Utshovঅধ্যায় 54
54.1
জনমেজয় উবাচ
ধর্মাত্মনি মহাসত্ত্বে সত্যসংধে জিতাত্মনি
দেবব্রতে মহাভাগে শরতল্পগতেঽচ্যুতে
54.2
শয়ানে বীরশয়নে ভীষ্মে শংতনুনন্দনে
গাঙ্গেয়ে পুরুষব্যাঘ্রে পাণ্ডবৈঃ পর্যুপস্থিতে
54.3
কাঃ কথাঃ সমবর্তন্ত তস্মিন্বীরসমাগমে
হতেষু সর্বসৈন্যেষু তন্মে শংস মহামুনে
54.4
বৈশংপায়ন উবাচ
শরতল্পগতে ভীষ্মে কৌরবাণাং ধুরংধরে
আজগ্মুরৃষয়ঃ সিদ্ধা নারদপ্রমুখা নৃপ
54.5
হতশিষ্টাশ্চ রাজানো যুধিষ্ঠিরপুরোগমাঃ
ধৃতরাষ্ট্রশ্চ কৃষ্ণশ্চ ভীমার্জুনয়মাস্তথা
54.6
তেঽভিগম্য মহাত্মানো ভরতানাং পিতামহম্
অন্বশোচন্ত গাঙ্গেয়মাদিত্যং পতিতং যথা
54.7
মুহূর্তমিব চ ধ্যাত্বা নারদো দেবদর্শনঃ
উবাচ পাণ্ডবান্সর্বান্হতশিষ্টাংশ্চ পার্থিবান্
54.8
প্রাপ্তকালং চ আচক্ষে ভীষ্মোঽয়মনুয়ুজ্যতাম্
অস্তমেতি হি গাঙ্গেয়ো ভানুমানিব ভারত
54.9
অয়ং প্রাণানুত্সিসৃক্ষুস্তং সর্বেঽভ্যেত্য পৃচ্ছত
কৃত্স্নান্হি বিবিধান্ধর্মাংশ্চাতুর্বর্ণ্যস্য বেত্ত্যয়ম্
54.10
এষ বৃদ্ধঃ পুরা লোকান্সংপ্রাপ্নোতি তনুত্যজাম্
তং শীঘ্রমনুয়ুঞ্জধ্বং সংশয়ান্মনসি স্থিতান্
54.11
এবমুক্তা নারদেন ভীষ্মমীয়ুর্নরাধিপাঃ
প্রষ্টুং চাশক্নুবন্তস্তে বীক্ষাং চক্রুঃ পরস্পরম্
54.12
অথোবাচ হৃষীকেশং পাণ্ডুপুত্রো যুধিষ্ঠিরঃ
নান্যস্ত্বদ্দেবকীপুত্র শক্তঃ প্রষ্টুং পিতামহম্
54.13
প্রব্যাহারয় দুর্ধর্ষ ত্বমগ্রে মধুসূদন
ত্বং হি নস্তাত সর্বেষাং সর্বধর্মবিদুত্তমঃ
54.14
এবমুক্তঃ পাণ্ডবেন ভগবান্কেশবস্তদা
অভিগম্য দুরাধর্ষং প্রব্যাহারয়দচ্যুতঃ
54.15
বাসুদেব উবাচ
কচ্চিত্সুখেন রজনী ব্যুষ্টা তে রাজসত্তম
বিস্পষ্টলক্ষণা বুদ্ধিঃ কচ্চিচ্চোপস্থিতা তব
54.16
কচ্চিজ্জ্ঞানানি সর্বাণি প্রতিভান্তি চ তেঽনঘ
ন গ্লায়তে চ হৃদয়ং ন চ তে ব্যাকুলং মনঃ
54.17
ভীষ্ম উবাচ
দাহো মোহঃ শ্রমশ্চৈব ক্লমো গ্লানিস্তথা রুজা
তব প্রসাদাদ্গোবিন্দ সদ্যো ব্যপগতানঘ
54.18
যচ্চ ভূতং ভবিষ্যচ্চ ভবচ্চ পরমদ্যুতে
তত্সর্বমনুপশ্যামি পাণৌ ফলমিবাহিতম্
54.19
বেদোক্তাশ্চৈব যে ধর্মা বেদান্তনিহিতাশ্চ যে
তান্সর্বান্সংপ্রপশ্যামি বরদানাত্তবাচ্যুত
54.20
শিষ্টৈশ্চ ধর্মো যঃ প্রোক্তঃ স চ মে হৃদি বর্ততে
