UtshovChapter 27
27.1
वैशंपायन उवाच
बृहस्पतिसमं बुद्ध्या क्षमया ब्रह्मणः समम्
पराक्रमे शक्रसममादित्यसमतेजसम्
Vaishampayana uvacha
Brihaspatisamam buddhya kshamaya brahmanah samam
Parakrame shakrasamamadityasamatejasam
27.2
गाङ्गेयमर्जुनेनाजौ निहतं भूरिवर्चसम्
भ्रातृभिः सहितोऽन्यैश्च पर्युपास्ते युधिष्ठिरः
Gangeyamarjunenajau nihatam bhurivarchasam
Bhratribhih sahitonyaishcha paryupaste yudhishthirah
27.3
शयानं वीरशयने कालाकाङ्क्षिणमच्युतम्
आजग्मुर्भरतश्रेष्ठं द्रष्टुकामा महर्षयः
Shayanam virashayane kalakankshinamachyutam
Ajagmurbharatashreshtham drashtukama maharshayah
27.4
अत्रिर्वसिष्ठोऽथ भृगुः पुलस्त्यः पुलहः क्रतुः
अङ्गिरा गौतमोऽगस्त्यः सुमतिः स्वायुरात्मवान्
Atrirvasishthotha bhriguh pulastyah pulahah kratuh
Angira gautamogastyah sumatih svayuratmavan
27.5
विश्वामित्रः स्थूलशिराः संवर्तः प्रमतिर्दमः
उशना बृहस्पतिर्व्यासश्च्यवनः काश्यपो ध्रुवः
Vishvamitrah sthulashirah sanvartah pramatirdamah
Ushana brihaspatirvyasashchyavanah kashyapo dhruvah
27.6
दुर्वासा जमदग्निश्च मार्कण्डेयोऽथ गालवः
भरद्वाजश्च रैभ्यश्च यवक्रीतस्त्रितस्तथा
Durvasa jamadagnishcha markandeyotha galavah
Bharadvajashcha raibhyashcha yavakritastritastatha
27.7
स्थूलाक्षः शकलाक्षश्च कण्वो मेधातिथिः कृशः
नारदः पर्वतश्चैव सुधन्वाथैकतो द्वितः
Sthulakshah shakalakshashcha kanvo medhatithih krishah
Naradah parvatashchaiva sudhanvathaikato dvitah
27.8
नितंभूर्भुवनो धौम्यः शतानन्दोऽकृतव्रणः
जामदग्न्यस्तथा रामः काम्यश्चेत्येवमादयः
समागता महात्मानो भीष्मं द्रष्टुं महर्षयः
Nitambhurbhuvano dhaumyah shatanandokritavranah
Jamadagnyastatha ramah kamyashchetyevamadayah
Samagata mahatmano bhishmam drashtum maharshayah
27.9
तेषां महात्मनां पूजामागतानां युधिष्ठिरः
भ्रातृभिः सहितश्चक्रे यथावदनुपूर्वशः
Tesham mahatmanam pujamagatanam yudhishthirah
Bhratribhih sahitashchakre yathavadanupurvashah
27.10
ते पूजिताः सुखासीनाः कथाश्चक्रुर्महर्षयः
भीष्माश्रिताः सुमधुराः सर्वेन्द्रियमनोहराः
Te pujitah sukhasinah kathashchakrurmaharshayah
Bhishmashritah sumadhurah sarvendriyamanoharah
27.11
भीष्मस्तेषां कथाः श्रुत्वा ऋषीणां भावितात्मनाम्
मेने दिविस्थमात्मानं तुष्ट्या परमया युतः
Bhishmastesham kathah shrutva rishinam bhavitatmanam
Mene divisthamatmanam tushtya paramaya yutah
27.12
ततस्ते भीष्ममामन्त्र्य पाण्डवांश्च महर्षयः
अन्तर्धानं गताः सर्वे सर्वेषामेव पश्यताम्
Tataste bhishmamamantrya pandavanshcha maharshayah
Antardhanam gatah sarve sarveshameva pashyatam
27.13
तानृषीन्सुमहाभागानन्तर्धानगतानपि
पाण्डवास्तुष्टुवुः सर्वे प्रणेमुश्च मुहुर्मुहुः
Tanrishinsumahabhaganantardhanagatanapi
Pandavastushtuvuh sarve pranemushcha muhurmuhuh
27.14
प्रसन्नमनसः सर्वे गाङ्गेयं कुरुसत्तमाः
उपतस्थुर्यथोद्यन्तमादित्यं मन्त्रकोविदाः
Prasannamanasah sarve gangeyam kurusattamah
