Utshovঅধ্যায় 59
59.1
বৈশংপায়ন উবাচ
ততঃ কাল্যং সমুত্থায় কৃতপৌর্বাহ্ণিকক্রিয়াঃ
যয়ুস্তে নগরাকারৈ রথৈঃ পাণ্ডবয়াদবাঃ
59.2
প্রপদ্য চ কুরুক্ষেত্রং ভীষ্মমাসাদ্য চানঘম্
সুখাং চ রজনীং পৃষ্ট্বা গাঙ্গেয়ং রথিনাং বরম্
59.3
ব্যাসাদীনভিবাদ্যর্ষীন্সর্বৈস্তৈশ্চাভিনন্দিতাঃ
নিষেদুরভিতো ভীষ্মং পরিবার্য সমন্ততঃ
59.4
ততো রাজা মহাতেজা ধর্মরাজো যুধিষ্ঠিরঃ
অব্রবীত্প্রাঞ্জলির্ভীষ্মং প্রতিপূজ্যাভিবাদ্য চ
59.5
য এষ রাজা-রাজেতি শব্দশ্চরতি ভারত
কথমেষ সমুত্পন্নস্তন্মে ব্রূহি পিতামহ
59.6
তুল্যপাণিশিরোগ্রীবস্তুল্যবুদ্ধীন্দ্রিয়াত্মকঃ
তুল্যদুঃখসুখাত্মা চ তুল্যপৃষ্ঠভুজোদরঃ
59.7
তুল্যশুক্রাস্থিমজ্জশ্চ তুল্যমাংসাসৃগেব চ
নিঃশ্বাসোচ্ছ্বাসতুল্যশ্চ তুল্যপ্রাণশরীরবান্
59.8
সমানজন্মমরণঃ সমঃ সর্বগুণৈর্নৃণাম্
বিশিষ্টবুদ্ধীঞ্শূরাংশ্চ কথমেকোঽধিতিষ্ঠতি
59.9
কথমেকো মহীং কৃত্স্নাং বীরশূরার্যসংকুলাম্
রক্ষত্যপি চ লোকোঽস্য প্রসাদমভিবাঞ্ছতি
59.10
একস্য চ প্রসাদেন কৃত্স্নো লোকঃ প্রসীদতি
ব্যাকুলেনাকুলঃ সর্বো ভবতীতি বিনিশ্চয়ঃ
59.11
এতদিচ্ছাম্যহং সর্বং তত্ত্বেন ভরতর্ষভ
শ্রোতুং তন্মে যথাতত্ত্বং প্রব্রূহি বদতাং বর
59.12
নৈতত্কারণমল্পং হি ভবিষ্যতি বিশাং পতে
যদেকস্মিঞ্জগত্সর্বং দেববদ্যাতি সংনতিম্
59.13
ভীষ্ম উবাচ
নিয়তস্ত্বং নরশ্রেষ্ঠ শৃণু সর্বমশেষতঃ
যথা রাজ্যং সমুত্পন্নমাদৌ কৃতয়ুগেঽভবৎ
59.14
নৈব রাজ্যং ন রাজাসীন্ন দণ্ডো ন চ দাণ্ডিকঃ
ধর্মেণৈব প্রজাঃ সর্বা রক্ষন্তি চ পরস্পরম্
59.15
পালয়ানাস্তথান্যোন্যং নরা ধর্মেণ ভারত
খেদং পরমমাজগ্মুস্ততস্তান্মোহ আবিশৎ
59.16
তে মোহবশমাপন্না মানবা মনুজর্ষভ
প্রতিপত্তিবিমোহাচ্চ ধর্মস্তেষামনীনশৎ
59.17
নষ্টায়াং প্রতিপত্তৌ তু মোহবশ্যা নরাস্তদা
লোভস্য বশমাপন্নাঃ সর্বে ভারতসত্তম
59.18
অপ্রাপ্তস্যাভিমর্শং তু কুর্বন্তো মনুজাস্ততঃ
