Utshovঅধ্যায় 57
57.1
ভীষ্ম উবাচ
নিত্যোদ্যুক্তেন বৈ রাজ্ঞা ভবিতব্যং যুধিষ্ঠির
প্রশাম্যতে চ রাজা হি নারীবোদ্যমবর্জিতঃ
57.2
ভগবানুশনা চাহ শ্লোকমত্র বিশাং পতে
তমিহৈকমনা রাজন্গদতস্ত্বং নিবোধ মে
57.3
দ্বাবেতৌ গ্রসতে ভূমিঃ সর্পো বিলশয়ানিব
রাজানং চাবিরোদ্ধারং ব্রাহ্মণং চাপ্রবাসিনম্
57.4
তদেতন্নরশার্দূল হৃদি ত্বং কর্তুমর্হসি
সংধেয়ানপি সংধত্স্ব বিরোধ্যাংশ্চ বিরোধয়
57.5
সপ্তাঙ্গে যশ্চ তে রাজ্যে বৈপরীত্যং সমাচরেৎ
গুরুর্বা যদি বা মিত্রং প্রতিহন্তব্য এব সঃ
57.6
মরুত্তেন হি রাজ্ঞায়ং গীতঃ শ্লোকঃ পুরাতনঃ
রাজ্যাধিকারে রাজেন্দ্র বৃহস্পতিমতঃ পুরা
57.7
গুরোরপ্যবলিপ্তস্য কার্যাকার্যমজানতঃ
উত্পথপ্রতিপন্নস্য পরিত্যাগো বিধীয়তে
57.8
বাহোঃ পুত্রেণ রাজ্ঞা চ সগরেণেহ ধীমতা
অসমঞ্জাঃ সুতো জ্যেষ্ঠস্ত্যক্তঃ পৌরহিতৈষিণা
57.9
অসমঞ্জাঃ সরয্বাং প্রাক্পৌরাণাং বালকান্নৃপ
ন্যমজ্জয়দতঃ পিত্রা নির্ভর্ত্স্য স বিবাসিতঃ
57.10
ঋষিণোদ্দালকেনাপি শ্বেতকেতুর্মহাতপাঃ
মিথ্যা বিপ্রানুপচরন্সংত্যক্তো দয়িতঃ সুতঃ
57.11
লোকরঞ্জনমেবাত্র রাজ্ঞাং ধর্মঃ সনাতনঃ
সত্যস্য রক্ষণং চৈব ব্যবহারস্য চার্জবম্
57.12
ন হিংস্যাত্পরবিত্তানি দেয়ং কালে চ দাপয়েৎ
বিক্রান্তঃ সত্যবাক্ক্ষান্তো নৃপো ন চলতে পথঃ
57.13
গুপ্তমন্ত্রো জিতক্রোধো শাস্ত্রার্থগতনিশ্চয়ঃ
ধর্মে চার্থে চ কামে চ মোক্ষে চ সততং রতঃ
57.14
ত্রয্যা সংবৃতরন্ধ্রশ্চ রাজা ভবিতুমর্হতি
বৃজিনস্য নরেন্দ্রাণাং নান্যত্সংবরণাত্পরম্
57.15
চাতুর্বর্ণ্যস্য ধর্মাশ্চ রক্ষিতব্যা মহীক্ষিতা
ধর্মসংকররক্ষা হি রাজ্ঞাং ধর্মঃ সনাতনঃ
57.16
ন বিশ্বসেচ্চ নৃপতির্ন চাত্যর্থং ন বিশ্বসেৎ
ষাড্গুণ্যগুণদোষাংশ্চ নিত্যং বুদ্ধ্যাবলোকয়েৎ
57.17
দ্বিট্ছিদ্রদর্শী নৃপতির্নিত্যমেব প্রশস্যতে
ত্রিবর্গবিদিতার্থশ্চ যুক্তচারোপধিশ্চ যঃ
57.18
কোশস্যোপার্জনরতির্যমবৈশ্রবণোপমঃ
বেত্তা চ দশবর্গস্য স্থানবৃদ্ধিক্ষয়াত্মনঃ
57.19
অভৃতানাং ভবেদ্ভর্তা ভৃতানাং চান্ববেক্ষকঃ
নৃপতিঃ সুমুখশ্চ স্যাত্স্মিতপূর্বাভিভাষিতা
57.20
উপাসিতা চ বৃদ্ধানাং জিততন্দ্রীরলোলুপঃ
সতাং বৃত্তে স্থিতমতিঃ সন্তো হ্যাচারদর্শিনঃ
57.21
ন চাদদীত বিত্তানি সতাং হস্তাত্কদাচন
অসদ্ভ্যস্তু সমাদদ্যাত্সদ্ভ্যঃ সংপ্রতিপাদয়েৎ
57.22
স্বয়ং প্রহর্তাদাতা চ বশ্যাত্মা বশ্যসাধনঃ
কালে দাতা চ ভোক্তা চ শুদ্ধাচারস্তথৈব চ
