Utshovঅধ্যায় 69
69.1
যুধিষ্ঠির উবাচ
পার্থিবেন বিশেষেণ কিং কার্যমবশিষ্যতে
কথং রক্ষ্যো জনপদঃ কথং রক্ষ্যাশ্চ শত্রবঃ
69.2
কথং চারং প্রয়ুঞ্জীত বর্ণান্বিশ্বাসয়েত্কথম্
কথং ভৃত্যান্কথং দারান্কথং পুত্রাংশ্চ ভারত
69.3
ভীষ্ম উবাচ
রাজবৃত্তং মহারাজ শৃণুষ্বাবহিতোঽখিলম্
যত্কার্যং পার্থিবেনাদৌ পার্থিবপ্রকৃতেন বা
69.4
আত্মা জেয়ঃ সদা রাজ্ঞা ততো জেয়াশ্চ শত্রবঃ
অজিতাত্মা নরপতির্বিজয়েত কথং রিপূন্
69.5
এতাবানাত্মবিজয়ঃ পঞ্চবর্গবিনিগ্রহঃ
জিতেন্দ্রিয়ো নরপতির্বাধিতুং শক্নুয়াদরীন্
69.6
ন্যসেত গুল্মান্দুর্গেষু সংধৌ চ কুরুনন্দন
নগরোপবনে চৈব পুরোদ্যানেষু চৈব হ
69.7
সংস্থানেষু চ সর্বেষু পুরেষু নগরস্য চ
মধ্যে চ নরশার্দূল তথা রাজনিবেশনে
69.8
প্রণিধীংশ্চ ততঃ কুর্যাজ্জডান্ধবধিরাকৃতীন্
পুংসঃ পরীক্ষিতান্প্রাজ্ঞান্ক্ষুত্পিপাসাতপক্ষমান্
69.9
অমাত্যেষু চ সর্বেষু মিত্রেষু ত্রিবিধেষু চ
পুত্রেষু চ মহারাজ প্রণিদধ্যাত্সমাহিতঃ
69.10
পুরে জনপদে চৈব তথা সামন্তরাজসু
যথা ন বিদ্যুরন্যোন্যং প্রণিধেয়াস্তথা হি তে
69.11
চারাংশ্চ বিদ্যাত্প্রহিতান্পরেণ ভরতর্ষভ
আপণেষু বিহারেষু সমবায়েষু ভিক্ষুষু
69.12
আরামেষু তথোদ্যানে পণ্ডিতানাং সমাগমে
বেশেষু চত্বরে চৈব সভাস্বাবসথেষু চ
69.13
এবং বিহন্যাচ্চারেণ পরচারং বিচক্ষণঃ
চারেণ বিহতং সর্বং হতং ভবতি পাণ্ডব
69.14
যদা তু হীনং নৃপতির্বিদ্যাদাত্মানমাত্মনা
অমাত্যৈঃ সহ সংমন্ত্র্য কুর্যাত্সংধিং বলীয়সা
69.15
অজ্ঞায়মানো হীনত্বে কুর্যাত্সংধিং পরেণ বৈ
লিপ্সুর্বা কংচিদেবার্থং ত্বরমাণো বিচক্ষণঃ
69.16
গুণবন্তো মহোত্সাহা ধর্মজ্ঞাঃ সাধবশ্চ যে
সংদধীত নৃপস্তৈশ্চ রাষ্ট্রং ধর্মেণ পালয়ন্
69.17
উচ্ছিদ্যমানমাত্মানং জ্ঞাত্বা রাজা মহামতিঃ
পূর্বাপকারিণো হন্যাল্লোকদ্বিষ্টাংশ্চ সর্বশঃ
69.18
যো নোপকর্তুং শক্নোতি নাপকর্তুং মহীপতিঃ
অশক্যরূপশ্চোদ্ধর্তুমুপেক্ষ্যস্তাদৃশো ভবেৎ
69.19
