tatha vada
26.7
अङ्गिरा उवाच
सप्ताहं चन्द्रभागां वै वितस्तामूर्मिमालिनीम्
विगाह्य वै निराहारो निर्ममो मुनिवद्भवेत्
Angira uvacha
Saptaham chandrabhagam vai vitastamurmimalinim
Vigahya vai niraharo nirmamo munivadbhavet
26.8
काश्मीरमण्डले नद्यो याः पतन्ति महानदम्
ता नदीः सिन्धुमासाद्य शीलवान्स्वर्गमाप्नुयात्
Kashmiramandale nadyo yah patanti mahanadam
Ta nadih sindhumasadya shilavansvargamapnuyat
26.9
पुष्करं च प्रभासं च नैमिषं सागरोदकम्
देविकामिन्द्रमार्गं च स्वर्णबिन्दुं विगाह्य च
विबोध्यते विमानस्थः सोऽप्सरोभिरभिष्टुतः
Pushkaram cha prabhasam cha naimisham sagarodakam
Devikamindramargam cha svarnabindum vigahya cha
Vibodhyate vimanasthah sopsarobhirabhishtutah
26.10
हिरण्यबिन्दुं विक्षोभ्य प्रयतश्चाभिवाद्य तम्
कुशेशयं च देवत्वं पूयते तस्य किल्बिषम्
Hiranyabindum vikshobhya prayatashchabhivadya tam
Kusheshayam cha devatvam puyate tasya kilbisham
26.11
इन्द्रतोयां समासाद्य गन्धमादनसंनिधौ
करतोयां कुरङ्गेषु त्रिरात्रोपोषितो नरः
अश्वमेधमवाप्नोति विगाह्य नियतः शुचिः
Indratoyam samasadya gandhamadanasannidhau
Karatoyam kurangeshu triratroposhito narah
Ashvamedhamavapnoti vigahya niyatah shuchih
26.12
गङ्गाद्वारे कुशावर्ते बिल्वके नेमिपर्वते
तथा कनखले स्नात्वा धूतपाप्मा दिवं व्रजेत्
Gangadvare kushavarte bilvake nemiparvate
Tatha kanakhale snatva dhutapapma divam vrajet
26.13
अपां ह्रद उपस्पृश्य वाजपेयफलं लभेत्
ब्रह्मचारी जितक्रोधः सत्यसंधस्त्वहिंसकः
Apam hrada upasprishya vajapeyaphalam labhet
Brahmachari jitakrodhah satyasandhastvahinsakah
26.14
यत्र भागीरथी गङ्गा भजते दिशमुत्तराम्
महेश्वरस्य निष्ठाने यो नरस्त्वभिषिच्यते
एकमासं निराहारः स्वयं पश्यति देवताः
Yatra bhagirathi ganga bhajate dishamuttaram
Maheshvarasya nishthane yo narastvabhishichyate
Ekamasam niraharah svayam pashyati devatah
26.15
सप्तगङ्गे त्रिगङ्गे च इन्द्रमार्गे च तर्पयन्
सुधां वै लभते भोक्तुं यो नरो जायते पुनः
Saptagange trigange cha indramarge cha tarpayan
Sudham vai labhate bhoktum yo naro jayate punah
26.16
महाश्रम उपस्पृश्य योऽग्निहोत्रपरः शुचिः
एकमासं निराहारः सिद्धिं मासेन स व्रजेत्
Mahashrama upasprishya yognihotraparah shuchih
Ekamasam niraharah siddhim masena sa vrajet
26.17
महाह्रद उपस्पृश्य भृगुतुङ्गे त्वलोलुपः
त्रिरात्रोपोषितो भूत्वा मुच्यते ब्रह्महत्यया
Mahahrada upasprishya bhrigutunge tvalolupah
Triratroposhito bhutva muchyate brahmahatyaya
26.18
कन्याकूप उपस्पृश्य बलाकायां कृतोदकः
देवेषु कीर्तिं लभते यशसा च विराजते
Kanyakupa upasprishya balakayam kritodakah
Deveshu kirtim labhate yashasa cha virajate
26.19
देशकाल उपस्पृश्य तथा सुन्दरिकाह्रदे
अश्विभ्यां रूपवर्चस्यं प्रेत्य वै लभते नरः
Deshakala upasprishya tatha sundarikahrade
Ashvibhyam rupavarchasyam pretya vai labhate narah
26.20
महागङ्गामुपस्पृश्य कृत्तिकाङ्गारके तथा
पक्षमेकं निराहारः स्वर्गमाप्नोति निर्मलः
Mahagangamupasprishya krittikangarake tatha
