Utshovঅধ্যায় 49
49.1
বাসুদেব উবাচ
শৃণু কৌন্তেয় রামস্য ময়া যাবত্পরিশ্রুতম্
মহর্ষীণাং কথয়তাং কারণং তস্য জন্ম চ
49.2
যথা চ জামদগ্ন্যেন কোটিশঃ ক্ষত্রিয়া হতাঃ
উদ্ভূতা রাজবংশেষু যে ভূয়ো ভারতে হতাঃ
49.3
জহ্নোরজহ্নুস্তনয়ো বল্লবস্তস্য চাত্মজঃ
কুশিকো নাম ধর্মজ্ঞস্তস্য পুত্রো মহীপতিঃ
49.4
উগ্রং তপঃ সমাতিষ্ঠত্সহস্রাক্ষসমো ভুবি
পুত্রং লভেয়মজিতং ত্রিলোকেশ্বরমিত্যুত
49.5
তমুগ্রতপসং দৃষ্ট্বা সহস্রাক্ষঃ পুরংদরঃ
সমর্থঃ পুত্রজননে স্বয়মেবৈত্য ভারত
49.6
পুত্রত্বমগমদ্রাজংস্তস্য লোকেশ্বরেশ্বরঃ
গাধির্নামাভবত্পুত্রঃ কৌশিকঃ পাকশাসনঃ
49.7
তস্য কন্যাভবদ্রাজন্নাম্না সত্যবতী প্রভো
তাং গাধিঃ কবিপুত্রায় সোর্চীকায় দদৌ প্রভুঃ
49.8
ততঃ প্রীতস্তু কৌন্তেয় ভার্গবঃ কুরুনন্দন
পুত্রার্থে শ্রপয়ামাস চরুং গাধেস্তথৈব চ
49.9
আহূয় চাহ তাং ভার্যামৃচীকো ভার্গবস্তদা
উপয়োজ্যশ্চরুরয়ং ত্বয়া মাত্রাপ্যয়ং তব
49.10
তস্যা জনিষ্যতে পুত্রো দীপ্তিমান্ক্ষত্রিয়র্ষভঃ
অজয্যঃ ক্ষত্রিয়ৈর্লোকে ক্ষত্রিয়র্ষভসূদনঃ
49.11
তবাপি পুত্রং কল্যাণি ধৃতিমন্তং তপোন্বিতম্
শমাত্মকং দ্বিজশ্রেষ্ঠং চরুরেষ বিধাস্যতি
49.12
ইত্যেবমুক্ত্বা তাং ভার্যামৃচীকো ভৃগুনন্দনঃ
তপস্যভিরতো ধীমাঞ্জগামারণ্যমেব হ
49.13
এতস্মিন্নেব কালে তু তীর্থয়াত্রাপরো নৃপঃ
গাধিঃ সদারঃ সংপ্রাপ্ত ঋচীকস্যাশ্রমং প্রতি
49.14
চরুদ্বয়ং গৃহীত্বা তু রাজন্সত্যবতী তদা
ভর্তুর্বাক্যাদথাব্যগ্রা মাত্রে হৃষ্টা ন্যবেদয়ৎ
49.15
মাতা তু তস্যাঃ কৌন্তেয় দুহিত্রে স্বং চরুং দদৌ
তস্যাশ্চরুমথাজ্ঞাতমাত্মসংস্থং চকার হ
49.16
অথ সত্যবতী গর্ভং ক্ষত্রিয়ান্তকরং তদা
ধারয়ামাস দীপ্তেন বপুষা ঘোরদর্শনম্
49.17
তামৃচীকস্তদা দৃষ্ট্বা ধ্যানয়োগেন বৈ ততঃ
অব্রবীদ্রাজশার্দূল স্বাং ভার্যাং বরবর্ণিনীম্
49.18
মাত্রাসি ব্যংসিতা ভদ্রে চরুব্যত্যাসহেতুনা
জনিষ্যতে হি তে পুত্রঃ ক্রূরকর্মা মহাবলঃ
49.19
জনিষ্যতে হি তে ভ্রাতা ব্রহ্মভূতস্তপোধনঃ
বিশ্বং হি ব্রহ্ম তপসা ময়া তত্র সমর্পিতম্
49.20
সৈবমুক্তা মহাভাগা ভর্ত্রা সত্যবতী তদা
পপাত শিরসা তস্মৈ বেপন্তী চাব্রবীদিদম্
49.21
নার্হোঽসি ভগবন্নদ্য বক্তুমেবংবিধং বচঃ
