Utshovঅধ্যায় 70
70.1
যুধিষ্ঠির উবাচ
দণ্ডনীতিশ্চ রাজা চ সমস্তৌ তাবুভাবপি
কস্য কিং কুর্বতঃ সিদ্ধ্যৈ তন্মে ব্রূহি পিতামহ
70.2
ভীষ্ম উবাচ
মহাভাগ্যং দণ্ডনীত্যাঃ সিদ্ধৈঃ শব্দৈঃ সহেতুকৈঃ
শৃণু মে শংসতো রাজন্যথাবদিহ ভারত
70.3
দণ্ডনীতিঃ স্বধর্মেভ্যশ্চাতুর্বর্ণ্যং নিয়চ্ছতি
প্রয়ুক্তা স্বামিনা সম্যগধর্মেভ্যশ্চ যচ্ছতি
70.4
চাতুর্বর্ণ্যে স্বধর্মস্থে মর্যাদানামসংকরে
দণ্ডনীতিকৃতে ক্ষেমে প্রজানামকুতোভয়ে
70.5
সোমে প্রয়ত্নং কুর্বন্তি ত্রয়ো বর্ণা যথাবিধি
তস্মাদ্দেবমনুষ্যাণাং সুখং বিদ্ধি সমাহিতম্
70.6
কালো বা কারণং রাজ্ঞো রাজা বা কালকারণম্
ইতি তে সংশয়ো মা ভূদ্রাজা কালস্য কারণম্
70.7
দণ্ডনীত্যা যদা রাজা সম্যক্কার্ত্স্ন্যেন বর্ততে
তদা কৃতয়ুগং নাম কালঃ শ্রেষ্ঠঃ প্রবর্ততে
70.8
ভবেত্কৃতয়ুগে ধর্মো নাধর্মো বিদ্যতে ক্বচিৎ
সর্বেষামেব বর্ণানাং নাধর্মে রমতে মনঃ
70.9
যোগক্ষেমাঃ প্রবর্তন্তে প্রজানাং নাত্র সংশয়ঃ
বৈদিকানি চ কর্মাণি ভবন্ত্যবিগুণান্যুত
70.10
ঋতবশ্চ সুখাঃ সর্বে ভবন্ত্যুত নিরাময়াঃ
প্রসীদন্তি নরাণাং চ স্বরবর্ণমনাংসি চ
70.11
ব্যাধয়ো ন ভবন্ত্যত্র নাল্পায়ুর্দৃশ্যতে নরঃ
বিধবা ন ভবন্ত্যত্র নৃশংসো নাভিজায়তে
70.12
অকৃষ্টপচ্যা পৃথিবী ভবন্ত্যোষধয়স্তথা
ত্বক্পত্রফলমূলানি বীর্যবন্তি ভবন্তি চ
70.13
নাধর্মো বিদ্যতে তত্র ধর্ম এব তু কেবলঃ
ইতি কার্তয়ুগানেতান্গুণান্বিদ্ধি যুধিষ্ঠির
70.14
দণ্ডনীত্যা যদা রাজা ত্রীনংশাননুবর্ততে
চতুর্থমংশমুত্সৃজ্য তদা ত্রেতা প্রবর্ততে
70.15
অশুভস্য চতুর্থাংশস্ত্রীনংশাননুবর্ততে
কৃষ্টপচ্যৈব পৃথিবী ভবন্ত্যোষধয়স্তথা
70.16
অর্ধং ত্যক্ত্বা যদা রাজা নীত্যর্ধমনুবর্ততে
ততস্তু দ্বাপরং নাম স কালঃ সংপ্রবর্ততে
70.17
অশুভস্য তদা অর্ধং দ্বাবংশাবনুবর্ততে
কৃষ্টপচ্যৈব পৃথিবী ভবত্যল্পফলা তথা
70.18
দণ্ডনীতিং পরিত্যজ্য যদা কার্ত্স্ন্যেন ভূমিপঃ
প্রজাঃ ক্লিশ্নাত্যয়োগেন প্রবিশ্যতি তদা কলিঃ
70.19
কলাবধর্মো ভূয়িষ্ঠং ধর্মো ভবতি তু ক্বচিৎ
সর্বেষামেব বর্ণানাং স্বধর্মাচ্চ্যবতে মনঃ
70.20
শূদ্রা ভৈক্ষেণ জীবন্তি ব্রাহ্মণাঃ পরিচর্যয়া
যোগক্ষেমস্য নাশশ্চ বর্ততে বর্ণসংকরঃ
70.21
বৈদিকানি চ কর্মাণি ভবন্তি বিগুণান্যুত
ঋতবো নসুখাঃ সর্বে ভবন্ত্যাময়িনস্তথা
70.22
হ্রসন্তি চ মনুষ্যাণাং স্বরবর্ণমনাংস্যুত
ব্যাধয়শ্চ ভবন্ত্যত্র ম্রিয়ন্তে চাগতায়ুষঃ
70.23
বিধবাশ্চ ভবন্ত্যত্র নৃশংসা জায়তে প্রজা
ক্বচিদ্বর্ষতি পর্জন্যঃ ক্বচিত্সস্যং প্ররোহতি
70.24
রসাঃ সর্বে ক্ষয়ং যান্তি যদা নেচ্ছতি ভূমিপঃ
প্রজাঃ সংরক্ষিতুং সম্যগ্দণ্ডনীতিসমাহিতঃ
70.25
রাজা কৃতয়ুগস্রষ্টা ত্রেতায়া দ্বাপরস্য চ
যুগস্য চ চতুর্থস্য রাজা ভবতি কারণম্
70.26
কৃতস্য করণাদ্রাজা স্বর্গমত্যন্তমশ্নুতে
ত্রেতায়াঃ করণাদ্রাজা স্বর্গং নাত্যন্তমশ্নুতে
70.27
প্রবর্তনাদ্দ্বাপরস্য যথাভাগমুপাশ্নুতে
কলেঃ প্রবর্তনাদ্রাজা পাপমত্যন্তমশ্নুতে
70.28
ততো বসতি দুষ্কর্মা নরকে শাশ্বতীঃ সমাঃ
প্রজানাং কল্মষে মগ্নোঽকীর্তিং পাপং চ বিন্দতি
70.29
দণ্ডনীতিং পুরস্কৃত্য বিজানন্ক্ষত্রিয়ঃ সদা
অনবাপ্তং চ লিপ্সেত লব্ধং চ পরিপালয়েৎ
70.30
লোকস্য সীমন্তকরী মর্যাদা লোকভাবনী
সম্যঙ্নীতা দণ্ডনীতির্যথা মাতা যথা পিতা
70.31
যস্যাং ভবন্তি ভূতানি তদ্বিদ্ধি ভরতর্ষভ
এষ এব পরো ধর্মো যদ্রাজা দণ্ডনীতিমান্
70.32
তস্মাত্কৌরব্য ধর্মেণ প্রজাঃ পালয় নীতিমান্
এবংবৃত্তঃ প্রজা রক্ষন্স্বর্গং জেতাসি দুর্জয়ম্