অধ্যায় 44

44.1

বৈশংপায়ন উবাচ
ততো বিসর্জয়ামাস সর্বাঃ প্রকৃতয়ো নৃপঃ
বিবিশুশ্চাভ্যনুজ্ঞাতা যথাস্বানি গৃহাণি চ

ততো যুধিষ্ঠিরো রাজা ভীমং ভীমপরাক্রমম্
সান্ত্বয়ন্নব্রবীদ্ধীমানর্জুনং যমজৌ তথা

শত্রুভির্বিবিধৈঃ শস্ত্রৈঃ কৃত্তদেহা মহারণে
শ্রান্তা ভবন্তঃ সুভৃশং তাপিতাঃ শোকমন্যুভিঃ

অরণ্যে দুঃখবসতীর্মত্কৃতে পুরুষোত্তমাঃ
ভবদ্ভিরনুভূতাশ্চ যথা কুপুরুষৈস্তথা

যথাসুখং যথাজোষং জয়োঽয়মনুভূয়তাম্
বিশ্রান্তাঁল্লব্ধবিজ্ঞানাঞ্শ্বঃ সমেতাস্মি বঃ পুনঃ

ততো দুর্যোধনগৃহং প্রাসাদৈরুপশোভিতম্
বহুরত্নসমাকীর্ণং দাসীদাসসমাকুলম্

ধৃতরাষ্ট্রাভ্যনুজ্ঞাতং ভ্রাত্রা দত্তং বৃকোদরঃ
প্রতিপেদে মহাবাহুর্মন্দরং মঘবানিব

যথা দুর্যোধনগৃহং তথা দুঃশাসনস্য চ
প্রাসাদমালাসংয়ুক্তং হেমতোরণভূষিতম্

দাসীদাসসুসংপূর্ণং প্রভূতধনধান্যবৎ
প্রতিপেদে মহাবাহুরর্জুনো রাজশাসনাৎ

দুর্মর্ষণস্য ভবনং দুঃশাসনগৃহাদ্বরম্
কুবেরভবনপ্রখ্যং মণিহেমবিভূষিতম্

নকুলায় বরার্হায় কর্শিতায় মহাবনে
দদৌ প্রীতো মহারাজ ধর্মরাজো যুধিষ্ঠিরঃ

দুর্মুখস্য চ বেশ্মাগ্র্যং শ্রীমত্কনকভূষিতম্
পূর্ণং পদ্মদলাক্ষীণাং স্ত্রীণাং শয়নসংকুলম্

প্রদদৌ সহদেবায় সততং প্রিয়কারিণে
মুমুদে তচ্চ লব্ধ্বা স কৈলাসং ধনদো যথা

যুয়ুত্সুর্বিদুরশ্চৈব সংজয়শ্চ মহাদ্যুতিঃ
সুধর্মা চৈব ধৌম্যশ্চ যথাস্বং জগ্মুরালয়ান্

সহ সাত্যকিনা শৌরিরর্জুনস্য নিবেশনম্
বিবেশ পুরুষব্যাঘ্রো ব্যাঘ্রো গিরিগুহামিব

তত্র ভক্ষান্নপানৈস্তে সমুপেতাঃ সুখোষিতাঃ
সুখপ্রবুদ্ধা রাজানমুপতস্থুর্যুধিষ্ঠিরম্