ব্রাহ্মণাপসদং পুত্রং প্রাপ্স্যসীতি মহামুনে
49.22
ঋচীক উবাচ
নৈষ সংকল্পিতঃ কামো ময়া ভদ্রে তথা ত্বয়ি
উগ্রকর্মা ভবেত্পুত্রশ্চরুর্মাতা চ কারণম্
49.23
সত্যবত্যুবাচ
ইচ্ছঁল্লোকানপি মুনে সৃজেথাঃ কিং পুনর্মম
শমাত্মকমৃজুং পুত্রং লভেয়ং জপতাং বর
49.24
ঋচীক উবাচ
নোক্তপূর্বং ময়া ভদ্রে স্বৈরেষ্বপ্যনৃতং বচঃ
কিমুতাগ্নিং সমাধায় মন্ত্রবচ্চরুসাধনে
49.25
সত্যবত্যুবাচ
কামমেবং ভবেত্পৌত্রো মমেহ তব চৈব হ
শমাত্মকমৃজুং পুত্রং লভেয়ং জপতাং বর
49.26
ঋচীক উবাচ
পুত্রে নাস্তি বিশেষো মে পৌত্রে বা বরবর্ণিনি
যথা ত্বয়োক্তং তু বচস্তথা ভদ্রে ভবিষ্যতি
49.27
বাসুদেব উবাচ
ততঃ সত্যবতী পুত্রং জনয়ামাস ভার্গবম্
তপস্যভিরতং শান্তং জমদগ্নিং শমাত্মকম্
49.28
বিশ্বামিত্রং চ দায়াদং গাধিঃ কুশিকনন্দনঃ
প্রাপ ব্রহ্মর্ষিসমিতং বিশ্বেন ব্রহ্মণা যুতম্
49.29
আর্চীকো জনয়ামাস জমদগ্নিঃ সুদারুণম্
সর্ববিদ্যান্তগং শ্রেষ্ঠং ধনুর্বেদে চ পারগম্
রামং ক্ষত্রিয়হন্তারং প্রদীপ্তমিব পাবকম্
49.30
এতস্মিন্নেব কালে তু কৃতবীর্যাত্মজো বলী
অর্জুনো নাম তেজস্বী ক্ষত্রিয়ো হৈহয়ান্বয়ঃ
49.31
দদাহ পৃথিবীং সর্বাং সপ্তদ্বীপাং সপত্তনাম্
স্ববাহ্বস্ত্রবলেনাজৌ ধর্মেণ পরমেণ চ
49.32
তৃষিতেন স কৌরব্য ভিক্ষিতশ্চিত্রভানুনা
সহস্রবাহুর্বিক্রান্তঃ প্রাদাদ্ভিক্ষামথাগ্নয়ে
49.33
গ্রামান্পুরাণি ঘোষাংশ্চ পত্তনানি চ বীর্যবান্
জজ্বাল তস্য বাণৈস্তু চিত্রভানুর্দিধক্ষয়া
49.34
স তস্য পুরুষেন্দ্রস্য প্রভাবেন মহাতপাঃ
দদাহ কার্তবীর্যস্য শৈলানথ বনানি চ
49.35
স শূন্যমাশ্রমারণ্যং বরুণস্যাত্মজস্য তৎ
দদাহ পবনেনেদ্ধশ্চিত্রভানুঃ সহৈহয়ঃ
49.36
আপবস্তং ততো রোষাচ্ছশাপার্জুনমচ্যুত
দগ্ধেঽঽশ্রমে মহারাজ কার্তবীর্যেণ বীর্যবান্
49.37
ত্বয়া ন বর্জিতং মোহাদ্যস্মাদ্বনমিদং মম
দগ্ধং তস্মাদ্রণে রামো বাহূংস্তে ছেত্স্যতেঽর্জুন
49.38
অর্জুনস্তু মহারাজ বলী নিত্যং শমাত্মকঃ
ব্রহ্মণ্যশ্চ শরণ্যশ্চ দাতা শূরশ্চ ভারত
49.39
তস্য পুত্রাঃ সুবলিনঃ শাপেনাসন্পিতুর্বধে
নিমিত্তমবলিপ্তা বৈ নৃশংসাশ্চৈব নিত্যদা
49.40
জমদগ্নিধেন্বাস্তে বত্সমানিন্যুর্ভরতর্ষভ
অজ্ঞাতং কার্তবীর্যস্য হৈহয়েন্দ্রস্য ধীমতঃ
49.41
