Utshovঅধ্যায় 58
58.1
ভীষ্ম উবাচ
এতত্তে রাজধর্মাণাং নবনীতং যুধিষ্ঠির
বৃহস্পতির্হি ভগবান্নান্যং ধর্মং প্রশংসতি
58.2
বিশালাক্ষশ্চ ভগবান্কাব্যশ্চৈব মহাতপাঃ
সহস্রাক্ষো মহেন্দ্রশ্চ তথা প্রাচেতসো মনুঃ
58.3
ভরদ্বাজশ্চ ভগবাংস্তথা গৌরশিরা মুনিঃ
রাজশাস্ত্রপ্রণেতারো ব্রহ্মণ্যা ব্রহ্মবাদিনঃ
58.4
রক্ষামেব প্রশংসন্তি ধর্মং ধর্মভৃতাং বর
রাজ্ঞাং রাজীবতাম্রাক্ষ সাধনং চাত্র বৈ শৃণু
58.5
চারশ্চ প্রণিধিশ্চৈব কালে দানমমত্সরঃ
যুক্ত্যাদানং ন চাদানময়োগেন যুধিষ্ঠির
58.6
সতাং সংগ্রহণং শৌর্যং দাক্ষ্যং সত্যং প্রজাহিতম্
অনার্জবৈরার্জবৈশ্চ শত্রুপক্ষস্য ভেদনম্
58.7
সাধূনামপরিত্যাগঃ কুলীনানাং চ ধারণম্
নিচয়শ্চ নিচেয়ানাং সেবা বুদ্ধিমতামপি
58.8
বলানাং হর্ষণং নিত্যং প্রজানামন্ববেক্ষণম্
কার্যেষ্বখেদঃ কোশস্য তথৈব চ বিবর্ধনম্
58.9
পুরগুপ্তিরবিশ্বাসঃ পৌরসংঘাতভেদনম্
কেতনানাং চ জীর্ণানামবেক্ষা চৈব সীদতাম্
58.10
দ্বিবিধস্য চ দণ্ডস্য প্রয়োগঃ কালচোদিতঃ
অরিমধ্যস্থমিত্রাণাং যথাবচ্চান্ববেক্ষণম্
58.11
উপজাপশ্চ ভৃত্যানামাত্মনঃ পরদর্শনাৎ
অবিশ্বাসঃ স্বয়ং চৈব পরস্যাশ্বাসনং তথা
58.12
নীতিধর্মানুসরণং নিত্যমুত্থানমেব চ
রিপূণামনবজ্ঞানং নিত্যং চানার্যবর্জনম্
58.13
উত্থানং হি নরেন্দ্রাণাং বৃহস্পতিরভাষত
রাজধর্মস্য যন্মূলং শ্লোকাংশ্চাত্র নিবোধ মে
58.14
উত্থানেনামৃতং লব্ধমুত্থানেনাসুরা হতাঃ
উত্থানেন মহেন্দ্রেণ শ্রৈষ্ঠ্যং প্রাপ্তং দিবীহ চ
58.15
উত্থানধীরঃ পুরুষো বাগ্ধীরানধিতিষ্ঠতি
উত্থানধীরং বাগ্ধীরা রময়ন্ত উপাসতে
58.16
উত্থানহীনো রাজা হি বুদ্ধিমানপি নিত্যশঃ
ধর্ষণীয়ো রিপূণাং স্যাদ্ভুজংগ ইব নির্বিষঃ
58.17
ন চ শত্রুরবজ্ঞেয়ো দুর্বলোঽপি বলীয়সা
অল্পোঽপি হি দহত্যগ্নির্বিষমল্পং হিনস্তি চ
58.18
একাশ্বেনাপি সংভূতঃ শত্রুর্দুর্গসমাশ্রিতঃ
তং তং তাপয়তে দেশমপি রাজ্ঞঃ সমৃদ্ধিনঃ
58.19
রাজ্ঞো রহস্যং যদ্বাক্যং জয়ার্থং লোকসংগ্রহঃ
হৃদি যচ্চাস্য জিহ্মং স্যাত্কারণার্থং চ যদ্ভবেৎ
58.20
যচ্চাস্য কার্যং বৃজিনমার্জবেনৈব ধার্যতে
দম্ভনার্থায় লোকস্য ধর্মিষ্ঠামাচরেত্ক্রিয়াম্
58.21
রাজ্যং হি সুমহত্তন্ত্রং দুর্ধার্যমকৃতাত্মভিঃ
ন শক্যং মৃদুনা বোঢুমাঘাতস্থানমুত্তমম্
58.22
রাজ্যং সর্বামিষং নিত্যমার্জবেনেহ ধার্যতে
তস্মান্মিশ্রেণ সততং বর্তিতব্যং যুধিষ্ঠির
58.23
যদ্যপ্যস্য বিপত্তিঃ স্যাদ্রক্ষমাণস্য বৈ প্রজাঃ
সোঽপ্যস্য বিপুলো ধর্ম এবংবৃত্তা হি ভূমিপাঃ
58.24
এষ তে রাজধর্মাণাং লেশঃ সমনুবর্ণিতঃ
ভূয়স্তে যত্র সংদেহস্তদ্ব্রূহি বদতাং বর
58.25
বৈশংপায়ন উবাচ
ততো ব্যাসশ্চ ভগবান্দেবস্থানোঽশ্মনা সহ
বাসুদেবঃ কৃপশ্চৈব সাত্যকিঃ সংজয়স্তথা
58.26
সাধু সাধ্বিতি সংহৃষ্টাঃ পুষ্যমাণৈরিবাননৈঃ
অস্তুবংস্তে নরব্যাঘ্রং ভীষ্মং ধর্মভৃতাং বরম্
58.27
ততো দীনমনা ভীষ্মমুবাচ কুরুসত্তমঃ
নেত্রাভ্যামশ্রুপূর্ণাভ্যাং পাদৌ তস্য শনৈঃ স্পৃশন্
58.28
শ্ব ইদানীং স্বসংদেহং প্রক্ষ্যামি ত্বা পিতামহ
উপৈতি সবিতাপ্যস্তং রসমাপীয় পার্থিবম্
58.29
ততো দ্বিজাতীনভিবাদ্য কেশবঃ; কৃপশ্চ তে চৈব যুধিষ্ঠিরাদয়ঃ
প্রদক্ষিণীকৃত্য মহানদীসুতং; ততো রথানারুরুহুর্মুদা যুতাঃ
58.30
দৃষদ্বতীং চাপ্যবগাহ্য সুব্রতাঃ; কৃতোদকার্যাঃ কৃতজপ্যমঙ্গলাঃ
উপাস্য সংধ্যাং বিধিবত্পরংতপা;স্ততঃ পুরং তে বিবিশুর্গজাহ্বয়ম্