Utshovঅধ্যায় 46
46.1
যুধিষ্ঠির উবাচ
কিমিদং পরমাশ্চর্যং ধ্যায়স্যমিতবিক্রম
কচ্চিল্লোকত্রয়স্যাস্য স্বস্তি লোকপরায়ণ
46.2
চতুর্থং ধ্যানমার্গং ত্বমালম্ব্য পুরুষোত্তম
অপক্রান্তো যতো দেব তেন মে বিস্মিতং মনঃ
46.3
নিগৃহীতো হি বায়ুস্তে পঞ্চকর্মা শরীরগঃ
ইন্দ্রিয়াণি চ সর্বাণি মনসি স্থাপিতানি তে
46.4
ইন্দ্রিয়াণি মনশ্চৈব বুদ্ধৌ সংবেশিতানি তে
সর্বশ্চৈব গণো দেব ক্ষেত্রজ্ঞে তে নিবেশিতঃ
46.5
নেঙ্গন্তি তব রোমাণি স্থিরা বুদ্ধিস্তথা মনঃ
স্থাণুকুড্যশিলাভূতো নিরীহশ্চাসি মাধব
46.6
যথা দীপো নিবাতস্থো নিরিঙ্গো জ্বলতেঽচ্যুত
তথাসি ভগবন্দেব নিশ্চলো দৃঢনিশ্চয়ঃ
46.7
যদি শ্রোতুমিহার্হামি ন রহস্যং চ তে যদি
ছিন্ধি মে সংশয়ং দেব প্রপন্নায়াভিয়াচতে
46.8
ত্বং হি কর্তা বিকর্তা চ ত্বং ক্ষরং চাক্ষরং চ হি
অনাদিনিধনশ্চাদ্যস্ত্বমেব পুরুষোত্তম
46.9
ত্বত্প্রপন্নায় ভক্তায় শিরসা প্রণতায় চ
ধ্যানস্যাস্য যথাতত্ত্বং ব্রূহি ধর্মভৃতাং বর
46.10
বৈশংপায়ন উবাচ
ততঃ স্বগোচরে ন্যস্য মনো বুদ্ধীন্দ্রিয়াণি চ
স্মিতপূর্বমুবাচেদং ভগবান্বাসবানুজঃ
46.11
শরতল্পগতো ভীষ্মঃ শাম্যন্নিব হুতাশনঃ
মাং ধ্যাতি পুরুষব্যাঘ্রস্ততো মে তদ্গতং মনঃ
46.12
যস্য জ্যাতলনির্ঘোষং বিস্ফূর্জিতমিবাশনেঃ
ন সহেদ্দেবরাজোঽপি তমস্মি মনসা গতঃ
46.13
যেনাভিদ্রুত্য তরসা সমস্তং রাজমণ্ডলম্
ঊঢাস্তিস্রঃ পুরা কন্যাস্তমস্মি মনসা গতঃ
46.14
ত্রয়োবিংশতিরাত্রং যো যোধয়ামাস ভার্গবম্
ন চ রামেণ নিস্তীর্ণস্তমস্মি মনসা গতঃ
46.15
যং গঙ্গা গর্ভবিধিনা ধারয়ামাস পার্থিবম্
বসিষ্ঠশিষ্যং তং তাত মনসাস্মি গতো নৃপ
46.16
দিব্যাস্ত্রাণি মহাতেজা যো ধারয়তি বুদ্ধিমান্
সাঙ্গাংশ্চ চতুরো বেদাংস্তমস্মি মনসা গতঃ
46.17
রামস্য দয়িতং শিষ্যং জামদগ্ন্যস্য পাণ্ডব
আধারং সর্ববিদ্যানাং তমস্মি মনসা গতঃ
46.18
একীকৃত্যেন্দ্রিয়গ্রামং মনঃ সংয়ম্য মেধয়া
শরণং মামুপাগচ্ছত্ততো মে তদ্গতং মনঃ