Pakshamekam niraharah svargamapnoti nirmalah
26.21
वैमानिक उपस्पृश्य किङ्किणीकाश्रमे तथा
निवासेऽप्सरसां दिव्ये कामचारी महीयते
Vaimanika upasprishya kinkinikashrame tatha
Nivasepsarasam divye kamachari mahiyate
26.22
कालिकाश्रममासाद्य विपाशायां कृतोदकः
ब्रह्मचारी जितक्रोधस्त्रिरात्रान्मुच्यते भवात्
Kalikashramamasadya vipashayam kritodakah
Brahmachari jitakrodhastriratranmuchyate bhavat
26.23
आश्रमे कृत्तिकानां तु स्नात्वा यस्तर्पयेत्पितॄन्
तोषयित्वा महादेवं निर्मलः स्वर्गमाप्नुयात्
Ashrame krittikanam tu snatva yastarpayetpitrin
Toshayitva mahadevam nirmalah svargamapnuyat
26.24
महापुर उपस्पृश्य त्रिरात्रोपोषितो नरः
त्रसानां स्थावराणां च द्विपदानां भयं त्यजेत्
Mahapura upasprishya triratroposhito narah
Trasanam sthavaranam cha dvipadanam bhayam tyajet
26.25
देवदारुवने स्नात्वा धूतपाप्मा कृतोदकः
देवलोकमवाप्नोति सप्तरात्रोषितः शुचिः
Devadaruvane snatva dhutapapma kritodakah
Devalokamavapnoti saptaratroshitah shuchih
26.26
कौशन्ते च कुशस्तम्बे द्रोणशर्मपदे तथा
आपःप्रपतने स्नातः सेव्यते सोऽप्सरोगणैः
Kaushante cha kushastambe dronasharmapade tatha
Apahprapatane snatah sevyate sopsaroganaih
26.27
चित्रकूटे जनस्थाने तथा मन्दाकिनीजले
विगाह्य वै निराहारो राजलक्ष्मीं निगच्छति
Chitrakute janasthane tatha mandakinijale
Vigahya vai niraharo rajalakshmim nigachchhati
26.28
श्यामायास्त्वाश्रमं गत्वा उष्य चैवाभिषिच्य च
त्रींस्त्रिरात्रान्स संधाय गन्धर्वनगरे वसेत्
Shyamayastvashramam gatva ushya chaivabhishichya cha
Trinstriratransa sandhaya gandharvanagare vaset
26.29
रमण्यां च उपस्पृश्य तथा वै गन्धतारिके
एकमासं निराहारस्त्वन्तर्धानफलं लभेत्
Ramanyam cha upasprishya tatha vai gandhatarike
Ekamasam niraharastvantardhanaphalam labhet
26.30
कौशिकीद्वारमासाद्य वायुभक्षस्त्वलोलुपः
एकविंशतिरात्रेण स्वर्गमारोहते नरः
Kaushikidvaramasadya vayubhakshastvalolupah
Ekavinshatiratrena svargamarohate narah
26.31
मतङ्गवाप्यां यः स्नायादेकरात्रेण सिध्यति
विगाहति ह्यनालम्बमन्धकं वै सनातनम्
Matangavapyam yah snayadekaratrena sidhyati
Vigahati hyanalambamandhakam vai sanatanam
26.32
नैमिषे स्वर्गतीर्थे च उपस्पृश्य जितेन्द्रियः
फलं पुरुषमेधस्य लभेन्मासं कृतोदकः
Naimishe svargatirthe cha upasprishya jitendriyah
Phalam purushamedhasya labhenmasam kritodakah
26.33
गङ्गाह्रद उपस्पृश्य तथा चैवोत्पलावने
अश्वमेधमवाप्नोति तत्र मासं कृतोदकः
Gangahrada upasprishya tatha chaivotpalavane
Ashvamedhamavapnoti tatra masam kritodakah
26.34
गङ्गायमुनयोस्तीर्थे तथा कालंजरे गिरौ
षष्टिह्रद उपस्पृश्य दानं नान्यद्विशिष्यते
Gangayamunayostirthe tatha kalanjare girau
Shashtihrada upasprishya danam nanyadvishishyate
26.35
दश तीर्थसहस्राणि तिस्रः कोट्यस्तथापराः
समागच्छन्ति माघ्यां तु प्रयागे भरतर्षभ
Dasha tirthasahasrani tisrah kotyastathaparah
Samagachchhanti maghyam tu prayage bharatarshabha
26.36
माघमासं प्रयागे तु नियतः संशितव्रतः
स्नात्वा तु भरतश्रेष्ठ निर्मलः स्वर्गमाप्नुयात्
