Utshovঅধ্যায় 39
39.1
বৈশংপায়ন উবাচ
প্রবেশনে তু পার্থানাং জনস্য পুরবাসিনঃ
দিদৃক্ষূণাং সহস্রাণি সমাজগ্মুর্বহূন্যথ
39.2
স রাজমার্গঃ শুশুভে সমলংকৃতচত্বরঃ
যথা চন্দ্রোদয়ে রাজন্বর্ধমানো মহোদধিঃ
39.3
গৃহাণি রাজমার্গে তু রত্নবন্তি বৃহন্তি চ
প্রাকম্পন্তেব ভারেণ স্ত্রীণাং পূর্ণানি ভারত
39.4
তাঃ শনৈরিব সব্রীডং প্রশশংসুর্যুধিষ্ঠিরম্
ভীমসেনার্জুনৌ চৈব মাদ্রীপুত্রৌ চ পাণ্ডবৌ
39.5
ধন্যা ত্বমসি পাঞ্চালি যা ত্বং পুরুষসত্তমান্
উপতিষ্ঠসি কল্যাণি মহর্ষীনিব গৌতমী
39.6
তব কর্মাণ্যমোঘানি ব্রতচর্যা চ ভামিনি
ইতি কৃষ্ণাং মহারাজ প্রশশংসুস্তদা স্ত্রিয়ঃ
39.7
প্রশংসাবচনৈস্তাসাং মিথঃশব্দৈশ্চ ভারত
প্রীতিজৈশ্চ তদা শব্দৈঃ পুরমাসীত্সমাকুলম্
39.8
তমতীত্য যথায়ুক্তং রাজমার্গং যুধিষ্ঠিরঃ
অলংকৃতং শোভমানমুপায়াদ্রাজবেশ্ম হ
39.9
ততঃ প্রকৃতয়ঃ সর্বাঃ পৌরজানপদাস্তথা
ঊচুঃ কথাঃ কর্ণসুখাঃ সমুপেত্য ততস্ততঃ
39.10
দিষ্ট্যা জয়সি রাজেন্দ্র শত্রূঞ্শত্রুনিসূদন
দিষ্ট্যা রাজ্যং পুনঃ প্রাপ্তং ধর্মেণ চ বলেন চ
39.11
ভব নস্ত্বং মহারাজ রাজেহ শরদাং শতম্
প্রজাঃ পালয় ধর্মেণ যথেন্দ্রস্ত্রিদিবং নৃপ
39.12
এবং রাজকুলদ্বারি মঙ্গলৈরভিপূজিতঃ
আশীর্বাদান্দ্বিজৈরুক্তান্প্রতিগৃহ্য সমন্ততঃ
39.13
প্রবিশ্য ভবনং রাজা দেবরাজগৃহোপমম্
শ্রুত্বা বিজয়সংয়ুক্তং রথাত্পশ্চাদবাতরৎ
39.14
প্রবিশ্যাভ্যন্তরং শ্রীমান্দৈবতান্যভিগম্য চ
পূজয়ামাস রত্নৈশ্চ গন্ধৈর্মাল্যৈশ্চ সর্বশঃ
39.15
নিশ্চক্রাম ততঃ শ্রীমান্পুনরেব মহায়শাঃ
দদর্শ ব্রাহ্মণাংশ্চৈব সোঽভিরূপানুপস্থিতান্
39.16
স সংবৃতস্তদা বিপ্রৈরাশীর্বাদবিবক্ষুভিঃ
শুশুভে বিমলশ্চন্দ্রস্তারাগণবৃতো যথা
39.17
তান্স সংপূজয়ামাস কৌন্তেয়ো বিধিবদ্দ্বিজান্
ধৌম্যং গুরুং পুরস্কৃত্য জ্যেষ্ঠং পিতরমেব চ
39.18
সুমনোমোদকৈ রত্নৈর্হিরণ্যেন চ ভূরিণা
গোভির্বস্ত্রৈশ্চ রাজেন্দ্র বিবিধৈশ্চ কিমিচ্ছকৈঃ
39.19
ততঃ পুণ্যাহঘোষোঽভূদ্দিবং স্তব্ধ্বেব ভারত
সুহৃদাং হর্ষজননঃ পুণ্যঃ শ্রুতিসুখাবহঃ
39.20
হংসবন্নেদুষাং রাজন্দ্বিজানাং তত্র ভারতী
শুশ্রুবে বেদবিদুষাং পুষ্কলার্থপদাক্ষরা
39.21
ততো দুন্দুভিনির্ঘোষঃ শঙ্খানাং চ মনোরমঃ
জয়ং প্রবদতাং তত্র স্বনঃ প্রাদুরভূন্নৃপ
39.22
নিঃশব্দে চ স্থিতে তত্র ততো বিপ্রজনে পুনঃ
রাজানং ব্রাহ্মণচ্ছদ্মা চার্বাকো রাক্ষসোঽব্রবীৎ
39.23
তত্র দুর্যোধনসখা ভিক্ষুরূপেণ সংবৃতঃ
সাংখ্যঃ শিখী ত্রিদণ্ডী চ ধৃষ্টো বিগতসাধ্বসঃ
39.24
বৃতঃ সর্বৈস্তদা বিপ্রৈরাশীর্বাদবিবক্ষুভিঃ
পরংসহস্রৈ রাজেন্দ্র তপোনিয়মসংস্থিতৈঃ
39.25
স দুষ্টঃ পাপমাশংসন্পাণ্ডবানাং মহাত্মনাম্
অনামন্ত্র্যৈব তান্বিপ্রাংস্তমুবাচ মহীপতিম্