যাত্রাং যায়াদবিজ্ঞাতমনাক্রন্দমনন্তরম্
ব্যাসক্তং চ প্রমত্তং চ দুর্বলং চ বিচক্ষণঃ
69.20
যাত্রামাজ্ঞাপয়েদ্বীরঃ কল্যপুষ্টবলঃ সুখী
পূর্বং কৃত্বা বিধানং চ যাত্রায়াং নগরে তথা
69.21
ন চ বশ্যো ভবেদস্য নৃপো যদ্যপি বীর্যবান্
হীনশ্চ বলবীর্যাভ্যাং কর্শয়ংস্তং পরাবসেৎ
69.22
রাষ্ট্রং চ পীডয়েত্তস্য শস্ত্রাগ্নিবিষমূর্ছনৈঃ
অমাত্যবল্লভানাং চ বিবাদাংস্তস্য কারয়েৎ
বর্জনীয়ং সদা যুদ্ধং রাজ্যকামেন ধীমতা
69.23
উপায়ৈস্ত্রিভিরাদানমর্থস্যাহ বৃহস্পতিঃ
সান্ত্বেনানুপ্রদানেন ভেদেন চ নরাধিপ
যমর্থং শক্নুয়াত্প্রাপ্তুং তেন তুষ্যেদ্ধি পণ্ডিতঃ
69.24
আদদীত বলিং চৈব প্রজাভ্যঃ কুরুনন্দন
ষড্ভাগমমিতপ্রজ্ঞস্তাসামেবাভিগুপ্তয়ে
69.25
দশধর্মগতেভ্যো যদ্বসু বহ্বল্পমেব চ
তন্নাদদীত সহসা পৌরাণাং রক্ষণায় বৈ
69.26
যথা পুত্রাস্তথা পৌরা দ্রষ্টব্যাস্তে ন সংশয়ঃ
ভক্তিশ্চৈষাং প্রকর্তব্যা ব্যবহারে প্রদর্শিতে
69.27
সুতং চ স্থাপয়েদ্রাজা প্রাজ্ঞং সর্বার্থদর্শিনম্
ব্যবহারেষু সততং তত্র রাজ্যং ব্যবস্থিতম্
69.28
আকরে লবণে শুল্কে তরে নাগবনে তথা
ন্যসেদমাত্যান্নৃপতিঃ স্বাপ্তান্বা পুরুষান্হিতান্
69.29
সম্যগ্দণ্ডধরো নিত্যং রাজা ধর্মমবাপ্নুয়াৎ
নৃপস্য সততং দণ্ডঃ সম্যগ্ধর্মে প্রশস্যতে
69.30
বেদবেদাঙ্গবিত্প্রাজ্ঞঃ সুতপস্বী নৃপো ভবেৎ
দানশীলশ্চ সততং যজ্ঞশীলশ্চ ভারত
69.31
এতে গুণাঃ সমস্তাঃ স্যুর্নৃপস্য সততং স্থিরাঃ
ক্রিয়ালোপে তু নৃপতেঃ কুতঃ স্বর্গঃ কুতো যশঃ
69.32
যদা তু পীডিতো রাজা ভবেদ্রাজ্ঞা বলীয়সা
ত্রিধা ত্বাক্রন্দ্য মিত্রাণি বিধানমুপকল্পয়েৎ
69.33
ঘোষান্ন্যসেত মার্গেষু গ্রামানুত্থাপয়েদপি
প্রবেশয়েচ্চ তান্সর্বাঞ্শাখানগরকেষ্বপি
69.34
যে গুপ্তাশ্চৈব দুর্গাশ্চ দেশাস্তেষু প্রবেশয়েৎ
ধনিনো বলমুখ্যাংশ্চ সান্ত্বয়িত্বা পুনঃ পুনঃ
69.35
সস্যাভিহারং কুর্যাচ্চ স্বয়মেব নরাধিপঃ
অসংভবে প্রবেশস্য দাহয়েদগ্নিনা ভৃশম্
69.36
