Utshovঅধ্যায় 65
65.1
ইন্দ্র উবাচ
এবংবীর্যঃ সর্বধর্মোপপন্নঃ; ক্ষাত্রঃ শ্রেষ্ঠঃ সর্বধর্মেষু ধর্মঃ
পাল্যো যুষ্মাভির্লোকসিংহৈরুদারৈ;র্বিপর্যয়ে স্যাদভাবঃ প্রজানাম্
65.2
ভুবঃ সংস্কারং রাজসংস্কারয়োগ;মভৈক্ষচর্যাং পালনং চ প্রজানাম্
বিদ্যাদ্রাজা সর্বভূতানুকম্পাং; দেহত্যাগং চাহবে ধর্মমগ্র্যম্
65.3
ত্যাগং শ্রেষ্ঠং মুনয়ো বৈ বদন্তি; সর্বশ্রেষ্ঠো যঃ শরীরং ত্যজেত
নিত্যং ত্যক্তং রাজধর্মেষু সর্বং; প্রত্যক্ষং তে ভূমিপালাঃ সদৈতে
65.4
বহুশ্রুত্যা গুরুশুশ্রূষয়া বা; পরস্য বা সংহননাদ্বদন্তি
নিত্যং ধর্মং ক্ষত্রিয়ো ব্রহ্মচারী; চরেদেকো হ্যাশ্রমং ধর্মকামঃ
65.5
সামান্যার্থে ব্যবহারে প্রবৃত্তে; প্রিয়াপ্রিয়ে বর্জয়ন্নেব যত্নাৎ
চাতুর্বর্ণ্যস্থাপনাত্পালনাচ্চ; তৈস্তৈর্যোগৈর্নিয়মৈরৌরসৈশ্চ
65.6
সর্বোদ্যোগৈরাশ্রমং ধর্মমাহুঃ; ক্ষাত্রং জ্যেষ্ঠং সর্বধর্মোপপন্নম্
স্বং স্বং ধর্মং যে ন চরন্তি বর্ণা;স্তাংস্তান্ধর্মানয়থাবদ্বদন্তি
65.7
নির্মর্যাদে নিত্যমর্থে বিনষ্টা;নাহুস্তান্বৈ পশুভূতান্মনুষ্যান্
যথা নীতিং গময়ত্যর্থলোভা;চ্ছ্রেয়াংস্তস্মাদাশ্রমঃ ক্ষত্রধর্মঃ
65.8
ত্রৈবিদ্যানাং যা গতির্ব্রাহ্মণানাং; যশ্চৈবোক্তোঽথাশ্রমো ব্রাহ্মণানাম্
এতত্কর্ম ব্রাহ্মণস্যাহুরগ্র্য;মন্যত্কুর্বঞ্শূদ্রবচ্ছস্ত্রবধ্যঃ
65.9
চাতুরাশ্রম্যধর্মাশ্চ বেদধর্মাশ্চ পার্থিব
ব্রাহ্মণেনানুগন্তব্যা নান্যো বিদ্যাত্কথংচন
65.10
অন্যথা বর্তমানস্য ন সা বৃত্তিঃ প্রকল্প্যতে
কর্মণা ব্যজ্যতে ধর্মো যথৈব শ্বা তথৈব সঃ
65.11
যো বিকর্মস্থিতো বিপ্রো ন স সন্মানমর্হতি
কর্মস্বনুপয়ুঞ্জানমবিশ্বাস্যং হি তং বিদুঃ
65.12
এতে ধর্মাঃ সর্ববর্ণাশ্চ বীরৈ;রুত্ক্রষ্টব্যাঃ ক্ষত্রিয়ৈরেষ ধর্মঃ
তস্মাজ্জ্যেষ্ঠা রাজধর্মা ন চান্যে; বীর্যজ্যেষ্ঠা বীরধর্মা মতা মে
65.13
মান্ধাতোবাচ
যবনাঃ কিরাতা গান্ধারাশ্চীনাঃ শবরবর্বরাঃ
শকাস্তুষারাঃ কহ্বাশ্চ পহ্লবাশ্চান্ধ্রমদ্রকাঃ
65.14
ওড্রাঃ পুলিন্দা রমঠাঃ কাচা ম্লেচ্ছাশ্চ সর্বশঃ
ব্রহ্মক্ষত্রপ্রসূতাশ্চ বৈশ্যাঃ শূদ্রাশ্চ মানবাঃ
65.15
কথং ধর্মং চরেয়ুস্তে সর্বে বিষয়বাসিনঃ
মদ্বিধৈশ্চ কথং স্থাপ্যাঃ সর্বে তে দস্যুজীবিনঃ
