অধ্যায় 43

43.1

বৈশংপায়ন উবাচ
অভিষিক্তো মহাপ্রাজ্ঞো রাজ্যং প্রাপ্য যুধিষ্ঠিরঃ
দাশার্হং পুণ্ডরীকাক্ষমুবাচ প্রাঞ্জলিঃ শুচিঃ

তব কৃষ্ণ প্রসাদেন নয়েন চ বলেন চ
বুদ্ধ্যা চ যদুশার্দূল তথা বিক্রমণেন চ

পুনঃ প্রাপ্তমিদং রাজ্যং পিতৃপৈতামহং ময়া
নমস্তে পুণ্ডরীকাক্ষ পুনঃ পুনররিংদম

ত্বামেকমাহুঃ পুরুষং ত্বামাহুঃ সাত্বতাং পতিম্
নামভিস্ত্বাং বহুবিধৈঃ স্তুবন্তি পরমর্ষয়ঃ

বিশ্বকর্মন্নমস্তেঽস্তু বিশ্বাত্মন্বিশ্বসংভব
বিষ্ণো জিষ্ণো হরে কৃষ্ণ বৈকুণ্ঠ পুরুষোত্তম

অদিত্যাঃ সপ্তরাত্রং তু পুরাণে গর্ভতাং গতঃ
পৃশ্নিগর্ভস্ত্বমেবৈকস্ত্রিয়ুগং ত্বাং বদন্ত্যপি

শুচিশ্রবা হৃষীকেশো ঘৃতার্চির্হংস উচ্যসে
ত্রিচক্ষুঃ শংভুরেকস্ত্বং বিভুর্দামোদরোঽপি চ

বরাহোঽগ্নির্বৃহদ্ভানুর্বৃষণস্তার্ক্ষ্যলক্ষণঃ
অনীকসাহঃ পুরুষঃ শিপিবিষ্ট উরুক্রমঃ

বাচিষ্ঠ উগ্রঃ সেনানীঃ সত্যো বাজসনির্গুহঃ
অচ্যুতশ্চ্যাবনোঽরীণাং সংকৃতির্বিকৃতির্বৃষঃ

কৃতবর্ত্মা ত্বমেবাদ্রির্বৃষগর্ভো বৃষাকপিঃ
সিন্ধুক্ষিদূর্মিস্ত্রিককুত্ত্রিধামা ত্রিবৃদচ্যুতঃ

সম্রাড্বিরাট্স্বরাট্চৈব সুররাড্ধর্মদো ভবঃ
বিভুর্ভূরভিভূঃ কৃষ্ণঃ কৃষ্ণবর্ত্মা ত্বমেব চ

স্বিষ্টকৃদ্ভিষগাবর্তঃ কপিলস্ত্বং চ বামনঃ
যজ্ঞো ধ্রুবঃ পতংগশ্চ জয়ত্সেনস্ত্বমুচ্যসে

শিখণ্ডী নহুষো বভ্রুর্দিবস্পৃক্ত্বং পুনর্বসুঃ
সুবভ্রুরুক্ষো রুক্মস্ত্বং সুষেণো দুন্দুভিস্তথা

গভস্তিনেমিঃ শ্রীপদ্মং পুষ্করং পুষ্পধারণঃ
ঋভুর্বিভুঃ সর্বসূক্ষ্মস্ত্বং সাবিত্রং চ পঠ্যসে

অম্ভোনিধিস্ত্বং ব্রহ্মা ত্বং পবিত্রং ধাম ধন্ব চ
হিরণ্যগর্ভং ত্বামাহুঃ স্বধা স্বাহা চ কেশব

যোনিস্ত্বমস্য প্রলয়শ্চ কৃষ্ণ; ত্বমেবেদং সৃজসি বিশ্বমগ্রে
বিশ্বং চেদং ত্বদ্বশে বিশ্বয়োনে; নমোঽস্তু তে শার্ঙ্গচক্রাসিপাণে

এবং স্তুতো ধর্মরাজেন কৃষ্ণঃ; সভামধ্যে প্রীতিমান্পুষ্করাক্ষঃ
তমভ্যনন্দদ্ভারতং পুষ্কলাভি;র্বাগ্ভির্জ্যেষ্ঠং পাণ্ডবং যাদবাগ্র্যঃ