UtshovChapter 44
44.1
वैशंपायन उवाच
ततो विसर्जयामास सर्वाः प्रकृतयो नृपः
विविशुश्चाभ्यनुज्ञाता यथास्वानि गृहाणि च
Vaishampayana uvacha
Tato visarjayamasa sarvah prakritayo nripah
Vivishushchabhyanugyata yathasvani grihani cha
44.2
ततो युधिष्ठिरो राजा भीमं भीमपराक्रमम्
सान्त्वयन्नब्रवीद्धीमानर्जुनं यमजौ तथा
Tato yudhishthiro raja bhimam bhimaparakramam
Santvayannabraviddhimanarjunam yamajau tatha
44.3
शत्रुभिर्विविधैः शस्त्रैः कृत्तदेहा महारणे
श्रान्ता भवन्तः सुभृशं तापिताः शोकमन्युभिः
Shatrubhirvividhaih shastraih krittadeha maharane
Shranta bhavantah subhrisham tapitah shokamanyubhih
44.4
अरण्ये दुःखवसतीर्मत्कृते पुरुषोत्तमाः
भवद्भिरनुभूताश्च यथा कुपुरुषैस्तथा
Aranye duhkhavasatirmatkrite purushottamah
Bhavadbhiranubhutashcha yatha kupurushaistatha
44.5
यथासुखं यथाजोषं जयोऽयमनुभूयताम्
विश्रान्ताँल्लब्धविज्ञानाञ्श्वः समेतास्मि वः पुनः
Yathasukham yathajosham jayoyamanubhuyatam
Vishrantanllabdhavigyananshvah sametasmi vah punah
44.6
ततो दुर्योधनगृहं प्रासादैरुपशोभितम्
बहुरत्नसमाकीर्णं दासीदाससमाकुलम्
Tato duryodhanagriham prasadairupashobhitam
Bahuratnasamakirnam dasidasasamakulam
44.7
धृतराष्ट्राभ्यनुज्ञातं भ्रात्रा दत्तं वृकोदरः
प्रतिपेदे महाबाहुर्मन्दरं मघवानिव
Dhritarashtrabhyanugyatam bhratra dattam vrikodarah
Pratipede mahabahurmandaram maghavaniva
44.8
यथा दुर्योधनगृहं तथा दुःशासनस्य च
प्रासादमालासंयुक्तं हेमतोरणभूषितम्
Yatha duryodhanagriham tatha duhshasanasya cha
Prasadamalasanyuktam hematoranabhushitam
44.9
दासीदाससुसंपूर्णं प्रभूतधनधान्यवत्
प्रतिपेदे महाबाहुरर्जुनो राजशासनात्
Dasidasasusampurnam prabhutadhanadhanyavat
Pratipede mahabahurarjuno rajashasanat
44.10
दुर्मर्षणस्य भवनं दुःशासनगृहाद्वरम्
कुबेरभवनप्रख्यं मणिहेमविभूषितम्
Durmarshanasya bhavanam duhshasanagrihadvaram
Kuberabhavanaprakhyam manihemavibhushitam
44.11
नकुलाय वरार्हाय कर्शिताय महावने
ददौ प्रीतो महाराज धर्मराजो युधिष्ठिरः
Nakulaya vararhaya karshitaya mahavane
Dadau prito maharaja dharmarajo yudhishthirah
44.12
दुर्मुखस्य च वेश्माग्र्यं श्रीमत्कनकभूषितम्
पूर्णं पद्मदलाक्षीणां स्त्रीणां शयनसंकुलम्
Durmukhasya cha veshmagryam shrimatkanakabhushitam
Purnam padmadalakshinam strinam shayanasankulam
44.13
प्रददौ सहदेवाय सततं प्रियकारिणे
मुमुदे तच्च लब्ध्वा स कैलासं धनदो यथा
Pradadau sahadevaya satatam priyakarine
Mumude tachcha labdhva sa kailasam dhanado yatha
44.14
युयुत्सुर्विदुरश्चैव संजयश्च महाद्युतिः
सुधर्मा चैव धौम्यश्च यथास्वं जग्मुरालयान्
Yuyutsurvidurashchaiva sanjayashcha mahadyutih
Sudharma chaiva dhaumyashcha yathasvam jagmuralayan
44.15
सह सात्यकिना शौरिरर्जुनस्य निवेशनम्
विवेश पुरुषव्याघ्रो व्याघ्रो गिरिगुहामिव
Saha satyakina shaurirarjunasya niveshanam
Vivesha purushavyaghro vyaghro giriguhamiva
44.16
तत्र भक्षान्नपानैस्ते समुपेताः सुखोषिताः
सुखप्रबुद्धा राजानमुपतस्थुर्युधिष्ठिरम्
Tatra bhakshannapanaiste samupetah sukhoshitah
Sukhaprabuddha rajanamupatasthuryudhishthiram