কামো নামাপরস্তত্র সমপদ্যত বৈ প্রভো
59.19
তাংস্তু কামবশং প্রাপ্তান্রাগো নাম সমস্পৃশৎ
রক্তাশ্চ নাভ্যজানন্ত কার্যাকার্যং যুধিষ্ঠির
59.20
অগম্যাগমনং চৈব বাচ্যাবাচ্যং তথৈব চ
ভক্ষ্যাভক্ষ্যং চ রাজেন্দ্র দোষাদোষং চ নাত্যজন্
59.21
বিপ্লুতে নরলোকেঽস্মিংস্ততো ব্রহ্ম ননাশ হ
নাশাচ্চ ব্রহ্মণো রাজন্ধর্মো নাশমথাগমৎ
59.22
নষ্টে ব্রহ্মণি ধর্মে চ দেবাস্ত্রাসমথাগমন্
তে ত্রস্তা নরশার্দূল ব্রহ্মাণং শরণং যয়ুঃ
59.23
প্রপদ্য ভগবন্তং তে দেবা লোকপিতামহম্
ঊচুঃ প্রাঞ্জলয়ঃ সর্বে দুঃখশোকভয়ার্দিতাঃ
59.24
ভগবন্নরলোকস্থং নষ্টং ব্রহ্ম সনাতনম্
লোভমোহাদিভির্ভাবৈস্ততো নো ভয়মাবিশৎ
59.25
ব্রহ্মণশ্চ প্রণাশেন ধর্মোঽপ্যনশদীশ্বর
ততঃ স্ম সমতাং যাতা মর্ত্যৈস্ত্রিভুবনেশ্বর
59.26
অধো হি বর্ষমস্মাকং মর্ত্যাস্তূর্ধ্বপ্রবর্ষিণঃ
ক্রিয়াব্যুপরমাত্তেষাং ততোঽগচ্ছাম সংশয়ম্
59.27
অত্র নিঃশ্রেয়সং যন্নস্তদ্ধ্যায়স্ব পিতামহ
ত্বত্প্রভাবসমুত্থোঽসৌ প্রভাবো নো বিনশ্যতি
59.28
তানুবাচ সুরান্সর্বান্স্বয়ংভূর্ভগবাংস্ততঃ
শ্রেয়োঽহং চিন্তয়িষ্যামি ব্যেতু বো ভীঃ সুরর্ষভাঃ
59.29
ততোঽধ্যায়সহস্রাণাং শতং চক্রে স্ববুদ্ধিজম্
যত্র ধর্মস্তথৈবার্থঃ কামশ্চৈবানুবর্ণিতঃ
59.30
ত্রিবর্গ ইতি বিখ্যাতো গণ এষ স্বয়ংভুবা
চতুর্থো মোক্ষ ইত্যেব পৃথগর্থঃ পৃথগ্গণঃ
59.31
মোক্ষস্যাপি ত্রিবর্গোঽন্যঃ প্রোক্তঃ সত্ত্বং রজস্তমঃ
স্থানং বৃদ্ধিঃ ক্ষয়শ্চৈব ত্রিবর্গশ্চৈব দণ্ডজঃ
59.32
আত্মা দেশশ্চ কালশ্চাপ্যুপায়াঃ কৃত্যমেব চ
সহায়াঃ কারণং চৈব ষড্বর্গো নীতিজঃ স্মৃতঃ
59.33
ত্রয়ী চান্বীক্ষিকী চৈব বার্তা চ ভরতর্ষভ
দণ্ডনীতিশ্চ বিপুলা বিদ্যাস্তত্র নিদর্শিতাঃ
59.34
অমাত্যরক্ষাপ্রণিধী রাজপুত্রস্য রক্ষণম্
চারশ্চ বিবিধোপায়ঃ প্রণিধিশ্চ পৃথগ্বিধঃ
59.35
সাম চোপপ্রদানং চ ভেদো দণ্ডশ্চ পাণ্ডব
উপেক্ষা পঞ্চমী চাত্র কার্ত্স্ন্যেন সমুদাহৃতা
59.36
