অধ্যায় 45

45.1

জনমেজয় উবাচ
প্রাপ্য রাজ্যং মহাতেজা ধর্মরাজো যুধিষ্ঠিরঃ
যদন্যদকরোদ্বিপ্র তন্মে বক্তুমিহার্হসি

ভগবান্বা হৃষীকেশস্ত্রৈলোক্যস্য পরো গুরুঃ
ঋষে যদকরোদ্বীরস্তচ্চ ব্যাখ্যাতুমর্হসি

বৈশংপায়ন উবাচ
শৃণু রাজেন্দ্র তত্ত্বেন কীর্ত্যমানং ময়ানঘ
বাসুদেবং পুরস্কৃত্য যদকুর্বত পাণ্ডবাঃ

প্রাপ্য রাজ্যং মহাতেজা ধর্মরাজো যুধিষ্ঠিরঃ
চাতুর্বর্ণ্যং যথায়োগং স্বে স্বে ধর্মে ন্যবেশয়ৎ

ব্রাহ্মণানাং সহস্রং চ স্নাতকানাং মহাত্মনাম্
সহস্রনিষ্কমেকৈকং বাচয়ামাস পাণ্ডবঃ

তথানুজীবিনো ভৃত্যান্সংশ্রিতানতিথীনপি
কামৈঃ সংতর্পয়ামাস কৃপণাংস্তর্ককানপি

পুরোহিতায় ধৌম্যায় প্রাদাদয়ুতশঃ স গাঃ
ধনং সুবর্ণং রজতং বাসাংসি বিবিধানি চ

কৃপায় চ মহারাজ গুরুবৃত্তিমবর্তত
বিদুরায় চ ধর্মাত্মা পূজাং চক্রে যতব্রতঃ

ভক্ষান্নপানৈর্বিবিধৈর্বাসোভিঃ শয়নাসনৈঃ
সর্বান্সংতোষয়ামাস সংশ্রিতান্দদতাং বরঃ

লব্ধপ্রশমনং কৃত্বা স রাজা রাজসত্তম
যুয়ুত্সোর্ধার্তরাষ্ট্রস্য পূজাং চক্রে মহায়শাঃ

ধৃতরাষ্ট্রায় তদ্রাজ্যং গান্ধার্যৈ বিদুরায় চ
নিবেদ্য স্বস্থবদ্রাজন্নাস্তে রাজা যুধিষ্ঠিরঃ

তথা সর্বং স নগরং প্রসাদ্য জনমেজয়
বাসুদেবং মহাত্মানমভ্যগচ্ছত্কৃতাঞ্জলিঃ

ততো মহতি পর্যঙ্কে মণিকাঞ্চনভূষিতে
দদর্শ কৃষ্ণমাসীনং নীলং মেরাবিবাম্বুদম্

জাজ্বল্যমানং বপুষা দিব্যাভরণভূষিতম্
পীতকৌশেয়সংবীতং হেম্নীবোপহিতং মণিম্

কৌস্তুভেন উরঃস্থেন মণিনাভিবিরাজিতম্
উদ্যতেবোদয়ং শৈলং সূর্যেণাপ্তকিরীটিনম্
নৌপম্যং বিদ্যতে যস্য ত্রিষু লোকেষু কিংচন

সোঽভিগম্য মহাত্মানং বিষ্ণুং পুরুষবিগ্রহম্
উবাচ মধুরাভাষঃ স্মিতপূর্বমিদং তদা

সুখেন তে নিশা কচ্চিদ্ব্যুষ্টা বুদ্ধিমতাং বর
কচ্চিজ্জ্ঞানানি সর্বাণি প্রসন্নানি তবাচ্যুত

তব হ্যাশ্রিত্য তাং দেবীং বুদ্ধিং বুদ্ধিমতাং বর
বয়ং রাজ্যমনুপ্রাপ্তাঃ পৃথিবী চ বশে স্থিতা

ভবত্প্রসাদাদ্ভগবংস্ত্রিলোকগতিবিক্রম
জয়ঃ প্রাপ্তো যশশ্চাগ্র্যং ন চ ধর্মাচ্চ্যুতা বয়ম্

তং তথা ভাষমাণং তু ধর্মরাজং যুধিষ্ঠিরম্
নোবাচ ভগবান্কিংচিদ্ধ্যানমেবান্বপদ্যত