65.16
এতদিচ্ছাম্যহং শ্রোতুং ভগবংস্তদ্ব্রবীহি মে
ত্বং বন্ধুভূতো হ্যস্মাকং ক্ষত্রিয়াণাং সুরেশ্বর
65.17
ইন্দ্র উবাচ
মাতাপিত্রোর্হি কর্তব্যা শুশ্রূষা সর্বদস্যুভিঃ
আচার্যগুরুশুশ্রূষা তথৈবাশ্রমবাসিনাম্
65.18
ভূমিপালানাং চ শুশ্রূষা কর্তব্যা সর্বদস্যুভিঃ
বেদধর্মক্রিয়াশ্চৈব তেষাং ধর্মো বিধীয়তে
65.19
পিতৃয়জ্ঞাস্তথা কূপাঃ প্রপাশ্চ শয়নানি চ
দানানি চ যথাকালং দ্বিজেষু দদ্যুরেব তে
65.20
অহিংসা সত্যমক্রোধো বৃত্তিদায়ানুপালনম্
ভরণং পুত্রদারাণাং শৌচমদ্রোহ এব চ
65.21
দক্ষিণা সর্বয়জ্ঞানাং দাতব্যা ভূতিমিচ্ছতা
পাকয়জ্ঞা মহার্হাশ্চ কর্তব্যাঃ সর্বদস্যুভিঃ
65.22
এতান্যেবংপ্রকারাণি বিহিতানি পুরানঘ
সর্বলোকস্য কর্মাণি কর্তব্যানীহ পার্থিব
65.23
মান্ধাতোবাচ
দৃশ্যন্তে মানবা লোকে সর্ববর্ণেষু দস্যবঃ
লিঙ্গান্তরে বর্তমানা আশ্রমেষু চতুর্ষ্বপি
65.24
ইন্দ্র উবাচ
বিনষ্টায়াং দণ্ডনীতৌ রাজধর্মে নিরাকৃতে
সংপ্রমুহ্যন্তি ভূতানি রাজদৌরাত্ম্যতো নৃপ
65.25
অসংখ্যাতা ভবিষ্যন্তি ভিক্ষবো লিঙ্গিনস্তথা
আশ্রমাণাং বিকল্পাশ্চ নিবৃত্তেঽস্মিন্কৃতে যুগে
65.26
অশৃণ্বানাঃ পুরাণানাং ধর্মাণাং প্রবরা গতীঃ
উত্পথং প্রতিপত্স্যন্তে কামমন্যুসমীরিতাঃ
65.27
যদা নিবর্ত্যতে পাপো দণ্ডনীত্যা মহাত্মভিঃ
তদা ধর্মো ন চলতে সদ্ভূতঃ শাশ্বতঃ পরঃ
65.28
পরলোকগুরুং চৈব রাজানং যোঽবমন্যতে
ন তস্য দত্তং ন হুতং ন শ্রাদ্ধং ফলতি ক্বচিৎ
65.29
মানুষাণামধিপতিং দেবভূতং সনাতনম্
দেবাশ্চ বহু মন্যন্তে ধর্মকামং নরেশ্বরম্
65.30
প্রজাপতির্হি ভগবান্যঃ সর্বমসৃজজ্জগৎ
স প্রবৃত্তিনিবৃত্ত্যর্থং ধর্মাণাং ক্ষত্রমিচ্ছতি
65.31
প্রবৃত্তস্য হি ধর্মস্য বুদ্ধ্যা যঃ স্মরতে গতিম্
স মে মান্যশ্চ পূজ্যশ্চ তত্র ক্ষত্রং প্রতিষ্ঠিতম্
65.32
ভীষ্ম উবাচ
এবমুক্ত্বা স ভগবান্মরুদ্গণবৃতঃ প্রভুঃ
জগাম ভবনং বিষ্ণুরক্ষরং পরমং পদম্
65.33
এবং প্রবর্তিতে ধর্মে পুরা সুচরিতেঽনঘ
কঃ ক্ষত্রমবমন্যেত চেতনাবান্বহুশ্রুতঃ
65.34
অন্যায়েন প্রবৃত্তানি নিবৃত্তানি তথৈব চ
অন্তরা বিলয়ং যান্তি যথা পথি বিচক্ষুষঃ
65.35
আদৌ প্রবর্তিতে চক্রে তথৈবাদিপরায়ণে
বর্তস্ব পুরুষব্যাঘ্র সংবিজানামি তেঽনঘ