Utshovঅধ্যায় 50
50.1
বৈশংপায়ন উবাচ
ততো রামস্য তত্কর্ম শ্রুত্বা রাজা যুধিষ্ঠিরঃ
বিস্ময়ং পরমং গত্বা প্রত্যুবাচ জনার্দনম্
50.2
অহো রামস্য বার্ষ্ণেয় শক্রস্যেব মহাত্মনঃ
বিক্রমো যেন বসুধা ক্রোধান্নিঃক্ষত্রিয়া কৃতা
50.3
গোভিঃ সমুদ্রেণ তথা গোলাঙ্গূলর্ক্ষবানরৈঃ
গুপ্তা রামভয়োদ্বিগ্নাঃ ক্ষত্রিয়াণাং কুলোদ্বহাঃ
50.4
অহো ধন্যো হি লোকোঽয়ং সভাগ্যাশ্চ নরা ভুবি
যত্র কর্মেদৃশং ধর্ম্যং দ্বিজেন কৃতমচ্যুত
50.5
তথা যান্তৌ তদা তাত তাবচ্যুতয়ুধিষ্ঠিরৌ
জগ্মতুর্যত্র গাঙ্গেয়ঃ শরতল্পগতঃ প্রভুঃ
50.6
ততস্তে দদৃশুর্ভীষ্মং শরপ্রস্তরশায়িনম্
স্বরশ্মিজালসংবীতং সায়ংসূর্যমিবানলম্
50.7
উপাস্যমানং মুনিভির্দেবৈরিব শতক্রতুম্
দেশে পরমধর্মিষ্ঠে নদীমোঘবতীমনু
50.8
দূরাদেব তমালোক্য কৃষ্ণো রাজা চ ধর্মরাট্
চত্বারঃ পাণ্ডবাশ্চৈব তে চ শারদ্বতাদয়ঃ
50.9
অবস্কন্দ্যাথ বাহেভ্যঃ সংয়ম্য প্রচলং মনঃ
একীকৃত্যেন্দ্রিয়গ্রামমুপতস্থুর্মহামুনীন্
50.10
অভিবাদ্য চ গোবিন্দঃ সাত্যকিস্তে চ কৌরবাঃ
ব্যাসাদীংস্তানৃষীন্পশ্চাদ্গাঙ্গেয়মুপতস্থিরে
50.11
তপোবৃদ্ধিং ততঃ পৃষ্ট্বা গাঙ্গেয়ং যদুকৌরবাঃ
পরিবার্য ততঃ সর্বে নিষেদুঃ পুরুষর্ষভাঃ
50.12
ততো নিশম্য গাঙ্গেয়ং শাম্যমানমিবানলম্
কিংচিদ্দীনমনা ভীষ্মমিতি হোবাচ কেশবঃ
50.13
কচ্চিজ্জ্ঞানানি তে রাজন্প্রসন্নানি যথা পুরা
কচ্চিদব্যাকুলা চৈব বুদ্ধিস্তে বদতাং বর
50.14
শরাভিঘাতদুঃখাত্তে কচ্চিদ্গাত্রং ন দূয়তে
মানসাদপি দুঃখাদ্ধি শারীরং বলবত্তরম্
50.15
বরদানাত্পিতুঃ কামং ছন্দমৃত্যুরসি প্রভো
শংতনোর্ধর্মশীলস্য ন ত্বেতচ্ছমকারণম্
50.16
সুসূক্ষ্মোঽপীহ দেহে বৈ শল্যো জনয়তে রুজম্
কিং পুনঃ শরসংঘাতৈশ্চিতস্য তব ভারত
50.17
কামং নৈতত্তবাখ্যেয়ং প্রাণিনাং প্রভবাপ্যয়ৌ
ভবান্হ্যুপদিশেচ্ছ্রেয়ো দেবানামপি ভারত
50.18
যদ্ধি ভূতং ভবিষ্যচ্চ ভবচ্চ পুরুষর্ষভ
সর্বং তজ্জ্ঞানবৃদ্ধস্য তব পাণাবিবাহিতম্
50.19
সংসারশ্চৈব ভূতানাং ধর্মস্য চ ফলোদয়ঃ
