Utshovঅধ্যায় 47
47.1
জনমেজয় উবাচ
শরতল্পে শয়ানস্তু ভরতানাং পিতামহঃ
কথমুত্সৃষ্টবান্দেহং কং চ যোগমধারয়ৎ
47.2
বৈশংপায়ন উবাচ
শৃণুষ্বাবহিতো রাজঞ্শুচির্ভূত্বা সমাহিতঃ
ভীষ্মস্য কুরুশার্দূল দেহোত্সর্গং মহাত্মনঃ
47.3
নিবৃত্তমাত্রে ত্বয়ন উত্তরে বৈ দিবাকরে
সমাবেশয়দাত্মানমাত্মন্যেব সমাহিতঃ
47.4
বিকীর্ণাংশুরিবাদিত্যো ভীষ্মঃ শরশতৈশ্চিতঃ
শিশ্যে পরময়া লক্ষ্ম্যা বৃতো ব্রাহ্মণসত্তমৈঃ
47.5
ব্যাসেন বেদশ্রবসা নারদেন সুরর্ষিণা
দেবস্থানেন বাত্স্যেন তথাশ্মকসুমন্তুনা
47.6
এতৈশ্চান্যৈর্মুনিগণৈর্মহাভাগৈর্মহাত্মভিঃ
শ্রদ্ধাদমপুরস্কারৈর্বৃতশ্চন্দ্র ইব গ্রহৈঃ
47.7
ভীষ্মস্তু পুরুষব্যাঘ্রঃ কর্মণা মনসা গিরা
শরতল্পগতঃ কৃষ্ণং প্রদধ্যৌ প্রাঞ্জলিঃ স্থিতঃ
47.8
স্বরেণ পুষ্টনাদেন তুষ্টাব মধুসূদনম্
যোগেশ্বরং পদ্মনাভং বিষ্ণুং জিষ্ণুং জগত্পতিম্
47.9
কৃতাঞ্জলিঃ শুচির্ভূত্বা বাগ্বিদাং প্রবরঃ প্রভুম্
ভীষ্মঃ পরমধর্মাত্মা বাসুদেবমথাস্তুবৎ
47.10
আরিরাধয়িষুঃ কৃষ্ণং বাচং জিগমিষামি যাম্
তয়া ব্যাসসমাসিন্যা প্রীয়তাং পুরুষোত্তমঃ
47.11
শুচিঃ শুচিষদং হংসং তত্পরঃ পরমেষ্ঠিনম্
যুক্ত্বা সর্বাত্মনাত্মানং তং প্রপদ্যে প্রজাপতিম্
47.12
যস্মিন্বিশ্বানি ভূতানি তিষ্ঠন্তি চ বিশন্তি চ
গুণভূতানি ভূতেশে সূত্রে মণিগণা ইব
47.13
যস্মিন্নিত্যে ততে তন্তৌ দৃঢে স্রগিব তিষ্ঠতি
সদসদ্গ্রথিতং বিশ্বং বিশ্বাঙ্গে বিশ্বকর্মণি
47.14
হরিং সহস্রশিরসং সহস্রচরণেক্ষণম্
প্রাহুর্নারায়ণং দেবং যং বিশ্বস্য পরায়ণম্
47.15
অণীয়সামণীয়াংসং স্থবিষ্ঠং চ স্থবীয়সাম্
গরীয়সাং গরিষ্ঠং চ শ্রেষ্ঠং চ শ্রেয়সামপি
47.16
যং বাকেষ্বনুবাকেষু নিষত্সূপনিষত্সু চ
গৃণন্তি সত্যকর্মাণং সত্যং সত্যেষু সামসু
47.17
চতুর্ভিশ্চতুরাত্মানং সত্ত্বস্থং সাত্বতাং পতিম্
যং দিব্যৈর্দেবমর্চন্তি গুহ্যৈঃ পরমনামভিঃ
47.18
যং দেবং দেবকী দেবী বসুদেবাদজীজনৎ
ভৌমস্য ব্রহ্মণো গুপ্ত্যৈ দীপ্তমগ্নিমিবারণিঃ
47.19
