Utshovঅধ্যায় 52
52.1
বৈশংপায়ন উবাচ
ততঃ কৃষ্ণস্য তদ্বাক্যং ধর্মার্থসহিতং হিতম্
শ্রুত্বা শাংতনবো ভীষ্মঃ প্রত্যুবাচ কৃতাঞ্জলিঃ
52.2
লোকনাথ মহাবাহো শিব নারায়ণাচ্যুত
তব বাক্যমভিশ্রুত্য হর্ষেণাস্মি পরিপ্লুতঃ
52.3
কিং চাহমভিধাস্যামি বাক্পতে তব সংনিধৌ
যদা বাচোগতং সর্বং তব বাচি সমাহিতম্
52.4
যদ্ধি কিংচিত্কৃতং লোকে কর্তব্যং ক্রিয়তে চ যৎ
ত্বত্তস্তন্নিঃসৃতং দেব লোকা বুদ্ধিময়া হি তে
52.5
কথয়েদ্দেবলোকং যো দেবরাজসমীপতঃ
ধর্মকামার্থশাস্ত্রাণাং সোঽর্থান্ব্রূয়াত্তবাগ্রতঃ
52.6
শরাভিঘাতাদ্ব্যথিতং মনো মে মধুসূদন
গাত্রাণি চাবসীদন্তি ন চ বুদ্ধিঃ প্রসীদতি
52.7
ন চ মে প্রতিভা কাচিদস্তি কিংচিত্প্রভাষিতুম্
পীড্যমানস্য গোবিন্দ বিষানলসমৈঃ শরৈঃ
52.8
বলং মেধাঃ প্রজরতি প্রাণাঃ সংত্বরয়ন্তি চ
মর্মাণি পরিতপ্যন্তে ভ্রান্তং চেতস্তথৈব চ
52.9
দৌর্বল্যাত্সজ্জতে বাঙ্মে স কথং বক্তুমুত্সহে
সাধু মে ত্বং প্রসীদস্ব দাশার্হকুলনন্দন
52.10
তত্ক্ষমস্ব মহাবাহো ন ব্রূয়াং কিংচিদচ্যুত
ত্বত্সংনিধৌ চ সীদেত বাচস্পতিরপি ব্রুবন্
52.11
ন দিশঃ সংপ্রজানামি নাকাশং ন চ মেদিনীম্
কেবলং তব বীর্যেণ তিষ্ঠামি মধুসূদন
52.12
স্বয়মেব প্রভো তস্মাদ্ধর্মরাজস্য যদ্ধিতম্
তদ্ব্রবীহ্যাশু সর্বেষামাগমানাং ত্বমাগমঃ
52.13
কথং ত্বয়ি স্থিতে লোকে শাশ্বতে লোককর্তরি
প্রব্রূয়ান্মদ্বিধঃ কশ্চিদ্গুরৌ শিষ্য ইব স্থিতে
52.14
বাসুদেব উবাচ
উপপন্নমিদং বাক্যং কৌরবাণাং ধুরংধরে
মহাবীর্যে মহাসত্ত্বে স্থিতে সর্বার্থদর্শিনি
52.15
যচ্চ মামাত্থ গাঙ্গেয় বাণঘাতরুজং প্রতি
গৃহাণাত্র বরং ভীষ্ম মত্প্রসাদকৃতং বিভো
52.16
ন তে গ্লানির্ন তে মূর্ছা ন দাহো ন চ তে রুজা
প্রভবিষ্যন্তি গাঙ্গেয় ক্ষুত্পিপাসে ন চাপ্যুত
52.17
জ্ঞানানি চ সমগ্রাণি প্রতিভাস্যন্তি তেঽনঘ
ন চ তে ক্বচিদাসক্তির্বুদ্ধেঃ প্রাদুর্ভবিষ্যতি
52.18
সত্ত্বস্থং চ মনো নিত্যং তব ভীষ্ম ভবিষ্যতি
