Utshovঅধ্যায় 56
56.1
বৈশংপায়ন উবাচ
প্রণিপত্য হৃষীকেশমভিবাদ্য পিতামহম্
অনুমান্য গুরূন্সর্বান্পর্যপৃচ্ছদ্যুধিষ্ঠিরঃ
56.2
রাজ্যং বৈ পরমো ধর্ম ইতি ধর্মবিদো বিদুঃ
মহান্তমেতং ভারং চ মন্যে তদ্ব্রূহি পার্থিব
56.3
রাজধর্মান্বিশেষেণ কথয়স্ব পিতামহ
সর্বস্য জীবলোকস্য রাজধর্মাঃ পরায়ণম্
56.4
ত্রিবর্গোঽত্র সমাসক্তো রাজধর্মেষু কৌরব
মোক্ষধর্মশ্চ বিস্পষ্টঃ সকলোঽত্র সমাহিতঃ
56.5
যথা হি রশ্ময়োঽশ্বস্য দ্বিরদস্যাঙ্কুশো যথা
নরেন্দ্রধর্মো লোকস্য তথা প্রগ্রহণং স্মৃতম্
56.6
অত্র বৈ সংপ্রমূঢে তু ধর্মে রাজর্ষিসেবিতে
লোকস্য সংস্থা ন ভবেত্সর্বং চ ব্যাকুলং ভবেৎ
56.7
উদয়ন্হি যথা সূর্যো নাশয়ত্যাসুরং তমঃ
রাজধর্মাস্তথালোক্যামাক্ষিপন্ত্যশুভাং গতিম্
56.8
তদগ্রে রাজধর্মাণামর্থতত্ত্বং পিতামহ
প্রব্রূহি ভরতশ্রেষ্ঠ ত্বং হি বুদ্ধিমতাং বরঃ
56.9
আগমশ্চ পরস্ত্বত্তঃ সর্বেষাং নঃ পরংতপ
ভবন্তং হি পরং বুদ্ধৌ বাসুদেবোঽভিমন্যতে
56.10
ভীষ্ম উবাচ
নমো ধর্মায় মহতে নমঃ কৃষ্ণায় বেধসে
ব্রাহ্মণেভ্যো নমস্কৃত্য ধর্মান্বক্ষ্যামি শাশ্বতান্
56.11
শৃণু কার্ত্স্ন্যেন মত্তস্ত্বং রাজধর্মান্যুধিষ্ঠির
নিরুচ্যমানান্নিয়তো যচ্চান্যদভিবাঞ্ছসি
56.12
আদাবেব কুরুশ্রেষ্ঠ রাজ্ঞা রঞ্জনকাম্যয়া
দেবতানাং দ্বিজানাং চ বর্তিতব্যং যথাবিধি
56.13
দৈবতান্যর্চয়িত্বা হি ব্রাহ্মণাংশ্চ কুরূদ্বহ
আনৃণ্যং যাতি ধর্মস্য লোকেন চ স মান্যতে
56.14
উত্থানে চ সদা পুত্র প্রয়তেথা যুধিষ্ঠির
ন হ্যুত্থানমৃতে দৈবং রাজ্ঞামর্থপ্রসিদ্ধয়ে
56.15
সাধারণং দ্বয়ং হ্যেতদ্দৈবমুত্থানমেব চ
পৌরুষং হি পরং মন্যে দৈবং নিশ্চিত্যমুচ্যতে
56.16
বিপন্নে চ সমারম্ভে সংতাপং মা স্ম বৈ কৃথাঃ
ঘটতে বিনয়স্তাত রাজ্ঞামেষ নয়ঃ পরঃ
56.17
ন হি সত্যাদৃতে কিংচিদ্রাজ্ঞাং বৈ সিদ্ধিকারণম্
সত্যে হি রাজা নিরতঃ প্রেত্য চেহ চ নন্দতি
56.18
ঋষীণামপি রাজেন্দ্র সত্যমেব পরং ধনম্
তথা রাজ্ঞঃ পরং সত্যান্নান্যদ্বিশ্বাসকারণম্
56.19
গুণবাঞ্শীলবান্দান্তো মৃদুর্ধর্ম্যো জিতেন্দ্রিয়ঃ
সুদর্শঃ স্থূললক্ষ্যশ্চ ন ভ্রশ্যেত সদা শ্রিয়ঃ
56.20
আর্জবং সর্বকার্যেষু শ্রয়েথাঃ কুরুনন্দন
পুনর্নয়বিচারেণ ত্রয়ীসংবরণেন চ
56.21
