Utshovঅধ্যায় 63
63.1
ভীষ্ম উবাচ
জ্যাকর্ষণং শত্রুনিবর্হণং চ; কৃষির্বণিজ্যা পশুপালনং চ
শুশ্রূষণং চাপি তথার্থহেতো;রকার্যমেতত্পরমং দ্বিজস্য
63.2
সেব্যং তু ব্রহ্মষট্কর্ম গৃহস্থেন মনীষিণা
কৃতকৃত্যস্য চারণ্যে বাসো বিপ্রস্য শস্যতে
63.3
রাজপ্রৈষ্যং কৃষিধনং জীবনং চ বণিজ্যয়া
কৌটিল্যং কৌলটেয়ং চ কুসীদং চ বিবর্জয়েৎ
63.4
শূদ্রো রাজন্ভবতি ব্রহ্মবন্ধু;র্দুশ্চারিত্র্যো যশ্চ ধর্মাদপেতঃ
বৃষলীপতিঃ পিশুনো নর্তকশ্চ; গ্রামপ্রৈষ্যো যশ্চ ভবেদ্বিকর্মা
63.5
জপন্বেদানজপংশ্চাপি রাজ;ন্সমঃ শূদ্রৈর্দাসবচ্চাপি ভোজ্যঃ
এতে সর্বে শূদ্রসমা ভবন্তি; রাজন্নেতান্বর্জয়েদ্দেবকৃত্যে
63.6
নির্মর্যাদে চাশনে ক্রূরবৃত্তৌ; হিংসাত্মকে ত্যক্তধর্মস্ববৃত্তে
হব্যং কব্যং যানি চান্যানি রাজ;ন্দেয়ান্যদেয়ানি ভবন্তি তস্মিন্
63.7
তস্মাদ্ধর্মো বিহিতো ব্রাহ্মণস্য; দমঃ শৌচং চার্জবং চাপি রাজন্
তথা বিপ্রস্যাশ্রমাঃ সর্ব এব; পুরা রাজন্ব্রহ্মণা বৈ নিসৃষ্টাঃ
63.8
যঃ স্যাদ্দান্তঃ সোমপ আর্যশীলঃ; সানুক্রোশঃ সর্বসহো নিরাশীঃ
ঋজুর্মৃদুরনৃশংসঃ ক্ষমাবা;ন্স বৈ বিপ্রো নেতরঃ পাপকর্মা
63.9
শূদ্রং বৈশ্যং রাজপুত্রং চ রাজঁ;ল্লোকাঃ সর্বে সংশ্রিতা ধর্মকামাঃ
তস্মাদ্বর্ণাঞ্জাতিধর্মেষু সক্তা;ন্মত্বা বিষ্ণুর্নেচ্ছতি পাণ্ডুপুত্র
63.10
লোকে চেদং সর্বলোকস্য ন স্যা;চ্চাতুর্বর্ণ্যং বেদবাদাশ্চ ন স্যুঃ
সর্বাশ্চেজ্যাঃ সর্বলোকক্রিয়াশ্চ; সদ্যঃ সর্বে চাশ্রমস্থা ন বৈ স্যুঃ
63.11
যশ্চ ত্রয়াণাং বর্ণানামিচ্ছেদাশ্রমসেবনম্
কর্তুমাশ্রমদৃষ্টাংশ্চ ধর্মাংস্তাঞ্শৃণু পাণ্ডব
63.12
শুশ্রূষাকৃতকৃত্যস্য কৃতসংতানকর্মণঃ
অভ্যনুজ্ঞাপ্য রাজানং শূদ্রস্য জগতীপতে
63.13
অল্পান্তরগতস্যাপি দশধর্মগতস্য বা
আশ্রমা বিহিতাঃ সর্বে বর্জয়িত্বা নিরাশিষম্
63.14
ভৈক্ষচর্যাং ন তু প্রাহুস্তস্য তদ্ধর্মচারিণঃ
তথা বৈশ্যস্য রাজেন্দ্র রাজপুত্রস্য চৈব হি
63.15
কৃতকৃত্যো বয়োতীতো রাজ্ঞঃ কৃতপরিশ্রমঃ
বৈশ্যো গচ্ছেদনুজ্ঞাতো নৃপেণাশ্রমমণ্ডলম্