Upatasthuryathodyantamadityam mantrakovidah
27.15
प्रभावात्तपसस्तेषामृषीणां वीक्ष्य पाण्डवाः
प्रकाशन्तो दिशः सर्वा विस्मयं परमं ययुः
Prabhavattapasasteshamrishinam vikshya pandavah
Prakashanto dishah sarva vismayam paramam yayuh
27.16
महाभाग्यं परं तेषामृषीणामनुचिन्त्य ते
पाण्डवाः सह भीष्मेण कथाश्चक्रुस्तदाश्रयाः
Mahabhagyam param teshamrishinamanuchintya te
Pandavah saha bhishmena kathashchakrustadashrayah
27.17
कथान्ते शिरसा पादौ स्पृष्ट्वा भीष्मस्य पाण्डवः
धर्म्यं धर्मसुतः प्रश्नं पर्यपृच्छद्युधिष्ठिरः
Kathante shirasa padau sprishtva bhishmasya pandavah
Dharmyam dharmasutah prashnam paryaprichchhadyudhishthirah
27.18
के देशाः के जनपदा आश्रमाः के च पर्वताः
प्रकृष्टाः पुण्यतः काश्च ज्ञेया नद्यः पितामह
Ke deshah ke janapada ashramah ke cha parvatah
Prakrishtah punyatah kashcha gyeya nadyah pitamaha
27.19
भीष्म उवाच
अत्राप्युदाहरन्तीममितिहासं पुरातनम्
शिलोञ्छवृत्तेः संवादं सिद्धस्य च युधिष्ठिर
Bhishma uvacha
Atrapyudaharantimamitihasam puratanam
Shilonchhavritteh sanvadam siddhasya cha yudhishthira
27.20
इमां कश्चित्परिक्रम्य पृथिवीं शैलभूषिताम्
असकृद्द्विपदां श्रेष्ठः श्रेष्ठस्य गृहमेधिनः
Imam kashchitparikramya prithivim shailabhushitam
Asakriddvipadam shreshthah shreshthasya grihamedhinah
27.21
शिलवृत्तेर्गृहं प्राप्तः स तेन विधिनार्चितः
कृतकृत्य उपातिष्ठत्सिद्धं तमतिथिं तदा
Shilavrittergriham praptah sa tena vidhinarchitah
Kritakritya upatishthatsiddham tamatithim tada
27.22
तौ समेत्य महात्मानौ सुखासीनौ कथाः शुभाः
चक्रतुर्वेदसंबद्धास्तच्छेषकृतलक्षणाः
Tau sametya mahatmanau sukhasinau kathah shubhah
Chakraturvedasambaddhastachchheshakritalakshanah
27.23
शिलवृत्तिः कथान्ते तु सिद्धमामन्त्र्य यत्नतः
प्रश्नं पप्रच्छ मेधावी यन्मां त्वं परिपृच्छसि
Shilavrittih kathante tu siddhamamantrya yatnatah
Prashnam paprachchha medhavi yanmam tvam pariprichchhasi
27.24
शिलवृत्तिरुवाच
के देशाः के जनपदाः केऽऽश्रमाः के च पर्वताः
प्रकृष्टाः पुण्यतः काश्च ज्ञेया नद्यस्तदुच्यताम्
Shilavrittiruvacha
Ke deshah ke janapadah keshramah ke cha parvatah
Prakrishtah punyatah kashcha gyeya nadyastaduchyatam
27.25
सिद्ध उवाच
ते देशास्ते जनपदास्तेऽऽश्रमास्ते च पर्वताः
येषां भागीरथी गङ्गा मध्येनैति सरिद्वरा
Siddha uvacha
Te deshaste janapadasteshramaste cha parvatah
Yesham bhagirathi ganga madhyenaiti saridvara
27.26
तपसा ब्रह्मचर्येण यज्ञैस्त्यागेन वा पुनः
गतिं तां न लभेज्जन्तुर्गङ्गां संसेव्य यां लभेत्
Tapasa brahmacharyena yagyaistyagena va punah
Gatim tam na labhejjanturgangam sansevya yam labhet
27.27
स्पृष्टानि येषां गाङ्गेयैस्तोयैर्गात्राणि देहिनाम्
न्यस्तानि न पुनस्तेषां त्यागः स्वर्गाद्विधीयते
Sprishtani yesham gangeyaistoyairgatrani dehinam
Nyastani na punastesham tyagah svargadvidhiyate
27.28
सर्वाणि येषां गाङ्गेयैस्तोयैः कृत्यानि देहिनाम्
