Utshovঅধ্যায় 68
68.1
যুধিষ্ঠির উবাচ
কিমাহুর্দৈবতং বিপ্রা রাজানং ভরতর্ষভ
মনুষ্যাণামধিপতিং তন্মে ব্রূহি পিতামহ
68.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
বৃহস্পতিং বসুমনা যথা পপ্রচ্ছ ভারত
68.3
রাজা বসুমনা নাম কৌসল্যো ধীমতাং বরঃ
মহর্ষিং পরিপপ্রচ্ছ কৃতপ্রজ্ঞো বৃহস্পতিম্
68.4
সর্বং বৈনয়িকং কৃত্বা বিনয়জ্ঞো বৃহস্পতেঃ
দক্ষিণানন্তরো ভূত্বা প্রণম্য বিধিপূর্বকম্
68.5
বিধিং পপ্রচ্ছ রাজ্যস্য সর্বভূতহিতে রতঃ
প্রজানাং হিতমন্বিচ্ছন্ধর্মমূলং বিশাং পতে
68.6
কেন ভূতানি বর্ধন্তে ক্ষয়ং গচ্ছন্তি কেন চ
কমর্চন্তো মহাপ্রাজ্ঞ সুখমত্যন্তমাপ্নুয়ুঃ
68.7
ইতি পৃষ্টো মহারাজ্ঞা কৌসল্যেনামিতৌজসা
রাজসত্কারমব্যগ্রঃ শশংসাস্মৈ বৃহস্পতিঃ
68.8
রাজমূলো মহারাজ ধর্মো লোকস্য লক্ষ্যতে
প্রজা রাজভয়াদেব ন খাদন্তি পরস্পরম্
68.9
রাজা হ্যেবাখিলং লোকং সমুদীর্ণং সমুত্সুকম্
প্রসাদয়তি ধর্মেণ প্রসাদ্য চ বিরাজতে
68.10
যথা হ্যনুদয়ে রাজন্ভূতানি শশিসূর্যয়োঃ
অন্ধে তমসি মজ্জেয়ুরপশ্যন্তঃ পরস্পরম্
68.11
যথা হ্যনুদকে মত্স্যা নিরাক্রন্দে বিহংগমাঃ
বিহরেয়ুর্যথাকামমভিসৃত্য পুনঃ পুনঃ
68.12
বিমথ্যাতিক্রমেরংশ্চ বিষহ্যাপি পরস্পরম্
অভাবমচিরেণৈব গচ্ছেয়ুর্নাত্র সংশয়ঃ
68.13
এবমেব বিনা রাজ্ঞা বিনশ্যেয়ুরিমাঃ প্রজাঃ
অন্ধে তমসি মজ্জেয়ুরগোপাঃ পশবো যথা
68.14
হরেয়ুর্বলবন্তো হি দুর্বলানাং পরিগ্রহান্
হন্যুর্ব্যায়চ্ছমানাংশ্চ যদি রাজা ন পালয়েৎ
68.15
যানং বস্ত্রমলংকারান্রত্নানি বিবিধানি চ
হরেয়ুঃ সহসা পাপা যদি রাজা ন পালয়েৎ
68.16
মমেদমিতি লোকেঽস্মিন্ন ভবেত্সংপরিগ্রহঃ
বিশ্বলোপঃ প্রবর্তেত যদি রাজা ন পালয়েৎ
68.17
মাতরং পিতরং বৃদ্ধমাচার্যমতিথিং গুরুম্
ক্লিশ্নীয়ুরপি হিংস্যুর্বা যদি রাজা ন পালয়েৎ
68.18
পতেদ্বহুবিধং শস্ত্রং বহুধা ধর্মচারিষু
অধর্মঃ প্রগৃহীতঃ স্যাদ্যদি রাজা ন পালয়েৎ
68.19
বধবন্ধপরিক্লেশো নিত্যমর্থবতাং ভবেৎ
মমত্বং চ ন বিন্দেয়ুর্যদি রাজা ন পালয়েৎ
68.20
অন্তশ্চাকাশমেব স্যাল্লোকোঽয়ং দস্যুসাদ্ভবেৎ
পতেচ্চ নরকং ঘোরং যদি রাজা ন পালয়েৎ
68.21
ন যোনিপোষো বর্তেত ন কৃষির্ন বণিক্পথঃ
মজ্জেদ্ধর্মস্ত্রয়ী ন স্যাদ্যদি রাজা ন পালয়েৎ