মন্ত্রশ্চ বর্ণিতঃ কৃত্স্নস্তথা ভেদার্থ এব চ
বিভ্রংশশ্চৈব মন্ত্রস্য সিদ্ধ্যসিদ্ধ্যোশ্চ যত্ফলম্
59.37
সংধিশ্চ বিবিধাভিখ্যো হীনো মধ্যস্তথোত্তমঃ
ভয়সত্কারবিত্তাখ্যঃ কার্ত্স্ন্যেন পরিবর্ণিতঃ
59.38
যাত্রাকালাশ্চ চত্বারস্ত্রিবর্গস্য চ বিস্তরঃ
বিজয়ো ধর্ময়ুক্তশ্চ তথার্থবিজয়শ্চ হ
59.39
আসুরশ্চৈব বিজয়স্তথা কার্ত্স্ন্যেন বর্ণিতঃ
লক্ষণং পঞ্চবর্গস্য ত্রিবিধং চাত্র বর্ণিতম্
59.40
প্রকাশশ্চাপ্রকাশশ্চ দণ্ডোঽথ পরিশব্দিতঃ
প্রকাশোঽষ্টবিধস্তত্র গুহ্যস্তু বহুবিস্তরঃ
59.41
রথা নাগা হয়াশ্চৈব পাদাতাশ্চৈব পাণ্ডব
বিষ্টির্নাবশ্চরাশ্চৈব দেশিকাঃ পথি চাষ্টকম্
59.42
অঙ্গান্যেতানি কৌরব্য প্রকাশানি বলস্য তু
জঙ্গমাজঙ্গমাশ্চোক্তাশ্চূর্ণয়োগা বিষাদয়ঃ
59.43
স্পর্শে চাভ্যবহার্যে চাপ্যুপাংশুর্বিবিধঃ স্মৃতঃ
অরির্মিত্রমুদাসীন ইত্যেতেঽপ্যনুবর্ণিতাঃ
59.44
কৃত্স্না মার্গগুণাশ্চৈব তথা ভূমিগুণাশ্চ হ
আত্মরক্ষণমাশ্বাসঃ স্পশানাং চান্ববেক্ষণম্
59.45
কল্পনা বিবিধাশ্চাপি নৃনাগরথবাজিনাম্
ব্যূহাশ্চ বিবিধাভিখ্যা বিচিত্রং যুদ্ধকৌশলম্
59.46
উত্পাতাশ্চ নিপাতাশ্চ সুয়ুদ্ধং সুপলায়নম্
শস্ত্রাণাং পায়নজ্ঞানং তথৈব ভরতর্ষভ
59.47
বলব্যসনমুক্তং চ তথৈব বলহর্ষণম্
পীডনাস্কন্দকালশ্চ ভয়কালশ্চ পাণ্ডব
59.48
তথা খাতবিধানং চ যোগসংচার এব চ
চৌরাটব্যবলৈশ্চোগ্রৈঃ পররাষ্ট্রস্য পীডনম্
59.49
অগ্নিদৈর্গরদৈশ্চৈব প্রতিরূপকচারকৈঃ
শ্রেণিমুখ্যোপজাপেন বীরুধশ্ছেদনেন চ
59.50
দূষণেন চ নাগানামাশঙ্কাজননেন চ
আরোধনেন ভক্তস্য পথশ্চোপার্জনেন চ
59.51
সপ্তাঙ্গস্য চ রাজ্যস্য হ্রাসবৃদ্ধিসমঞ্জসম্
দূতসামর্থ্যয়োগশ্চ রাষ্ট্রস্য চ বিবর্ধনম্
59.52
অরিমধ্যস্থমিত্রাণাং সম্যক্চোক্তং প্রপঞ্চনম্
অবমর্দঃ প্রতীঘাতস্তথৈব চ বলীয়সাম্
59.53
ব্যবহারঃ সুসূক্ষ্মশ্চ তথা কণ্টকশোধনম্
শমো ব্যায়াময়োগশ্চ যোগো দ্রব্যস্য সংচয়ঃ