দেশজাতিকুলানাং চ ধর্মজ্ঞোঽস্মি জনার্দন
54.21
চতুর্ষ্বাশ্রমধর্মেষু যোঽর্থঃ স চ হৃদি স্থিতঃ
রাজধর্মাংশ্চ সকলানবগচ্ছামি কেশব
54.22
যত্র যত্র চ বক্তব্যং তদ্বক্ষ্যামি জনার্দন
তব প্রসাদাদ্ধি শুভা মনো মে বুদ্ধিরাবিশৎ
54.23
যুবেব চাস্মি সংবৃত্তস্ত্বদনুধ্যানবৃংহিতঃ
বক্তুং শ্রেয়ঃ সমর্থোঽস্মি ত্বত্প্রসাদাজ্জনার্দন
54.24
স্বয়ং কিমর্থং তু ভবাঞ্শ্রেয়ো ন প্রাহ পাণ্ডবম্
কিং তে বিবক্ষিতং চাত্র তদাশু বদ মাধব
54.25
বাসুদেব উবাচ
যশসঃ শ্রেয়সশ্চৈব মূলং মাং বিদ্ধি কৌরব
মত্তঃ সর্বেঽভিনির্বৃত্তা ভাবাঃ সদসদাত্মকাঃ
54.26
শীতাংশুশ্চন্দ্র ইত্যুক্তে কো লোকে বিস্ময়িষ্যতি
তথৈব যশসা পূর্ণে ময়ি কো বিস্ময়িষ্যতি
54.27
আধেয়ং তু ময়া ভূয়ো যশস্তব মহাদ্যুতে
ততো মে বিপুলা বুদ্ধিস্ত্বয়ি ভীষ্ম সমাহিতা
54.28
যাবদ্ধি পৃথিবীপাল পৃথিবী স্থাস্যতে ধ্রুবা
তাবত্তবাক্ষয়া কীর্তির্লোকাননু চরিষ্যতি
54.29
যচ্চ ত্বং বক্ষ্যসে ভীষ্ম পাণ্ডবায়ানুপৃচ্ছতে
বেদপ্রবাদা ইব তে স্থাস্যন্তি বসুধাতলে
54.30
যশ্চৈতেন প্রমাণেন যোক্ষ্যত্যাত্মানমাত্মনা
স ফলং সর্বপুণ্যানাং প্রেত্য চানুভবিষ্যতি
54.31
এতস্মাত্কারণাদ্ভীষ্ম মতির্দিব্যা ময়া হি তে
দত্তা যশো বিপ্রথেত কথং ভূয়স্তবেতি হ
54.32
যাবদ্ধি প্রথতে লোকে পুরুষস্য যশো ভুবি
তাবত্তস্যাক্ষয়ং স্থানং ভবতীতি বিনিশ্চিতম্
54.33
রাজানো হতশিষ্টাস্ত্বাং রাজন্নভিত আসতে
ধর্মাননুয়ুয়ুক্ষন্তস্তেভ্যঃ প্রব্রূহি ভারত
54.34
ভবান্হি বয়সা বৃদ্ধঃ শ্রুতাচারসমন্বিতঃ
কুশলো রাজধর্মাণাং পূর্বেষামপরাশ্চ যে
54.35
জন্মপ্রভৃতি তে কশ্চিদ্বৃজিনং ন দদর্শ হ
জ্ঞাতারমনুধর্মাণাং ত্বাং বিদুঃ সর্বপার্থিবাঃ
54.36
তেভ্যঃ পিতেব পুত্রেভ্যো রাজন্ব্রূহি পরং নয়ম্
ঋষয়শ্চ হি দেবাশ্চ ত্বয়া নিত্যমুপাসিতাঃ
54.37
তস্মাদ্বক্তব্যমেবেহ ত্বয়া পশ্যাম্যশেষতঃ
ধর্মাঞ্শুশ্রূষমাণেভ্যঃ পৃষ্টেন চ সতা পুনঃ
54.38
বক্তব্যং বিদুষা চেতি ধর্মমাহুর্মনীষিণঃ
অপ্রতিব্রুবতঃ কষ্টো দোষো হি ভবতি প্রভো
54.39
তস্মাত্পুত্রৈশ্চ পৌত্রৈশ্চ ধর্মান্পৃষ্টঃ সনাতনান্
বিদ্বাঞ্জিজ্ঞাসমানৈস্ত্বং প্রব্রূহি ভরতর্ষভ