ততোঽর্জুনস্য বাহূংস্তু ছিত্ত্বা বৈ পৌরুষান্বিতঃ
তং রুবন্তং ততো বত্সং জামদগ্ন্যঃ স্বমাশ্রমম্
প্রত্যানয়ত রাজেন্দ্র তেষামন্তঃপুরাত্প্রভুঃ
49.42
অর্জুনস্য সুতাস্তে তু সংভূয়াবুদ্ধয়স্তদা
গত্বাশ্রমমসংবুদ্ধং জমদগ্নের্মহাত্মনঃ
49.43
অপাতয়ন্ত ভল্লাগ্রৈঃ শিরঃ কায়ান্নরাধিপ
সমিত্কুশার্থং রামস্য নির্গতস্য মহাত্মনঃ
49.44
ততঃ পিতৃবধামর্ষাদ্রামঃ পরমমন্যুমান্
নিঃক্ষত্রিয়াং প্রতিশ্রুত্য মহীং শস্ত্রমগৃহ্ণত
49.45
ততঃ স ভৃগুশার্দূলঃ কার্তবীর্যস্য বীর্যবান্
বিক্রম্য নিজঘানাশু পুত্রান্পৌত্রাংশ্চ সর্বশঃ
49.46
স হৈহয়সহস্রাণি হত্বা পরমমন্যুমান্
চকার ভার্গবো রাজন্মহীং শোণিতকর্দমাম্
49.47
স তথা সুমহাতেজাঃ কৃত্বা নিঃক্ষত্রিয়াং মহীম্
কৃপয়া পরয়াবিষ্টো বনমেব জগাম হ
49.48
ততো বর্ষসহস্রেষু সমতীতেষু কেষুচিৎ
ক্ষোভং সংপ্রাপ্তবাংস্তীব্রং প্রকৃত্যা কোপনঃ প্রভুঃ
49.49
বিশ্বামিত্রস্য পৌত্রস্তু রৈভ্যপুত্রো মহাতপাঃ
পরাবসুর্মহারাজ ক্ষিপ্ত্বাহ জনসংসদি
49.50
যে তে যয়াতিপতনে যজ্ঞে সন্তঃ সমাগতাঃ
প্রতর্দনপ্রভৃতয়ো রাম কিং ক্ষত্রিয়া ন তে
49.51
মিথ্যাপ্রতিজ্ঞো রাম ত্বং কত্থসে জনসংসদি
ভয়াত্ক্ষত্রিয়বীরাণাং পর্বতং সমুপাশ্রিতঃ
49.52
স পুনঃ ক্ষত্রিয়শতৈঃ পৃথিবীমনুসংততাম্
পরাবসোস্তদা শ্রুত্বা শস্ত্রং জগ্রাহ ভার্গবঃ
49.53
ততো যে ক্ষত্রিয়া রাজঞ্শতশস্তেন জীবিতাঃ
তে বিবৃদ্ধা মহাবীর্যাঃ পৃথিবীপতয়োঽভবন্
49.54
স পুনস্তাঞ্জঘানাশু বালানপি নরাধিপ
গর্ভস্থৈস্তু মহী ব্যাপ্তা পুনরেবাভবত্তদা
49.55
জাতং জাতং স গর্ভং তু পুনরেব জঘান হ
অরক্ষংশ্চ সুতান্কাংশ্চিত্তদা ক্ষত্রিয়য়োষিতঃ
49.56
ত্রিঃসপ্তকৃত্বঃ পৃথিবীং কৃত্বা নিঃক্ষত্রিয়াং প্রভুঃ
দক্ষিণামশ্বমেধান্তে কশ্যপায়াদদত্ততঃ
49.57
ক্ষত্রিয়াণাং তু শেষার্থং করেণোদ্দিশ্য কশ্যপঃ
স্রুক্প্রগ্রহবতা রাজঞ্শ্রীমান্বাক্যমথাব্রবীৎ
49.58
গচ্ছ পারং সমুদ্রস্য দক্ষিণস্য মহামুনে
ন তে মদ্বিষয়ে রাম বস্তব্যমিহ কর্হিচিৎ
49.59
ততঃ শূর্পারকং দেশং সাগরস্তস্য নির্মমে
সংত্রাসাজ্জামদগ্ন্যস্য সোঽপরান্তং মহীতলম্
49.60
কশ্যপস্তু মহারাজ প্রতিগৃহ্য মহীমিমাম্
কৃত্বা ব্রাহ্মণসংস্থাং বৈ প্রবিবেশ মহাবনম্
