Utshovঅধ্যায় 60
60.1
বৈশংপায়ন উবাচ
ততঃ পুনঃ স গাঙ্গেয়মভিবাদ্য পিতামহম্
প্রাঞ্জলির্নিয়তো ভূত্বা পর্যপৃচ্ছদ্যুধিষ্ঠিরঃ
60.2
কে ধর্মাঃ সর্ববর্ণানাং চাতুর্বর্ণ্যস্য কে পৃথক্
চতুর্ণামাশ্রমাণাং চ রাজধর্মাশ্চ কে মতাঃ
60.3
কেন স্বিদ্বর্ধতে রাষ্ট্রং রাজা কেন বিবর্ধতে
কেন পৌরাশ্চ ভৃত্যাশ্চ বর্ধন্তে ভরতর্ষভ
60.4
কোশং দণ্ডং চ দুর্গং চ সহায়ান্মন্ত্রিণস্তথা
ঋত্বিক্পুরোহিতাচার্যান্কীদৃশান্বর্জয়েন্নৃপঃ
60.5
কেষু বিশ্বসিতব্যং স্যাদ্রাজ্ঞাং কস্যাংচিদাপদি
কুতো বাত্মা দৃঢো রক্ষ্যস্তন্মে ব্রূহি পিতামহ
60.6
ভীষ্ম উবাচ
নমো ধর্মায় মহতে নমঃ কৃষ্ণায় বেধসে
ব্রাহ্মণেভ্যো নমস্কৃত্বা ধর্মান্বক্ষ্যামি শাশ্বতান্
60.7
অক্রোধঃ সত্যবচনং সংবিভাগঃ ক্ষমা তথা
প্রজনঃ স্বেষু দারেষু শৌচমদ্রোহ এব চ
60.8
আর্জবং ভৃত্যভরণং নবৈতে সার্ববর্ণিকাঃ
ব্রাহ্মণস্য তু যো ধর্মস্তং তে বক্ষ্যামি কেবলম্
60.9
দমমেব মহারাজ ধর্মমাহুঃ পুরাতনম্
স্বাধ্যায়োঽধ্যাপনং চৈব তত্র কর্ম সমাপ্যতে
60.10
তং চেদ্বিত্তমুপাগচ্ছেদ্বর্তমানং স্বকর্মণি
অকুর্বাণং বিকর্মাণি শান্তং প্রজ্ঞানতর্পিতম্
60.11
কুর্বীতাপত্যসংতানমথো দদ্যাদ্যজেত চ
সংবিভজ্য হি ভোক্তব্যং ধনং সদ্ভিরিতীষ্যতে
60.12
পরিনিষ্ঠিতকার্যস্তু স্বাধ্যায়েনৈব ব্রাহ্মণঃ
কুর্যাদন্যন্ন বা কুর্যান্মৈত্রো ব্রাহ্মণ উচ্যতে
60.13
ক্ষত্রিয়স্যাপি যো ধর্মস্তং তে বক্ষ্যামি ভারত
দদ্যাদ্রাজা ন যাচেত যজেত ন তু যাজয়েৎ
60.14
নাধ্যাপয়েদধীয়ীত প্রজাশ্চ পরিপালয়েৎ
নিত্যোদ্যুক্তো দস্যুবধে রণে কুর্যাত্পরাক্রমম্
60.15
যে চ ক্রতুভিরীজানাঃ শ্রুতবন্তশ্চ ভূমিপাঃ
য এবাহবজেতারস্ত এষাং লোকজিত্তমাঃ
60.16
অবিক্ষতেন দেহেন সমরাদ্যো নিবর্ততে
ক্ষত্রিয়ো নাস্য তত্কর্ম প্রশংসন্তি পুরাবিদঃ
60.17
বধং হি ক্ষত্রবন্ধূনাং ধর্মমাহুঃ প্রধানতঃ
নাস্য কৃত্যতমং কিংচিদন্যদ্দস্যুনিবর্হণাৎ
60.18
দানমধ্যয়নং যজ্ঞো যোগঃ ক্ষেমো বিধীয়তে
তস্মাদ্রাজ্ঞা বিশেষেণ যোদ্ধব্যং ধর্মমীপ্সতা
60.19