59.54
অভৃতানাং চ ভরণং ভৃতানাং চান্ববেক্ষণম্
অর্থকালে প্রদানং চ ব্যসনেষ্বপ্রসঙ্গিতা
59.55
তথা রাজগুণাশ্চৈব সেনাপতিগুণাশ্চ যে
কারণস্য চ কর্তুশ্চ গুণদোষাস্তথৈব চ
59.56
দুষ্টেঙ্গিতং চ বিবিধং বৃত্তিশ্চৈবানুজীবিনাম্
শঙ্কিতত্বং চ সর্বস্য প্রমাদস্য চ বর্জনম্
59.57
অলব্ধলিপ্সা লব্ধস্য তথৈব চ বিবর্ধনম্
প্রদানং চ বিবৃদ্ধস্য পাত্রেভ্যো বিধিবত্তথা
59.58
বিসর্গোঽর্থস্য ধর্মার্থমর্থার্থং কামহেতুনা
চতুর্থো ব্যসনাঘাতে তথৈবাত্রানুবর্ণিতঃ
59.59
ক্রোধজানি তথোগ্রাণি কামজানি তথৈব চ
দশোক্তানি কুরুশ্রেষ্ঠ ব্যসনান্যত্র চৈব হ
59.60
মৃগয়াক্ষাস্তথা পানং স্ত্রিয়শ্চ ভরতর্ষভ
কামজান্যাহুরাচার্যাঃ প্রোক্তানীহ স্বয়ংভুবা
59.61
বাক্পারুষ্যং তথোগ্রত্বং দণ্ডপারুষ্যমেব চ
আত্মনো নিগ্রহস্ত্যাগোঽথার্থদূষণমেব চ
59.62
যন্ত্রাণি বিবিধান্যেব ক্রিয়াস্তেষাং চ বর্ণিতাঃ
অবমর্দঃ প্রতীঘাতঃ কেতনানাং চ ভঞ্জনম্
59.63
চৈত্যদ্রুমাণামামর্দো রোধঃকর্মান্তনাশনম্
অপস্করোঽথ গমনং তথোপাস্যা চ বর্ণিতা
59.64
পণবানকশঙ্খানাং ভেরীণাং চ যুধাং বর
উপার্জনং চ দ্রব্যাণাং পরমর্ম চ তানি ষট্
59.65
লব্ধস্য চ প্রশমনং সতাং চৈব হি পূজনম্
বিদ্বদ্ভিরেকীভাবশ্চ প্রাতর্হোমবিধিজ্ঞতা
59.66
মঙ্গলালম্ভনং চৈব শরীরস্য প্রতিক্রিয়া
আহারয়োজনং চৈব নিত্যমাস্তিক্যমেব চ
59.67
একেন চ যথোত্থেয়ং সত্যত্বং মধুরা গিরঃ
উত্সবানাং সমাজানাং ক্রিয়াঃ কেতনজাস্তথা
59.68
প্রত্যক্ষা চ পরোক্ষা চ সর্বাধিকরণেষু চ
বৃত্তির্ভরতশার্দূল নিত্যং চৈবান্ববেক্ষণম্
59.69
অদণ্ড্যত্বং চ বিপ্রাণাং যুক্ত্যা দণ্ডনিপাতনম্
অনুজীবিস্বজাতিভ্যো গুণেষু পরিরক্ষণম্
59.70
রক্ষণং চৈব পৌরাণাং স্বরাষ্ট্রস্য বিবর্ধনম্
মণ্ডলস্থা চ যা চিন্তা রাজন্দ্বাদশরাজিকা
59.71
দ্বাসপ্ততিমতিশ্চৈব প্রোক্তা যা চ স্বয়ংভুবা
দেশজাতিকুলানাং চ ধর্মাঃ সমনুবর্ণিতাঃ
59.72