गां त्यक्त्वा मानवा विप्र दिवि तिष्ठन्ति तेऽचलाः
Sarvani yesham gangeyaistoyaih krityani dehinam
Gam tyaktva manava vipra divi tishthanti techalah
27.29
पूर्वे वयसि कर्माणि कृत्वा पापानि ये नराः
पश्चाद्गङ्गां निषेवन्ते तेऽपि यान्त्युत्तमां गतिम्
Purve vayasi karmani kritva papani ye narah
Pashchadgangam nishevante tepi yantyuttamam gatim
27.30
स्नातानां शुचिभिस्तोयैर्गाङ्गेयैः प्रयतात्मनाम्
व्युष्टिर्भवति या पुंसां न सा क्रतुशतैरपि
Snatanam shuchibhistoyairgangeyaih prayatatmanam
Vyushtirbhavati ya punsam na sa kratushatairapi
27.31
यावदस्थि मनुष्यस्य गङ्गातोयेषु तिष्ठति
तावद्वर्षसहस्राणि स्वर्गं प्राप्य महीयते
Yavadasthi manushyasya gangatoyeshu tishthati
Tavadvarshasahasrani svargam prapya mahiyate
27.32
अपहत्य तमस्तीव्रं यथा भात्युदये रविः
तथापहत्य पाप्मानं भाति गङ्गाजलोक्षितः
Apahatya tamastivram yatha bhatyudaye ravih
Tathapahatya papmanam bhati gangajalokshitah
27.33
विसोमा इव शर्वर्यो विपुष्पास्तरवो यथा
तद्वद्देशा दिशश्चैव हीना गङ्गाजलैः शुभैः
Visoma iva sharvaryo vipushpastaravo yatha
Tadvaddesha dishashchaiva hina gangajalaih shubhaih
27.34
वर्णाश्रमा यथा सर्वे स्वधर्मज्ञानवर्जिताः
क्रतवश्च यथासोमास्तथा गङ्गां विना जगत्
Varnashrama yatha sarve svadharmagyanavarjitah
Kratavashcha yathasomastatha gangam vina jagat
27.35
यथा हीनं नभोऽर्केण भूः शैलैः खं च वायुना
तथा देशा दिशश्चैव गङ्गाहीना न संशयः
Yatha hinam nabhorkena bhuh shailaih kham cha vayuna
Tatha desha dishashchaiva gangahina na sanshayah
27.36
त्रिषु लोकेषु ये केचित्प्राणिनः सर्व एव ते
तर्प्यमाणाः परां तृप्तिं यान्ति गङ्गाजलैः शुभैः
Trishu lokeshu ye kechitpraninah sarva eva te
Tarpyamanah param triptim yanti gangajalaih shubhaih
27.37
यस्तु सूर्येण निष्टप्तं गाङ्गेयं पिबते जलम्
गवां निर्हारनिर्मुक्ताद्यावकात्तद्विशिष्यते
Yastu suryena nishtaptam gangeyam pibate jalam
Gavam nirharanirmuktadyavakattadvishishyate
27.38
इन्दुव्रतसहस्रं तु चरेद्यः कायशोधनम्
पिबेद्यश्चापि गङ्गाम्भः समौ स्यातां न वा समौ
Induvratasahasram tu charedyah kayashodhanam
Pibedyashchapi gangambhah samau syatam na va samau
27.39
तिष्ठेद्युगसहस्रं तु पादेनैकेन यः पुमान्
मासमेकं तु गङ्गायां समौ स्यातां न वा समौ
Tishthedyugasahasram tu padenaikena yah puman
Masamekam tu gangayam samau syatam na va samau
27.40
लम्बेतावाक्शिरा यस्तु युगानामयुतं पुमान्
तिष्ठेद्यथेष्टं यश्चापि गङ्गायां स विशिष्यते
Lambetavakshira yastu yuganamayutam puman
Tishthedyatheshtam yashchapi gangayam sa vishishyate
27.41
अग्नौ प्राप्तं प्रधूयेत यथा तूलं द्विजोत्तम
तथा गङ्गावगाढस्य सर्वं पापं प्रधूयते
Agnau praptam pradhuyeta yatha tulam dvijottama
Tatha gangavagadhasya sarvam papam pradhuyate
27.42
भूतानामिह सर्वेषां दुःखोपहतचेतसाम्
गतिमन्वेषमाणानां न गङ्गासदृशी गतिः
Bhutanamiha sarvesham duhkhopahatachetasam