মৃদুর্হি রাজা সততং লঙ্ঘ্যো ভবতি সর্বশঃ
তীক্ষ্ণাচ্চোদ্বিজতে লোকস্তস্মাদুভয়মাচর
56.22
অদণ্ড্যাশ্চৈব তে নিত্যং বিপ্রাঃ স্যুর্দদতাং বর
ভূতমেতত্পরং লোকে ব্রাহ্মণা নাম ভারত
56.23
মনুনা চাপি রাজেন্দ্র গীতৌ শ্লোকৌ মহাত্মনা
ধর্মেষু স্বেষু কৌরব্য হৃদি তৌ কর্তুমর্হসি
56.24
অদ্ভ্যোঽগ্নির্ব্রহ্মতঃ ক্ষত্রমশ্মনো লোহমুত্থিতম্
তেষাং সর্বত্রগং তেজঃ স্বাসু যোনিষু শাম্যতি
56.25
অয়ো হন্তি যদাশ্মানমগ্নিশ্চাপোঽভিপদ্যতে
ব্রহ্ম চ ক্ষত্রিয়ো দ্বেষ্টি তদা সীদন্তি তে ত্রয়ঃ
56.26
এতজ্জ্ঞাত্বা মহারাজ নমস্যা এব তে দ্বিজাঃ
ভৌমং ব্রহ্ম দ্বিজশ্রেষ্ঠা ধারয়ন্তি শমান্বিতাঃ
56.27
এবং চৈব নরব্যাঘ্র লোকতন্ত্রবিঘাতকাঃ
নিগ্রাহ্যা এব সততং বাহুভ্যাং যে স্যুরীদৃশাঃ
56.28
শ্লোকৌ চোশনসা গীতৌ পুরা তাত মহর্ষিণা
তৌ নিবোধ মহাপ্রাজ্ঞ ত্বমেকাগ্রমনা নৃপ
56.29
উদ্যম্য শস্ত্রমায়ান্তমপি বেদান্তগং রণে
নিগৃহ্ণীয়াত্স্বধর্মেণ ধর্মাপেক্ষী নরেশ্বরঃ
56.30
বিনশ্যমানং ধর্মং হি যো রক্ষতি স ধর্মবিৎ
ন তেন ভ্রূণহা স স্যান্মন্যুস্তং মনুমৃচ্ছতি
56.31
এবং চৈব নরশ্রেষ্ঠ রক্ষ্যা এব দ্বিজাতয়ঃ
স্বপরাদ্ধানপি হি তান্বিষয়ান্তে সমুত্সৃজেৎ
56.32
অভিশস্তমপি হ্যেষাং কৃপায়ীত বিশাং পতে
ব্রহ্মঘ্নে গুরুতল্পে চ ভ্রূণহত্যে তথৈব চ
56.33
রাজদ্বিষ্টে চ বিপ্রস্য বিষয়ান্তে বিসর্জনম্
বিধীয়তে ন শারীরং ভয়মেষাং কদাচন
56.34
দয়িতাশ্চ নরাস্তে স্যুর্নিত্যং পুরুষসত্তম
ন কোশঃ পরমো হ্যন্যো রাজ্ঞাং পুরুষসংচয়াৎ
56.35
দুর্গেষু চ মহারাজ ষট্সু যে শাস্ত্রনিশ্চিতাঃ
সর্বেষু তেষু মন্যন্তে নরদুর্গং সুদুস্তরম্
56.36
তস্মান্নিত্যং দয়া কার্যা চাতুর্বর্ণ্যে বিপশ্চিতা
ধর্মাত্মা সত্যবাক্চৈব রাজা রঞ্জয়তি প্রজাঃ
56.37
ন চ ক্ষান্তেন তে ভাব্যং নিত্যং পুরুষসত্তম
অধর্ম্যো হি মৃদূ রাজা ক্ষমাবানিব কুঞ্জরঃ
56.38
বার্হস্পত্যে চ শাস্ত্রে বৈ শ্লোকা বিনিয়তাঃ পুরা
অস্মিন্নর্থে মহারাজ তন্মে নিগদতঃ শৃণু
56.39
ক্ষমমাণং নৃপং নিত্যং নীচঃ পরিভবেজ্জনঃ
হস্তিয়ন্তা গজস্যেব শির এবারুরুক্ষতি
56.40
তস্মান্নৈব মৃদুর্নিত্যং তীক্ষ্ণো বাপি ভবেন্নৃপঃ
বসন্তেঽর্ক ইব শ্রীমান্ন শীতো ন চ ঘর্মদঃ
56.41
প্রত্যক্ষেণানুমানেন তথৌপম্যোপদেশতঃ
