অধ্যায় 55

55.1

বৈশংপায়ন উবাচ
অথাব্রবীন্মহাতেজা বাক্যং কৌরবনন্দনঃ
হন্ত ধর্মান্প্রবক্ষ্যামি দৃঢে বাঙ্মনসী মম
তব প্রসাদাদ্গোবিন্দ ভূতাত্মা হ্যসি শাশ্বতঃ

যুধিষ্ঠিরস্তু মাং রাজা ধর্মান্সমনুপৃচ্ছতু
এবং প্রীতো ভবিষ্যামি ধর্মান্বক্ষ্যামি চানঘ

যস্মিন্রাজর্ষভে জাতে ধর্মাত্মনি মহাত্মনি
অহৃষ্যন্নৃষয়ঃ সর্বে স মাং পৃচ্ছতু পাণ্ডবঃ

সর্বেষাং দীপ্তয়শসাং কুরূণাং ধর্মচারিণাম্
যস্য নাস্তি সমঃ কশ্চিত্স মাং পৃচ্ছতু পাণ্ডবঃ

ধৃতির্দমো ব্রহ্মচর্যং ক্ষমা ধর্মশ্চ নিত্যদা
যস্মিন্নোজশ্চ তেজশ্চ স মাং পৃচ্ছতু পাণ্ডবঃ

সত্যং দানং তপঃ শৌচং শান্তির্দাক্ষ্যমসংভ্রমঃ
যস্মিন্নেতানি সর্বাণি স মাং পৃচ্ছতু পাণ্ডবঃ

যো ন কামান্ন সংরম্ভান্ন ভয়ান্নার্থকারণাৎ
কুর্যাদধর্মং ধর্মাত্মা স মাং পৃচ্ছতু পাণ্ডবঃ

সংবন্ধিনোঽতিথীন্ভৃত্যান্সংশ্রিতোপাশ্রিতাংশ্চ যঃ
সংমানয়তি সত্কৃত্য স মাং পৃচ্ছতু পাণ্ডবঃ

সত্যনিত্যঃ ক্ষমানিত্যো জ্ঞাননিত্যোঽতিথিপ্রিয়ঃ
যো দদাতি সতাং নিত্যং স মাং পৃচ্ছতু পাণ্ডবঃ

ইজ্যাধ্যয়ননিত্যশ্চ ধর্মে চ নিরতঃ সদা
শান্তঃ শ্রুতরহস্যশ্চ স মাং পৃচ্ছতু পাণ্ডবঃ

বাসুদেব উবাচ
লজ্জয়া পরয়োপেতো ধর্মাত্মা স যুধিষ্ঠিরঃ
অভিশাপভয়াদ্ভীতো ভবন্তং নোপসর্পতি

লোকস্য কদনং কৃত্বা লোকনাথো বিশাং পতে
অভিশাপভয়াদ্ভীতো ভবন্তং নোপসর্পতি

পূজ্যান্মান্যাংশ্চ ভক্তাংশ্চ গুরূন্সংবন্ধিবান্ধবান্
অর্ঘ্যার্হানিষুভির্হত্বা ভবন্তং নোপসর্পতি

ভীষ্ম উবাচ
ব্রাহ্মণানাং যথা ধর্মো দানমধ্যয়নং তপঃ
ক্ষত্রিয়াণাং তথা কৃষ্ণ সমরে দেহপাতনম্

পিতৄন্পিতামহান্পুত্রান্গুরূন্সংবন্ধিবান্ধবান্
মিথ্যাপ্রবৃত্তান্যঃ সংখ্যে নিহন্যাদ্ধর্ম এব সঃ

সময়ত্যাগিনো লুব্ধান্গুরূনপি চ কেশব
নিহন্তি সমরে পাপান্ক্ষত্রিয়ো যঃ স ধর্মবিৎ

আহূতেন রণে নিত্যং যোদ্ধব্যং ক্ষত্রবন্ধুনা
ধর্ম্যং স্বর্গ্যং চ লোক্যং চ যুদ্ধং হি মনুরব্রবীৎ

বৈশংপায়ন উবাচ
এবমুক্তস্তু ভীষ্মেণ ধর্মরাজো যুধিষ্ঠিরঃ
বিনীতবদুপাগম্য তস্থৌ সংদর্শনেঽগ্রতঃ

অথাস্য পাদৌ জগ্রাহ ভীষ্মশ্চাভিননন্দ তম্
মূর্ধ্নি চৈনমুপাঘ্রায় নিষীদেত্যব্রবীত্তদা

তমুবাচাথ গাঙ্গেয় ঋষভঃ সর্বধন্বিনাম্
পৃচ্ছ মাং তাত বিস্রব্ধং মা ভৈস্ত্বং কুরুসত্তম