Gatimanveshamananam na gangasadrishi gatih
27.43
भवन्ति निर्विषाः सर्पा यथा तार्क्ष्यस्य दर्शनात्
गङ्गाया दर्शनात्तद्वत्सर्वपापैः प्रमुच्यते
Bhavanti nirvishah sarpa yatha tarkshyasya darshanat
Gangaya darshanattadvatsarvapapaih pramuchyate
27.44
अप्रतिष्ठाश्च ये केचिदधर्मशरणाश्च ये
तेषां प्रतिष्ठा गङ्गेह शरणं शर्म वर्म च
Apratishthashcha ye kechidadharmasharanashcha ye
Tesham pratishtha gangeha sharanam sharma varma cha
27.45
प्रकृष्टैरशुभैर्ग्रस्ताननेकैः पुरुषाधमान्
पततो नरके गङ्गा संश्रितान्प्रेत्य तारयेत्
Prakrishtairashubhairgrastananekaih purushadhaman
Patato narake ganga sanshritanpretya tarayet
27.46
ते संविभक्ता मुनिभिर्नूनं देवैः सवासवैः
येऽभिगच्छन्ति सततं गङ्गामभिगतां सुरैः
Te sanvibhakta munibhirnunam devaih savasavaih
Yebhigachchhanti satatam gangamabhigatam suraih
27.47
विनयाचारहीनाश्च अशिवाश्च नराधमाः
ते भवन्ति शिवा विप्र ये वै गङ्गां समाश्रिताः
Vinayacharahinashcha ashivashcha naradhamah
Te bhavanti shiva vipra ye vai gangam samashritah
27.48
यथा सुराणाममृतं पितॄणां च यथा स्वधा
सुधा यथा च नागानां तथा गङ्गाजलं नृणाम्
Yatha suranamamritam pitrinam cha yatha svadha
Sudha yatha cha naganam tatha gangajalam nrinam
27.49
उपासते यथा बाला मातरं क्षुधयार्दिताः
श्रेयस्कामास्तथा गङ्गामुपासन्तीह देहिनः
Upasate yatha bala mataram kshudhayarditah
Shreyaskamastatha gangamupasantiha dehinah
27.50
स्वायंभुवं यथा स्थानं सर्वेषां श्रेष्ठमुच्यते
स्नातानां सरितां श्रेष्ठा गङ्गा तद्वदिहोच्यते
Svayambhuvam yatha sthanam sarvesham shreshthamuchyate
Snatanam saritam shreshtha ganga tadvadihochyate
27.51
यथोपजीविनां धेनुर्देवादीनां धरा स्मृता
तथोपजीविनां गङ्गा सर्वप्राणभृतामिह
Yathopajivinam dhenurdevadinam dhara smrita
Tathopajivinam ganga sarvapranabhritamiha
27.52
देवाः सोमार्कसंस्थानि यथा सत्रादिभिर्मखैः
अमृतान्युपजीवन्ति तथा गङ्गाजलं नराः
Devah somarkasansthani yatha satradibhirmakhaih
Amritanyupajivanti tatha gangajalam narah
27.53
जाह्नवीपुलिनोत्थाभिः सिकताभिः समुक्षितः
मन्यते पुरुषोऽऽत्मानं दिविष्ठमिव शोभितम्
Jahnavipulinotthabhih sikatabhih samukshitah
Manyate purushotmanam divishthamiva shobhitam
27.54
जाह्नवीतीरसंभूतां मृदं मूर्ध्ना बिभर्ति यः
बिभर्ति रूपं सोऽर्कस्य तमोनाशात्सुनिर्मलम्
Jahnavitirasambhutam mridam murdhna bibharti yah
Bibharti rupam sorkasya tamonashatsunirmalam
27.55
गङ्गोर्मिभिरथो दिग्धः पुरुषं पवनो यदा
स्पृशते सोऽपि पाप्मानं सद्य एवापमार्जति
Gangormibhiratho digdhah purusham pavano yada
Sprishate sopi papmanam sadya evapamarjati
27.56
व्यसनैरभितप्तस्य नरस्य विनशिष्यतः
गङ्गादर्शनजा प्रीतिर्व्यसनान्यपकर्षति
Vyasanairabhitaptasya narasya vinashishyatah
Gangadarshanaja pritirvyasananyapakarshati
27.57
हंसारावैः कोकरवै रवैरन्यैश्च पक्षिणाम्
पस्पर्ध गङ्गा गन्धर्वान्पुलिनैश्च शिलोच्चयान्
