Utshovঅধ্যায় 66
66.1
যুধিষ্ঠির উবাচ
শ্রুতা মে কথিতাঃ পূর্বৈশ্চত্বারো মানবাশ্রমাঃ
ব্যাখ্যানমেষামাচক্ষ্ব পৃচ্ছতো মে পিতামহ
66.2
ভীষ্ম উবাচ
বিদিতাঃ সর্ব এবেহ ধর্মাস্তব যুধিষ্ঠির
যথা মম মহাবাহো বিদিতাঃ সাধুসংমতাঃ
66.3
যত্তু লিঙ্গান্তরগতং পৃচ্ছসে মাং যুধিষ্ঠির
ধর্মং ধর্মভৃতাং শ্রেষ্ঠ তন্নিবোধ নরাধিপ
66.4
সর্বাণ্যেতানি কৌন্তেয় বিদ্যন্তে মনুজর্ষভ
সাধ্বাচারপ্রবৃত্তানাং চাতুরাশ্রম্যকর্মণাম্
66.5
অকামদ্বেষয়ুক্তস্য দণ্ডনীত্যা যুধিষ্ঠির
সমেক্ষিণশ্চ ভূতেষু ভৈক্ষাশ্রমপদং ভবেৎ
66.6
বেত্ত্যাদানবিসর্গং যো নিগ্রহানুগ্রহৌ তথা
যথোক্তবৃত্তের্বীরস্য ক্ষেমাশ্রমপদং ভবেৎ
66.7
জ্ঞাতিসংবন্ধিমিত্রাণি ব্যাপন্নানি যুধিষ্ঠির
সমভ্যুদ্ধরমাণস্য দীক্ষাশ্রমপদং ভবেৎ
66.8
আহ্নিকং ভূতয়জ্ঞাংশ্চ পিতৃয়জ্ঞাংশ্চ মানুষান্
কুর্বতঃ পার্থ বিপুলান্বন্যাশ্রমপদং ভবেৎ
66.9
পালনাত্সর্বভূতানাং স্বরাষ্ট্রপরিপালনাৎ
দীক্ষা বহুবিধা রাজ্ঞো বন্যাশ্রমপদং ভবেৎ
66.10
বেদাধ্যয়ননিত্যত্বং ক্ষমাথাচার্যপূজনম্
তথোপাধ্যায়শুশ্রূষা ব্রহ্মাশ্রমপদং ভবেৎ
66.11
অজিহ্মমশঠং মার্গং সেবমানস্য ভারত
সর্বদা সর্বভূতেষু ব্রহ্মাশ্রমপদং ভবেৎ
66.12
বানপ্রস্থেষু বিপ্রেষু ত্রৈবিদ্যেষু চ ভারত
প্রয়চ্ছতোঽর্থান্বিপুলান্বন্যাশ্রমপদং ভবেৎ
66.13
সর্বভূতেষ্বনুক্রোশং কুর্বতস্তস্য ভারত
আনৃশংস্যপ্রবৃত্তস্য সর্বাবস্থং পদং ভবেৎ
66.14
বালবৃদ্ধেষু কৌরব্য সর্বাবস্থং যুধিষ্ঠির
অনুক্রোশং বিদধতঃ সর্বাবস্থং পদং ভবেৎ
66.15
বলাত্কৃতেষু ভূতেষু পরিত্রাণং কুরূদ্বহ
শরণাগতেষু কৌরব্য কুর্বন্গার্হস্থ্যমাবসেৎ
66.16
চরাচরাণাং ভূতানাং রক্ষামপি চ সর্বশঃ
যথার্হপূজাং চ সদা কুর্বন্গার্হস্থ্যমাবসেৎ
66.17
জ্যেষ্ঠানুজ্যেষ্ঠপত্নীনাং ভ্রাতৄণাং পুত্রনপ্তৃণাম্
নিগ্রহানুগ্রহৌ পার্থ গার্হস্থ্যমিতি তত্তপঃ
66.18
সাধূনামর্চনীয়ানাং প্রজাসু বিদিতাত্মনাম্
পালনং পুরুষব্যাঘ্র গৃহাশ্রমপদং ভবেৎ
66.19
আশ্রমস্থানি সর্বাণি যস্তু বেশ্মনি ভারত