39.26
ইমে প্রাহুর্দ্বিজাঃ সর্বে সমারোপ্য বচো ময়ি
ধিগ্ভবন্তং কুনৃপতিং জ্ঞাতিঘাতিনমস্তু বৈ
39.27
কিং তে রাজ্যেন কৌন্তেয় কৃত্বেমং জ্ঞাতিসংক্ষয়ম্
ঘাতয়িত্বা গুরূংশ্চৈব মৃতং শ্রেয়ো ন জীবিতম্
39.28
ইতি তে বৈ দ্বিজাঃ শ্রুত্বা তস্য ঘোরস্য রক্ষসঃ
বিব্যথুশ্চুক্রুশুশ্চৈব তস্য বাক্যপ্রধর্ষিতাঃ
39.29
ততস্তে ব্রাহ্মণাঃ সর্বে স চ রাজা যুধিষ্ঠিরঃ
ব্রীডিতাঃ পরমোদ্বিগ্নাস্তূষ্ণীমাসন্বিশাং পতে
39.30
যুধিষ্ঠির উবাচ
প্রসীদন্তু ভবন্তো মে প্রণতস্যাভিয়াচতঃ
প্রত্যাপন্নং ব্যসনিনং ন মাং ধিক্কর্তুমর্হথ
39.31
বৈশংপায়ন উবাচ
ততো রাজন্ব্রাহ্মণাস্তে সর্ব এব বিশাং পতে
ঊচুর্নৈতদ্বচোঽস্মাকং শ্রীরস্তু তব পার্থিব
39.32
জজ্ঞুশ্চৈব মহাত্মানস্ততস্তং জ্ঞানচক্ষুষা
ব্রাহ্মণা বেদবিদ্বাংসস্তপোভির্বিমলীকৃতাঃ
39.33
ব্রাহ্মণা ঊচুঃ
এষ দুর্যোধনসখা চার্বাকো নাম রাক্ষসঃ
পরিব্রাজকরূপেণ হিতং তস্য চিকীর্ষতি
39.34
ন বয়ং ব্রূম ধর্মাত্মন্ব্যেতু তে ভয়মীদৃশম্
উপতিষ্ঠতু কল্যাণং ভবন্তং ভ্রাতৃভিঃ সহ
39.35
বৈশংপায়ন উবাচ
ততস্তে ব্রাহ্মণাঃ সর্বে হুংকারৈঃ ক্রোধমূর্ছিতাঃ
নির্ভর্ত্সয়ন্তঃ শুচয়ো নিজঘ্নুঃ পাপরাক্ষসম্
39.36
স পপাত বিনির্দগ্ধস্তেজসা ব্রহ্মবাদিনাম্
মহেন্দ্রাশনিনির্দগ্ধঃ পাদপোঽঙ্কুরবানিব
39.37
পূজিতাশ্চ যয়ুর্বিপ্রা রাজানমভিনন্দ্য তম্
রাজা চ হর্ষমাপেদে পাণ্ডবঃ সসুহৃজ্জনঃ
39.38
বাসুদেব উবাচ
ব্রাহ্মণাস্তাত লোকেঽস্মিন্নর্চনীয়াঃ সদা মম
এতে ভূমিচরা দেবা বাগ্বিষাঃ সুপ্রসাদকাঃ
39.39
পুরা কৃতয়ুগে তাত চার্বাকো নাম রাক্ষসঃ
তপস্তেপে মহাবাহো বদর্যাং বহুবত্সরম্
39.40
ছন্দ্যমানো বরেণাথ ব্রহ্মণা স পুনঃ পুনঃ
অভয়ং সর্বভূতেভ্যো বরয়ামাস ভারত
39.41
দ্বিজাবমানাদন্যত্র প্রাদাদ্বরমনুত্তমম্
অভয়ং সর্বভূতেভ্যস্ততস্তস্মৈ জগত্প্রভুঃ
39.42
স তু লব্ধবরঃ পাপো দেবানমিতবিক্রমঃ
রাক্ষসস্তাপয়ামাস তীব্রকর্মা মহাবলঃ
39.43
ততো দেবাঃ সমেত্যাথ ব্রহ্মাণমিদমব্রুবন্
বধায় রক্ষসস্তস্য বলবিপ্রকৃতাস্তদা
39.44
তানুবাচাব্যয়ো দেবো বিহিতং তত্র বৈ ময়া
যথাস্য ভবিতা মৃত্যুরচিরেণৈব ভারত
39.45
রাজা দুর্যোধনো নাম সখাস্য ভবিতা নৃপ
তস্য স্নেহাববদ্ধোঽসৌ ব্রাহ্মণানবমংস্যতে
39.46
তত্রৈনং রুষিতা বিপ্রা বিপ্রকারপ্রধর্ষিতাঃ
ধক্ষ্যন্তি বাগ্বলাঃ পাপং ততো নাশং গমিষ্যতি
39.47
স এষ নিহতঃ শেতে ব্রহ্মদণ্ডেন রাক্ষসঃ
চার্বাকো নৃপতিশ্রেষ্ঠ মা শুচো ভরতর্ষভ
39.48
হতাস্তে ক্ষত্রধর্মেণ জ্ঞাতয়স্তব পার্থিব
স্বর্গতাশ্চ মহাত্মানো বীরাঃ ক্ষত্রিয়পুংগবাঃ
39.49
স ত্বমাতিষ্ঠ কল্যাণং মা তে ভূদ্গ্লানিরচ্যুত
শত্রূঞ্জহি প্রজা রক্ষ দ্বিজাংশ্চ প্রতিপালয়