Utshovঅধ্যায় 36
36.1
ব্যাস উবাচ
তপসা কর্মভিশ্চৈব প্রদানেন চ ভারত
পুনাতি পাপং পুরুষঃ পূতশ্চেন্ন প্রবর্ততে
36.2
এককালং তু ভুঞ্জানশ্চরন্ভৈক্ষং স্বকর্মকৃৎ
কপালপাণিঃ খট্বাঙ্গী ব্রহ্মচারী সদোত্থিতঃ
36.3
অনসূয়ুরধঃশায়ী কর্ম লোকে প্রকাশয়ন্
পূর্ণৈর্দ্বাদশভির্বর্ষৈর্ব্রহ্মহা বিপ্রমুচ্যতে
36.4
ষড্ভির্বর্ষৈঃ কৃচ্ছ্রভোজী ব্রহ্মহা পূয়তে নরঃ
মাসে মাসে সমশ্নংস্তু ত্রিভির্বর্ষৈঃ প্রমুচ্যতে
36.5
সংবত্সরেণ মাসাশী পূয়তে নাত্র সংশয়ঃ
তথৈবোপরমন্রাজন্স্বল্পেনাপি প্রমুচ্যতে
36.6
ক্রতুনা চাশ্বমেধেন পূয়তে নাত্র সংশয়ঃ
যে চাস্যাবভৃথে স্নান্তি কেচিদেবংবিধা নরাঃ
36.7
তে সর্বে পূতপাপ্মানো ভবন্তীতি পরা শ্রুতিঃ
ব্রাহ্মণার্থে হতো যুদ্ধে মুচ্যতে ব্রহ্মহত্যয়া
36.8
গবাং শতসহস্রং তু পাত্রেভ্যঃ প্রতিপাদয়ন্
ব্রহ্মহা বিপ্রমুচ্যেত সর্বপাপেভ্য এব চ
36.9
কপিলানাং সহস্রাণি যো দদ্যাত্পঞ্চবিংশতিম্
দোগ্ধ্রীণাং স চ পাপেভ্যঃ সর্বেভ্যো বিপ্রমুচ্যতে
36.10
গোসহস্রং সবত্সানাং দোগ্ধ্রীণাং প্রাণসংশয়ে
সাধুভ্যো বৈ দরিদ্রেভ্যো দত্ত্বা মুচ্যেত কিল্বিষাৎ
36.11
শতং বৈ যস্তু কাম্বোজান্ব্রাহ্মণেভ্যঃ প্রয়চ্ছতি
নিয়তেভ্যো মহীপাল স চ পাপাত্প্রমুচ্যতে
36.12
মনোরথং তু যো দদ্যাদেকস্মা অপি ভারত
ন কীর্তয়েত দত্ত্বা যঃ স চ পাপাত্প্রমুচ্যতে
36.13
সুরাপানং সকৃত্পীত্বা যোঽগ্নিবর্ণাং পিবেদ্দ্বিজঃ
স পাবয়ত্যথাত্মানমিহ লোকে পরত্র চ
36.14
মেরুপ্রপাতং প্রপতঞ্জ্বলনং বা সমাবিশন্
মহাপ্রস্থানমাতিষ্ঠন্মুচ্যতে সর্বকিল্বিষৈঃ
36.15
বৃহস্পতিসবেনেষ্ট্বা সুরাপো ব্রাহ্মণঃ পুনঃ
সমিতিং ব্রাহ্মণৈর্গচ্ছেদিতি বৈ ব্রাহ্মণী শ্রুতিঃ
36.16
ভূমিপ্রদানং কুর্যাদ্যঃ সুরাং পীত্বা বিমত্সরঃ
পুনর্ন চ পিবেদ্রাজন্সংস্কৃতঃ শুধ্যতে নরঃ
36.17
গুরুতল্পী শিলাং তপ্তামায়সীমধিসংবিশেৎ
পাণাবাধায় বা শেফং প্রব্রজেদূর্ধ্বদর্শনঃ
36.18
শরীরস্য বিমোক্ষেণ মুচ্যতে কর্মণোঽশুভাৎ
কর্মভ্যো বিপ্রমুচ্যন্তে যত্তাঃ সংবত্সরং স্ত্রিয়ঃ
36.19
মহাব্রতং চরেদ্যস্তু দদ্যাত্সর্বস্বমেব তু
গুর্বর্থে বা হতো যুদ্ধে স মুচ্যেত্কর্মণোঽশুভাৎ
36.20
অনৃতেনোপচর্তা চ প্রতিরোদ্ধা গুরোস্তথা
উপহৃত্য প্রিয়ং তস্মৈ তস্মাত্পাপাত্প্রমুচ্যতে
36.21
অবকীর্ণিনিমিত্তং তু ব্রহ্মহত্যাব্রতং চরেৎ
খরচর্মবাসাঃ ষণ্মাসং তথা মুচ্যেত কিল্বিষাৎ
36.22
পরদারাপহারী চ পরস্যাপহরন্বসু
সংবত্সরং ব্রতী ভূত্বা তথা মুচ্যেত কিল্বিষাৎ
36.23
স্তেয়ং তু যস্যাপহরেত্তস্মৈ দদ্যাত্সমং বসু
বিবিধেনাভ্যুপায়েন তেন মুচ্যেত কিল্বিষাৎ
