Utshovঅধ্যায় 67
67.1
যুধিষ্ঠির উবাচ
চাতুরাশ্রম্য উক্তোঽত্র চাতুর্বর্ণ্যস্তথৈব চ
রাষ্ট্রস্য যত্কৃত্যতমং তন্মে ব্রূহি পিতামহ
67.2
ভীষ্ম উবাচ
রাষ্ট্রস্যৈতত্কৃত্যতমং রাজ্ঞ এবাভিষেচনম্
অনিন্দ্রমবলং রাষ্ট্রং দস্যবোঽভিভবন্তি চ
67.3
অরাজকেষু রাষ্ট্রেষু ধর্মো ন ব্যবতিষ্ঠতে
পরস্পরং চ খাদন্তি সর্বথা ধিগরাজকম্
67.4
ইন্দ্রমেনং প্রবৃণুতে যদ্রাজানমিতি শ্রুতিঃ
যথৈবেন্দ্রস্তথা রাজা সংপূজ্যো ভূতিমিচ্ছতা
67.5
নারাজকেষু রাষ্ট্রেষু বস্তব্যমিতি বৈদিকম্
নারাজকেষু রাষ্ট্রেষু হব্যমগ্নির্বহত্যপি
67.6
অথ চেদভিবর্তেত রাজ্যার্থী বলবত্তরঃ
অরাজকানি রাষ্ট্রাণি হতরাজানি বা পুনঃ
67.7
প্রত্যুদ্গম্যাভিপূজ্যঃ স্যাদেতদত্র সুমন্ত্রিতম্
ন হি পাপাত্পাপতরমস্তি কিংচিদরাজকাৎ
67.8
স চেত্সমনুপশ্যেত সমগ্রং কুশলং ভবেৎ
বলবান্হি প্রকুপিতঃ কুর্যান্নিঃশেষতামপি
67.9
ভূয়াংসং লভতে ক্লেশং যা গৌর্ভবতি দুর্দুহা
সুদুহা যা তু ভবতি নৈব তাং ক্লেশয়ন্ত্যুত
67.10
যদতপ্তং প্রণমতি ন তত্সংতাপয়ন্ত্যুত
যচ্চ স্বয়ং নতং দারু ন তত্সংনাময়ন্ত্যপি
67.11
এতয়োপময়া ধীরঃ সংনমেত বলীয়সে
ইন্দ্রায় স প্রণমতে নমতে যো বলীয়সে
67.12
তস্মাদ্রাজৈব কর্তব্যঃ সততং ভূতিমিচ্ছতা
ন ধনার্থো ন দারার্থস্তেষাং যেষামরাজকম্
67.13
প্রীয়তে হি হরন্পাপঃ পরবিত্তমরাজকে
যদাস্য উদ্ধরন্ত্যন্যে তদা রাজানমিচ্ছতি
67.14
পাপা অপি তদা ক্ষেমং ন লভন্তে কদাচন
একস্য হি দ্বৌ হরতো দ্বয়োশ্চ বহবোঽপরে
67.15
অদাসঃ ক্রিয়তে দাসো হ্রিয়ন্তে চ বলাত্স্ত্রিয়ঃ
এতস্মাত্কারণাদ্দেবাঃ প্রজাপালান্প্রচক্রিরে
67.16
রাজা চেন্ন ভবেল্লোকে পৃথিব্যাং দণ্ডধারকঃ
শূলে মত্স্যানিবাপক্ষ্যন্দুর্বলান্বলবত্তরাঃ
67.17
অরাজকাঃ প্রজাঃ পূর্বং বিনেশুরিতি নঃ শ্রুতম্
পরস্পরং ভক্ষয়ন্তো মত্স্যা ইব জলে কৃশান্
67.18
তাঃ সমেত্য ততশ্চক্রুঃ সময়ানিতি নঃ শ্রুতম্
বাক্ক্রূরো দণ্ডপুরুষো যশ্চ স্যাত্পারদারিকঃ
যশ্চ ন স্বমথাদদ্যাত্ত্যাজ্যা নস্তাদৃশা ইতি
67.19
বিশ্বাসনার্থং বর্ণানাং সর্বেষামবিশেষতঃ
তাস্তথা সময়ং কৃত্বা সময়ে নাবতস্থিরে
