অধ্যায় 40

40.1

বৈশংপায়ন উবাচ
ততঃ কুন্তীসুতো রাজা গতমন্যুর্গতজ্বরঃ
কাঞ্চনে প্রাঙ্মুখো হৃষ্টো ন্যষীদত্পরমাসনে

তমেবাভিমুখৌ পীঠে সেব্যাস্তরণসংবৃতে
সাত্যকির্বাসুদেবশ্চ নিষীদতুররিংদমৌ

মধ্যে কৃত্বা তু রাজানং ভীমসেনার্জুনাবুভৌ
নিষীদতুর্মহাত্মানৌ শ্লক্ষ্ণয়োর্মণিপীঠয়োঃ

দান্তে শয্যাসনে শুভ্রে জাম্বূনদবিভূষিতে
পৃথাপি সহদেবেন সহাস্তে নকুলেন চ

সুধর্মা বিদুরো ধৌম্যো ধৃতরাষ্ট্রশ্চ কৌরবঃ
নিষেদুর্জ্বলনাকারেষ্বাসনেষু পৃথক্পৃথক্

যুয়ুত্সুঃ সংজয়শ্চৈব গান্ধারী চ যশস্বিনী
ধৃতরাষ্ট্রো যতো রাজা ততঃ সর্ব উপাবিশন্

তত্রোপবিষ্টো ধর্মাত্মা শ্বেতাঃ সুমনসোঽস্পৃশৎ
স্বস্তিকানক্ষতান্ভূমিং সুবর্ণং রজতং মণীন্

ততঃ প্রকৃতয়ঃ সর্বাঃ পুরস্কৃত্য পুরোহিতম্
দদৃশুর্ধর্মরাজানমাদায় বহু মঙ্গলম্

পৃথিবীং চ সুবর্ণং চ রত্নানি বিবিধানি চ
আভিষেচনিকং ভাণ্ডং সর্বসংভারসংভৃতম্

কাঞ্চনৌদুম্বরাস্তত্র রাজতাঃ পৃথিবীময়াঃ
পূর্ণকুম্ভাঃ সুমনসো লাজা বর্হীংষি গোরসাঃ

শমীপলাশপুংনাগাঃ সমিধো মধুসর্পিষী
স্রুব ঔদুম্বরঃ শঙ্খাস্তথা হেমবিভূষিতাঃ

দাশার্হেণাভ্যনুজ্ঞাতস্তত্র ধৌম্যঃ পুরোহিতঃ
প্রাগুদক্প্রবণাং বেদীং লক্ষণেনোপলিপ্য হ

ব্যাঘ্রচর্মোত্তরে শ্লক্ষ্ণে সর্বতোভদ্র আসনে
দৃঢপাদপ্রতিষ্ঠানে হুতাশনসমত্বিষি

উপবেশ্য মহাত্মানং কৃষ্ণাং চ দ্রুপদাত্মজাম্
জুহাব পাবকং ধীমান্বিধিমন্ত্রপুরস্কৃতম্

অভ্যষিঞ্চত্পতিং পৃথ্ব্যাঃ কুন্তীপুত্রং যুধিষ্ঠিরম্
ধৃতরাষ্ট্রশ্চ রাজর্ষিঃ সর্বাঃ প্রকৃতয়স্তথা

ততোঽনুবাদয়ামাসুঃ পণবানকদুন্দুভীঃ
ধর্মরাজোঽপি তত্সর্বং প্রতিজগ্রাহ ধর্মতঃ

পূজয়ামাস তাংশ্চাপি বিধিবদ্ভূরিদক্ষিণঃ
ততো নিষ্কসহস্রেণ ব্রাহ্মণান্স্বস্তি বাচয়ৎ
বেদাধ্যয়নসংপন্নাঞ্শীলবৃত্তসমন্বিতান্

তে প্রীতা ব্রাহ্মণা রাজন্স্বস্ত্যূচুর্জয়মেব চ
হংসা ইব চ নর্দন্তঃ প্রশশংসুর্যুধিষ্ঠিরম্

যুধিষ্ঠির মহাবাহো দিষ্ট্যা জয়সি পাণ্ডব
দিষ্ট্যা স্বধর্মং প্রাপ্তোঽসি বিক্রমেণ মহাদ্যুতে

দিষ্ট্যা গাণ্ডীবধন্বা চ ভীমসেনশ্চ পাণ্ডবঃ
ত্বং চাপি কুশলী রাজন্মাদ্রীপুত্রৌ চ পাণ্ডবৌ

মুক্তা বীরক্ষয়াদস্মাত্সংগ্রামান্নিহতদ্বিষঃ
ক্ষিপ্রমুত্তরকালানি কুরু কার্যাণি পাণ্ডব

ততঃ প্রত্যর্চিতঃ সদ্ভির্ধর্মরাজো যুধিষ্ঠিরঃ
প্রতিপেদে মহদ্রাজ্যং সুহৃদ্ভিঃ সহ ভারত