অধ্যায় 64

64.1

ভীষ্ম উবাচ
চাতুরাশ্রম্যধর্মাশ্চ জাতিধর্মাশ্চ পাণ্ডব
লোকপালোত্তরাশ্চৈব ক্ষাত্রে ধর্মে ব্যবস্থিতাঃ

64.2

সর্বাণ্যেতানি ধর্মাণি ক্ষাত্রে ভরতসত্তম
নিরাশিষো জীবলোকে ক্ষাত্রে ধর্মে ব্যবস্থিতাঃ

64.3

অপ্রত্যক্ষং বহুদ্বারং ধর্মমাশ্রমবাসিনাম্
প্ররূপয়ন্তি তদ্ভাবমাগমৈরেব শাশ্বতম্

64.4

অপরে বচনৈঃ পুণ্যৈর্বাদিনো লোকনিশ্চয়ম্
অনিশ্চয়জ্ঞা ধর্মাণামদৃষ্টান্তে পরে রতাঃ

64.5

প্রত্যক্ষসুখভূয়িষ্ঠমাত্মসাক্ষিকমচ্ছলম্
সর্বলোকহিতং ধর্মং ক্ষত্রিয়েষু প্রতিষ্ঠিতম্

64.6

ধর্মাশ্রমব্যবসিনাং ব্রাহ্মণানাং যুধিষ্ঠির
যথা ত্রয়াণাং বর্ণানাং সংখ্যাতোপশ্রুতিঃ পুরা
রাজধর্মেষ্বনুপমা লোক্যা সুচরিতৈরিহ

64.7

উদাহৃতং তে রাজেন্দ্র যথা বিষ্ণুং মহৌজসম্
সর্বভূতেশ্বরং দেবং প্রভুং নারায়ণং পুরা
জগ্মুঃ সুবহবঃ শূরা রাজানো দণ্ডনীতয়ে

64.8

একৈকমাত্মনঃ কর্ম তুলয়িত্বাশ্রমে পুরা
রাজানঃ পর্যুপাতিষ্ঠন্দৃষ্টান্তবচনে স্থিতাঃ

64.9

সাধ্যা দেবা বসবশ্চাশ্বিনৌ চ; রুদ্রাশ্চ বিশ্বে মরুতাং গণাশ্চ
সৃষ্টাঃ পুরা আদিদেবেন দেবা; ক্ষাত্রে ধর্মে বর্তয়ন্তে চ সিদ্ধাঃ

64.10

অত্র তে বর্তয়িষ্যামি ধর্মমর্থবিনিশ্চয়ম্
নির্মর্যাদে বর্তমানে দানবৈকায়নে কৃতে
বভূব রাজা রাজেন্দ্র মান্ধাতা নাম বীর্যবান্

64.11

পুরা বসুমতীপালো যজ্ঞং চক্রে দিদৃক্ষয়া
অনাদিমধ্যনিধনং দেবং নারায়ণং প্রতি

64.12

স রাজা রাজশার্দূল মান্ধাতা পরমেষ্ঠিনঃ
জগ্রাহ শিরসা পাদৌ যজ্ঞে বিষ্ণোর্মহাত্মনঃ

64.13

দর্শয়ামাস তং বিষ্ণূ রূপমাস্থায় বাসবম্
স পার্থিবৈর্বৃতঃ সদ্ভিরর্চয়ামাস তং প্রভুম্

64.14

তস্য পার্থিবসংঘস্য তস্য চৈব মহাত্মনঃ
সংবাদোঽয়ং মহানাসীদ্বিষ্ণুং প্রতি মহাদ্যুতে

64.15

ইন্দ্র উবাচ
কিমিষ্যতে ধর্মভৃতাং বরিষ্ঠ; যদ্দ্রষ্টুকামোঽসি তমপ্রমেয়ম্
অনন্তমায়ামিতসত্ত্ববীর্যং; নারায়ণং হ্যাদিদেবং পুরাণম্

64.16

নাসৌ দেবো বিশ্বরূপো ময়াপি; শক্যো দ্রষ্টুং ব্রহ্মণা বাপি সাক্ষাৎ
যেঽন্যে কামাস্তব রাজন্হৃদিস্থা; দাস্যামি তাংস্ত্বং হি মর্ত্যেষু রাজা

