অধ্যায় 62

62.1

যুধিষ্ঠির উবাচ
শিবান্সুখান্মহোদর্কানহিংস্রাঁল্লোকসংমতান্
ব্রূহি ধর্মান্সুখোপায়ান্মদ্বিধানাং সুখাবহান্

ভীষ্ম উবাচ
ব্রাহ্মণস্যেহ চত্বার আশ্রমা বিহিতাঃ প্রভো
বর্ণাস্তাননুবর্তন্তে ত্রয়ো ভরতসত্তম

উক্তানি কর্মাণি বহূনি রাজ;ন্স্বর্গ্যাণি রাজন্যপরায়ণানি
নেমানি দৃষ্টান্তবিধৌ স্মৃতানি; ক্ষাত্রে হি সর্বং বিহিতং যথাবৎ

ক্ষাত্রাণি বৈশ্যানি চ সেবমানঃ; শৌদ্রাণি কর্মাণি চ ব্রাহ্মণঃ সন্
অস্মিঁল্লোকে নিন্দিতো মন্দচেতাঃ; পরে চ লোকে নিরয়ং প্রয়াতি

যা সংজ্ঞা বিহিতা লোকে দাসে শুনি বৃকে পশৌ
বিকর্মণি স্থিতে বিপ্রে তাং সংজ্ঞাং কুরু পাণ্ডব

ষট্কর্মসংপ্রবৃত্তস্য আশ্রমেষু চতুর্ষ্বপি
সর্বধর্মোপপন্নস্য সংভূতস্য কৃতাত্মনঃ

ব্রাহ্মণস্য বিশুদ্ধস্য তপস্যভিরতস্য চ
নিরাশিষো বদান্যস্য লোকা হ্যক্ষরসংজ্ঞিতাঃ

যো যস্মিন্কুরুতে কর্ম যাদৃশং যেন যত্র চ
তাদৃশং তাদৃশেনৈব স গুণং প্রতিপদ্যতে

বৃদ্ধ্যা কৃষিবণিক্ত্বেন জীবসংজীবনেন চ
বেত্তুমর্হসি রাজেন্দ্র স্বাধ্যায়গণিতং মহৎ

কালসংচোদিতঃ কালঃ কালপর্যায়নিশ্চিতঃ
উত্তমাধমমধ্যানি কর্মাণি কুরুতেঽবশঃ

অন্তবন্তি প্রদানানি পুরা শ্রেয়স্করাণি চ
স্বকর্মনিরতো লোকো হ্যক্ষরঃ সর্বতোমুখঃ