রজস্তমোভ্যাং রহিতং ঘনৈর্মুক্ত ইবোডুরাট্
52.19
যদ্যচ্চ ধর্মসংয়ুক্তমর্থয়ুক্তমথাপি বা
চিন্তয়িষ্যসি তত্রাগ্র্যা বুদ্ধিস্তব ভবিষ্যতি
52.20
ইমং চ রাজশার্দূল ভূতগ্রামং চতুর্বিধম্
চক্ষুর্দিব্যং সমাশ্রিত্য দ্রক্ষ্যস্যমিতবিক্রম
52.21
চতুর্বিধং প্রজাজালং সংয়ুক্তো জ্ঞানচক্ষুষা
ভীষ্ম দ্রক্ষ্যসি তত্ত্বেন জলে মীন ইবামলে
52.22
বৈশংপায়ন উবাচ
ততস্তে ব্যাসসহিতাঃ সর্ব এব মহর্ষয়ঃ
ঋগ্যজুঃসামসংয়ুক্তৈর্বচোভিঃ কৃষ্ণমর্চয়ন্
52.23
ততঃ সর্বার্তবং দিব্যং পুষ্পবর্ষং নভস্তলাৎ
পপাত যত্র বার্ষ্ণেয়ঃ সগাঙ্গেয়ঃ সপাণ্ডবঃ
52.24
বাদিত্রাণি চ দিব্যানি জগুশ্চাপ্সরসাং গণাঃ
ন চাহিতমনিষ্টং বা কিংচিত্তত্র ব্যদৃশ্যত
52.25
ববৌ শিবঃ সুখো বায়ুঃ সর্বগন্ধবহঃ শুচিঃ
শান্তায়াং দিশি শান্তাশ্চ প্রাবদন্মৃগপক্ষিণঃ
52.26
ততো মুহূর্তাদ্ভগবান্সহস্রাংশুর্দিবাকরঃ
দহন্বনমিবৈকান্তে প্রতীচ্যাং প্রত্যদৃশ্যত
52.27
ততো মহর্ষয়ঃ সর্বে সমুত্থায় জনার্দনম্
ভীষ্মমামন্ত্রয়াং চক্রূ রাজানং চ যুধিষ্ঠিরম্
52.28
ততঃ প্রণামমকরোত্কেশবঃ পাণ্ডবস্তথা
সাত্যকিঃ সংজয়শ্চৈব স চ শারদ্বতঃ কৃপঃ
52.29
ততস্তে ধর্মনিরতাঃ সম্যক্তৈরভিপূজিতাঃ
শ্বঃ সমেষ্যাম ইত্যুক্ত্বা যথেষ্টং ত্বরিতা যয়ুঃ
52.30
তথৈবামন্ত্র্য গাঙ্গেয়ং কেশবস্তে চ পাণ্ডবাঃ
প্রদক্ষিণমুপাবৃত্য রথানারুরুহুঃ শুভান্
52.31
ততো রথৈঃ কাঞ্চনদন্তকূবরৈ;র্মহীধরাভৈঃ সমদৈশ্চ দন্তিভিঃ
হয়ৈঃ সুপর্ণৈরিব চাশুগামিভিঃ; পদাতিভিশ্চাত্তশরাসনাদিভিঃ
52.32
যয়ৌ রথানাং পুরতো হি সা চমূ;স্তথৈব পশ্চাদতিমাত্রসারিণী
পুরশ্চ পশ্চাচ্চ যথা মহানদী; পুরর্ক্ষবন্তং গিরিমেত্য নর্মদা
52.33
ততঃ পুরস্তাদ্ভগবান্নিশাকরঃ; সমুত্থিতস্তামভিহর্ষয়ংশ্চমূম্
দিবাকরাপীতরসাস্তথৌষধীঃ; পুনঃ স্বকেনৈব গুণেন যোজয়ন্
52.34
ততঃ পুরং সুরপুরসংনিভদ্যুতি; প্রবিশ্য তে যদুবৃষপাণ্ডবাস্তদা
যথোচিতান্ভবনবরান্সমাবিশ;ঞ্শ্রমান্বিতা মৃগপতয়ো গুহা ইব