64.17

সত্যে স্থিতো ধর্মপরো জিতেন্দ্রিয়ঃ; শূরো দৃঢং প্রীতিরতঃ সুরাণাম্
বুদ্ধ্যা ভক্ত্যা চোত্তমশ্রদ্ধয়া চ; ততস্তেঽহং দদ্মি বরং যথেষ্টম্

64.18

মান্ধাতোবাচ
অসংশয়ং ভগবন্নাদিদেবং; দ্রক্ষ্যাম্যহং শিরসাহং প্রসাদ্য
ত্যক্ত্বা ভোগান্ধর্মকামো হ্যরণ্য;মিচ্ছে গন্তুং সত্পথং লোকজুষ্টম্

64.19

ক্ষাত্রাদ্ধর্মাদ্বিপুলাদপ্রমেয়া;ল্লোকাঃ প্রাপ্তাঃ স্থাপিতং স্বং যশশ্চ
ধর্মো যোঽসাবাদিদেবাত্প্রবৃত্তো; লোকজ্যেষ্ঠস্তং ন জানামি কর্তুম্

64.20

ইন্দ্র উবাচ
অসৈনিকোঽধর্মপরশ্চরেথাঃ; পরাং গতিং লপ্স্যসে চাপ্রমত্তঃ
ক্ষাত্রো ধর্মো হ্যাদিদেবাত্প্রবৃত্তঃ; পশ্চাদন্যে শেষভূতাশ্চ ধর্মাঃ

64.21

শেষাঃ সৃষ্টা হ্যন্তবন্তো হ্যনন্তাঃ; সুপ্রস্থানাঃ ক্ষত্রধর্মাবিশিষ্টাঃ
অস্মিন্ধর্মে সর্বধর্মাঃ প্রবিষ্টা;স্তস্মাদ্ধর্মং শ্রেষ্ঠমিমং বদন্তি

64.22

কর্মণা বৈ পুরা দেবা ঋষয়শ্চামিতৌজসঃ
ত্রাতাঃ সর্বে প্রমথ্যারীন্ক্ষত্রধর্মেণ বিষ্ণুনা

64.23

যদি হ্যসৌ ভগবান্নাহনিষ্য;দ্রিপূন্সর্বান্বসুমানপ্রমেয়ঃ
ন ব্রাহ্মণা ন চ লোকাদিকর্তা; ন সদ্ধর্মা নাদিধর্মা ভবেয়ুঃ

64.24

ইমামুর্বীং ন জয়েদ্বিক্রমেণ; দেবশ্রেষ্ঠোঽসৌ পুরা চেদমেয়ঃ
চাতুর্বর্ণ্যং চাতুরাশ্রম্যধর্মাঃ; সর্বে ন স্যুর্ব্রহ্মণো বৈ বিনাশাৎ

64.25

দৃষ্টা ধর্মাঃ শতধা শাশ্বতেন; ক্ষাত্রেণ ধর্মেণ পুনঃ প্রবৃত্তাঃ
যুগে যুগে হ্যাদিধর্মাঃ প্রবৃত্তা; লোকজ্যেষ্ঠং ক্ষত্রধর্মং বদন্তি

64.26

আত্মত্যাগঃ সর্বভূতানুকম্পা; লোকজ্ঞানং মোক্ষণং পালনং চ
বিষণ্ণানাং মোক্ষণং পীডিতানাং; ক্ষাত্রে ধর্মে বিদ্যতে পার্থিবানাম্

64.27

নির্মর্যাদাঃ কামমন্যুপ্রবৃত্তা; ভীতা রাজ্ঞো নাধিগচ্ছন্তি পাপম্
শিষ্টাশ্চান্যে সর্বধর্মোপপন্নাঃ; সাধ্বাচারাঃ সাধু ধর্মং চরন্তি

64.28

পুত্রবত্পরিপাল্যানি লিঙ্গধর্মেণ পার্থিবৈঃ
লোকে ভূতানি সর্বাণি বিচরন্তি ন সংশয়ঃ

64.29

সর্বধর্মপরং ক্ষত্রং লোকজ্যেষ্ঠং সনাতনম্
শশ্বদক্ষরপর্যন্তমক্ষরং সর্বতোমুখম্

Contains text from DharmicData, made available under the Open Database License (ODbL). Simple meanings are written by AI and can contain mistakes.