UtshovChapter 41
41.1
वैशंपायन उवाच
प्रकृतीनां तु तद्वाक्यं देशकालोपसंहितम्
श्रुत्वा युधिष्ठिरो राजाथोत्तरं प्रत्यभाषत
Vaishampayana uvacha
Prakritinam tu tadvakyam deshakalopasanhitam
Shrutva yudhishthiro rajathottaram pratyabhashata
41.2
धन्याः पाण्डुसुता लोके येषां ब्राह्मणपुंगवाः
तथ्यान्वाप्यथ वातथ्यान्गुणानाहुः समागताः
Dhanyah pandusuta loke yesham brahmanapungavah
Tathyanvapyatha vatathyangunanahuh samagatah
41.3
अनुग्राह्या वयं नूनं भवतामिति मे मतिः
यत्रैवं गुणसंपन्नानस्मान्ब्रूथ विमत्सराः
Anugrahya vayam nunam bhavatamiti me matih
Yatraivam gunasampannanasmanbrutha vimatsarah
41.4
धृतराष्ट्रो महाराजः पिता नो दैवतं परम्
शासनेऽस्य प्रिये चैव स्थेयं मत्प्रियकाङ्क्षिभिः
Dhritarashtro maharajah pita no daivatam param
Shasanesya priye chaiva stheyam matpriyakankshibhih
41.5
एतदर्थं हि जीवामि कृत्वा ज्ञातिवधं महत्
अस्य शुश्रूषणं कार्यं मया नित्यमतन्द्रिणा
Etadartham hi jivami kritva gyativadham mahat
Asya shushrushanam karyam maya nityamatandrina
41.6
यदि चाहमनुग्राह्यो भवतां सुहृदां ततः
धृतराष्ट्रे यथापूर्वं वृत्तिं वर्तितुमर्हथ
Yadi chahamanugrahyo bhavatam suhridam tatah
Dhritarashtre yathapurvam vrittim vartitumarhatha
41.7
एष नाथो हि जगतो भवतां च मया सह
अस्यैव पृथिवी कृत्स्ना पाण्डवाः सर्व एव च
एतन्मनसि कर्तव्यं भवद्भिर्वचनं मम
Esha natho hi jagato bhavatam cha maya saha
Asyaiva prithivi kritsna pandavah sarva eva cha
Etanmanasi kartavyam bhavadbhirvachanam mama
41.8
अनुगम्य च राजानं यथेष्टं गम्यतामिति
पौरजानपदान्सर्वान्विसृज्य कुरुनन्दनः
यौवराज्येन कौरव्यो भीमसेनमयोजयत्
Anugamya cha rajanam yatheshtam gamyatamiti
Paurajanapadansarvanvisrijya kurunandanah
Yauvarajyena kauravyo bhimasenamayojayat
41.9
मन्त्रे च निश्चये चैव षाड्गुण्यस्य च चिन्तने
विदुरं बुद्धिसंपन्नं प्रीतिमान्वै समादिशत्
Mantre cha nishchaye chaiva shadgunyasya cha chintane
Viduram buddhisampannam pritimanvai samadishat
41.10
कृताकृतपरिज्ञाने तथायव्ययचिन्तने
संजयं योजयामास ऋद्धमृद्धैर्गुणैर्युतम्
Kritakritaparigyane tathayavyayachintane
Sanjayam yojayamasa riddhamriddhairgunairyutam
41.11
बलस्य परिमाणे च भक्तवेतनयोस्तथा
नकुलं व्यादिशद्राजा कर्मिणामन्ववेक्षणे
Balasya parimane cha bhaktavetanayostatha
Nakulam vyadishadraja karminamanvavekshane
41.12
परचक्रोपरोधे च दृप्तानां चावमर्दने
युधिष्ठिरो महाराजः फल्गुनं व्यादिदेश ह
Parachakroparodhe cha driptanam chavamardane
Yudhishthiro maharajah phalgunam vyadidesha ha
41.13
द्विजानां वेदकार्येषु कार्येष्वन्येषु चैव हि
धौम्यं पुरोधसां श्रेष्ठं व्यादिदेश परंतपः
Dvijanam vedakaryeshu karyeshvanyeshu chaiva hi
Dhaumyam purodhasam shreshtham vyadidesha parantapah
41.14
सहदेवं समीपस्थं नित्यमेव समादिशत्
तेन गोप्यो हि नृपतिः सर्वावस्थो विशां पते
Sahadevam samipastham nityameva samadishat
Tena gopyo hi nripatih sarvavastho visham pate
41.15
यान्यानमन्यद्योग्यांश्च येषु येष्विह कर्मसु
तांस्तांस्तेष्वेव युयुजे प्रीयमाणो महीपतिः
Yanyanamanyadyogyanshcha yeshu yeshviha karmasu
Tanstansteshveva yuyuje priyamano mahipatih
41.16
विदुरं संजयं चैव युयुत्सुं च महामतिम्
अब्रवीत्परवीरघ्नो धर्मात्मा धर्मवत्सलः
Viduram sanjayam chaiva yuyutsum cha mahamatim
Abravitparaviraghno dharmatma dharmavatsalah
41.17
उत्थायोत्थाय यत्कार्यमस्य राज्ञः पितुर्मम
सर्वं भवद्भिः कर्तव्यमप्रमत्तैर्यथातथम्
Utthayotthaya yatkaryamasya ragyah piturmama
Sarvam bhavadbhih kartavyamapramattairyathatatham
41.18
पौरजानपदानां च यानि कार्याणि नित्यशः
राजानं समनुज्ञाप्य तानि कार्याणि धर्मतः
Paurajanapadanam cha yani karyani nityashah
Rajanam samanugyapya tani karyani dharmatah