স্বেষু ধর্মেষ্ববস্থাপ্য প্রজাঃ সর্বা মহীপতিঃ
ধর্মেণ সর্বকৃত্যানি সমনিষ্ঠানি কারয়েৎ
60.20
পরিনিষ্ঠিতকার্যঃ স্যান্নৃপতিঃ পরিপালনাৎ
কুর্যাদন্যন্ন বা কুর্যাদৈন্দ্রো রাজন্য উচ্যতে
60.21
বৈশ্যস্যাপীহ যো ধর্মস্তং তে বক্ষ্যামি ভারত
দানমধ্যয়নং যজ্ঞঃ শৌচেন ধনসংচয়ঃ
60.22
পিতৃবত্পালয়েদ্বৈশ্যো যুক্তঃ সর্বপশূনিহ
বিকর্ম তদ্ভবেদন্যত্কর্ম যদ্যত্সমাচরেৎ
রক্ষয়া স হি তেষাং বৈ মহত্সুখমবাপ্নুয়াৎ
60.23
প্রজাপতির্হি বৈশ্যায় সৃষ্ট্বা পরিদদে পশূন্
ব্রাহ্মণায় চ রাজ্ঞে চ সর্বাঃ পরিদদে প্রজাঃ
60.24
তস্য বৃত্তিং প্রবক্ষ্যামি যচ্চ তস্যোপজীবনম্
ষণ্ণামেকাং পিবেদ্ধেনুং শতাচ্চ মিথুনং হরেৎ
60.25
লয়ে চ সপ্তমো ভাগস্তথা শৃঙ্গে কলা খুরে
সস্যস্য সর্ববীজানামেষা সাংবত্সরী ভৃতিঃ
60.26
ন চ বৈশ্যস্য কামঃ স্যান্ন রক্ষেয়ং পশূনিতি
বৈশ্যে চেচ্ছতি নান্যেন রক্ষিতব্যাঃ কথংচন
60.27
শূদ্রস্যাপি হি যো ধর্মস্তং তে বক্ষ্যামি ভারত
প্রজাপতির্হি বর্ণানাং দাসং শূদ্রমকল্পয়ৎ
60.28
তস্মাচ্ছূদ্রস্য বর্ণানাং পরিচর্যা বিধীয়তে
তেষাং শুশ্রূষণাচ্চৈব মহত্সুখমবাপ্নুয়াৎ
60.29
শূদ্র এতান্পরিচরেত্ত্রীন্বর্ণাননসূয়কঃ
সংচয়াংশ্চ ন কুর্বীত জাতু শূদ্রঃ কথংচন
60.30
পাপীয়ান্হি ধনং লব্ধ্বা বশে কুর্যাদ্গরীয়সঃ
রাজ্ঞা বা সমনুজ্ঞাতঃ কামং কুর্বীত ধার্মিকঃ
60.31
তস্য বৃত্তিং প্রবক্ষ্যামি যচ্চ তস্যোপজীবনম্
অবশ্যভরণীয়ো হি বর্ণানাং শূদ্র উচ্যতে
60.32
ছত্রং বেষ্টনমৌশীরমুপানদ্ব্যজনানি চ
যাতয়ামানি দেয়ানি শূদ্রায় পরিচারিণে
60.33
অধার্যাণি বিশীর্ণানি বসনানি দ্বিজাতিভিঃ
শূদ্রায়ৈব বিধেয়ানি তস্য ধর্মধনং হি তৎ
60.34
যশ্চ কশ্চিদ্দ্বিজাতীনাং শূদ্রঃ শুশ্রূষুরাব্রজেৎ
কল্প্যাং তস্য তু তেনাহুর্বৃত্তিং ধর্মবিদো জনাঃ
দেয়ঃ পিণ্ডোঽনপেতায় ভর্তব্যৌ বৃদ্ধদুর্বলৌ
60.35
শূদ্রেণ চ ন হাতব্যো ভর্তা কস্যাংচিদাপদি
অতিরেকেণ ভর্তব্যো ভর্তা দ্রব্যপরিক্ষয়ে
ন হি স্বমস্তি শূদ্রস্য ভর্তৃহার্যধনো হ্যসৌ
60.36
উক্তস্ত্রয়াণাং বর্ণানাং যজ্ঞস্ত্রয্যৈব ভারত
