অধ্যায় 51

51.1

বৈশংপায়ন উবাচ
শ্রুত্বা তু বচনং ভীষ্মো বাসুদেবস্য ধীমতঃ
কিংচিদুন্নাম্য বদনং প্রাঞ্জলির্বাক্যমব্রবীৎ

নমস্তে ভগবন্বিষ্ণো লোকানাং নিধনোদ্ভব
ত্বং হি কর্তা হৃষীকেশ সংহর্তা চাপরাজিতঃ

বিশ্বকর্মন্নমস্তেঽস্তু বিশ্বাত্মন্বিশ্বসংভব
অপবর্গোঽসি ভূতানাং পঞ্চানাং পরতঃ স্থিতঃ

নমস্তে ত্রিষু লোকেষু নমস্তে পরতস্ত্রিষু
যোগেশ্বর নমস্তেঽস্তু ত্বং হি সর্বপরায়ণম্

মত্সংশ্রিতং যদাত্থ ত্বং বচঃ পুরুষসত্তম
তেন পশ্যামি তে দিব্যান্ভাবান্হি ত্রিষু বর্ত্মসু

তচ্চ পশ্যামি তত্ত্বেন যত্তে রূপং সনাতনম্
সপ্ত মার্গা নিরুদ্ধাস্তে বায়োরমিততেজসঃ

দিবং তে শিরসা ব্যাপ্তং পদ্ভ্যাং দেবী বসুংধরা
দিশো ভুজৌ রবিশ্চক্ষুর্বীর্যে শক্রঃ প্রতিষ্ঠিতঃ

অতসীপুষ্পসংকাশং পীতবাসসমচ্যুতম্
বপুর্হ্যনুমিমীমস্তে মেঘস্যেব সবিদ্যুতঃ

ত্বত্প্রপন্নায় ভক্তায় গতিমিষ্টাং জিগীষবে
যচ্ছ্রেয়ঃ পুণ্ডরীকাক্ষ তদ্ধ্যায়স্ব সুরোত্তম

বাসুদেব উবাচ
যতঃ খলু পরা ভক্তির্ময়ি তে পুরুষর্ষভ
ততো বপুর্ময়া দিব্যং তব রাজন্প্রদর্শিতম্

ন হ্যভক্তায় রাজেন্দ্র ভক্তায়ানৃজবে ন চ
দর্শয়াম্যহমাত্মানং ন চাদান্তায় ভারত

ভবাংস্তু মম ভক্তশ্চ নিত্যং চার্জবমাস্থিতঃ
দমে তপসি সত্যে চ দানে চ নিরতঃ শুচিঃ

অর্হস্ত্বং ভীষ্ম মাং দ্রষ্টুং তপসা স্বেন পার্থিব
তব হ্যুপস্থিতা লোকা যেভ্যো নাবর্ততে পুনঃ

পঞ্চাশতং ষট্চ কুরুপ্রবীর; শেষং দিনানাং তব জীবিতস্য
ততঃ শুভৈঃ কর্মফলোদয়ৈস্ত্বং; সমেষ্যসে ভীষ্ম বিমুচ্য দেহম্

এতে হি দেবা বসবো বিমানা;ন্যাস্থায় সর্বে জ্বলিতাগ্নিকল্পাঃ
অন্তর্হিতাস্ত্বাং প্রতিপালয়ন্তি; কাষ্ঠাং প্রপদ্যন্তমুদক্পতংগম্

ব্যাবৃত্তমাত্রে ভগবত্যুদীচীং; সূর্যে দিশং কালবশাত্প্রপন্নে
গন্তাসি লোকান্পুরুষপ্রবীর; নাবর্ততে যানুপলভ্য বিদ্বান্

অমুং চ লোকং ত্বয়ি ভীষ্ম যাতে; জ্ঞানানি নঙ্ক্ষ্যন্ত্যখিলেন বীর
অতঃ স্ম সর্বে ত্বয়ি সংনিকর্ষং; সমাগতা ধর্মবিবেচনায়

তজ্জ্ঞাতিশোকোপহতশ্রুতায়; সত্যাভিসংধায় যুধিষ্ঠিরায়
প্রব্রূহি ধর্মার্থসমাধিয়ুক্ত;মর্থ্যং বচোঽস্যাপনুদাস্য শোকম্