Hansaravaih kokaravai ravairanyaishcha pakshinam
Paspardha ganga gandharvanpulinaishcha shilochchayan
27.58
हंसादिभिः सुबहुभिर्विविधैः पक्षिभिर्वृताम्
गङ्गां गोकुलसंबाधां दृष्ट्वा स्वर्गोऽपि विस्मृतः
Hansadibhih subahubhirvividhaih pakshibhirvritam
Gangam gokulasambadham drishtva svargopi vismritah
27.59
न सा प्रीतिर्दिविष्ठस्य सर्वकामानुपाश्नतः
अभवद्या परा प्रीतिर्गङ्गायाः पुलिने नृणाम्
Na sa pritirdivishthasya sarvakamanupashnatah
Abhavadya para pritirgangayah puline nrinam
27.60
वाङ्मनःकर्मजैर्ग्रस्तः पापैरपि पुमानिह
वीक्ष्य गङ्गां भवेत्पूतस्तत्र मे नास्ति संशयः
Vanmanahkarmajairgrastah papairapi pumaniha
Vikshya gangam bhavetputastatra me nasti sanshayah
27.61
सप्तावरान्सप्त परान्पितॄंस्तेभ्यश्च ये परे
पुमांस्तारयते गङ्गां वीक्ष्य स्पृष्ट्वावगाह्य च
Saptavaransapta paranpitrinstebhyashcha ye pare
Pumanstarayate gangam vikshya sprishtvavagahya cha
27.62
श्रुताभिलषिता दृष्टा स्पृष्टा पीतावगाहिता
गङ्गा तारयते नॄणामुभौ वंशौ विशेषतः
Shrutabhilashita drishta sprishta pitavagahita
Ganga tarayate nrinamubhau vanshau visheshatah
27.63
दर्शनात्स्पर्शनात्पानात्तथा गङ्गेति कीर्तनात्
पुनात्यपुण्यान्पुरुषाञ्शतशोऽथ सहस्रशः
Darshanatsparshanatpanattatha gangeti kirtanat
Punatyapunyanpurushanshatashotha sahasrashah
27.64
य इच्छेत्सफलं जन्म जीवितं श्रुतमेव च
स पितॄंस्तर्पयेद्गङ्गामभिगम्य सुरांस्तथा
Ya ichchhetsaphalam janma jivitam shrutameva cha
Sa pitrinstarpayedgangamabhigamya suranstatha
27.65
न सुतैर्न च वित्तेन कर्मणा न च तत्फलम्
प्राप्नुयात्पुरुषोऽत्यन्तं गङ्गां प्राप्य यदाप्नुयात्
Na sutairna cha vittena karmana na cha tatphalam
Prapnuyatpurushotyantam gangam prapya yadapnuyat
27.66
जात्यन्धैरिह तुल्यास्ते मृतैः पङ्गुभिरेव च
समर्था ये न पश्यन्ति गङ्गां पुण्यजलां शिवाम्
Jatyandhairiha tulyaste mritaih pangubhireva cha
Samartha ye na pashyanti gangam punyajalam shivam
27.67
भूतभव्यभविष्यज्ञैर्महर्षिभिरुपस्थिताम्
देवैः सेन्द्रैश्च को गङ्गां नोपसेवेत मानवः
Bhutabhavyabhavishyagyairmaharshibhirupasthitam
Devaih sendraishcha ko gangam nopaseveta manavah
27.68
वानप्रस्थैर्गृहस्थैश्च यतिभिर्ब्रह्मचारिभिः
विद्यावद्भिः श्रितां गङ्गां पुमान्को नाम नाश्रयेत्
Vanaprasthairgrihasthaishcha yatibhirbrahmacharibhih
Vidyavadbhih shritam gangam pumanko nama nashrayet
27.69
उत्क्रामद्भिश्च यः प्राणैः प्रयतः शिष्टसंमतः
चिन्तयेन्मनसा गङ्गां स गतिं परमां लभेत्
Utkramadbhishcha yah pranaih prayatah shishtasammatah
Chintayenmanasa gangam sa gatim paramam labhet
27.70
न भयेभ्यो भयं तस्य न पापेभ्यो न राजतः
आ देहपतनाद्गङ्गामुपास्ते यः पुमानिह
Na bhayebhyo bhayam tasya na papebhyo na rajatah
A dehapatanadgangamupaste yah pumaniha
27.71
गगनाद्यां महापुण्यां पतन्तीं वै महेश्वरः
दधार शिरसा देवीं तामेव दिवि सेवते
Gaganadyam mahapunyam patantim vai maheshvarah
