অধ্যায় 42

42.1

বৈশংপায়ন উবাচ
ততো যুধিষ্ঠিরো রাজা জ্ঞাতীনাং যে হতা মৃধে
শ্রাদ্ধানি কারয়ামাস তেষাং পৃথগুদারধীঃ

ধৃতরাষ্ট্রো দদৌ রাজা পুত্রাণামৌর্ধ্বদেহিকম্
সর্বকামগুণোপেতমন্নং গাশ্চ ধনানি চ
রত্নানি চ বিচিত্রাণি মহার্হাণি মহায়শাঃ

যুধিষ্ঠিরস্তু কর্ণস্য দ্রোণস্য চ মহাত্মনঃ
ধৃষ্টদ্যুম্নাভিমন্যুভ্যাং হৈডিম্বস্য চ রক্ষসঃ

বিরাটপ্রভৃতীনাং চ সুহৃদামুপকারিণাম্
দ্রুপদদ্রৌপদেয়ানাং দ্রৌপদ্যা সহিতো দদৌ

ব্রাহ্মণানাং সহস্রাণি পৃথগেকৈকমুদ্দিশন্
ধনৈশ্চ বস্ত্রৈ রত্নৈশ্চ গোভিশ্চ সমতর্পয়ৎ

যে চান্যে পৃথিবীপালা যেষাং নাস্তি সুহৃজ্জনঃ
উদ্দিশ্যোদ্দিশ্য তেষাং চ চক্রে রাজৌর্ধ্বদৈহিকম্

সভাঃ প্রপাশ্চ বিবিধাস্তডাগানি চ পাণ্ডবঃ
সুহৃদাং কারয়ামাস সর্বেষামৌর্ধ্বদৈহিকম্

স তেষামনৃণো ভূত্বা গত্বা লোকেষ্ববাচ্যতাম্
কৃতকৃত্যোঽভবদ্রাজা প্রজা ধর্মেণ পালয়ন্

ধৃতরাষ্ট্রং যথাপূর্বং গান্ধারীং বিদুরং তথা
সর্বাংশ্চ কৌরবামাত্যান্ভৃত্যাংশ্চ সমপূজয়ৎ

যাশ্চ তত্র স্ত্রিয়ঃ কাশ্চিদ্ধতবীরা হতাত্মজাঃ
সর্বাস্তাঃ কৌরবো রাজা সংপূজ্যাপালয়দ্ঘৃণী

দীনান্ধকৃপণানাং চ গৃহাচ্ছাদনভোজনৈঃ
আনৃশংস্যপরো রাজা চকারানুগ্রহং প্রভুঃ

স বিজিত্য মহীং কৃত্স্নামানৃণ্যং প্রাপ্য বৈরিষু
নিঃসপত্নঃ সুখী রাজা বিজহার যুধিষ্ঠিরঃ