ধর্মশ্চার্থশ্চ কামশ্চ মোক্ষশ্চাত্রানুবর্ণিতঃ
উপায়শ্চার্থলিপ্সা চ বিবিধা ভূরিদক্ষিণাঃ
59.73
মূলকর্মক্রিয়া চাত্র মায়া যোগশ্চ বর্ণিতঃ
দূষণং স্রোতসামত্র বর্ণিতং চ স্থিরাম্ভসাম্
59.74
যৈর্যৈরুপায়ৈর্লোকশ্চ ন চলেদার্যবর্ত্মনঃ
তত্সর্বং রাজশার্দূল নীতিশাস্ত্রেঽনুবর্ণিতম্
59.75
এতত্কৃত্বা শুভং শাস্ত্রং ততঃ স ভগবান্প্রভুঃ
দেবানুবাচ সংহৃষ্টঃ সর্বাঞ্শক্রপুরোগমান্
59.76
উপকারায় লোকস্য ত্রিবর্গস্থাপনায় চ
নবনীতং সরস্বত্যা বুদ্ধিরেষা প্রভাবিতা
59.77
দণ্ডেন সহিতা হ্যেষা লোকরক্ষণকারিকা
নিগ্রহানুগ্রহরতা লোকাননু চরিষ্যতি
59.78
দণ্ডেন নীয়তে চেয়ং দণ্ডং নয়তি চাপ্যুত
দণ্ডনীতিরিতি প্রোক্তা ত্রীঁল্লোকাননুবর্ততে
59.79
ষাড্গুণ্যগুণসারৈষা স্থাস্যত্যগ্রে মহাত্মসু
মহত্ত্বাত্তস্য দণ্ডস্য নীতির্বিস্পষ্টলক্ষণা
59.80
নয়চারশ্চ বিপুলো যেন সর্বমিদং ততম্
আগমশ্চ পুরাণানাং মহর্ষীণাং চ সংভবঃ
59.81
তীর্থবংশশ্চ বংশশ্চ নক্ষত্রাণাং যুধিষ্ঠির
সকলং চাতুরাশ্রম্যং চাতুর্হোত্রং তথৈব চ
59.82
চাতুর্বর্ণ্যং তথৈবাত্র চাতুর্বেদ্যং চ বর্ণিতম্
ইতিহাসোপবেদাশ্চ ন্যায়ঃ কৃত্স্নশ্চ বর্ণিতঃ
59.83
তপো জ্ঞানমহিংসা চ সত্যাসত্যে নয়ঃ পরঃ
বৃদ্ধোপসেবা দানং চ শৌচমুত্থানমেব চ
59.84
সর্বভূতানুকম্পা চ সর্বমত্রোপবর্ণিতম্
ভুবি বাচোগতং যচ্চ তচ্চ সর্বং সমর্পিতম্
59.85
তস্মিন্পৈতামহে শাস্ত্রে পাণ্ডবৈতদসংশয়ম্
ধর্মার্থকামমোক্ষাশ্চ সকলা হ্যত্র শব্দিতাঃ
59.86
ততস্তাং ভগবান্নীতিং পূর্বং জগ্রাহ শংকরঃ
বহুরূপো বিশালাক্ষঃ শিবঃ স্থাণুরুমাপতিঃ
59.87
যুগানামায়ুষো হ্রাসং বিজ্ঞায় ভগবাঞ্শিবঃ
সংচিক্ষেপ ততঃ শাস্ত্রং মহার্থং ব্রহ্মণা কৃতম্
59.88
বৈশালাক্ষমিতি প্রোক্তং তদিন্দ্রঃ প্রত্যপদ্যত
দশাধ্যায়সহস্রাণি সুব্রহ্মণ্যো মহাতপাঃ
59.89
ভগবানপি তচ্ছাস্ত্রং সংচিক্ষেপ পুরংদরঃ
সহস্রৈঃ পঞ্চভিস্তাত যদুক্তং বাহুদন্তকম্
