Utshovঅধ্যায় 38
38.1
যুধিষ্ঠির উবাচ
শ্রোতুমিচ্ছামি ভগবন্বিস্তরেণ মহামুনে
রাজধর্মান্দ্বিজশ্রেষ্ঠ চাতুর্বর্ণ্যস্য চাখিলান্
38.2
আপত্সু চ যথা নীতির্বিধাতব্যা মহীক্ষিতা
ধর্ম্যমালম্ব্য পন্থানং বিজয়েয়ং কথং মহীম্
38.3
প্রায়শ্চিত্তকথা হ্যেষা ভক্ষ্যাভক্ষ্যবিবর্ধিতা
কৌতূহলানুপ্রবণা হর্ষং জনয়তীব মে
38.4
ধর্মচর্যা চ রাজ্যং চ নিত্যমেব বিরুধ্যতে
যেন মুহ্যতি মে চেতশ্চিন্তয়ানস্য নিত্যশঃ
38.5
বৈশংপায়ন উবাচ
তমুবাচ মহাতেজা ব্যাসো বেদবিদাং বরঃ
নারদং সমভিপ্রেক্ষ্য সর্বং জানন্পুরাতনম্
38.6
শ্রোতুমিচ্ছসি চেদ্ধর্মানখিলেন যুধিষ্ঠির
প্রৈহি ভীষ্মং মহাবাহো বৃদ্ধং কুরুপিতামহম্
38.7
স তে সর্বরহস্যেষু সংশয়ান্মনসি স্থিতান্
ছেত্তা ভাগীরথীপুত্রঃ সর্বজ্ঞঃ সর্বধর্মবিৎ
38.8
জনয়ামাস যং দেবী দিব্যা ত্রিপথগা নদী
সাক্ষাদ্দদর্শ যো দেবান্সর্বাঞ্শক্রপুরোগমান্
38.9
বৃহস্পতিপুরোগাংশ্চ দেবর্ষীনসকৃত্প্রভুঃ
তোষয়িত্বোপচারেণ রাজনীতিমধীতবান্
38.10
উশনা বেদ যচ্ছাস্ত্রং দেবাসুরগুরুর্দ্বিজঃ
তচ্চ সর্বং সবৈয়াখ্যং প্রাপ্তবান্কুরুসত্তমঃ
38.11
ভার্গবাচ্চ্যবনাচ্চাপি বেদানঙ্গোপবৃংহিতান্
প্রতিপেদে মহাবুদ্ধির্বসিষ্ঠাচ্চ যতব্রতাৎ
38.12
পিতামহসুতং জ্যেষ্ঠং কুমারং দীপ্ততেজসম্
অধ্যাত্মগতিতত্ত্বজ্ঞমুপাশিক্ষত যঃ পুরা
38.13
মার্কণ্ডেয়মুখাত্কৃত্স্নং যতিধর্মমবাপ্তবান্
রামাদস্ত্রাণি শক্রাচ্চ প্রাপ্তবান্ভরতর্ষভ
38.14
মৃত্যুরাত্মেচ্ছয়া যস্য জাতস্য মনুজেষ্বপি
তথানপত্যস্য সতঃ পুণ্যলোকা দিবি শ্রুতাঃ
38.15
যস্য ব্রহ্মর্ষয়ঃ পুণ্যা নিত্যমাসন্সভাসদঃ
যস্য নাবিদিতং কিংচিজ্জ্ঞানজ্ঞেয়েষু বিদ্যতে
38.16
স তে বক্ষ্যতি ধর্মজ্ঞঃ সূক্ষ্মধর্মার্থতত্ত্ববিৎ
তমভ্যেহি পুরা প্রাণান্স বিমুঞ্চতি ধর্মবিৎ
38.17
এবমুক্তস্তু কৌন্তেয়ো দীর্ঘপ্রজ্ঞো মহাদ্যুতিঃ
উবাচ বদতাং শ্রেষ্ঠং ব্যাসং সত্যবতীসুতম্
38.18
বৈশসং সুমহত্কৃত্বা জ্ঞাতীনাং লোমহর্ষণম্
আগস্কৃত্সর্বলোকস্য পৃথিবীনাশকারকঃ
38.19
ঘাতয়িত্বা তমেবাজৌ ছলেনাজিহ্ময়োধিনম্
উপসংপ্রষ্টুমর্হামি তমহং কেন হেতুনা
38.20
ততস্তং নৃপতিশ্রেষ্ঠং চাতুর্বর্ণ্যহিতেপ্সয়া
পুনরাহ মহাবাহুর্যদুশ্রেষ্ঠো মহাদ্যুতিঃ
38.21
নেদানীমতিনির্বন্ধং শোকে কর্তুমিহার্হসি
যদাহ ভগবান্ব্যাসস্তত্কুরুষ্ব নৃপোত্তম
38.22
ব্রাহ্মণাস্ত্বাং মহাবাহো ভ্রাতরশ্চ মহৌজসঃ
পর্জন্যমিব ঘর্মার্তা আশংসানা উপাসতে
38.23
হতশিষ্টাশ্চ রাজানঃ কৃত্স্নং চৈব সমাগতম্
চাতুর্বর্ণ্যং মহারাজ রাষ্ট্রং তে কুরুজাঙ্গলম্
38.24
প্রিয়ার্থমপি চৈতেষাং ব্রাহ্মণানাং মহাত্মনাম্
নিয়োগাদস্য চ গুরোর্ব্যাসস্যামিততেজসঃ
38.25
