অধ্যায় 61

61.1

ভীষ্ম উবাচ
আশ্রমাণাং মহাবাহো শৃণু সত্যপরাক্রম
চতুর্ণামিহ বর্ণানাং কর্মাণি চ যুধিষ্ঠির

বানপ্রস্থং ভৈক্ষচর্যাং গার্হস্থ্যং চ মহাশ্রমম্
ব্রহ্মচর্যাশ্রমং প্রাহুশ্চতুর্থং ব্রাহ্মণৈর্বৃতম্

জটাকরণসংস্কারং দ্বিজাতিত্বমবাপ্য চ
আধানাদীনি কর্মাণি প্রাপ্য বেদমধীত্য চ

সদারো বাপ্যদারো বা আত্মবান্সংয়তেন্দ্রিয়ঃ
বানপ্রস্থাশ্রমং গচ্ছেত্কৃতকৃত্যো গৃহাশ্রমাৎ

তত্রারণ্যকশাস্ত্রাণি সমধীত্য স ধর্মবিৎ
ঊর্ধ্বরেতাঃ প্রজায়িত্বা গচ্ছত্যক্ষরসাত্মতাম্

এতান্যেব নিমিত্তানি মুনীনামূর্ধ্বরেতসাম্
কর্তব্যানীহ বিপ্রেণ রাজন্নাদৌ বিপশ্চিতা

চরিতব্রহ্মচর্যস্য ব্রাহ্মণস্য বিশাং পতে
ভৈক্ষচর্যাস্বধীকারঃ প্রশস্ত ইহ মোক্ষিণঃ

যত্রাস্তমিতশায়ী স্যান্নিরগ্নিরনিকেতনঃ
যথোপলব্ধজীবী স্যান্মুনির্দান্তো জিতেন্দ্রিয়ঃ

নিরাশীঃ স্যাত্সর্বসমো নির্ভোগো নির্বিকারবান্
বিপ্রঃ ক্ষেমাশ্রমং প্রাপ্তো গচ্ছত্যক্ষরসাত্মতাম্

অধীত্য বেদান্কৃতসর্বকৃত্যঃ; সংতানমুত্পাদ্য সুখানি ভুক্ত্বা
সমাহিতঃ প্রচরেদ্দুশ্চরং তং; গার্হস্থ্যধর্মং মুনিধর্মদৃষ্টম্

স্বদারতুষ্ট ঋতুকালগামী; নিয়োগসেবী নশঠো নজিহ্মঃ
মিতাশনো দেবপরঃ কৃতজ্ঞঃ; সত্যো মৃদুশ্চানৃশংসঃ ক্ষমাবান্

দান্তো বিধেয়ো হব্যকব্যেঽপ্রমত্তো; অন্নস্য দাতা সততং দ্বিজেভ্যঃ
অমত্সরী সর্বলিঙ্গিপ্রদাতা; বৈতাননিত্যশ্চ গৃহাশ্রমী স্যাৎ

অথাত্র নারায়ণগীতমাহু;র্মহর্ষয়স্তাত মহানুভাবাঃ
মহার্থমত্যর্থতপঃপ্রয়ুক্তং; তদুচ্যমানং হি ময়া নিবোধ

সত্যার্জবং চাতিথিপূজনং চ; ধর্মস্তথার্থশ্চ রতিশ্চ দারে
নিষেবিতব্যানি সুখানি লোকে; হ্যস্মিন্পরে চৈব মতং মমৈতৎ

ভরণং পুত্রদারাণাং বেদানাং পারণং তথা
সতাং তমাশ্রমং শ্রেষ্ঠং বদন্তি পরমর্ষয়ঃ

এবং হি যো ব্রাহ্মণো যজ্ঞশীলো; গার্হস্থ্যমধ্যাবসতে যথাবৎ
গৃহস্থবৃত্তিং প্রবিশোধ্য সম্য;ক্স্বর্গে বিশুদ্ধং ফলমাপ্নুতে সঃ

তস্য দেহপরিত্যাগাদিষ্টাঃ কামাক্ষয়া মতাঃ
আনন্ত্যায়োপতিষ্ঠন্তি সর্বতোক্ষিশিরোমুখাঃ

খাদন্নেকো জপন্নেকঃ সর্পন্নেকো যুধিষ্ঠির
একস্মিন্নেব আচার্যে শুশ্রূষুর্মলপঙ্কবান্

ব্রহ্মচারী ব্রতী নিত্যং নিত্যং দীক্ষাপরো বশী
অবিচার্য তথা বেদং কৃত্যং কুর্বন্বসেত্সদা

শুশ্রূষাং সততং কুর্বন্গুরোঃ সংপ্রণমেত চ
ষট্কর্মস্বনিবৃত্তশ্চ নপ্রবৃত্তশ্চ সর্বশঃ

ন চরত্যধিকারেণ সেবিতং দ্বিষতো ন চ
এষোঽঽশ্রমপদস্তাত ব্রহ্মচারিণ ইষ্যতে