59.90
অধ্যায়ানাং সহস্রৈস্তু ত্রিভিরেব বৃহস্পতিঃ
সংচিক্ষেপেশ্বরো বুদ্ধ্যা বার্হস্পত্যং তদুচ্যতে
59.91
অধ্যায়ানাং সহস্রেণ কাব্যঃ সংক্ষেপমব্রবীৎ
তচ্ছাস্ত্রমমিতপ্রজ্ঞো যোগাচার্যো মহাতপাঃ
59.92
এবং লোকানুরোধেন শাস্ত্রমেতন্মহর্ষিভিঃ
সংক্ষিপ্তমায়ুর্বিজ্ঞায় মর্ত্যানাং হ্রাসি পাণ্ডব
59.93
অথ দেবাঃ সমাগম্য বিষ্ণুমূচুঃ প্রজাপতিম্
একো যোঽর্হতি মর্ত্যেভ্যঃ শ্রৈষ্ঠ্যং তং বৈ সমাদিশ
59.94
ততঃ সংচিন্ত্য ভগবান্দেবো নারায়ণঃ প্রভুঃ
তৈজসং বৈ বিরজসং সোঽসৃজন্মানসং সুতম্
59.95
বিরজাস্তু মহাভাগ বিভুত্বং ভুবি নৈচ্ছত
ন্যাসায়ৈবাভবদ্বুদ্ধিঃ প্রণীতা তস্য পাণ্ডব
59.96
কীর্তিমাংস্তস্য পুত্রোঽভূত্সোঽপি পঞ্চাতিগোঽভবৎ
কর্দমস্তস্য চ সুতঃ সোঽপ্যতপ্যন্মহত্তপঃ
59.97
প্রজাপতেঃ কর্দমস্য অনঙ্গো নাম বৈ সুতঃ
প্রজানাং রক্ষিতা সাধুর্দণ্ডনীতিবিশারদঃ
59.98
অনঙ্গপুত্রোঽতিবলো নীতিমানধিগম্য বৈ
অভিপেদে মহীরাজ্যমথেন্দ্রিয়বশোঽভবৎ
59.99
মৃত্যোস্তু দুহিতা রাজন্সুনীথা নাম মানসী
প্রখ্যাতা ত্রিষু লোকেষু যা সা বেনমজীজনৎ
59.100
তং প্রজাসু বিধর্মাণং রাগদ্বেষবশানুগম্
মন্ত্রপূতৈঃ কুশৈর্জঘ্নুরৃষয়ো ব্রহ্মবাদিনঃ
59.101
মমন্থুর্দক্ষিণং চোরুমৃষয়স্তস্য মন্ত্রতঃ
ততোঽস্য বিকৃতো জজ্ঞে হ্রস্বাঙ্গঃ পুরুষো ভুবি
59.102
দগ্ধস্থাণুপ্রতীকাশো রক্তাক্ষঃ কৃষ্ণমূর্ধজঃ
নিষীদেত্যেবমূচুস্তমৃষয়ো ব্রহ্মবাদিনঃ
59.103
তস্মান্নিষাদাঃ সংভূতাঃ ক্রূরাঃ শৈলবনাশ্রয়াঃ
যে চান্যে বিন্ধ্যনিলয়া ম্লেচ্ছাঃ শতসহস্রশঃ
59.104
ভূয়োঽস্য দক্ষিণং পাণিং মমন্থুস্তে মহর্ষয়ঃ
ততঃ পুরুষ উত্পন্নো রূপেণেন্দ্র ইবাপরঃ
59.105
কবচী বদ্ধনিস্ত্রিংশঃ সশরঃ সশরাসনঃ
বেদবেদাঙ্গবিচ্চৈব ধনুর্বেদে চ পারগঃ
59.106
তং দণ্ডনীতিঃ সকলা শ্রিতা রাজন্নরোত্তমম্
ততঃ স প্রাঞ্জলির্বৈন্যো মহর্ষীংস্তানুবাচ হ
59.107
সুসূক্ষ্মা মে সমুত্পন্না বুদ্ধির্ধর্মার্থদর্শিনী