ক্ষেত্রস্থেষু চ সস্যেষু শত্রোরুপজপেন্নরান্
বিনাশয়েদ্বা সর্বস্বং বলেনাথ স্বকেন বৈ
69.37
নদীষু মার্গেষু সদা সংক্রমানবসাদয়েৎ
জলং নিস্রাবয়েত্সর্বমনিস্রাব্যং চ দূষয়েৎ
69.38
তদাত্বেনায়তীভিশ্চ বিবদন্ভূম্যনন্তরম্
প্রতীঘাতঃ পরস্যাজৌ মিত্রকালেঽপ্যুপস্থিতে
69.39
দুর্গাণাং চাভিতো রাজা মূলচ্ছেদং প্রকারয়েৎ
সর্বেষাং ক্ষুদ্রবৃক্ষাণাং চৈত্যবৃক্ষান্বিবর্জয়েৎ
69.40
প্রবৃদ্ধানাং চ বৃক্ষাণাং শাখাঃ প্রচ্ছেদয়েত্তথা
চৈত্যানাং সর্বথা বর্জ্যমপি পত্রস্য পাতনম্
69.41
প্রকণ্ঠীঃ কারয়েত্সম্যগাকাশজননীস্তথা
আপূরয়েচ্চ পরিখাঃ স্থাণুনক্রঝষাকুলাঃ
69.42
কডঙ্গদ্বারকাণি স্যুরুচ্ছ্বাসার্থে পুরস্য হ
তেষাং চ দ্বারবদ্গুপ্তিঃ কার্যা সর্বাত্মনা ভবেৎ
69.43
দ্বারেষু চ গুরূণ্যেব যন্ত্রাণি স্থাপয়েত্সদা
আরোপয়েচ্ছতঘ্নীশ্চ স্বাধীনানি চ কারয়েৎ
69.44
কাষ্ঠানি চাভিহার্যাণি তথা কূপাংশ্চ খানয়েৎ
সংশোধয়েত্তথা কূপান্কৃতান্পূর্বং পয়োর্থিভিঃ
69.45
তৃণচ্ছন্নানি বেশ্মানি পঙ্কেনাপি প্রলেপয়েৎ
নির্হরেচ্চ তৃণং মাসে চৈত্রে বহ্নিভয়াত্পুরঃ
69.46
নক্তমেব চ ভক্তানি পাচয়েত নরাধিপঃ
ন দিবাগ্নির্জ্বলেদ্গেহে বর্জয়িত্বাগ্নিহোত্রিকম্
69.47
কর্মারারিষ্টশালাসু জ্বলেদগ্নিঃ সমাহিতঃ
গৃহাণি চ প্রবিশ্যাথ বিধেয়ঃ স্যাদ্ধুতাশনঃ
69.48
মহাদণ্ডশ্চ তস্য স্যাদ্যস্যাগ্নির্বৈ দিবা ভবেৎ
প্রঘোষয়েদথৈবং চ রক্ষণার্থং পুরস্য বৈ
69.49
ভিক্ষুকাংশ্চাক্রিকাংশ্চৈব ক্ষীবোন্মত্তান্কুশীলবান্
বাহ্যান্কুর্যান্নরশ্রেষ্ঠ দোষায় স্যুর্হি তেঽন্যথা
69.50
চত্বরেষু চ তীর্থেষু সভাস্বাবসথেষু চ
যথার্হবর্ণং প্রণিধিং কুর্যাত্সর্বত্র পার্থিবঃ
69.51
বিশালান্রাজমার্গাংশ্চ কারয়েত নরাধিপঃ
প্রপাশ্চ বিপণীশ্চৈব যথোদ্দেশং সমাদিশেৎ
69.52
ভাণ্ডাগারায়ুধাগারান্ধান্যাগারাংশ্চ সর্বশঃ
অশ্বাগারান্গজাগারান্বলাধিকরণানি চ
69.53
পরিখাশ্চৈব কৌরব্য প্রতোলীঃ সংকটানি চ
