অধ্যায় 48

48.1

বৈশংপায়ন উবাচ
ততঃ স চ হৃষীকেশঃ স চ রাজা যুধিষ্ঠিরঃ
কৃপাদয়শ্চ তে সর্বে চত্বারঃ পাণ্ডবাশ্চ হ

রথৈস্তে নগরাকারৈঃ পতাকাধ্বজশোভিতৈঃ
যয়ুরাশু কুরুক্ষেত্রং বাজিভিঃ শীঘ্রগামিভিঃ

তেঽবতীর্য কুরুক্ষেত্রং কেশমজ্জাস্থিসংকুলম্
দেহন্যাসঃ কৃতো যত্র ক্ষত্রিয়ৈস্তৈর্মহাত্মভিঃ

গজাশ্বদেহাস্থিচয়ৈঃ পর্বতৈরিব সংচিতম্
নরশীর্ষকপালৈশ্চ শঙ্খৈরিব সমাচিতম্

চিতাসহস্রৈর্নিচিতং বর্মশস্ত্রসমাকুলম্
আপানভূমিং কালস্য তদা ভুক্তোজ্ঝিতামিব

ভূতসংঘানুচরিতং রক্ষোগণনিষেবিতম্
পশ্যন্তস্তে কুরুক্ষেত্রং যয়ুরাশু মহারথাঃ

গচ্ছন্নেব মহাবাহুঃ সর্বয়াদবনন্দনঃ
যুধিষ্ঠিরায় প্রোবাচ জামদগ্ন্যস্য বিক্রমম্

অমী রামহ্রদাঃ পঞ্চ দৃশ্যন্তে পার্থ দূরতঃ
যেষু সংতর্পয়ামাস পূর্বান্ক্ষত্রিয়শোণিতৈঃ

ত্রিঃসপ্তকৃত্বো বসুধাং কৃত্বা নিঃক্ষত্রিয়াং প্রভুঃ
ইহেদানীং ততো রামঃ কর্মণো বিররাম হ

যুধিষ্ঠির উবাচ
ত্রিঃসপ্তকৃত্বঃ পৃথিবী কৃতা নিঃক্ষত্রিয়া তদা
রামেণেতি যদাত্থ ত্বমত্র মে সংশয়ো মহান্

ক্ষত্রবীজং যদা দগ্ধং রামেণ যদুপুংগব
কথং ভূয়ঃ সমুত্পত্তিঃ ক্ষত্রস্যামিতবিক্রম

মহাত্মনা ভগবতা রামেণ যদুপুংগব
কথমুত্সাদিতং ক্ষত্রং কথং বৃদ্ধিং পুনর্গতম্

মহাভারতয়ুদ্ধে হি কোটিশঃ ক্ষত্রিয়া হতাঃ
তথাভূচ্চ মহী কীর্ণা ক্ষত্রিয়ৈর্বদতাং বর

এবং মে ছিন্ধি বার্ষ্ণেয় সংশয়ং তার্ক্ষ্যকেতন
আগমো হি পরঃ কৃষ্ণ ত্বত্তো নো বাসবানুজ

বৈশংপায়ন উবাচ
ততো ব্রজন্নেব গদাগ্রজঃ প্রভুঃ; শশংস তস্মৈ নিখিলেন তত্ত্বতঃ
যুধিষ্ঠিরায়াপ্রতিমৌজসে তদা; যথাভবত্ক্ষত্রিয়সংকুলা মহী