যমনন্যো ব্যপেতাশীরাত্মানং বীতকল্মষম্
ইষ্ট্বানন্ত্যায় গোবিন্দং পশ্যত্যাত্মন্যবস্থিতম্
47.20
পুরাণে পুরুষঃ প্রোক্তো ব্রহ্মা প্রোক্তো যুগাদিষু
ক্ষয়ে সংকর্ষণঃ প্রোক্তস্তমুপাস্যমুপাস্মহে
47.21
অতিবায্বিন্দ্রকর্মাণমতিসূর্যাগ্নিতেজসম্
অতিবুদ্ধীন্দ্রিয়াত্মানং তং প্রপদ্যে প্রজাপতিম্
47.22
যং বৈ বিশ্বস্য কর্তারং জগতস্তস্থুষাং পতিম্
বদন্তি জগতোঽধ্যক্ষমক্ষরং পরমং পদম্
47.23
হিরণ্যবর্ণং যং গর্ভমদিতির্দৈত্যনাশনম্
একং দ্বাদশধা জজ্ঞে তস্মৈ সূর্যাত্মনে নমঃ
47.24
শুক্লে দেবান্পিতৄন্কৃষ্ণে তর্পয়ত্যমৃতেন যঃ
যশ্চ রাজা দ্বিজাতীনাং তস্মৈ সোমাত্মনে নমঃ
47.25
মহতস্তমসঃ পারে পুরুষং জ্বলনদ্যুতিম্
যং জ্ঞাত্বা মৃত্যুমত্যেতি তস্মৈ জ্ঞেয়াত্মনে নমঃ
47.26
যং বৃহন্তং বৃহত্যুক্থে যমগ্নৌ যং মহাধ্বরে
যং বিপ্রসংঘা গায়ন্তি তস্মৈ বেদাত্মনে নমঃ
47.27
ঋগ্যজুঃসামধামানং দশার্ধহবিরাকৃতিম্
যং সপ্ততন্তুং তন্বন্তি তস্মৈ যজ্ঞাত্মনে নমঃ
47.28
যঃ সুপর্ণো যজুর্নাম ছন্দোগাত্রস্ত্রিবৃচ্ছিরাঃ
রথংতরবৃহত্যক্ষস্তস্মৈ স্তোত্রাত্মনে নমঃ
47.29
যঃ সহস্রসবে সত্রে জজ্ঞে বিশ্বসৃজামৃষিঃ
হিরণ্যবর্ণঃ শকুনিস্তস্মৈ হংসাত্মনে নমঃ
47.30
পদাঙ্গং সংধিপর্বাণং স্বরব্যঞ্জনলক্ষণম্
যমাহুরক্ষরং নিত্যং তস্মৈ বাগাত্মনে নমঃ
47.31
যশ্চিনোতি সতাং সেতুমৃতেনামৃতয়োনিনা
ধর্মার্থব্যবহারাঙ্গৈস্তস্মৈ সত্যাত্মনে নমঃ
47.32
যং পৃথগ্ধর্মচরণাঃ পৃথগ্ধর্মফলৈষিণঃ
পৃথগ্ধর্মৈঃ সমর্চন্তি তস্মৈ ধর্মাত্মনে নমঃ
47.33
যং তং ব্যক্তস্থমব্যক্তং বিচিন্বন্তি মহর্ষয়ঃ
ক্ষেত্রে ক্ষেত্রজ্ঞমাসীনং তস্মৈ ক্ষেত্রাত্মনে নমঃ
47.34
যং দৃগাত্মানমাত্মস্থং বৃতং ষোডশভির্গুণৈঃ
প্রাহুঃ সপ্তদশং সাংখ্যাস্তস্মৈ সাংখ্যাত্মনে নমঃ
47.35
যং বিনিদ্রা জিতশ্বাসাঃ সত্ত্বস্থাঃ সংয়তেন্দ্রিয়াঃ
জ্যোতিঃ পশ্যন্তি যুঞ্জানাস্তস্মৈ যোগাত্মনে নমঃ
47.36
অপুণ্যপুণ্যোপরমে যং পুনর্ভবনির্ভয়াঃ
শান্তাঃ সংন্যাসিনো যান্তি তস্মৈ মোক্ষাত্মনে নমঃ