ন জাতু কশ্চিত্পশ্যেত্তু গুহ্যমেতদ্যুধিষ্ঠির
69.54
অথ সংনিচয়ং কুর্যাদ্রাজা পরবলার্দিতঃ
তৈলং মধু ঘৃতং সস্যমৌষধানি চ সর্বশঃ
69.55
অঙ্গারকুশমুঞ্জানাং পলাশশরপর্ণিনাম্
যবসেন্ধনদিগ্ধানাং কারয়েত চ সংচয়ান্
69.56
আয়ুধানাং চ সর্বেষাং শক্ত্যৃষ্টিপ্রাসবর্মণাম্
সংচয়ানেবমাদীনাং কারয়েত নরাধিপঃ
69.57
ঔষধানি চ সর্বাণি মূলানি চ ফলানি চ
চতুর্বিধাংশ্চ বৈদ্যান্বৈ সংগৃহ্ণীয়াদ্বিশেষতঃ
69.58
নটাশ্চ নর্তকাশ্চৈব মল্লা মায়াবিনস্তথা
শোভয়েয়ুঃ পুরবরং মোদয়েয়ুশ্চ সর্বশঃ
69.59
যতঃ শঙ্কা ভবেচ্চাপি ভৃত্যতো বাপি মন্ত্রিতঃ
পৌরেভ্যো নৃপতের্বাপি স্বাধীনান্কারয়েত তান্
69.60
কৃতে কর্মণি রাজেন্দ্র পূজয়েদ্ধনসংচয়ৈঃ
মানেন চ যথার্হেণ সান্ত্বেন বিবিধেন চ
69.61
নির্বেদয়িত্বা তু পরং হত্বা বা কুরুনন্দন
গতানৃণ্যো ভবেদ্রাজা যথা শাস্ত্রেষু দর্শিতম্
69.62
রাজ্ঞা সপ্তৈব রক্ষ্যাণি তানি চাপি নিবোধ মে
আত্মামাত্যশ্চ কোশশ্চ দণ্ডো মিত্রাণি চৈব হি
69.63
তথা জনপদশ্চৈব পুরং চ কুরুনন্দন
এতত্সপ্তাত্মকং রাজ্যং পরিপাল্যং প্রয়ত্নতঃ
69.64
ষাড্গুণ্যং চ ত্রিবর্গং চ ত্রিবর্গমপরং তথা
যো বেত্তি পুরুষব্যাঘ্র স ভুনক্তি মহীমিমাম্
69.65
ষাড্গুণ্যমিতি যত্প্রোক্তং তন্নিবোধ যুধিষ্ঠির
সংধায়াসনমিত্যেব যাত্রাসংধানমেব চ
69.66
বিগৃহ্যাসনমিত্যেব যাত্রাং সংপরিগৃহ্য চ
দ্বৈধীভাবস্তথান্যেষাং সংশ্রয়োঽথ পরস্য চ
69.67
ত্রিবর্গশ্চাপি যঃ প্রোক্তস্তমিহৈকমনাঃ শৃণু
ক্ষয়ঃ স্থানং চ বৃদ্ধিশ্চ ত্রিবর্গমপরং তথা
69.68
ধর্মশ্চার্থশ্চ কামশ্চ সেবিতব্যোঽথ কালতঃ
ধর্মেণ হি মহীপালশ্চিরং পালয়তে মহীম্
69.69
অস্মিন্নর্থে চ যৌ শ্লোকৌ গীতাবঙ্গিরসা স্বয়ম্
যাদবীপুত্র ভদ্রং তে শ্রোতুমর্হসি তাবপি
69.70
কৃত্বা সর্বাণি কার্যাণি সম্যক্সংপাল্য মেদিনীম্
পালয়িত্বা তথা পৌরান্পরত্র সুখমেধতে
69.71
কিং তস্য তপসা রাজ্ঞঃ কিং চ তস্যাধ্বরৈরপি
অপালিতাঃ প্রজা যস্য সর্বা ধর্মবিনাকৃতাঃ