Maghamasam prayage tu niyatah sanshitavratah
Snatva tu bharatashreshtha nirmalah svargamapnuyat
26.37
मरुद्गण उपस्पृश्य पितॄणामाश्रमे शुचिः
वैवस्वतस्य तीर्थे च तीर्थभूतो भवेन्नरः
Marudgana upasprishya pitrinamashrame shuchih
Vaivasvatasya tirthe cha tirthabhuto bhavennarah
26.38
तथा ब्रह्मशिरो गत्वा भागीरथ्यां कृतोदकः
एकमासं निराहारः सोमलोकमवाप्नुयात्
Tatha brahmashiro gatva bhagirathyam kritodakah
Ekamasam niraharah somalokamavapnuyat
26.39
कपोतके नरः स्नात्वा अष्टावक्रे कृतोदकः
द्वादशाहं निराहारो नरमेधफलं लभेत्
Kapotake narah snatva ashtavakre kritodakah
Dvadashaham niraharo naramedhaphalam labhet
26.40
मुञ्जपृष्ठं गयां चैव निरृतिं देवपर्वतम्
तृतीयां क्रौञ्चपादीं च ब्रह्महत्या विशुध्यति
Munjaprishtham gayam chaiva nirritim devaparvatam
Tritiyam kraunchapadim cha brahmahatya vishudhyati
26.41
कलश्यां वाप्युपस्पृश्य वेद्यां च बहुशोजलाम्
अग्नेः पुरे नरः स्नात्वा विशालायां कृतोदकः
देवह्रद उपस्पृश्य ब्रह्मभूतो विराजते
Kalashyam vapyupasprishya vedyam cha bahushojalam
Agneh pure narah snatva vishalayam kritodakah
Devahrada upasprishya brahmabhuto virajate
26.42
पुरापवर्तनं नन्दां महानन्दां च सेव्य वै
नन्दने सेव्यते दान्तस्त्वप्सरोभिरहिंसकः
Purapavartanam nandam mahanandam cha sevya vai
Nandane sevyate dantastvapsarobhirahinsakah
26.43
उर्वशीकृत्तिकायोगे गत्वा यः सुसमाहितः
लौहित्ये विधिवत्स्नात्वा पुण्डरीकफलं लभेत्
Urvashikrittikayoge gatva yah susamahitah
Lauhitye vidhivatsnatva pundarikaphalam labhet
26.44
रामह्रद उपस्पृश्य विशालायां कृतोदकः
द्वादशाहं निराहारः कल्मषाद्विप्रमुच्यते
Ramahrada upasprishya vishalayam kritodakah
Dvadashaham niraharah kalmashadvipramuchyate
26.45
महाह्रद उपस्पृश्य शुद्धेन मनसा नरः
एकमासं निराहारो जमदग्निगतिं लभेत्
Mahahrada upasprishya shuddhena manasa narah
Ekamasam niraharo jamadagnigatim labhet
26.46
विन्ध्ये संताप्य चात्मानं सत्यसंधस्त्वहिंसकः
षण्मासं पदमास्थाय मासेनैकेन शुध्यति
Vindhye santapya chatmanam satyasandhastvahinsakah
Shanmasam padamasthaya masenaikena shudhyati
26.47
नर्मदायामुपस्पृश्य तथा सूर्पारकोदके
एकपक्षं निराहारो राजपुत्रो विधीयते
Narmadayamupasprishya tatha surparakodake
Ekapaksham niraharo rajaputro vidhiyate
26.48
जम्बूमार्गे त्रिभिर्मासैः संयतः सुसमाहितः
अहोरात्रेण चैकेन सिद्धिं समधिगच्छति
Jambumarge tribhirmasaih sanyatah susamahitah
Ahoratrena chaikena siddhim samadhigachchhati
26.49
कोकामुखे विगाह्यापो गत्वा चण्डालिकाश्रमम्
शाकभक्षश्चीरवासाः कुमारीर्विन्दते दश
Kokamukhe vigahyapo gatva chandalikashramam
Shakabhakshashchiravasah kumarirvindate dasha
26.50
वैवस्वतस्य सदनं न स गच्छेत्कदाचन
यस्य कन्याह्रदे वासो देवलोकं स गच्छति
Vaivasvatasya sadanam na sa gachchhetkadachana
Yasya kanyahrade vaso devalokam sa gachchhati
26.51
प्रभासे त्वेकरात्रेण अमावास्यां समाहितः
सिध्यतेऽत्र महाबाहो यो नरो जायते पुनः
Prabhase tvekaratrena amavasyam samahitah