68.22
ন যজ্ঞাঃ সংপ্রবর্তেরন্বিধিবত্স্বাপ্তদক্ষিণাঃ
ন বিবাহাঃ সমাজা বা যদি রাজা ন পালয়েৎ
68.23
ন বৃষাঃ সংপ্রবর্তেরন্ন মথ্যেরংশ্চ গর্গরাঃ
ঘোষাঃ প্রণাশং গচ্ছেয়ুর্যদি রাজা ন পালয়েৎ
68.24
ত্রস্তমুদ্বিগ্নহৃদয়ং হাহাভূতমচেতনম্
ক্ষণেন বিনশেত্সর্বং যদি রাজা ন পালয়েৎ
68.25
ন সংবত্সরসত্রাণি তিষ্ঠেয়ুরকুতোভয়াঃ
বিধিবদ্দক্ষিণাবন্তি যদি রাজা ন পালয়েৎ
68.26
ব্রাহ্মণাশ্চতুরো বেদান্নাধীয়েরংস্তপস্বিনঃ
বিদ্যাস্নাতাস্তপঃস্নাতা যদি রাজা ন পালয়েৎ
68.27
হস্তো হস্তং স মুষ্ণীয়াদ্ভিদ্যেরন্সর্বসেতবঃ
ভয়ার্তং বিদ্রবেত্সর্বং যদি রাজা ন পালয়েৎ
68.28
ন লভেদ্ধর্মসংশ্লেষং হতবিপ্রহতো জনঃ
কর্তা স্বেচ্ছেন্দ্রিয়ো গচ্ছেদ্যদি রাজা ন পালয়েৎ
68.29
অনয়াঃ সংপ্রবর্তেরন্ভবেদ্বৈ বর্ণসংকরঃ
দুর্ভিক্ষমাবিশেদ্রাষ্ট্রং যদি রাজা ন পালয়েৎ
68.30
বিবৃত্য হি যথাকামং গৃহদ্বারাণি শেরতে
মনুষ্যা রক্ষিতা রাজ্ঞা সমন্তাদকুতোভয়াঃ
68.31
নাক্রুষ্টং সহতে কশ্চিত্কুতো হস্তস্য লঙ্ঘনম্
যদি রাজা মনুষ্যেষু ত্রাতা ভবতি ধার্মিকঃ
68.32
স্ত্রিয়শ্চাপুরুষা মার্গং সর্বালংকারভূষিতাঃ
নির্ভয়াঃ প্রতিপদ্যন্তে যদা রক্ষতি ভূমিপঃ
68.33
ধর্মমেব প্রপদ্যন্তে ন হিংসন্তি পরস্পরম্
অনুগৃহ্ণন্তি চান্যোন্যং যদা রক্ষতি ভূমিপঃ
68.34
যজন্তে চ ত্রয়ো বর্ণা মহায়জ্ঞৈঃ পৃথগ্বিধৈঃ
যুক্তাশ্চাধীয়তে শাস্ত্রং যদা রক্ষতি ভূমিপঃ
68.35
বার্তামূলো হ্যয়ং লোকস্ত্রয্যা বৈ ধার্যতে সদা
তত্সর্বং বর্ততে সম্যগ্যদা রক্ষতি ভূমিপঃ
68.36
যদা রাজা ধুরং শ্রেষ্ঠামাদায় বহতি প্রজাঃ
মহতা বলয়োগেন তদা লোকঃ প্রসীদতি
68.37
যস্যাভাবে চ ভূতানামভাবঃ স্যাত্সমন্ততঃ
ভাবে চ ভাবো নিত্যঃ স্যাত্কস্তং ন প্রতিপূজয়েৎ
68.38
তস্য যো বহতে ভারং সর্বলোকসুখাবহম্
তিষ্ঠেত্প্রিয়হিতে রাজ্ঞ উভৌ লোকৌ হি যো জয়েৎ
68.39
যস্তস্য পুরুষঃ পাপং মনসাপ্যনুচিন্তয়েৎ
অসংশয়মিহ ক্লিষ্টঃ প্রেত্যাপি নরকং পতেৎ
68.40
ন হি জাত্ববমন্তব্যো মনুষ্য ইতি ভূমিপঃ
মহতী দেবতা হ্যেষা নররূপেণ তিষ্ঠতি
68.41
কুরুতে পঞ্চ রূপাণি কালয়ুক্তানি যঃ সদা
ভবত্যগ্নিস্তথাদিত্যো মৃত্যুর্বৈশ্রবণো যমঃ
68.42
যদা হ্যাসীদতঃ পাপান্দহত্যুগ্রেণ তেজসা