36.24
কৃচ্ছ্রাদ্দ্বাদশরাত্রেণ স্বভ্যস্তেন দশাবরম্
পরিবেত্তা ভবেত্পূতঃ পরিবিত্তিশ্চ ভারত
36.25
নিবেশ্যং তু ভবেত্তেন সদা তারয়িতা পিতৄন্
ন তু স্ত্রিয়া ভবেদ্দোষো ন তু সা তেন লিপ্যতে
36.26
ভজনে হ্যৃতুনা শুদ্ধং চাতুর্মাস্যং বিধীয়তে
স্ত্রিয়স্তেন বিশুধ্যন্তি ইতি ধর্মবিদো বিদুঃ
36.27
স্ত্রিয়স্ত্বাশঙ্কিতাঃ পাপৈর্নোপগম্যা হি জানতা
রজসা তা বিশুধ্যন্তে ভস্মনা ভাজনং যথা
36.28
চতুষ্পাত্সকলো ধর্মো ব্রাহ্মণানাং বিধীয়তে
পাদাবকৃষ্টো রাজন্যে তথা ধর্মো বিধীয়তে
36.29
তথা বৈশ্যে চ শূদ্রে চ পাদঃ পাদো বিধীয়তে
বিদ্যাদেবংবিধেনৈষাং গুরুলাঘবনিশ্চয়ম্
36.30
তির্যগ্যোনিবধং কৃত্বা দ্রুমাংশ্ছিত্ত্বেতরান্বহূন্
ত্রিরাত্রং বায়ুভক্ষঃ স্যাত্কর্ম চ প্রথয়েন্নরঃ
36.31
অগম্যাগমনে রাজন্প্রায়শ্চিত্তং বিধীয়তে
আর্দ্রবস্ত্রেণ ষণ্মাসং বিহার্যং ভস্মশায়িনা
36.32
এষ এব তু সর্বেষামকার্যাণাং বিধির্ভবেৎ
ব্রাহ্মণোক্তেন বিধিনা দৃষ্টান্তাগমহেতুভিঃ
36.33
সাবিত্রীমপ্যধীয়ানঃ শুচৌ দেশে মিতাশনঃ
অহিংস্রোঽমন্দকোঽজল্পন্মুচ্যতে সর্বকিল্বিষৈঃ
36.34
অহঃসু সততং তিষ্ঠেদভ্যাকাশং নিশি স্বপেৎ
ত্রিরহ্নস্ত্রির্নিশায়াশ্চ সবাসা জলমাবিশেৎ
36.35
স্ত্রীশূদ্রপতিতাংশ্চাপি নাভিভাষেদ্ব্রতান্বিতঃ
পাপান্যজ্ঞানতঃ কৃত্বা মুচ্যেদেবংব্রতো দ্বিজঃ
36.36
শুভাশুভফলং প্রেত্য লভতে ভূতসাক্ষিকঃ
অতিরিচ্যেত্তয়োর্যত্তু তত্কর্তা লভতে ফলম্
36.37
তস্মাদ্দানেন তপসা কর্মণা চ শুভং ফলম্
বর্ধয়েদশুভং কৃত্বা যথা স্যাদতিরেকবান্
36.38
কুর্যাচ্ছুভানি কর্মাণি নিমিত্তে পাপকর্মণাম্
দদ্যান্নিত্যং চ বিত্তানি তথা মুচ্যেত কিল্বিষাৎ
36.39
অনুরূপং হি পাপস্য প্রায়শ্চিত্তমুদাহৃতম্
মহাপাতকবর্জং তু প্রায়শ্চিত্তং বিধীয়তে
36.40
ভক্ষ্যাভক্ষ্যেষু সর্বেষু বাচ্যাবাচ্যে তথৈব চ
অজ্ঞানজ্ঞানয়ো রাজন্বিহিতান্যনুজানতে
36.41
জানতা তু কৃতং পাপং গুরু সর্বং ভবত্যুত
অজ্ঞানাত্স্খলিতে দোষে প্রায়শ্চিত্তং বিধীয়তে
36.42
শক্যতে বিধিনা পাপং যথোক্তেন ব্যপোহিতুম্
আস্তিকে শ্রদ্দধানে তু বিধিরেষ বিধীয়তে
36.43
নাস্তিকাশ্রদ্দধানেষু পুরুষেষু কদাচন
দম্ভদোষপ্রধানেষু বিধিরেষ ন দৃশ্যতে
36.44
শিষ্টাচারশ্চ শিষ্টশ্চ ধর্মো ধর্মভৃতাং বর
সেবিতব্যো নরব্যাঘ্র প্রেত্য চেহ সুখার্থিনা
36.45
স রাজন্মোক্ষ্যসে পাপাত্তেন পূর্বেণ হেতুনা
ত্রাণার্থং বা বধেনৈষামথ বা নৃপকর্মণা
36.46
অথ বা তে ঘৃণা কাচিত্প্রায়শ্চিত্তং চরিষ্যসি
মা ত্বেবানার্যজুষ্টেন কর্মণা নিধনং গমঃ