47.37
যোঽসৌ যুগসহস্রান্তে প্রদীপ্তার্চির্বিভাবসুঃ
সংভক্ষয়তি ভূতানি তস্মৈ ঘোরাত্মনে নমঃ
47.38
সংভক্ষ্য সর্বভূতানি কৃত্বা চৈকার্ণবং জগৎ
বালঃ স্বপিতি যশ্চৈকস্তস্মৈ মায়াত্মনে নমঃ
47.39
সহস্রশিরসে তস্মৈ পুরুষায়ামিতাত্মনে
চতুঃসমুদ্রপর্যায়য়োগনিদ্রাত্মনে নমঃ
47.40
অজস্য নাভাবধ্যেকং যস্মিন্বিশ্বং প্রতিষ্ঠিতম্
পুষ্করং পুষ্করাক্ষস্য তস্মৈ পদ্মাত্মনে নমঃ
47.41
যস্য কেশেষু জীমূতা নদ্যঃ সর্বাঙ্গসংধিষু
কুক্ষৌ সমুদ্রাশ্চত্বারস্তস্মৈ তোয়াত্মনে নমঃ
47.42
যুগেষ্বাবর্ততে যোংঽশৈর্দিনর্ত্বয়নহায়নৈঃ
সর্গপ্রলয়য়োঃ কর্তা তস্মৈ কালাত্মনে নমঃ
47.43
ব্রহ্ম বক্ত্রং ভুজৌ ক্ষত্রং কৃত্স্নমূরূদরং বিশঃ
পাদৌ যস্যাশ্রিতাঃ শূদ্রাস্তস্মৈ বর্ণাত্মনে নমঃ
47.44
যস্যাগ্নিরাস্যং দ্যৌর্মূর্ধা খং নাভিশ্চরণৌ ক্ষিতিঃ
সূর্যশ্চক্ষুর্দিশঃ শ্রোত্রে তস্মৈ লোকাত্মনে নমঃ
47.45
বিষয়ে বর্তমানানাং যং তং বৈশেষিকৈর্গুণৈঃ
প্রাহুর্বিষয়গোপ্তারং তস্মৈ গোপ্ত্রাত্মনে নমঃ
47.46
অন্নপানেন্ধনময়ো রসপ্রাণবিবর্ধনঃ
যো ধারয়তি ভূতানি তস্মৈ প্রাণাত্মনে নমঃ
47.47
পরঃ কালাত্পরো যজ্ঞাত্পরঃ সদসতোশ্চ যঃ
অনাদিরাদির্বিশ্বস্য তস্মৈ বিশ্বাত্মনে নমঃ
47.48
যো মোহয়তি ভূতানি স্নেহরাগানুবন্ধনৈঃ
সর্গস্য রক্ষণার্থায় তস্মৈ মোহাত্মনে নমঃ
47.49
আত্মজ্ঞানমিদং জ্ঞানং জ্ঞাত্বা পঞ্চস্ববস্থিতম্
যং জ্ঞানিনোঽধিগচ্ছন্তি তস্মৈ জ্ঞানাত্মনে নমঃ
47.50
অপ্রমেয়শরীরায় সর্বতোঽনন্তচক্ষুষে
অপারপরিমেয়ায় তস্মৈ চিন্ত্যাত্মনে নমঃ
47.51
জটিনে দণ্ডিনে নিত্যং লম্বোদরশরীরিণে
কমণ্ডলুনিষঙ্গায় তস্মৈ ব্রহ্মাত্মনে নমঃ
47.52
শূলিনে ত্রিদশেশায় ত্র্যম্বকায় মহাত্মনে
ভস্মদিগ্ধোর্ধ্বলিঙ্গায় তস্মৈ রুদ্রাত্মনে নমঃ
47.53
পঞ্চভূতাত্মভূতায় ভূতাদিনিধনাত্মনে
অক্রোধদ্রোহমোহায় তস্মৈ শান্তাত্মনে নমঃ
47.54
যস্মিন্সর্বং যতঃ সর্বং যঃ সর্বং সর্বতশ্চ যঃ
যশ্চ সর্বময়ো নিত্যং তস্মৈ সর্বাত্মনে নমঃ