আদদীতেহ ভোজ্যেন তদ্গার্হস্থ্যং যুধিষ্ঠির
66.20
যঃ স্থিতঃ পুরুষো ধর্মে ধাত্রা সৃষ্টে যথার্থবৎ
আশ্রমাণাং স সর্বেষাং ফলং প্রাপ্নোত্যনুত্তমম্
66.21
যস্মিন্ন নশ্যন্তি গুণাঃ কৌন্তেয় পুরুষে সদা
আশ্রমস্থং তমপ্যাহুর্নরশ্রেষ্ঠং যুধিষ্ঠির
66.22
স্থানমানং বয়োমানং কুলমানং তথৈব চ
কুর্বন্বসতি সর্বেষু হ্যাশ্রমেষু যুধিষ্ঠির
66.23
দেশধর্মাংশ্চ কৌন্তেয় কুলধর্মাংস্তথৈব চ
পালয়ন্পুরুষব্যাঘ্র রাজা সর্বাশ্রমী ভবেৎ
66.24
কালে বিভূতিং ভূতানামুপহারাংস্তথৈব চ
অর্হয়ন্পুরুষব্যাঘ্র সাধূনামাশ্রমে বসেৎ
66.25
দশধর্মগতশ্চাপি যো ধর্মং প্রত্যবেক্ষতে
সর্বলোকস্য কৌন্তেয় রাজা ভবতি সোঽঽশ্রমী
66.26
যে ধর্মকুশলা লোকে ধর্মং কুর্বন্তি সাধবঃ
পালিতা যস্য বিষয়ে পাদোংঽশস্তস্য ভূপতেঃ
66.27
ধর্মারামান্ধর্মপরান্যে ন রক্ষন্তি মানবান্
পার্থিবাঃ পুরুষব্যাঘ্র তেষাং পাপং হরন্তি তে
66.28
যে চ রক্ষাসহায়াঃ স্যুঃ পার্থিবানাং যুধিষ্ঠির
তে চৈবাংশহরাঃ সর্বে ধর্মে পরকৃতেঽনঘ
66.29
সর্বাশ্রমপদে হ্যাহুর্গার্হস্থ্যং দীপ্তনির্ণয়ম্
পাবনং পুরুষব্যাঘ্র যং বয়ং পর্যুপাস্মহে
66.30
আত্মোপমস্তু ভূতেষু যো বৈ ভবতি মানবঃ
ন্যস্তদণ্ডো জিতক্রোধঃ স প্রেত্য লভতে সুখম্
66.31
ধর্মোত্থিতা সত্ত্ববীর্যা ধর্মসেতুবটাকরা
ত্যাগবাতাধ্বগা শীঘ্রা নৌস্ত্বা সংতারয়িষ্যতি
66.32
যদা নিবৃত্তঃ সর্বস্মাত্কামো যোঽস্য হৃদি স্থিতঃ
তদা ভবতি সত্ত্বস্থস্ততো ব্রহ্ম সমশ্নুতে
66.33
সুপ্রসন্নস্তু ভাবেন যোগেন চ নরাধিপ
ধর্মং পুরুষশার্দূল প্রাপ্স্যসে পালনে রতঃ
66.34
বেদাধ্যয়নশীলানাং বিপ্রাণাং সাধুকর্মণাম্
পালনে যত্নমাতিষ্ঠ সর্বলোকস্য চানঘ
66.35
বনে চরতি যো ধর্মমাশ্রমেষু চ ভারত
রক্ষয়া তচ্ছতগুণং ধর্মং প্রাপ্নোতি পার্থিবঃ
66.36
এষ তে বিবিধো ধর্মঃ পাণ্ডবশ্রেষ্ঠ কীর্তিতঃ
অনুতিষ্ঠ ত্বমেনং বৈ পূর্বৈর্দৃষ্টং সনাতনম্
66.37
চাতুরাশ্রম্যমেকাগ্রঃ চাতুর্বর্ণ্যং চ পাণ্ডব
ধর্মং পুরুষশার্দূল প্রাপ্স্যসে পালনে রতঃ