অনয়া কিং ময়া কার্যং তন্মে তত্ত্বেন শংসত
59.108
যন্মাং ভবন্তো বক্ষ্যন্তি কার্যমর্থসমন্বিতম্
তদহং বৈ করিষ্যামি নাত্র কার্যা বিচারণা
59.109
তমূচুরথ দেবাস্তে তে চৈব পরমর্ষয়ঃ
নিয়তো যত্র ধর্মো বৈ তমশঙ্কঃ সমাচর
59.110
প্রিয়াপ্রিয়ে পরিত্যজ্য সমঃ সর্বেষু জন্তুষু
কামক্রোধৌ চ লোভং চ মানং চোত্সৃজ্য দূরতঃ
59.111
যশ্চ ধর্মাত্প্রবিচলেল্লোকে কশ্চন মানবঃ
নিগ্রাহ্যস্তে স বাহুভ্যাং শশ্বদ্ধর্মমবেক্ষতঃ
59.112
প্রতিজ্ঞাং চাধিরোহস্ব মনসা কর্মণা গিরা
পালয়িষ্যাম্যহং ভৌমং ব্রহ্ম ইত্যেব চাসকৃৎ
59.113
যশ্চাত্র ধর্মনীত্যুক্তো দণ্ডনীতিব্যপাশ্রয়ঃ
তমশঙ্কঃ করিষ্যামি স্ববশো ন কদাচন
59.114
অদণ্ড্যা মে দ্বিজাশ্চেতি প্রতিজানীষ্ব চাভিভো
লোকং চ সংকরাত্কৃত্স্নাত্ত্রাতাস্মীতি পরংতপ
59.115
বৈন্যস্ততস্তানুবাচ দেবানৃষিপুরোগমান্
ব্রাহ্মণা মে সহায়াশ্চেদেবমস্তু সুরর্ষভাঃ
59.116
এবমস্ত্বিতি বৈন্যস্তু তৈরুক্তো ব্রহ্মবাদিভিঃ
পুরোধাশ্চাভবত্তস্য শুক্রো ব্রহ্মময়ো নিধিঃ
59.117
মন্ত্রিণো বালখিল্যাস্তু সারস্বত্যো গণো হ্যভূৎ
মহর্ষির্ভগবান্গর্গস্তস্য সাংবত্সরোঽভবৎ
59.118
আত্মনাষ্টম ইত্যেব শ্রুতিরেষা পরা নৃষু
উত্পন্নৌ বন্দিনৌ চাস্য তত্পূর্বৌ সূতমাগধৌ
59.119
সমতাং বসুধায়াশ্চ স সম্যগুপপাদয়ৎ
বৈষম্যং হি পরং ভূমেরাসীদিতি হ নঃ শ্রুতম্
59.120
স বিষ্ণুনা চ দেবেন শক্রেণ বিবুধৈঃ সহ
ঋষিভিশ্চ প্রজাপাল্যে ব্রহ্মণা চাভিষেচিতঃ
59.121
তং সাক্ষাত্পৃথিবী ভেজে রত্নান্যাদায় পাণ্ডব
সাগরঃ সরিতাং ভর্তা হিমবাংশ্চাচলোত্তমঃ
59.122
শক্রশ্চ ধনমক্ষয্যং প্রাদাত্তস্য যুধিষ্ঠির
রুক্মং চাপি মহামেরুঃ স্বয়ং কনকপর্বতঃ
59.123
যক্ষরাক্ষসভর্তা চ ভগবান্নরবাহনঃ
ধর্মে চার্থে চ কামে চ সমর্থং প্রদদৌ ধনম্
59.124
হয়া রথাশ্চ নাগাশ্চ কোটিশঃ পুরুষাস্তথা
প্রাদুর্বভূবুর্বৈন্যস্য চিন্তনাদেব পাণ্ডব