47.55
বিশ্বকর্মন্নমস্তেঽস্তু বিশ্বাত্মন্বিশ্বসংভব
অপবর্গোঽসি ভূতানাং পঞ্চানাং পরতঃ স্থিতঃ
47.56
নমস্তে ত্রিষু লোকেষু নমস্তে পরতস্ত্রিষু
নমস্তে দিক্ষু সর্বাসু ত্বং হি সর্বপরায়ণম্
47.57
নমস্তে ভগবন্বিষ্ণো লোকানাং প্রভবাপ্যয়
ত্বং হি কর্তা হৃষীকেশ সংহর্তা চাপরাজিতঃ
47.58
তেন পশ্যামি তে দিব্যান্ভাবান্হি ত্রিষু বর্ত্মসু
তচ্চ পশ্যামি তত্ত্বেন যত্তে রূপং সনাতনম্
47.59
দিবং তে শিরসা ব্যাপ্তং পদ্ভ্যাং দেবী বসুংধরা
বিক্রমেণ ত্রয়ো লোকাঃ পুরুষোঽসি সনাতনঃ
47.60
অতসীপুষ্পসংকাশং পীতবাসসমচ্যুতম্
যে নমস্যন্তি গোবিন্দং ন তেষাং বিদ্যতে ভয়ম্
47.61
যথা বিষ্ণুময়ং সত্যং যথা বিষ্ণুময়ং হবিঃ
যথা বিষ্ণুময়ং সর্বং পাপ্মা মে নশ্যতাং তথা
47.62
ত্বাং প্রপন্নায় ভক্তায় গতিমিষ্টাং জিগীষবে
যচ্ছ্রেয়ঃ পুণ্ডরীকাক্ষ তদ্ধ্যায়স্ব সুরোত্তম
47.63
ইতি বিদ্যাতপোয়োনিরয়োনির্বিষ্ণুরীডিতঃ
বাগ্যজ্ঞেনার্চিতো দেবঃ প্রীয়তাং মে জনার্দনঃ
47.64
এতাবদুক্ত্বা বচনং ভীষ্মস্তদ্গতমানসঃ
নম ইত্যেব কৃষ্ণায় প্রণামমকরোত্তদা
47.65
অভিগম্য তু যোগেন ভক্তিং ভীষ্মস্য মাধবঃ
ত্রৈকাল্যদর্শনং জ্ঞানং দিব্যং দাতুং যয়ৌ হরিঃ
47.66
তস্মিন্নুপরতে শব্দে ততস্তে ব্রহ্মবাদিনঃ
ভীষ্মং বাগ্ভির্বাষ্পকণ্ঠাস্তমানর্চুর্মহামতিম্
47.67
তে স্তুবন্তশ্চ বিপ্রাগ্র্যাঃ কেশবং পুরুষোত্তমম্
ভীষ্মং চ শনকৈঃ সর্বে প্রশশংসুঃ পুনঃ পুনঃ
47.68
বিদিত্বা ভক্তিয়োগং তু ভীষ্মস্য পুরুষোত্তমঃ
সহসোত্থায় সংহৃষ্টো যানমেবান্বপদ্যত
47.69
কেশবঃ সাত্যকিশ্চৈব রথেনৈকেন জগ্মতুঃ
অপরেণ মহাত্মানৌ যুধিষ্ঠিরধনংজয়ৌ
47.70
ভীমসেনো যমৌ চোভৌ রথমেকং সমাস্থিতৌ
কৃপো যুয়ুত্সুঃ সূতশ্চ সংজয়শ্চাপরং রথম্
47.71
তে রথৈর্নগরাকারৈঃ প্রয়াতাঃ পুরুষর্ষভাঃ
নেমিঘোষেণ মহতা কম্পয়ন্তো বসুংধরাম্
47.72
ততো গিরঃ পুরুষবরস্তবান্বিতা; দ্বিজেরিতাঃ পথি সুমনাঃ স শুশ্রুবে
কৃতাঞ্জলিং প্রণতমথাপরং জনং; স কেশিহা মুদিতমনাভ্যনন্দত