57.23
শূরান্ভক্তানসংহার্যান্কুলে জাতানরোগিণঃ
শিষ্টাঞ্শিষ্টাভিসংবন্ধান্মানিনো নাবমানিনঃ
57.24
বিদ্যাবিদো লোকবিদঃ পরলোকান্ববেক্ষকান্
ধর্মেষু নিরতান্সাধূনচলানচলানিব
57.25
সহায়ান্সততং কুর্যাদ্রাজা ভূতিপুরস্কৃতঃ
তৈস্তুল্যশ্চ ভবেদ্ভোগৈশ্ছত্রমাত্রাজ্ঞয়াধিকঃ
57.26
প্রত্যক্ষা চ পরোক্ষা চ বৃত্তিশ্চাস্য ভবেত্সদা
এবং কৃত্বা নরেন্দ্রো হি ন খেদমিহ বিন্দতি
57.27
সর্বাতিশঙ্কী নৃপতির্যশ্চ সর্বহরো ভবেৎ
স ক্ষিপ্রমনৃজুর্লুব্ধঃ স্বজনেনৈব বাধ্যতে
57.28
শুচিস্তু পৃথিবীপালো লোকচিত্তগ্রহে রতঃ
ন পতত্যরিভির্গ্রস্তঃ পতিতশ্চাবতিষ্ঠতে
57.29
অক্রোধনোঽথাব্যসনী মৃদুদণ্ডো জিতেন্দ্রিয়ঃ
রাজা ভবতি ভূতানাং বিশ্বাস্যো হিমবানিব
57.30
প্রাজ্ঞো ন্যায়গুণোপেতঃ পররন্ধ্রেষু তত্পরঃ
সুদর্শঃ সর্ববর্ণানাং নয়াপনয়বিত্তথা
57.31
ক্ষিপ্রকারী জিতক্রোধঃ সুপ্রসাদো মহামনাঃ
অরোগপ্রকৃতির্যুক্তঃ ক্রিয়াবানবিকত্থনঃ
57.32
আরব্ধান্যেব কার্যাণি ন পর্যবসিতানি চ
যস্য রাজ্ঞঃ প্রদৃশ্যন্তে স রাজা রাজসত্তমঃ
57.33
পুত্রা ইব পিতুর্গেহে বিষয়ে যস্য মানবাঃ
নির্ভয়া বিচরিষ্যন্তি স রাজা রাজসত্তমঃ
57.34
অগূঢবিভবা যস্য পৌরা রাষ্ট্রনিবাসিনঃ
নয়াপনয়বেত্তারঃ স রাজা রাজসত্তমঃ
57.35
স্বকর্মনিরতা যস্য জনা বিষয়বাসিনঃ
অসংঘাতরতা দান্তাঃ পাল্যমানা যথাবিধি
57.36
বশ্যা নেয়া বিনীতাশ্চ ন চ সংঘর্ষশীলিনঃ
বিষয়ে দানরুচয়ো নরা যস্য স পার্থিবঃ
57.37
ন যস্য কূটকপটং ন মায়া ন চ মত্সরঃ
বিষয়ে ভূমিপালস্য তস্য ধর্মঃ সনাতনঃ
57.38
যঃ সত্করোতি জ্ঞানানি নেয়ঃ পৌরহিতে রতঃ
সতাং ধর্মানুগস্ত্যাগী স রাজা রাজ্যমর্হতি
57.39
যস্য চারশ্চ মন্ত্রশ্চ নিত্যং চৈব কৃতাকৃতে
ন জ্ঞায়তে হি রিপুভিঃ স রাজা রাজ্যমর্হতি
57.40
শ্লোকশ্চায়ং পুরা গীতো ভার্গবেণ মহাত্মনা
আখ্যাতে রামচরিতে নৃপতিং প্রতি ভারত
57.41
রাজানং প্রথমং বিন্দেত্ততো ভার্যাং ততো ধনম্
রাজন্যসতি লোকস্য কুতো ভার্যা কুতো ধনম্
57.42
তদ্রাজন্রাজসিংহানাং নান্যো ধর্মঃ সনাতনঃ
ঋতে রক্ষাং সুবিস্পষ্টাং রক্ষা লোকস্য ধারণম্
57.43
প্রাচেতসেন মনুনা শ্লোকৌ চেমাবুদাহৃতৌ
রাজধর্মেষু রাজেন্দ্র তাবিহৈকমনাঃ শৃণু
57.44
ষডেতান্পুরুষো জহ্যাদ্ভিন্নাং নাবমিবার্ণবে
অপ্রবক্তারমাচার্যমনধীয়ানমৃত্বিজম্
57.45
অরক্ষিতারং রাজানং ভার্যাং চাপ্রিয়বাদিনীম্
গ্রামকামং চ গোপালং বনকামং চ নাপিতম্