Dadhara shirasa devim tameva divi sevate
27.72
अलंकृतास्त्रयो लोकाः पथिभिर्विमलैस्त्रिभिः
यस्तु तस्या जलं सेवेत्कृतकृत्यः पुमान्भवेत्
Alankritastrayo lokah pathibhirvimalaistribhih
Yastu tasya jalam sevetkritakrityah pumanbhavet
27.73
दिवि ज्योतिर्यथादित्यः पितॄणां चैव चन्द्रमाः
देवेशश्च यथा नॄणां गङ्गेह सरितां तथा
Divi jyotiryathadityah pitrinam chaiva chandramah
Deveshashcha yatha nrinam gangeha saritam tatha
27.74
मात्रा पित्रा सुतैर्दारैर्वियुक्तस्य धनेन वा
न भवेद्धि तथा दुःखं यथा गङ्गावियोगजम्
Matra pitra sutairdarairviyuktasya dhanena va
Na bhaveddhi tatha duhkham yatha gangaviyogajam
27.75
नारण्यैर्नेष्टविषयैर्न सुतैर्न धनागमैः
तथा प्रसादो भवति गङ्गां वीक्ष्य यथा नृणाम्
Naranyairneshtavishayairna sutairna dhanagamaih
Tatha prasado bhavati gangam vikshya yatha nrinam
27.76
पूर्णमिन्दुं यथा दृष्ट्वा नृणां दृष्टिः प्रसीदति
गङ्गां त्रिपथगां दृष्ट्वा तथा दृष्टिः प्रसीदति
Purnamindum yatha drishtva nrinam drishtih prasidati
Gangam tripathagam drishtva tatha drishtih prasidati
27.77
तद्भावस्तद्गतमनास्तन्निष्ठस्तत्परायणः
गङ्गां योऽनुगतो भक्त्या स तस्याः प्रियतां व्रजेत्
Tadbhavastadgatamanastannishthastatparayanah
Gangam yonugato bhaktya sa tasyah priyatam vrajet
27.78
भूःस्थैः खस्थैर्दिविष्ठैश्च भूतैरुच्चावचैरपि
गङ्गा विगाह्या सततमेतत्कार्यतमं सताम्
Bhuhsthaih khasthairdivishthaishcha bhutairuchchavachairapi
Ganga vigahya satatametatkaryatamam satam
27.79
त्रिषु लोकेषु पुण्यत्वाद्गङ्गायाः प्रथितं यशः
यत्पुत्रान्सगरस्यैषा भस्माख्याननयद्दिवम्
Trishu lokeshu punyatvadgangayah prathitam yashah
Yatputransagarasyaisha bhasmakhyananayaddivam
27.80
वाय्वीरिताभिः सुमहास्वनाभि;र्द्रुताभिरत्यर्थसमुच्छ्रिताभिः
गङ्गोर्मिभिर्भानुमतीभिरिद्धः; सहस्ररश्मिप्रतिमो विभाति
Vayviritabhih sumahasvanabhi;rdrutabhiratyarthasamuchchhritabhih
Gangormibhirbhanumatibhiriddhah; sahasrarashmipratimo vibhati
27.81
पयस्विनीं घृतिनीमत्युदारां; समृद्धिनीं वेगिनीं दुर्विगाह्याम्
गङ्गां गत्वा यैः शरीरं विसृष्टं; गता धीरास्ते विबुधैः समत्वम्
Payasvinim ghritinimatyudaram; samriddhinim veginim durvigahyam
Gangam gatva yaih shariram visrishtam; gata dhiraste vibudhaih samatvam
27.82
अन्धाञ्जडान्द्रव्यहीनांश्च गङ्गा; यशस्विनी बृहती विश्वरूपा
देवैः सेन्द्रैर्मुनिभिर्मानवैश्च; निषेविता सर्वकामैर्युनक्ति
Andhanjadandravyahinanshcha ganga; yashasvini brihati vishvarupa
Devaih sendrairmunibhirmanavaishcha; nishevita sarvakamairyunakti
27.83
ऊर्जावतीं मधुमतीं महापुण्यां त्रिवर्त्मगाम्
त्रिलोकगोप्त्रीं ये गङ्गां संश्रितास्ते दिवं गताः
Urjavatim madhumatim mahapunyam trivartmagam
Trilokagoptrim ye gangam sanshritaste divam gatah
27.84
यो वत्स्यति द्रक्ष्यति वापि मर्त्य;स्तस्मै प्रयच्छन्ति सुखानि देवाः
तद्भाविताः स्पर्शने दर्शने य;स्तस्मै देवा गतिमिष्टां दिशन्ति