Sidhyatetra mahabaho yo naro jayate punah
26.52
उज्जानक उपस्पृश्य आर्ष्टिषेणस्य चाश्रमे
पिङ्गायाश्चाश्रमे स्नात्वा सर्वपापैः प्रमुच्यते
Ujjanaka upasprishya arshtishenasya chashrame
Pingayashchashrame snatva sarvapapaih pramuchyate
26.53
कुल्यायां समुपस्पृश्य जप्त्वा चैवाघमर्षणम्
अश्वमेधमवाप्नोति त्रिरात्रोपोषितः शुचिः
Kulyayam samupasprishya japtva chaivaghamarshanam
Ashvamedhamavapnoti triratroposhitah shuchih
26.54
पिण्डारक उपस्पृश्य एकरात्रोषितो नरः
अग्निष्टोममवाप्नोति प्रभातां शर्वरीं शुचिः
Pindaraka upasprishya ekaratroshito narah
Agnishtomamavapnoti prabhatam sharvarim shuchih
26.55
तथा ब्रह्मसरो गत्वा धर्मारण्योपशोभितम्
पुण्डरीकमवाप्नोति प्रभातां शर्वरीं शुचिः
Tatha brahmasaro gatva dharmaranyopashobhitam
Pundarikamavapnoti prabhatam sharvarim shuchih
26.56
मैनाके पर्वते स्नात्वा तथा संध्यामुपास्य च
कामं जित्वा च वै मासं सर्वमेधफलं लभेत्
Mainake parvate snatva tatha sandhyamupasya cha
Kamam jitva cha vai masam sarvamedhaphalam labhet
26.57
विख्यातो हिमवान्पुण्यः शंकरश्वशुरो गिरिः
आकरः सर्वरत्नानां सिद्धचारणसेवितः
Vikhyato himavanpunyah shankarashvashuro girih
Akarah sarvaratnanam siddhacharanasevitah
26.58
शरीरमुत्सृजेत्तत्र विधिपूर्वमनाशके
अध्रुवं जीवितं ज्ञात्वा यो वै वेदान्तगो द्विजः
Shariramutsrijettatra vidhipurvamanashake
Adhruvam jivitam gyatva yo vai vedantago dvijah
26.59
अभ्यर्च्य देवतास्तत्र नमस्कृत्य मुनींस्तथा
ततः सिद्धो दिवं गच्छेद्ब्रह्मलोकं सनातनम्
Abhyarchya devatastatra namaskritya muninstatha
Tatah siddho divam gachchhedbrahmalokam sanatanam
26.60
कामं क्रोधं च लोभं च यो जित्वा तीर्थमावसेत्
न तेन किंचिन्न प्राप्तं तीर्थाभिगमनाद्भवेत्
Kamam krodham cha lobham cha yo jitva tirthamavaset
Na tena kinchinna praptam tirthabhigamanadbhavet
26.61
यान्यगम्यानि तीर्थानि दुर्गाणि विषमाणि च
मनसा तानि गम्यानि सर्वतीर्थसमासतः
Yanyagamyani tirthani durgani vishamani cha
Manasa tani gamyani sarvatirthasamasatah
26.62
इदं मेध्यमिदं धन्यमिदं स्वर्ग्यमिदं सुखम्
इदं रहस्यं देवानामाप्लाव्यानां च पावनम्
Idam medhyamidam dhanyamidam svargyamidam sukham
Idam rahasyam devanamaplavyanam cha pavanam
26.63
इदं दद्याद्द्विजातीनां साधूनामात्मजस्य वा
सुहृदां च जपेत्कर्णे शिष्यस्यानुगतस्य वा
Idam dadyaddvijatinam sadhunamatmajasya va
Suhridam cha japetkarne shishyasyanugatasya va
26.64
दत्तवान्गौतमस्येदमङ्गिरा वै महातपाः
गुरुभिः समनुज्ञातः काश्यपेन च धीमता
Dattavangautamasyedamangira vai mahatapah
Gurubhih samanugyatah kashyapena cha dhimata
26.65
महर्षीणामिदं जप्यं पावनानां तथोत्तमम्
जपंश्चाभ्युत्थितः शश्वन्निर्मलः स्वर्गमाप्नुयात्
Maharshinamidam japyam pavananam tathottamam
Japanshchabhyutthitah shashvannirmalah svargamapnuyat
26.66
इदं यश्चापि शृणुयाद्रहस्यं त्वङ्गिरोमतम्
उत्तमे च कुले जन्म लभेज्जातिं च संस्मरेत्
Idam yashchapi shrinuyadrahasyam tvangiromatam
Uttame cha kule janma labhejjatim cha sansmaret