46.19
স হি ভূতং চ ভব্যং চ ভবচ্চ পুরুষর্ষভ
বেত্তি ধর্মভৃতাং শ্রেষ্ঠস্ততো মে তদ্গতং মনঃ
46.20
তস্মিন্হি পুরুষব্যাঘ্রে কর্মভিঃ স্বৈর্দিবং গতে
ভবিষ্যতি মহী পার্থ নষ্টচন্দ্রেব শর্বরী
46.21
তদ্যুধিষ্ঠির গাঙ্গেয়ং ভীষ্মং ভীমপরাক্রমম্
অভিগম্যোপসংগৃহ্য পৃচ্ছ যত্তে মনোগতম্
46.22
চাতুর্বেদ্যং চাতুর্হোত্রং চাতুরাশ্রম্যমেব চ
চাতুর্বর্ণ্যস্য ধর্মং চ পৃচ্ছৈনং পৃথিবীপতে
46.23
তস্মিন্নস্তমিতে ভীষ্মে কৌরবাণাং ধুরংধরে
জ্ঞানান্যল্পীভবিষ্যন্তি তস্মাত্ত্বাং চোদয়াম্যহম্
46.24
তচ্ছ্রুত্বা বাসুদেবস্য তথ্যং বচনমুত্তমম্
সাশ্রুকণ্ঠঃ স ধর্মজ্ঞো জনার্দনমুবাচ হ
46.25
যদ্ভবানাহ ভীষ্মস্য প্রভাবং প্রতি মাধব
তথা তন্নাত্র সংদেহো বিদ্যতে মম মানদ
46.26
মহাভাগ্যং হি ভীষ্মস্য প্রভাবশ্চ মহাত্মনঃ
শ্রুতং ময়া কথয়তাং ব্রাহ্মণানাং মহাত্মনাম্
46.27
ভবাংশ্চ কর্তা লোকানাং যদ্ব্রবীত্যরিসূদন
তথা তদনভিধ্যেয়ং বাক্যং যাদবনন্দন
46.28
যতস্ত্বনুগ্রহকৃতা বুদ্ধিস্তে ময়ি মাধব
ত্বামগ্রতঃ পুরস্কৃত্য ভীষ্মং পশ্যামহে বয়ম্
46.29
আবৃত্তে ভগবত্যর্কে স হি লোকান্গমিষ্যতি
ত্বদ্দর্শনং মহাবাহো তস্মাদর্হতি কৌরবঃ
46.30
তব হ্যাদ্যস্য দেবস্য ক্ষরস্যৈবাক্ষরস্য চ
দর্শনং তস্য লাভঃ স্যাত্ত্বং হি ব্রহ্মময়ো নিধিঃ
46.31
শ্রুত্বৈতদ্ধর্মরাজস্য বচনং মধুসূদনঃ
পার্শ্বস্থং সাত্যকিং প্রাহ রথো মে যুজ্যতামিতি
46.32
সাত্যকিস্তূপনিষ্ক্রম্য কেশবস্য সমীপতঃ
দারুকং প্রাহ কৃষ্ণস্য যুজ্যতাং রথ ইত্যুত
46.33
স সাত্যকেরাশু বচো নিশম্য; রথোত্তমং কাঞ্চনভূষিতাঙ্গম্
মসারগল্বর্কময়ৈর্বিভঙ্গৈ;র্বিভূষিতং হেমপিনদ্ধচক্রম্
46.34
দিবাকরাংশুপ্রভমাশুগামিনং; বিচিত্রনানামণিরত্নভূষিতম্
নবোদিতং সূর্যমিব প্রতাপিনং; বিচিত্রতার্ক্ষ্যধ্বজিনং পতাকিনম্
46.35
সুগ্রীবসৈন্যপ্রমুখৈর্বরাশ্বৈ;র্মনোজবৈঃ কাঞ্চনভূষিতাঙ্গৈঃ
সুয়ুক্তমাবেদয়দচ্যুতায়; কৃতাঞ্জলির্দারুকো রাজসিংহ