67.20
সহিতাস্তাস্তদা জগ্মুরসুখার্তাঃ পিতামহম্
অনীশ্বরা বিনশ্যামো ভগবন্নীশ্বরং দিশ
67.21
যং পূজয়েম সংভূয় যশ্চ নঃ পরিপালয়েৎ
তাভ্যো মনুং ব্যাদিদেশ মনুর্নাভিননন্দ তাঃ
67.22
মনুরুবাচ
বিভেমি কর্মণঃ ক্রূরাদ্রাজ্যং হি ভৃশদুষ্করম্
বিশেষতো মনুষ্যেষু মিথ্যাবৃত্তিষু নিত্যদা
67.23
ভীষ্ম উবাচ
তমব্রুবন্প্রজা মা ভৈঃ কর্মণৈনো গমিষ্যতি
পশূনামধিপঞ্চাশদ্ধিরণ্যস্য তথৈব চ
ধান্যস্য দশমং ভাগং দাস্যামঃ কোশবর্ধনম্
67.24
মুখ্যেন শস্ত্রপত্রেণ যে মনুষ্যাঃ প্রধানতঃ
ভবন্তং তেঽনুয়াস্যন্তি মহেন্দ্রমিব দেবতাঃ
67.25
স ত্বং জাতবলো রাজন্দুষ্প্রধর্ষঃ প্রতাপবান্
সুখে ধাস্যসি নঃ সর্বান্কুবের ইব নৈরৃতান্
67.26
যং চ ধর্মং চরিষ্যন্তি প্রজা রাজ্ঞা সুরক্ষিতাঃ
চতুর্থং তস্য ধর্মস্য ত্বত্সংস্থং নো ভবিষ্যতি
67.27
তেন ধর্মেণ মহতা সুখলব্ধেন ভাবিতঃ
পাহ্যস্মান্সর্বতো রাজন্দেবানিব শতক্রতুঃ
67.28
বিজয়ায়াশু নির্যাহি প্রতপন্রশ্মিমানিব
মানং বিধম শত্রূণাং ধর্মো জয়তু নঃ সদা
67.29
স নির্যয়ৌ মহাতেজা বলেন মহতা বৃতঃ
মহাভিজনসংপন্নস্তেজসা প্রজ্বলন্নিব
67.30
তস্য তাং মহিমাং দৃষ্ট্বা মহেন্দ্রস্যেব দেবতাঃ
অপতত্রসিরে সর্বে স্বধর্মে চ দধুর্মনঃ
67.31
ততো মহীং পরিয়য়ৌ পর্জন্য ইব বৃষ্টিমান্
শময়ন্সর্বতঃ পাপান্স্বকর্মসু চ যোজয়ন্
67.32
এবং যে ভূতিমিচ্ছেয়ুঃ পৃথিব্যাং মানবাঃ ক্বচিৎ
কুর্যূ রাজানমেবাগ্রে প্রজানুগ্রহকারণাৎ
67.33
নমস্যেয়ুশ্চ তং ভক্ত্যা শিষ্যা ইব গুরুং সদা
দেবা ইব সহস্রাক্ষং প্রজা রাজানমন্তিকে
67.34
সত্কৃতং স্বজনেনেহ পরোঽপি বহু মন্যতে
স্বজনেন ত্ববজ্ঞাতং পরে পরিভবন্ত্যুত
67.35
রাজ্ঞঃ পরৈঃ পরিভবঃ সর্বেষামসুখাবহঃ
তস্মাচ্ছত্রং চ পত্রং চ বাসাংস্যাভরণানি চ
67.36
ভোজনান্যথ পানানি রাজ্ঞে দদ্যুর্গৃহাণি চ
আসনানি চ শয্যাশ্চ সর্বোপকরণানি চ
67.37
গুপ্তাত্মা স্যাদ্দুরাধর্ষঃ স্মিতপূর্বাভিভাষিতা
আভাষিতশ্চ মধুরং প্রতিভাষেত মানবান্
67.38
কৃতজ্ঞো দৃঢভক্তিঃ স্যাত্সংবিভাগী জিতেন্দ্রিয়ঃ
ঈক্ষিতঃ প্রতিবীক্ষেত মৃদু চর্জু চ বল্গু চ