Utshovঅধ্যায় 37
37.1
বৈশংপায়ন উবাচ
এবমুক্তো ভগবতা ধর্মরাজো যুধিষ্ঠিরঃ
চিন্তয়িত্বা মুহূর্তং তু প্রত্যুবাচ তপোধনম্
37.2
কিং ভক্ষ্যং কিমভক্ষ্যং চ কিং চ দেয়ং প্রশস্যতে
কিং চ পাত্রমপাত্রং বা তন্মে ব্রূহি পিতামহ
37.3
ব্যাস উবাচ
অত্রাপ্যুদাহরন্তীমমিতিহাসং পুরাতনম্
সিদ্ধানাং চৈব সংবাদং মনোশ্চৈব প্রজাপতেঃ
37.4
সিদ্ধাস্তপোব্রতপরাঃ সমাগম্য পুরা বিভুম্
ধর্মং পপ্রচ্ছুরাসীনমাদিকালে প্রজাপতিম্
37.5
কথমন্নং কথং দানং কথমধ্যয়নং তপঃ
কার্যাকার্যং চ নঃ সর্বং শংস বৈ ত্বং প্রজাপতে
37.6
তৈরেবমুক্তো ভগবান্মনুঃ স্বায়ংভুবোঽব্রবীৎ
শুশ্রূষধ্বং যথাবৃত্তং ধর্মং ব্যাসসমাসতঃ
37.7
অদত্তস্যানুপাদানং দানমধ্যয়নং তপঃ
অহিংসা সত্যমক্রোধঃ ক্ষমেজ্যা ধর্মলক্ষণম্
37.8
য এব ধর্মঃ সোঽধর্মোঽদেশেঽকালে প্রতিষ্ঠিতঃ
আদানমনৃতং হিংসা ধর্মো ব্যাবস্থিকঃ স্মৃতঃ
37.9
দ্বিবিধৌ চাপ্যুভাবেতৌ ধর্মাধর্মৌ বিজানতাম্
অপ্রবৃত্তিঃ প্রবৃত্তিশ্চ দ্বৈবিধ্যং লোকবেদয়োঃ
37.10
অপ্রবৃত্তেরমর্ত্যত্বং মর্ত্যত্বং কর্মণঃ ফলম্
অশুভস্যাশুভং বিদ্যাচ্ছুভস্য শুভমেব চ
37.11
এতয়োশ্চোভয়োঃ স্যাতাং শুভাশুভতয়া তথা
দৈবং চ দৈবয়ুক্তং চ প্রাণশ্চ প্রলয়শ্চ হ
37.12
অপ্রেক্ষাপূর্বকরণাদশুভানাং শুভং ফলম্
ঊর্ধ্বং ভবতি সংদেহাদিহ দৃষ্টার্থমেব বা
অপ্রেক্ষাপূর্বকরণাত্প্রায়শ্চিত্তং বিধীয়তে
37.13
ক্রোধমোহকৃতে চৈব দৃষ্টান্তাগমহেতুভিঃ
শরীরাণামুপক্লেশো মনসশ্চ প্রিয়াপ্রিয়ে
তদৌষধৈশ্চ মন্ত্রৈশ্চ প্রায়শ্চিত্তৈশ্চ শাম্যতি
37.14
জাতিশ্রেণ্যধিবাসানাং কুলধর্মাংশ্চ সর্বতঃ
বর্জয়েন্ন হি তং ধর্মং যেষাং ধর্মো ন বিদ্যতে
37.15
দশ বা বেদশাস্ত্রজ্ঞাস্ত্রয়ো বা ধর্মপাঠকাঃ
যদ্ব্রূয়ুঃ কার্য উত্পন্নে স ধর্মো ধর্মসংশয়ে
37.16
অরুণা মৃত্তিকা চৈব তথা চৈব পিপীলকাঃ
শ্লেষ্মাতকস্তথা বিপ্রৈরভক্ষ্যং বিষমেব চ
37.17
অভক্ষ্যা ব্রাহ্মণৈর্মত্স্যাঃ শকলৈর্যে বিবর্জিতাঃ
চতুষ্পাত্কচ্ছপাদন্যো মণ্ডূকা জলজাশ্চ যে
37.18
ভাসা হংসাঃ সুপর্ণাশ্চ চক্রবাকা বকাঃ প্লবাঃ
কঙ্কো মদ্গুশ্চ গৃধ্রাশ্চ কাকোলূকং তথৈব চ
37.19
ক্রব্যাদাঃ পক্ষিণঃ সর্বে চতুষ্পাদাশ্চ দংষ্ট্রিণঃ
যেষাং চোভয়তো দন্তাশ্চতুর্দংষ্ট্রাশ্চ সর্বশঃ
37.20
এডকাশ্বখরোষ্ট্রীণাং সূতিকানাং গবামপি
মানুষীণাং মৃগীণাং চ ন পিবেদ্ব্রাহ্মণঃ পয়ঃ
37.21
প্রেতান্নং সূতিকান্নং চ যচ্চ কিংচিদনির্দশম্
অভোজ্যং চাপ্যপেয়ং চ ধেন্বা দুগ্ধমনির্দশম্
