অধ্যায় 41

41.1

বৈশংপায়ন উবাচ
প্রকৃতীনাং তু তদ্বাক্যং দেশকালোপসংহিতম্
শ্রুত্বা যুধিষ্ঠিরো রাজাথোত্তরং প্রত্যভাষত

ধন্যাঃ পাণ্ডুসুতা লোকে যেষাং ব্রাহ্মণপুংগবাঃ
তথ্যান্বাপ্যথ বাতথ্যান্গুণানাহুঃ সমাগতাঃ

অনুগ্রাহ্যা বয়ং নূনং ভবতামিতি মে মতিঃ
যত্রৈবং গুণসংপন্নানস্মান্ব্রূথ বিমত্সরাঃ

ধৃতরাষ্ট্রো মহারাজঃ পিতা নো দৈবতং পরম্
শাসনেঽস্য প্রিয়ে চৈব স্থেয়ং মত্প্রিয়কাঙ্ক্ষিভিঃ

এতদর্থং হি জীবামি কৃত্বা জ্ঞাতিবধং মহৎ
অস্য শুশ্রূষণং কার্যং ময়া নিত্যমতন্দ্রিণা

যদি চাহমনুগ্রাহ্যো ভবতাং সুহৃদাং ততঃ
ধৃতরাষ্ট্রে যথাপূর্বং বৃত্তিং বর্তিতুমর্হথ

এষ নাথো হি জগতো ভবতাং চ ময়া সহ
অস্যৈব পৃথিবী কৃত্স্না পাণ্ডবাঃ সর্ব এব চ
এতন্মনসি কর্তব্যং ভবদ্ভির্বচনং মম

অনুগম্য চ রাজানং যথেষ্টং গম্যতামিতি
পৌরজানপদান্সর্বান্বিসৃজ্য কুরুনন্দনঃ
যৌবরাজ্যেন কৌরব্যো ভীমসেনময়োজয়ৎ

মন্ত্রে চ নিশ্চয়ে চৈব ষাড্গুণ্যস্য চ চিন্তনে
বিদুরং বুদ্ধিসংপন্নং প্রীতিমান্বৈ সমাদিশৎ

কৃতাকৃতপরিজ্ঞানে তথায়ব্যয়চিন্তনে
সংজয়ং যোজয়ামাস ঋদ্ধমৃদ্ধৈর্গুণৈর্যুতম্

বলস্য পরিমাণে চ ভক্তবেতনয়োস্তথা
নকুলং ব্যাদিশদ্রাজা কর্মিণামন্ববেক্ষণে

পরচক্রোপরোধে চ দৃপ্তানাং চাবমর্দনে
যুধিষ্ঠিরো মহারাজঃ ফল্গুনং ব্যাদিদেশ হ

দ্বিজানাং বেদকার্যেষু কার্যেষ্বন্যেষু চৈব হি
ধৌম্যং পুরোধসাং শ্রেষ্ঠং ব্যাদিদেশ পরংতপঃ

সহদেবং সমীপস্থং নিত্যমেব সমাদিশৎ
তেন গোপ্যো হি নৃপতিঃ সর্বাবস্থো বিশাং পতে

যান্যানমন্যদ্যোগ্যাংশ্চ যেষু যেষ্বিহ কর্মসু
তাংস্তাংস্তেষ্বেব যুয়ুজে প্রীয়মাণো মহীপতিঃ

বিদুরং সংজয়ং চৈব যুয়ুত্সুং চ মহামতিম্
অব্রবীত্পরবীরঘ্নো ধর্মাত্মা ধর্মবত্সলঃ

উত্থায়োত্থায় যত্কার্যমস্য রাজ্ঞঃ পিতুর্মম
সর্বং ভবদ্ভিঃ কর্তব্যমপ্রমত্তৈর্যথাতথম্

পৌরজানপদানাং চ যানি কার্যাণি নিত্যশঃ
রাজানং সমনুজ্ঞাপ্য তানি কার্যাণি ধর্মতঃ