UtshovChapter 42
42.1
वैशंपायन उवाच
ततो युधिष्ठिरो राजा ज्ञातीनां ये हता मृधे
श्राद्धानि कारयामास तेषां पृथगुदारधीः
Vaishampayana uvacha
Tato yudhishthiro raja gyatinam ye hata mridhe
Shraddhani karayamasa tesham prithagudaradhih
42.2
धृतराष्ट्रो ददौ राजा पुत्राणामौर्ध्वदेहिकम्
सर्वकामगुणोपेतमन्नं गाश्च धनानि च
रत्नानि च विचित्राणि महार्हाणि महायशाः
Dhritarashtro dadau raja putranamaurdhvadehikam
Sarvakamagunopetamannam gashcha dhanani cha
Ratnani cha vichitrani maharhani mahayashah
42.3
युधिष्ठिरस्तु कर्णस्य द्रोणस्य च महात्मनः
धृष्टद्युम्नाभिमन्युभ्यां हैडिम्बस्य च रक्षसः
Yudhishthirastu karnasya dronasya cha mahatmanah
Dhrishtadyumnabhimanyubhyam haidimbasya cha rakshasah
42.4
विराटप्रभृतीनां च सुहृदामुपकारिणाम्
द्रुपदद्रौपदेयानां द्रौपद्या सहितो ददौ
Virataprabhritinam cha suhridamupakarinam
Drupadadraupadeyanam draupadya sahito dadau
42.5
ब्राह्मणानां सहस्राणि पृथगेकैकमुद्दिशन्
धनैश्च वस्त्रै रत्नैश्च गोभिश्च समतर्पयत्
Brahmananam sahasrani prithagekaikamuddishan
Dhanaishcha vastrai ratnaishcha gobhishcha samatarpayat
42.6
ये चान्ये पृथिवीपाला येषां नास्ति सुहृज्जनः
उद्दिश्योद्दिश्य तेषां च चक्रे राजौर्ध्वदैहिकम्
Ye chanye prithivipala yesham nasti suhrijjanah
Uddishyoddishya tesham cha chakre rajaurdhvadaihikam
42.7
सभाः प्रपाश्च विविधास्तडागानि च पाण्डवः
सुहृदां कारयामास सर्वेषामौर्ध्वदैहिकम्
Sabhah prapashcha vividhastadagani cha pandavah
Suhridam karayamasa sarveshamaurdhvadaihikam
42.8
स तेषामनृणो भूत्वा गत्वा लोकेष्ववाच्यताम्
कृतकृत्योऽभवद्राजा प्रजा धर्मेण पालयन्
Sa teshamanrino bhutva gatva lokeshvavachyatam
Kritakrityobhavadraja praja dharmena palayan
42.9
धृतराष्ट्रं यथापूर्वं गान्धारीं विदुरं तथा
सर्वांश्च कौरवामात्यान्भृत्यांश्च समपूजयत्
Dhritarashtram yathapurvam gandharim viduram tatha
Sarvanshcha kauravamatyanbhrityanshcha samapujayat
42.10
याश्च तत्र स्त्रियः काश्चिद्धतवीरा हतात्मजाः
सर्वास्ताः कौरवो राजा संपूज्यापालयद्घृणी
Yashcha tatra striyah kashchiddhatavira hatatmajah
Sarvastah kauravo raja sampujyapalayadghrini
42.11
दीनान्धकृपणानां च गृहाच्छादनभोजनैः
आनृशंस्यपरो राजा चकारानुग्रहं प्रभुः
Dinandhakripananam cha grihachchhadanabhojanaih
Anrishansyaparo raja chakaranugraham prabhuh
42.12
स विजित्य महीं कृत्स्नामानृण्यं प्राप्य वैरिषु
निःसपत्नः सुखी राजा विजहार युधिष्ठिरः
Sa vijitya mahim kritsnamanrinyam prapya vairishu
Nihsapatnah sukhi raja vijahara yudhishthirah