ন জরা ন চ দুর্ভিক্ষং নাধয়ো ব্যাধয়স্তথা
59.125
সরীসৃপেভ্যঃ স্তেনেভ্যো ন চান্যোন্যাত্কদাচন
ভয়মুত্পদ্যতে তত্র তস্য রাজ্ঞোঽভিরক্ষণাৎ
59.126
তেনেয়ং পৃথিবী দুগ্ধা সস্যানি দশ সপ্ত চ
যক্ষরাক্ষসনাগৈশ্চাপীপ্সিতং যস্য যস্য যৎ
59.127
তেন ধর্মোত্তরশ্চায়ং কৃতো লোকো মহাত্মনা
রঞ্জিতাশ্চ প্রজাঃ সর্বাস্তেন রাজেতি শব্দ্যতে
59.128
ব্রাহ্মণানাং ক্ষতত্রাণাত্ততঃ ক্ষত্রিয় উচ্যতে
প্রথিতা ধনতশ্চেয়ং পৃথিবী সাধুভিঃ স্মৃতা
59.129
স্থাপনং চাকরোদ্বিষ্ণুঃ স্বয়মেব সনাতনঃ
নাতিবর্তিষ্যতে কশ্চিদ্রাজংস্ত্বামিতি পার্থিব
59.130
তপসা ভগবান্বিষ্ণুরাবিবেশ চ ভূমিপম্
দেববন্নরদেবানাং নমতে যজ্জগন্নৃপ
59.131
দণ্ডনীত্যা চ সততং রক্ষিতং তং নরেশ্বর
নাধর্ষয়ত্ততঃ কশ্চিচ্চারনিত্যাচ্চ দর্শনাৎ
59.132
আত্মনা করণৈশ্চৈব সমস্যেহ মহীক্ষিতঃ
কো হেতুর্যদ্বশে তিষ্ঠেল্লোকো দৈবাদৃতে গুণাৎ
59.133
বিষ্ণোর্ললাটাত্কমলং সৌবর্ণমভবত্তদা
শ্রীঃ সংভূতা যতো দেবী পত্নী ধর্মস্য ধীমতঃ
59.134
শ্রিয়ঃ সকাশাদর্থশ্চ জাতো ধর্মেণ পাণ্ডব
অথ ধর্মস্তথৈবার্থঃ শ্রীশ্চ রাজ্যে প্রতিষ্ঠিতা
59.135
সুকৃতস্য ক্ষয়াচ্চৈব স্বর্লোকাদেত্য মেদিনীম্
পার্থিবো জায়তে তাত দণ্ডনীতিবশানুগঃ
59.136
মহত্ত্বেন চ সংয়ুক্তো বৈষ্ণবেন নরো ভুবি
বুদ্ধ্যা ভবতি সংয়ুক্তো মাহাত্ম্যং চাধিগচ্ছতি
59.137
স্থাপনামথ দেবানাং ন কশ্চিদতিবর্ততে
তিষ্ঠত্যেকস্য চ বশে তং চেদনুবিধীয়তে
59.138
শুভং হি কর্ম রাজেন্দ্র শুভত্বায়োপকল্পতে
তুল্যস্যৈকস্য যস্যায়ং লোকো বচসি তিষ্ঠতি
59.139
যো হ্যস্য মুখমদ্রাক্ষীত্সোম্য সোঽস্য বশানুগঃ
সুভগং চার্থবন্তং চ রূপবন্তং চ পশ্যতি
59.140
ততো জগতি রাজেন্দ্র সততং শব্দিতং বুধৈঃ
দেবাশ্চ নরদেবাশ্চ তুল্যা ইতি বিশাং পতে
59.141
এতত্তে সর্বমাখ্যাতং মহত্ত্বং প্রতি রাজসু
কার্ত্স্ন্যেন ভরতশ্রেষ্ঠ কিমন্যদিহ বর্ততাম্