স্বাহাকারনমস্কারৌ মন্ত্রঃ শূদ্রে বিধীয়তে
60.37
তাভ্যাং শূদ্রঃ পাকয়জ্ঞৈর্যজেত ব্রতবান্স্বয়ম্
পূর্ণপাত্রময়ীমাহুঃ পাকয়জ্ঞস্য দক্ষিণাম্
60.38
শূদ্রঃ পৈজবনো নাম সহস্রাণাং শতং দদৌ
ঐন্দ্রাগ্নেন বিধানেন দক্ষিণামিতি নঃ শ্রুতম্
60.39
অতো হি সর্ববর্ণানাং শ্রদ্ধায়জ্ঞো বিধীয়তে
দৈবতং হি মহচ্ছ্রদ্ধা পবিত্রং যজতাং চ যৎ
60.40
দৈবতং পরমং বিপ্রাঃ স্বেন স্বেন পরস্পরম্
অয়জন্নিহ সত্রৈস্তে তৈস্তৈঃ কামৈঃ সনাতনৈঃ
60.41
সংসৃষ্টা ব্রাহ্মণৈরেব ত্রিষু বর্ণেষু সৃষ্টয়ঃ
দেবানামপি যে দেবা যদ্ব্রূয়ুস্তে পরং হি তৎ
তস্মাদ্বর্ণৈঃ সর্বয়জ্ঞাঃ সংসৃজ্যন্তে ন কাম্যয়া
60.42
ঋগ্যজুঃসামবিত্পূজ্যো নিত্যং স্যাদ্দেববদ্দ্বিজঃ
অনৃগ্যজুরসামা তু প্রাজাপত্য উপদ্রবঃ
60.43
যজ্ঞো মনীষয়া তাত সর্ববর্ণেষু ভারত
নাস্য যজ্ঞহনো দেবা ঈহন্তে নেতরে জনাঃ
তস্মাত্সর্বেষু বর্ণেষু শ্রদ্ধায়জ্ঞো বিধীয়তে
60.44
স্বং দৈবতং ব্রাহ্মণাঃ স্বেন নিত্যং; পরান্বর্ণানয়জন্নেবমাসীৎ
আরোচিতা নঃ সুমহান্স ধর্মঃ; সৃষ্টো ব্রহ্মণা ত্রিষু বর্ণেষু দৃষ্টঃ
60.45
তস্মাদ্বর্ণা ঋজবো জাতিধর্মাঃ; সংসৃজ্যন্তে তস্য বিপাক এষঃ
একং সাম যজুরেকমৃগেকা; বিপ্রশ্চৈকোঽনিশ্চয়স্তেষু দৃষ্টঃ
60.46
অত্র গাথা যজ্ঞগীতাঃ কীর্তয়ন্তি পুরাবিদঃ
বৈখানসানাং রাজেন্দ্র মুনীনাং যষ্টুমিচ্ছতাম্
60.47
উদিতেঽনুদিতে বাপি শ্রদ্দধানো জিতেন্দ্রিয়ঃ
বহ্নিং জুহোতি ধর্মেণ শ্রদ্ধা বৈ কারণং মহৎ
60.48
যত্স্কন্নমস্য তত্পূর্বং যদস্কন্নং তদুত্তরম্
বহূনি যজ্ঞরূপাণি নানাকর্মফলানি চ
60.49
তানি যঃ সংবিজানাতি জ্ঞাননিশ্চয়নিশ্চিতঃ
দ্বিজাতিঃ শ্রদ্ধয়োপেতঃ স যষ্টুং পুরুষোঽর্হতি
60.50
স্তেনো বা যদি বা পাপো যদি বা পাপকৃত্তমঃ
যষ্টুমিচ্ছতি যজ্ঞং যঃ সাধুমেব বদন্তি তম্
60.51
ঋষয়স্তং প্রশংসন্তি সাধু চৈতদসংশয়ম্
সর্বথা সর্ববর্ণৈর্হি যষ্টব্যমিতি নিশ্চয়ঃ
ন হি যজ্ঞসমং কিংচিত্ত্রিষু লোকেষু বিদ্যতে
60.52
তস্মাদ্যষ্টব্যমিত্যাহুঃ পুরুষেণানসূয়তা
শ্রদ্ধাপবিত্রমাশ্রিত্য যথাশক্তি প্রয়চ্ছতা