37.22
তক্ষ্ণশ্চর্মাবকর্তুশ্চ পুংশ্চল্যা রজকস্য চ
চিকিত্সকস্য যচ্চান্নমভোজ্যং রক্ষিণস্তথা
37.23
গণগ্রামাভিশস্তানাং রঙ্গস্ত্রীজীবিনশ্চ যে
পরিবিত্তিনপুংষাং চ বন্দিদ্যূতবিদাং তথা
37.24
বার্যমাণাহৃতং চান্নং শুক্তং পর্যুষিতং চ যৎ
সুরানুগতমুচ্ছিষ্টমভোজ্যং শেষিতং চ যৎ
37.25
পিষ্টমাংসেক্ষুশাকানাং বিকারাঃ পয়সস্তথা
সক্তুধানাকরম্ভাশ্চ নোপভোজ্যাশ্চিরস্থিতাঃ
37.26
পায়সং কৃসরং মাংসমপূপাশ্চ বৃথা কৃতাঃ
অভোজ্যাশ্চাপ্যভক্ষ্যাশ্চ ব্রাহ্মণৈর্গৃহমেধিভিঃ
37.27
দেবান্পিতৄন্মনুষ্যাংশ্চ মুনীন্গৃহ্যাশ্চ দেবতাঃ
পূজয়িত্বা ততঃ পশ্চাদ্গৃহস্থো ভোক্তুমর্হতি
37.28
যথা প্রব্রজিতো ভিক্ষুর্গৃহস্থঃ স্বগৃহে বসেৎ
এবংবৃত্তঃ প্রিয়ৈর্দারৈঃ সংবসন্ধর্মমাপ্নুয়াৎ
37.29
ন দদ্যাদ্যশসে দানং ন ভয়ান্নোপকারিণে
ন নৃত্তগীতশীলেষু হাসকেষু চ ধার্মিকঃ
37.30
ন মত্তে নৈব চোন্মত্তে ন স্তেনে ন চিকিত্সকে
ন বাগ্ঘীনে বিবর্ণে বা নাঙ্গহীনে ন বামনে
37.31
ন দুর্জনে দৌষ্কুলে বা ব্রতৈর্বা যো ন সংস্কৃতঃ
অশ্রোত্রিয়ে মৃতং দানং ব্রাহ্মণেঽব্রহ্মবাদিনি
37.32
অসম্যক্চৈব যদ্দত্তমসম্যক্চ প্রতিগ্রহঃ
উভয়োঃ স্যাদনর্থায় দাতুরাদাতুরেব চ
37.33
যথা খদিরমালম্ব্য শিলাং বাপ্যর্ণবং তরন্
মজ্জতে মজ্জতে তদ্বদ্দাতা যশ্চ প্রতীচ্ছকঃ
37.34
কাষ্ঠৈরার্দ্রৈর্যথা বহ্নিরুপস্তীর্ণো ন দীপ্যতে
তপঃস্বাধ্যায়চারিত্রৈরেবং হীনঃ প্রতিগ্রহী
37.35
কপালে যদ্বদাপঃ স্যুঃ শ্বদৃতৌ বা যথা পয়ঃ
আশ্রয়স্থানদোষেণ বৃত্তহীনে তথা শ্রুতম্
37.36
নির্মন্ত্রো নির্ব্রতো যঃ স্যাদশাস্ত্রজ্ঞোঽনসূয়কঃ
অনুক্রোশাত্প্রদাতব্যং দীনেষ্বেবং নরেষ্বপি
37.37
ন বৈ দেয়মনুক্রোশাদ্দীনায়াপ্যপকারিণে
আপ্তাচরিতমিত্যেব ধর্ম ইত্যেব বা পুনঃ
37.38
নিষ্কারণং স্ম তদ্দত্তং ব্রাহ্মণে ধর্মবর্জিতে
ভবেদপাত্রদোষেণ ন মেঽত্রাস্তি বিচারণা
37.39
যথা দারুময়ো হস্তী যথা চর্মময়ো মৃগঃ
ব্রাহ্মণশ্চানধীয়ানস্ত্রয়স্তে নামধারকাঃ
37.40
যথা ষণ্ঢোঽফলঃ স্ত্রীষু যথা গৌর্গবি চাফলা
শকুনির্বাপ্যপক্ষঃ স্যান্নির্মন্ত্রো ব্রাহ্মণস্তথা
37.41
গ্রামধান্যং যথা শূন্যং যথা কূপশ্চ নির্জলঃ
যথা হুতমনগ্নৌ চ তথৈব স্যান্নিরাকৃতৌ
37.42
দেবতানাং পিতৄণাং চ হব্যকব্যবিনাশনঃ
শত্রুরর্থহরো মূর্খো ন লোকান্প্রাপ্তুমর্হতি
37.43
এতত্তে কথিতং সর্বং যথা বৃত্তং যুধিষ্ঠির
সমাসেন মহদ্ধ্যেতচ্ছ্রোতব্যং ভরতর্ষভ