মিথ্যোপচরিতো রাজা তদা ভবতি পাবকঃ
68.43
যদা পশ্যতি চারেণ সর্বভূতানি ভূমিপঃ
ক্ষেমং চ কৃত্বা ব্রজতি তদা ভবতি ভাস্করঃ
68.44
অশুচীংশ্চ যদা ক্রুদ্ধঃ ক্ষিণোতি শতশো নরান্
সপুত্রপৌত্রান্সামাত্যাংস্তদা ভবতি সোঽন্তকঃ
68.45
যদা ত্বধার্মিকান্সর্বাংস্তীক্ষ্ণৈর্দণ্ডৈর্নিয়চ্ছতি
ধার্মিকাংশ্চানুগৃহ্ণাতি ভবত্যথ যমস্তদা
68.46
যদা তু ধনধারাভিস্তর্পয়ত্যুপকারিণঃ
আচ্ছিনত্তি চ রত্নানি বিবিধান্যপকারিণাম্
68.47
শ্রিয়ং দদাতি কস্মৈচিত্কস্মাচ্চিদপকর্ষতি
তদা বৈশ্রবণো রাজঁল্লোকে ভবতি ভূমিপঃ
68.48
নাস্যাপবাদে স্থাতব্যং দক্ষেণাক্লিষ্টকর্মণা
ধর্ম্যমাকাঙ্ক্ষতা লাভমীশ্বরস্যানসূয়তা
68.49
ন হি রাজ্ঞঃ প্রতীপানি কুর্বন্সুখমবাপ্নুয়াৎ
পুত্রো ভ্রাতা বয়স্যো বা যদ্যপ্যাত্মসমো ভবেৎ
68.50
কুর্যাত্কৃষ্ণগতিঃ শেষং জ্বলিতোঽনিলসারথিঃ
ন তু রাজ্ঞাভিপন্নস্য শেষং ক্বচন বিদ্যতে
68.51
তস্য সর্বাণি রক্ষ্যাণি দূরতঃ পরিবর্জয়েৎ
মৃত্যোরিব জুগুপ্সেত রাজস্বহরণান্নরঃ
68.52
নশ্যেদভিমৃশন্সদ্যো মৃগঃ কূটমিব স্পৃশন্
আত্মস্বমিব সংরক্ষেদ্রাজস্বমিহ বুদ্ধিমান্
68.53
মহান্তং নরকং ঘোরমপ্রতিষ্ঠমচেতসঃ
পতন্তি চিররাত্রায় রাজবিত্তাপহারিণঃ
68.54
রাজা ভোজো বিরাট্সম্রাট্ক্ষত্রিয়ো ভূপতির্নৃপঃ
য এবং স্তূয়তে শব্দৈঃ কস্তং নার্চিতুমিচ্ছতি
68.55
তস্মাদ্বুভূষুর্নিয়তো জিতাত্মা সংয়তেন্দ্রিয়ঃ
মেধাবী স্মৃতিমান্দক্ষঃ সংশ্রয়েত মহীপতিম্
68.56
কৃতজ্ঞং প্রাজ্ঞমক্ষুদ্রং দৃঢভক্তিং জিতেন্দ্রিয়ম্
ধর্মনিত্যং স্থিতং স্থিত্যাং মন্ত্রিণং পূজয়েন্নৃপঃ
68.57
দৃঢভক্তিং কৃতপ্রজ্ঞং ধর্মজ্ঞং সংয়তেন্দ্রিয়ম্
শূরমক্ষুদ্রকর্মাণং নিষিদ্ধজনমাশ্রয়েৎ
68.58
রাজা প্রগল্ভং পুরুষং করোতি; রাজা কৃশং বৃংহয়তে মনুষ্যম্
রাজাভিপন্নস্য কুতঃ সুখানি; রাজাভ্যুপেতং সুখিনং করোতি
68.59
রাজা প্রজানাং হৃদয়ং গরীয়ো; গতিঃ প্রতিষ্ঠা সুখমুত্তমং চ
যমাশ্রিতা লোকমিমং পরং চ; জয়ন্তি সম্যক্পুরুষা নরেন্দ্রম্
68.60
নরাধিপশ্চাপ্যনুশিষ্য মেদিনীং; দমেন সত্যেন চ সৌহৃদেন
মহদ্ভিরিষ্ট্বা ক্রতুভির্মহায়শা;স্ত্রিবিষ্টপে স্থানমুপৈতি সত্কৃতম্
68.61
স এবমুক্তো গুরুণা কৌসল্যো রাজসত্তমঃ
প্রয়ত্নাত্কৃতবান্বীরঃ প্রজানাং পরিপালনম্