49.61
ততঃ শূদ্রাশ্চ বৈশ্যাশ্চ যথাস্বৈরপ্রচারিণঃ
অবর্তন্ত দ্বিজাগ্র্যাণাং দারেষু ভরতর্ষভ
49.62
অরাজকে জীবলোকে দুর্বলা বলবত্তরৈঃ
বাধ্যন্তে ন চ বিত্তেষু প্রভুত্বমিহ কস্যচিৎ
49.63
ততঃ কালেন পৃথিবী প্রবিবেশ রসাতলম্
অরক্ষ্যমাণা বিধিবত্ক্ষত্রিয়ৈর্ধর্মরক্ষিভিঃ
49.64
ঊরুণা ধারয়ামাস কশ্যপঃ পৃথিবীং ততঃ
নিমজ্জন্তীং তদা রাজংস্তেনোর্বীতি মহী স্মৃতা
49.65
রক্ষিণশ্চ সমুদ্দিশ্য প্রায়াচত্পৃথিবী তদা
প্রসাদ্য কশ্যপং দেবী ক্ষত্রিয়ান্বাহুশালিনঃ
49.66
সন্তি ব্রহ্মন্ময়া গুপ্তা নৃষু ক্ষত্রিয়পুংগবাঃ
হৈহয়ানাং কুলে জাতাস্তে সংরক্ষন্তু মাং মুনে
49.67
অস্তি পৌরবদায়াদো বিডূরথসুতঃ প্রভো
ঋক্ষৈঃ সংবর্ধিতো বিপ্র ঋক্ষবত্যেব পর্বতে
49.68
তথানুকম্পমানেন যজ্বনাথামিতৌজসা
পরাশরেণ দায়াদঃ সৌদাসস্যাভিরক্ষিতঃ
49.69
সর্বকর্মাণি কুরুতে তস্যর্ষেঃ শূদ্রবদ্ধি সঃ
সর্বকর্মেত্যভিখ্যাতঃ স মাং রক্ষতু পার্থিবঃ
49.70
শিবেঃ পুত্রো মহাতেজা গোপতির্নাম নামতঃ
বনে সংরক্ষিতো গোভিঃ সোঽভিরক্ষতু মাং মুনে
49.71
প্রতর্দনস্য পুত্রস্তু বত্সো নাম মহায়শাঃ
বত্সৈঃ সংবর্ধিতো গোষ্ঠে স মাং রক্ষতু পার্থিবঃ
49.72
দধিবাহনপৌত্রস্তু পুত্রো দিবিরথস্য হ
অঙ্গঃ স গৌতমেনাপি গঙ্গাকূলেঽভিরক্ষিতঃ
49.73
বৃহদ্রথো মহাবাহুর্ভুবি ভূতিপুরস্কৃতঃ
গোলাঙ্গূলৈর্মহাভাগো গৃধ্রকূটেঽভিরক্ষিতঃ
49.74
মরুত্তস্যান্ববায়ে তু ক্ষত্রিয়াস্তুর্বসোস্ত্রয়ঃ
মরুত্পতিসমা বীর্যে সমুদ্রেণাভিরক্ষিতাঃ
49.75
এতে ক্ষত্রিয়দায়াদাস্তত্র তত্র পরিশ্রুতাঃ
সম্যঙ্মামভিরক্ষন্তু ততঃ স্থাস্যামি নিশ্চলা
49.76
এতেষাং পিতরশ্চৈব তথৈব চ পিতামহাঃ
মদর্থং নিহতা যুদ্ধে রামেণাক্লিষ্টকর্মণা
49.77
তেষামপচিতিশ্চৈব ময়া কার্যা ন সংশয়ঃ
ন হ্যহং কাময়ে নিত্যমবিক্রান্তেন রক্ষণম্
49.78
ততঃ পৃথিব্যা নির্দিষ্টাংস্তান্সমানীয় কশ্যপঃ
অভ্যষিঞ্চন্মহীপালান্ক্ষত্রিয়ান্বীর্যসংমতান্
49.79
তেষাং পুত্রাশ্চ পৌত্রাশ্চ যেষাং বংশাঃ প্রতিষ্ঠিতাঃ
এবমেতত্পুরা বৃত্তং যন্মাং পৃচ্ছসি পাণ্ডব
49.80
বৈশংপায়ন উবাচ
এবং ব্রুবন্নেব যদুপ্রবীরো; যুধিষ্ঠিরং ধর্মভৃতাং বরিষ্ঠম্
রথেন তেনাশু যয়ৌ যথার্কো; বিশন্প্রভাভির্ভগবাংস্ত্রিলোকম্