বিদিতস্তে মহাপ্রাজ্ঞ ত্বং হি ব্রহ্মময়ো নিধিঃ
50.20
ত্বাং হি রাজ্যে স্থিতং স্ফীতে সমগ্রাঙ্গমরোগিণম্
স্ত্রীসহস্রৈঃ পরিবৃতং পশ্যামীহোর্ধ্বরেতসম্
50.21
ঋতে শাংতনবাদ্ভীষ্মাত্ত্রিষু লোকেষু পার্থিব
সত্যসংধান্মহাবীর্যাচ্ছূরাদ্ধর্মৈকতত্পরাৎ
50.22
মৃত্যুমাবার্য তরসা শরপ্রস্তরশায়িনঃ
নিসর্গপ্রভবং কিংচিন্ন চ তাতানুশুশ্রুম
50.23
সত্যে তপসি দানে চ যজ্ঞাধিকরণে তথা
ধনুর্বেদে চ বেদে চ নিত্যং চৈবান্ববেক্ষণে
50.24
অনৃশংসং শুচিং দান্তং সর্বভূতহিতে রতম্
মহারথং ত্বত্সদৃশং ন কংচিদনুশুশ্রুম
50.25
ত্বং হি দেবান্সগন্ধর্বান্সসুরাসুররাক্ষসান্
শক্ত একরথেনৈব বিজেতুং নাত্র সংশয়ঃ
50.26
ত্বং হি ভীষ্ম মহাবাহো বসূনাং বাসবোপমঃ
নিত্যং বিপ্রৈঃ সমাখ্যাতো নবমোঽনবমো গুণৈঃ
50.27
অহং হি ত্বাভিজানামি যস্ত্বং পুরুষসত্তম
ত্রিদশেষ্বপি বিখ্যাতঃ স্বশক্ত্যা সুমহাবলঃ
50.28
মনুষ্যেষু মনুষ্যেন্দ্র ন দৃষ্টো ন চ মে শ্রুতঃ
ভবতো যো গুণৈস্তুল্যঃ পৃথিব্যাং পুরুষঃ ক্বচিৎ
50.29
ত্বং হি সর্বৈর্গুণৈ রাজন্দেবানপ্যতিরিচ্যসে
তপসা হি ভবাঞ্শক্তঃ স্রষ্টুং লোকাংশ্চরাচরান্
50.30
তদস্য তপ্যমানস্য জ্ঞাতীনাং সংক্ষয়েণ বৈ
জ্যেষ্ঠস্য পাণ্ডুপুত্রস্য শোকং ভীষ্ম ব্যপানুদ
50.31
যে হি ধর্মাঃ সমাখ্যাতাশ্চাতুর্বর্ণ্যস্য ভারত
চাতুরাশ্রম্যসংসৃষ্টাস্তে সর্বে বিদিতাস্তব
50.32
চাতুর্বেদ্যে চ যে প্রোক্তাশ্চাতুর্হোত্রে চ ভারত
সাংখ্যে যোগে চ নিয়তা যে চ ধর্মাঃ সনাতনাঃ
50.33
চাতুর্বর্ণ্যেন যশ্চৈকো ধর্মো ন স্ম বিরুধ্যতে
সেব্যমানঃ স চৈবাদ্যো গাঙ্গেয় বিদিতস্তব
50.34
ইতিহাসপুরাণং চ কার্ত্স্ন্যেন বিদিতং তব
ধর্মশাস্ত্রং চ সকলং নিত্যং মনসি তে স্থিতম্
50.35
যে চ কেচন লোকেঽস্মিন্নর্থাঃ সংশয়কারকাঃ
তেষাং ছেত্তা নাস্তি লোকে ত্বদন্যঃ পুরুষর্ষভ
50.36
স পাণ্ডবেয়স্য মনঃসমুত্থিতং; নরেন্দ্র শোকং ব্যপকর্ষ মেধয়া
ভবদ্বিধা হ্যুত্তমবুদ্ধিবিস্তরা; বিমুহ্যমানস্য জনস্য শান্তয়ে