Utshovঅধ্যায় 35
35.1
যুধিষ্ঠির উবাচ
কানি কৃত্বেহ কর্মাণি প্রায়শ্চিত্তীয়তে নরঃ
কিং কৃত্বা চৈব মুচ্যেত তন্মে ব্রূহি পিতামহ
35.2
ব্যাস উবাচ
অকুর্বন্বিহিতং কর্ম প্রতিষিদ্ধানি চাচরন্
প্রায়শ্চিত্তীয়তে হ্যেবং নরো মিথ্যা চ বর্তয়ন্
35.3
সূর্যেণাভ্যুদিতো যশ্চ ব্রহ্মচারী ভবত্যুত
তথা সূর্যাভিনির্মুক্তঃ কুনখী শ্যাবদন্নপি
35.4
পরিবিত্তিঃ পরিবেত্তা ব্রহ্মোজ্ঝো যশ্চ কুত্সকঃ
দিধিষূপতিস্তথা যঃ স্যাদগ্রেদিধিষুরেব চ
35.5
অবকীর্ণী ভবেদ্যশ্চ দ্বিজাতিবধকস্তথা
অতীর্থে ব্রহ্মণস্ত্যাগী তীর্থে চাপ্রতিপাদকঃ
35.6
গ্রাময়াজী চ কৌন্তেয় রাজ্ঞশ্চ পরিবিক্রয়ী
শূদ্রস্ত্রীবধকো যশ্চ পূর্বঃ পূর্বস্তু গর্হিতঃ
35.7
বৃথাপশুসমালম্ভী বনদাহস্য কারকঃ
অনৃতেনোপচর্তা চ প্রতিরোদ্ধা গুরোস্তথা
35.8
যশ্চাগ্নীনপবিধ্যেত তথৈব ব্রহ্মবিক্রয়ী
এতান্যেনাংসি সর্বাণি ব্যুত্ক্রান্তসময়শ্চ যঃ
35.9
অকার্যাণ্যপি বক্ষ্যামি যানি তানি নিবোধ মে
লোকবেদবিরুদ্ধানি তান্যেকাগ্রমনাঃ শৃণু
35.10
স্বধর্মস্য পরিত্যাগঃ পরধর্মস্য চ ক্রিয়া
অয়াজ্যয়াজনং চৈব তথাভক্ষ্যস্য ভক্ষণম্
35.11
শরণাগতসংত্যাগো ভৃত্যস্যাভরণং তথা
রসানাং বিক্রয়শ্চাপি তির্যগ্যোনিবধস্তথা
35.12
আধানাদীনি কর্মাণি শক্তিমান্ন করোতি যঃ
অপ্রয়চ্ছংশ্চ সর্বাণি নিত্যং দেয়ানি ভারত
35.13
দক্ষিণানামদানং চ ব্রাহ্মণস্বাভিমর্শনম্
সর্বাণ্যেতান্যকার্যাণি প্রাহুর্ধর্মবিদো জনাঃ
35.14
পিত্রা বিভজতে পুত্রো যশ্চ স্যাদ্গুরুতল্পগঃ
অপ্রজায়ন্নধর্মেণ ভবত্যাধর্মিকো জনঃ
35.15
উক্তান্যেতানি কর্মাণি বিস্তরেণেতরেণ চ
যানি কুর্বন্নকুর্বংশ্চ প্রায়শ্চিত্তীয়তে জনঃ
35.16
এতান্যেব তু কর্মাণি ক্রিয়মাণানি মানবান্
যেষু যেষু নিমিত্তেষু ন লিম্পন্ত্যথ তচ্ছৃণু
35.17
প্রগৃহ্য শস্ত্রমায়ান্তমপি বেদান্তগং রণে
জিঘাংসন্তং নিহত্যাজৌ ন তেন ব্রহ্মহা ভবেৎ
35.18
অপি চাপ্যত্র কৌন্তেয় মন্ত্রো বেদেষু পঠ্যতে
বেদপ্রমাণবিহিতং তং ধর্মং প্রব্রবীমি তে
35.19
অপেতং ব্রাহ্মণং বৃত্তাদ্যো হন্যাদাততায়িনম্
ন তেন ব্রহ্মহা স স্যান্মন্যুস্তং মন্যুমৃচ্ছতি
35.20
প্রাণাত্যয়ে তথাজ্ঞানাদাচরন্মদিরামপি
অচোদিতো ধর্মপরঃ পুনঃ সংস্কারমর্হতি
35.21
এতত্তে সর্বমাখ্যাতং কৌন্তেয়াভক্ষ্যভক্ষণম্
প্রায়শ্চিত্তবিধানেন সর্বমেতেন শুধ্যতি
35.22
গুরুতল্পং হি গুর্বর্থে ন দূষয়তি মানবম্
উদ্দালকঃ শ্বেতকেতুং জনয়ামাস শিষ্যতঃ
35.23
স্তেয়ং কুর্বংস্তু গুর্বর্থমাপত্সু ন নিবধ্যতে
বহুশঃ কামকারেণ ন চেদ্যঃ সংপ্রবর্ততে
35.24
অন্যত্র ব্রাহ্মণস্বেভ্য আদদানো ন দুষ্যতি
স্বয়মপ্রাশিতা যশ্চ ন স পাপেন লিপ্যতে
35.25
প্রাণত্রাণেঽনৃতং বাচ্যমাত্মনো বা পরস্য বা
গুর্বর্থে স্ত্রীষু চৈব স্যাদ্বিবাহকরণেষু চ
35.26
নাবর্ততে ব্রতং স্বপ্নে শুক্রমোক্ষে কথংচন
আজ্যহোমঃ সমিদ্ধেঽগ্নৌ প্রায়শ্চিত্তং বিধীয়তে
35.27
পারিবিত্ত্যং চ পতিতে নাস্তি প্রব্রজিতে তথা
ভিক্ষিতে পারদার্যং চ ন তদ্ধর্মস্য দূষকম্
35.28
বৃথাপশুসমালম্ভং নৈব কুর্যান্ন কারয়েৎ
অনুগ্রহঃ পশূণাং হি সংস্কারো বিধিচোদিতঃ
35.29
অনর্হে ব্রাহ্মণে দত্তমজ্ঞানাত্তন্ন দূষকম্
সকারণং তথা তীর্থেঽতীর্থে বা প্রতিপাদনম্
35.30
স্ত্রিয়স্তথাপচারিণ্যো নিষ্কৃতিঃ স্যাদদূষিকা
অপি সা পূয়তে তেন ন তু ভর্তা প্রদুষ্যতে
35.31
তত্ত্বং জ্ঞাত্বা তু সোমস্য বিক্রয়ঃ স্যাদদূষকঃ
অসমর্থস্য ভৃত্যস্য বিসর্গঃ স্যাদদোষবান্
বনদাহো গবামর্থে ক্রিয়মাণো ন দূষকঃ
35.32
উক্তান্যেতানি কর্মাণি যানি কুর্বন্ন দুষ্যতি
প্রায়শ্চিত্তানি বক্ষ্যামি বিস্তরেণৈব ভারত