সুহৃদাং চাস্মদাদীনাং দ্রৌপদ্যাশ্চ পরংতপ
কুরু প্রিয়মমিত্রঘ্ন লোকস্য চ হিতং কুরু
38.26
এবমুক্তস্তু কৃষ্ণেন রাজা রাজীবলোচনঃ
হিতার্থং সর্বলোকস্য সমুত্তস্থৌ মহাতপাঃ
38.27
সোঽনুনীতো নরব্যাঘ্রো বিষ্টরশ্রবসা স্বয়ম্
দ্বৈপায়নেন চ তথা দেবস্থানেন জিষ্ণুনা
38.28
এতৈশ্চান্যৈশ্চ বহুভিরনুনীতো যুধিষ্ঠিরঃ
ব্যজহান্মানসং দুঃখং সংতাপং চ মহামনাঃ
38.29
শ্রুতবাক্যঃ শ্রুতনিধিঃ শ্রুতশ্রব্যবিশারদঃ
ব্যবস্য মনসঃ শান্তিমগচ্ছত্পাণ্ডুনন্দনঃ
38.30
স তৈঃ পরিবৃতো রাজা নক্ষত্রৈরিব চন্দ্রমাঃ
ধৃতরাষ্ট্রং পুরস্কৃত্য স্বপুরং প্রবিবেশ হ
38.31
প্রবিবিক্ষুঃ স ধর্মজ্ঞঃ কুন্তীপুত্রো যুধিষ্ঠিরঃ
অর্চয়ামাস দেবাংশ্চ ব্রাহ্মণাংশ্চ সহস্রশঃ
38.32
ততো রথং নবং শুভ্রং কম্বলাজিনসংবৃতম্
যুক্তং ষোডশভির্গোভিঃ পাণ্ডুরৈঃ শুভলক্ষণৈঃ
38.33
মন্ত্রৈরভ্যর্চিতঃ পুণ্যৈঃ স্তূয়মানো মহর্ষিভিঃ
আরুরোহ যথা দেবঃ সোমোঽমৃতময়ং রথম্
38.34
জগ্রাহ রশ্মীন্কৌন্তেয়ো ভীমো ভীমপরাক্রমঃ
অর্জুনঃ পাণ্ডুরং ছত্রং ধারয়ামাস ভানুমৎ
38.35
ধ্রিয়মাণং তু তচ্ছত্রং পাণ্ডুরং তস্য মূর্ধনি
শুশুভে তারকারাজসিতমভ্রমিবাম্বরে
38.36
চামরব্যজনে চাস্য বীরৌ জগৃহতুস্তদা
চন্দ্ররশ্মিপ্রভে শুভ্রে মাদ্রীপুত্রাবলংকৃতে
38.37
তে পঞ্চ রথমাস্থায় ভ্রাতরঃ সমলংকৃতাঃ
ভূতানীব সমস্তানি রাজন্দদৃশিরে তদা
38.38
আস্থায় তু রথং শুভ্রং যুক্তমশ্বৈর্মহাজবৈঃ
অন্বয়াত্পৃষ্ঠতো রাজন্যুয়ুত্সুঃ পাণ্ডবাগ্রজম্
38.39
রথং হেমময়ং শুভ্রং সৈন্যসুগ্রীবয়োজিতম্
সহ সাত্যকিনা কৃষ্ণঃ সমাস্থায়ান্বয়াত্কুরূন্
38.40
নরয়ানেন তু জ্যেষ্ঠঃ পিতা পার্থস্য ভারত
অগ্রতো ধর্মরাজস্য গান্ধারীসহিতো যয়ৌ
38.41
কুরুস্ত্রিয়শ্চ তাঃ সর্বাঃ কুন্তী কৃষ্ণা চ দ্রৌপদী
যানৈরুচ্চাবচৈর্জগ্মুর্বিদুরেণ পুরস্কৃতাঃ
38.42
ততো রথাশ্চ বহুলা নাগাশ্চ সমলংকৃতাঃ
পাদাতাশ্চ হয়াশ্চৈব পৃষ্ঠতঃ সমনুব্রজন্
38.43
ততো বৈতালিকৈঃ সূতৈর্মাগধৈশ্চ সুভাষিতৈঃ
স্তূয়মানো যয়ৌ রাজা নগরং নাগসাহ্বয়ম্
38.44
তত্প্রয়াণং মহাবাহোর্বভূবাপ্রতিমং ভুবি
আকুলাকুলমুত্সৃষ্টং হৃষ্টপুষ্টজনান্বিতম্
38.45
অভিয়ানে তু পার্থস্য নরৈর্নগরবাসিভিঃ
নগরং রাজমার্গশ্চ যথাবত্সমলংকৃতম্
38.46
পাণ্ডুরেণ চ মাল্যেন পতাকাভিশ্চ বেদিভিঃ
সংবৃতো রাজমার্গশ্চ ধূপনৈশ্চ সুধূপিতঃ
38.47
অথ চূর্ণৈশ্চ গন্ধানাং নানাপুষ্পৈঃ প্রিয়ঙ্গুভিঃ
মাল্যদামভিরাসক্তৈ রাজবেশ্মাভিসংবৃতম্
38.48
কুম্ভাশ্চ নগরদ্বারি বারিপূর্ণা দৃঢা নবাঃ
কন্যাঃ সুমনসশ্ছাগাঃ স্থাপিতাস্তত্র তত্র হ
38.49
তথা স্বলংকৃতদ্বারং নগরং পাণ্ডুনন্দনঃ
স্তূয়মানঃ শুভৈর্বাক্যৈঃ প্রবিবেশ সুহৃদ্বৃতঃ