63.16
বেদানধীত্য ধর্মেণ রাজশাস্ত্রাণি চানঘ
সংতানাদীনি কর্মাণি কৃত্বা সোমং নিষেব্য চ
63.17
পালয়িত্বা প্রজাঃ সর্বা ধর্মেণ বদতাং বর
রাজসূয়াশ্বমেধাদীন্মখানন্যাংস্তথৈব চ
63.18
সমানীয় যথাপাঠং বিপ্রেভ্যো দত্তদক্ষিণঃ
সংগ্রামে বিজয়ং প্রাপ্য তথাল্পং যদি বা বহু
63.19
স্থাপয়িত্বা প্রজাপালং পুত্রং রাজ্যে চ পাণ্ডব
অন্যগোত্রং প্রশস্তং বা ক্ষত্রিয়ং ক্ষত্রিয়র্ষভ
63.20
অর্চয়িত্বা পিতৄন্সম্যক্পিতৃয়জ্ঞৈর্যথাবিধি
দেবান্যজ্ঞৈরৃষীন্বেদৈরর্চিত্বা চৈব যত্নতঃ
63.21
অন্তকালে চ সংপ্রাপ্তে য ইচ্ছেদাশ্রমান্তরম্
আনুপূর্ব্যাশ্রমান্রাজন্গত্বা সিদ্ধিমবাপ্নুয়াৎ
63.22
রাজর্ষিত্বেন রাজেন্দ্র ভৈক্ষচর্যাধ্বসেবয়া
অপেতগৃহধর্মোঽপি চরেজ্জীবিতকাম্যয়া
63.23
ন চৈতন্নৈষ্ঠিকং কর্ম ত্রয়াণাং ভরতর্ষভ
চতুর্ণাং রাজশার্দূল প্রাহুরাশ্রমবাসিনাম্
63.24
বহ্বায়ত্তং ক্ষত্রিয়ৈর্মানবানাং; লোকশ্রেষ্ঠং ধর্মমাসেবমানৈঃ
সর্বে ধর্মাঃ সোপধর্মাস্ত্রয়াণাং; রাজ্ঞো ধর্মাদিতি বেদাচ্ছৃণোমি
63.25
যথা রাজন্হস্তিপদে পদানি; সংলীয়ন্তে সর্বসত্ত্বোদ্ভবানি
এবং ধর্মান্রাজধর্মেষু সর্বা;ন্সর্বাবস্থং সংপ্রলীনান্নিবোধ
63.26
অল্পাশ্রয়ানল্পফলান্বদন্তি; ধর্মানন্যান্ধর্মবিদো মনুষ্যাঃ
মহাশ্রয়ং বহুকল্যাণরূপং; ক্ষাত্রং ধর্মং নেতরং প্রাহুরার্যাঃ
63.27
সর্বে ধর্মা রাজধর্মপ্রধানাঃ; সর্বে ধর্মাঃ পাল্যমানা ভবন্তি
সর্বত্যাগো রাজধর্মেষু রাজং;স্ত্যাগে চাহুর্ধর্মমগ্র্যং পুরাণম্
63.28
মজ্জেত্ত্রয়ী দণ্ডনীতৌ হতায়াং; সর্বে ধর্মা ন ভবেয়ুর্বিরুদ্ধাঃ
সর্বে ধর্মাশ্চাশ্রমাণাং গতাঃ স্যুঃ; ক্ষাত্রে ত্যক্তে রাজধর্মে পুরাণে
63.29
সর্বে ত্যাগা রাজধর্মেষু দৃষ্টাঃ; সর্বা দীক্ষা রাজধর্মেষু চোক্তাঃ
সর্বে যোগা রাজধর্মেষু চোক্তাঃ; সর্বে লোকা রাজধর্মান্প্রবিষ্টাঃ
63.30
যথা জীবাঃ প্রকৃতৌ বধ্যমানা; ধর্মাশ্রিতানামুপপীডনায়
এবং ধর্মা রাজধর্মৈর্বিয়ুক্তাঃ; সর্বাবস্থং নাদ্রিয়ন্তে স্বধর্মম্