Utshovঅধ্যায় 53
53.1
বৈশংপায়ন উবাচ
ততঃ প্রবিশ্য ভবনং প্রসুপ্তো মধুসূদনঃ
যামমাত্রাবশেষায়াং যামিন্যাং প্রত্যবুধ্যত
53.2
স ধ্যানপথমাশ্রিত্য সর্বজ্ঞানানি মাধবঃ
অবলোক্য ততঃ পশ্চাদ্দধ্যৌ ব্রহ্ম সনাতনম্
53.3
ততঃ শ্রুতিপুরাণজ্ঞাঃ শিক্ষিতা রক্তকণ্ঠিনঃ
অস্তুবন্বিশ্বকর্মাণং বাসুদেবং প্রজাপতিম্
53.4
পঠন্তি পাণিস্বনিকাস্তথা গায়ন্তি গায়নাঃ
শঙ্খানকমৃদঙ্গাংশ্চ প্রবাদ্যন্ত সহস্রশঃ
53.5
বীণাপণববেণূনাং স্বনশ্চাতিমনোরমঃ
প্রহাস ইব বিস্তীর্ণঃ শুশ্রুবে তস্য বেশ্মনঃ
53.6
তথা যুধিষ্ঠিরস্যাপি রাজ্ঞো মঙ্গলসংহিতাঃ
উচ্চেরুর্মধুরা বাচো গীতবাদিত্রসংহিতাঃ
53.7
তত উত্থায় দাশার্হঃ স্নাতঃ প্রাঞ্জলিরচ্যুতঃ
জপ্ত্বা গুহ্যং মহাবাহুরগ্নীনাশ্রিত্য তস্থিবান্
53.8
ততঃ সহস্রং বিপ্রাণাং চতুর্বেদবিদাং তথা
গবাং সহস্রেণৈকৈকং বাচয়ামাস মাধবঃ
53.9
মঙ্গলালম্ভনং কৃত্বা আত্মানমবলোক্য চ
আদর্শে বিমলে কৃষ্ণস্ততঃ সাত্যকিমব্রবীৎ
53.10
গচ্ছ শৈনেয় জানীহি গত্বা রাজনিবেশনম্
অপি সজ্জো মহাতেজা ভীষ্মং দ্রষ্টুং যুথিষ্ঠিরঃ
53.11
ততঃ কৃষ্ণস্য বচনাত্সাত্যকিস্ত্বরিতো যয়ৌ
উপগম্য চ রাজানং যুধিষ্ঠিরমুবাচ হ
53.12
যুক্তো রথবরো রাজন্বাসুদেবস্য ধীমতঃ
সমীপমাপগেয়স্য প্রয়াস্যতি জনার্দনঃ
53.13
ভবত্প্রতীক্ষঃ কৃষ্ণোঽসৌ ধর্মরাজ মহাদ্যুতে
যদত্রানন্তরং কৃত্যং তদ্ভবান্কর্তুমর্হতি
53.14
যুধিষ্ঠির উবাচ
যুজ্যতাং মে রথবরঃ ফল্গুনাপ্রতিমদ্যুতে
ন সৈনিকৈশ্চ যাতব্যং যাস্যামো বয়মেব হি
53.15
ন চ পীডয়িতব্যো মে ভীষ্মো ধর্মভৃতাং বরঃ
অতঃ পুরঃসরাশ্চাপি নিবর্তন্তু ধনংজয়
53.16
অদ্যপ্রভৃতি গাঙ্গেয়ঃ পরং গুহ্যং প্রবক্ষ্যতি
ততো নেচ্ছামি কৌন্তেয় পৃথগ্জনসমাগমম্
53.17
বৈশংপায়ন উবাচ
তদ্বাক্যমাকর্ণ্য তথা কুন্তীপুত্রো ধনংজয়ঃ
যুক্তং রথবরং তস্মা আচচক্ষে নরর্ষভ
53.18
ততো যুধিষ্ঠিরো রাজা যমৌ ভীমার্জুনাবপি
ভূতানীব সমস্তানি যয়ুঃ কৃষ্ণনিবেশনম্
53.19
আগচ্ছত্স্বথ কৃষ্ণোঽপি পাণ্ডবেষু মহাত্মসু
শৈনেয়সহিতো ধীমান্রথমেবান্বপদ্যত
53.20
রথস্থাঃ সংবিদং কৃত্বা সুখাং পৃষ্ট্বা চ শর্বরীম্
মেঘঘোষৈ রথবরৈঃ প্রয়য়ুস্তে মহারথাঃ
53.21
মেঘপুষ্পং বলাহং চ সৈন্যং সুগ্রীবমেব চ
দারুকশ্চোদয়ামাস বাসুদেবস্য বাজিনঃ
53.22
তে হয়া বাসুদেবস্য দারুকেণ প্রচোদিতাঃ
গাং খুরাগ্রৈস্তথা রাজঁল্লিখন্তঃ প্রয়য়ুস্তদা
53.23
তে গ্রসন্ত ইবাকাশং বেগবন্তো মহাবলাঃ
ক্ষেত্রং ধর্মস্য কৃত্স্নস্য কুরুক্ষেত্রমবাতরন্
53.24
ততো যয়ুর্যত্র ভীষ্মঃ শরতল্পগতঃ প্রভুঃ
আস্তে ব্রহ্মর্ষিভিঃ সার্ধং ব্রহ্মা দেবগণৈর্যথা
53.25
ততোঽবতীর্য গোবিন্দো রথাত্স চ যুধিষ্ঠিরঃ
ভীমো গাণ্ডীবধন্বা চ যমৌ সাত্যকিরেব চ
ঋষীনভ্যর্চয়ামাসুঃ করানুদ্যম্য দক্ষিণান্
53.26
স তৈঃ পরিবৃতো রাজা নক্ষত্রৈরিব চন্দ্রমাঃ
অভ্যাজগাম গাঙ্গেয়ং ব্রহ্মাণমিব বাসবঃ
53.27
শরতল্পে শয়ানং তমাদিত্যং পতিতং যথা
দদর্শ স মহাবাহুর্ভয়াদাগতসাধ্বসঃ