Yo vatsyati drakshyati vapi martya;stasmai prayachchhanti sukhani devah
Tadbhavitah sparshane darshane ya;stasmai deva gatimishtam dishanti
27.85
दक्षां पृथ्वीं बृहतीं विप्रकृष्टां; शिवामृतां सुरसां सुप्रसन्नाम्
विभावरीं सर्वभूतप्रतिष्ठां; गङ्गां गता ये त्रिदिवं गतास्ते
Daksham prithvim brihatim viprakrishtam; shivamritam surasam suprasannam
Vibhavarim sarvabhutapratishtham; gangam gata ye tridivam gataste
27.86
ख्यातिर्यस्याः खं दिवं गां च नित्यं; पुरा दिशो विदिशश्चावतस्थे
तस्या जलं सेव्य सरिद्वराया; मर्त्याः सर्वे कृतकृत्या भवन्ति
Khyatiryasyah kham divam gam cha nityam; pura disho vidishashchavatasthe
Tasya jalam sevya saridvaraya; martyah sarve kritakritya bhavanti
27.87
इयं गङ्गेति नियतं प्रतिष्ठा; गुहस्य रुक्मस्य च गर्भयोषा
प्रातस्त्रिमार्गा घृतवहा विपाप्मा; गङ्गावतीर्णा वियतो विश्वतोया
Iyam gangeti niyatam pratishtha; guhasya rukmasya cha garbhayosha
Pratastrimarga ghritavaha vipapma; gangavatirna viyato vishvatoya
27.88
सुतावनीध्रस्य हरस्य भार्या; दिवो भुवश्चापि कक्ष्यानुरूपा
भव्या पृथिव्या भाविनी भाति राज;न्गङ्गा लोकानां पुण्यदा वै त्रयाणाम्
Sutavanidhrasya harasya bharya; divo bhuvashchapi kakshyanurupa
Bhavya prithivya bhavini bhati raja;nganga lokanam punyada vai trayanam
27.89
मधुप्रवाहा घृतरागोद्धृताभि;र्महोर्मिभिः शोभिता ब्राह्मणैश्च
दिवश्च्युता शिरसात्ता भवेन; गङ्गावनीध्रास्त्रिदिवस्य माला
Madhupravaha ghritaragoddhritabhi;rmahormibhih shobhita brahmanaishcha
Divashchyuta shirasatta bhavena; gangavanidhrastridivasya mala
27.90
योनिर्वरिष्ठा विरजा वितन्वी; शुष्मा इरा वारिवहा यशोदा
विश्वावती चाकृतिरिष्टिरिद्धा; गङ्गोक्षितानां भुवनस्य पन्थाः
Yonirvarishtha viraja vitanvi; shushma ira varivaha yashoda
Vishvavati chakritirishtiriddha; gangokshitanam bhuvanasya panthah
27.91
क्षान्त्या मह्या गोपने धारणे च; दीप्त्या कृशानोस्तपनस्य चैव
तुल्या गङ्गा संमता ब्राह्मणानां; गुहस्य ब्रह्मण्यतया च नित्यम्
Kshantya mahya gopane dharane cha; diptya krishanostapanasya chaiva
Tulya ganga sammata brahmananam; guhasya brahmanyataya cha nityam
27.92
ऋषिष्टुतां विष्णुपदीं पुराणीं; सुपुण्यतोयां मनसापि लोके
सर्वात्मना जाह्नवीं ये प्रपन्ना;स्ते ब्रह्मणः सदनं संप्रयाताः
Rishishtutam vishnupadim puranim; supunyatoyam manasapi loke
Sarvatmana jahnavim ye prapanna;ste brahmanah sadanam samprayatah
27.93
लोकानिमान्नयति या जननीव पुत्रा;न्सर्वात्मना सर्वगुणोपपन्ना
स्वस्थानमिष्टमिह ब्राह्ममभीप्समानै;र्गङ्गा सदैवात्मवशैरुपास्या
Lokanimannayati ya jananiva putra;nsarvatmana sarvagunopapanna
Svasthanamishtamiha brahmamabhipsamanai;rganga sadaivatmavashairupasya
27.94
उस्रां जुष्टां मिषतीं विश्वतोया;मिरां वज्रीं रेवतीं भूधराणाम्
शिष्टाश्रयाममृतां ब्रह्मकान्तां; गङ्गां श्रयेदात्मवान्सिद्धिकामः
Usram jushtam mishatim vishvatoya;miram vajrim revatim bhudharanam