পরীক্ষ্যাস্তে মহারাজ স্বে পরে চৈব সর্বদা
56.42
ব্যসনানি চ সর্বাণি ত্যজেথা ভূরিদক্ষিণ
ন চৈব ন প্রয়ুঞ্জীত সঙ্গং তু পরিবর্জয়েৎ
56.43
নিত্যং হি ব্যসনী লোকে পরিভূতো ভবত্যুত
উদ্বেজয়তি লোকং চাপ্যতিদ্বেষী মহীপতিঃ
56.44
ভবিতব্যং সদা রাজ্ঞা গর্ভিণীসহধর্মিণা
কারণং চ মহারাজ শৃণু যেনেদমিষ্যতে
56.45
যথা হি গর্ভিণী হিত্বা স্বং প্রিয়ং মনসোঽনুগম্
গর্ভস্য হিতমাধত্তে তথা রাজ্ঞাপ্যসংশয়ম্
56.46
বর্তিতব্যং কুরুশ্রেষ্ঠ নিত্যং ধর্মানুবর্তিনা
স্বং প্রিয়ং সমভিত্যজ্য যদ্যল্লোকহিতং ভবেৎ
56.47
ন সংত্যাজ্যং চ তে ধৈর্যং কদাচিদপি পাণ্ডব
ধীরস্য স্পষ্টদণ্ডস্য ন হ্যাজ্ঞা প্রতিহন্যতে
56.48
পরিহাসশ্চ ভৃত্যৈস্তে ন নিত্যং বদতাং বর
কর্তব্যো রাজশার্দূল দোষমত্র হি মে শৃণু
56.49
অবমন্যন্তি ভর্তারং সংহর্ষাদুপজীবিনঃ
স্বে স্থানে ন চ তিষ্ঠন্তি লঙ্ঘয়ন্তি হি তদ্বচঃ
56.50
প্রেষ্যমাণা বিকল্পন্তে গুহ্যং চাপ্যনুয়ুঞ্জতে
অয়াচ্যং চৈব যাচন্তেঽভোজ্যান্যাহারয়ন্তি চ
56.51
ক্রুধ্যন্তি পরিদীপ্যন্তি ভূমিমধ্যাসতেঽস্য চ
উত্কোচৈর্বঞ্চনাভিশ্চ কার্যাণ্যনুবিহন্তি চ
56.52
জর্জরং চাস্য বিষয়ং কুর্বন্তি প্রতিরূপকৈঃ
স্ত্রীরক্ষিভিশ্চ সজ্জন্তে তুল্যবেষা ভবন্তি চ
56.53
বাতং চ ষ্ঠীবনং চৈব কুর্বতে চাস্য সংনিধৌ
নির্লজ্জা নরশার্দূল ব্যাহরন্তি চ তদ্বচঃ
56.54
হয়ং বা দন্তিনং বাপি রথং নৃপতিসংমতম্
অধিরোহন্ত্যনাদৃত্য হর্ষুলে পার্থিবে মৃদৌ
56.55
ইদং তে দুষ্করং রাজন্নিদং তে দুর্বিচেষ্টিতম্
ইত্যেবং সুহৃদো নাম ব্রুবন্তি পরিষদ্গতাঃ
56.56
ক্রুদ্ধে চাস্মিন্হসন্ত্যেব ন চ হৃষ্যন্তি পূজিতাঃ
সংঘর্ষশীলাশ্চ সদা ভবন্ত্যন্যোন্যকারণাৎ
56.57
বিস্রংসয়ন্তি মন্ত্রং চ বিবৃণ্বন্তি চ দুষ্কৃতম্
লীলয়া চৈব কুর্বন্তি সাবজ্ঞাস্তস্য শাসনম্
অলংকরণভোজ্যং চ তথা স্নানানুলেপনম্
56.58
হেলমানা নরব্যাঘ্র স্বস্থাস্তস্যোপশৃণ্বতে
নিন্দন্তি স্বানধীকারান্সংত্যজন্তি চ ভারত
56.59
ন বৃত্ত্যা পরিতুষ্যন্তি রাজদেয়ং হরন্তি চ
ক্রীডিতুং তেন চেচ্ছন্তি সসূত্রেণেব পক্ষিণা
অস্মত্প্রণেয়ো রাজেতি লোকে চৈব বদন্ত্যুত
56.60
এতে চৈবাপরে চৈব দোষাঃ প্রাদুর্ভবন্ত্যুত
নৃপতৌ মার্দবোপেতে হর্ষুলে চ যুধিষ্ঠির