Shishtashrayamamritam brahmakantam; gangam shrayedatmavansiddhikamah
27.95
प्रसाद्य देवान्सविभून्समस्ता;न्भगीरथस्तपसोग्रेण गङ्गाम्
गामानयत्तामभिगम्य शश्व;न्पुमान्भयं नेह नामुत्र विद्यात्
Prasadya devansavibhunsamasta;nbhagirathastapasogrena gangam
Gamanayattamabhigamya shashva;npumanbhayam neha namutra vidyat
27.96
उदाहृतः सर्वथा ते गुणानां; मयैकदेशः प्रसमीक्ष्य बुद्ध्या
शक्तिर्न मे काचिदिहास्ति वक्तुं; गुणान्सर्वान्परिमातुं तथैव
Udahritah sarvatha te gunanam; mayaikadeshah prasamikshya buddhya
Shaktirna me kachidihasti vaktum; gunansarvanparimatum tathaiva
27.97
मेरोः समुद्रस्य च सर्वरत्नैः; संख्योपलानामुदकस्य वापि
वक्तुं शक्यं नेह गङ्गाजलानां; गुणाख्यानं परिमातुं तथैव
Meroh samudrasya cha sarvaratnaih; sankhyopalanamudakasya vapi
Vaktum shakyam neha gangajalanam; gunakhyanam parimatum tathaiva
27.98
तस्मादिमान्परया श्रद्धयोक्ता;न्गुणान्सर्वाञ्जाह्नवीजांस्तथैव
भजेद्वाचा मनसा कर्मणा च; भक्त्या युक्तः परया श्रद्दधानः
Tasmadimanparaya shraddhayokta;ngunansarvanjahnavijanstathaiva
Bhajedvacha manasa karmana cha; bhaktya yuktah paraya shraddadhanah
27.99
लोकानिमांस्त्रीन्यशसा वितत्य; सिद्धिं प्राप्य महतीं तां दुरापाम्
गङ्गाकृतानचिरेणैव लोका;न्यथेष्टमिष्टान्विचरिष्यसि त्वम्
Lokanimanstrinyashasa vitatya; siddhim prapya mahatim tam durapam
Gangakritanachirenaiva loka;nyatheshtamishtanvicharishyasi tvam
27.100
तव मम च गुणैर्महानुभावा; जुषतु मतिं सततं स्वधर्मयुक्तैः
अभिगतजनवत्सला हि गङ्गा; भजति युनक्ति सुखैश्च भक्तिमन्तम्
Tava mama cha gunairmahanubhava; jushatu matim satatam svadharmayuktaih
Abhigatajanavatsala hi ganga; bhajati yunakti sukhaishcha bhaktimantam
27.101
भीष्म उवाच
इति परममतिर्गुणाननेका;ञ्शिलरतये त्रिपथानुयोगरूपान्
बहुविधमनुशास्य तथ्यरूपा;न्गगनतलं द्युतिमान्विवेश सिद्धः
Bhishma uvacha
Iti paramamatirgunananeka;nshilarataye tripathanuyogarupan
Bahuvidhamanushasya tathyarupa;ngaganatalam dyutimanvivesha siddhah
27.102
शिलवृत्तिस्तु सिद्धस्य वाक्यैः संबोधितस्तदा
गङ्गामुपास्य विधिवत्सिद्धिं प्राप्तः सुदुर्लभाम्
Shilavrittistu siddhasya vakyaih sambodhitastada
Gangamupasya vidhivatsiddhim praptah sudurlabham
27.103
तस्मात्त्वमपि कौन्तेय भक्त्या परमया युतः
गङ्गामभ्येहि सततं प्राप्स्यसे सिद्धिमुत्तमाम्
Tasmattvamapi kaunteya bhaktya paramaya yutah
Gangamabhyehi satatam prapsyase siddhimuttamam
27.104
वैशंपायन उवाच
श्रुत्वेतिहासं भीष्मोक्तं गङ्गायाः स्तवसंयुतम्
युधिष्ठिरः परां प्रीतिमगच्छद्भ्रातृभिः सह
Vaishampayana uvacha
Shrutvetihasam bhishmoktam gangayah stavasanyutam
Yudhishthirah param pritimagachchhadbhratribhih saha
27.105
इतिहासमिमं पुण्यं शृणुयाद्यः पठेत वा
गङ्गायाः स्तवसंयुक्तं स मुच्येत्सर्वकिल्बिषैः
Itihasamimam punyam shrinuyadyah patheta va
Gangayah stavasanyuktam sa muchyetsarvakilbishaih