Utshovঅধ্যায় 34
34.1
বৈশংপায়ন উবাচ
যুধিষ্ঠিরস্য তদ্বাক্যং শ্রুত্বা দ্বৈপায়নস্তদা
সমীক্ষ্য নিপুণং বুদ্ধ্যা ঋষিঃ প্রোবাচ পাণ্ডবম্
34.2
মা বিষাদং কৃথা রাজন্ক্ষত্রধর্মমনুস্মর
স্বধর্মেণ হতা হ্যেতে ক্ষত্রিয়াঃ ক্ষত্রিয়র্ষভ
34.3
কাঙ্ক্ষমাণাঃ শ্রিয়ং কৃত্স্নাং পৃথিব্যাং চ মহদ্যশঃ
কৃতান্তবিধিসংয়ুক্তাঃ কালেন নিধনং গতাঃ
34.4
ন ত্বং হন্তা ন ভীমোঽপি নার্জুনো ন যমাবপি
কালঃ পর্যায়ধর্মেণ প্রাণানাদত্ত দেহিনাম্
34.5
ন যস্য মাতাপিতরৌ নানুগ্রাহ্যোঽস্তি কশ্চন
কর্মসাক্ষী প্রজানাং যস্তেন কালেন সংহৃতাঃ
34.6
হেতুমাত্রমিদং তস্য কালস্য পুরুষর্ষভ
যদ্ধন্তি ভূতৈর্ভূতানি তদস্মৈ রূপমৈশ্বরম্
34.7
কর্মমূর্ত্যাত্মকং বিদ্ধি সাক্ষিণং শুভপাপয়োঃ
সুখদুঃখগুণোদর্কং কালং কালফলপ্রদম্
34.8
তেষামপি মহাবাহো কর্মাণি পরিচিন্তয়
বিনাশহেতুকারিত্বে যৈস্তে কালবশং গতাঃ
34.9
আত্মনশ্চ বিজানীহি নিয়মব্রতশীলতাম্
যদা ত্বমীদৃশং কর্ম বিধিনাক্রম্য কারিতঃ
34.10
ত্বষ্ট্রেব বিহিতং যন্ত্রং যথা স্থাপয়িতুর্বশে
কর্মণা কালয়ুক্তেন তথেদং ভ্রাম্যতে জগৎ
34.11
পুরুষস্য হি দৃষ্ট্বেমামুত্পত্তিমনিমিত্ততঃ
যদৃচ্ছয়া বিনাশং চ শোকহর্ষাবনর্থকৌ
34.12
ব্যলীকং চাপি যত্ত্বত্র চিত্তবৈতংসিকং তব
তদর্থমিষ্যতে রাজন্প্রায়শ্চিত্তং তদাচর
34.13
ইদং চ শ্রূয়তে পার্থ যুদ্ধে দেবাসুরে পুরা
অসুরা ভ্রাতরো জ্যেষ্ঠা দেবাশ্চাপি যবীয়সঃ
34.14
তেষামপি শ্রীনিমিত্তং মহানাসীত্সমুচ্ছ্রয়ঃ
যুদ্ধং বর্ষসহস্রাণি দ্বাত্রিংশদভবত্কিল
34.15
একার্ণবাং মহীং কৃত্বা রুধিরেণ পরিপ্লুতাম্
জঘ্নুর্দৈত্যাংস্তদা দেবাস্ত্রিদিবং চৈব লেভিরে
34.16
তথৈব পৃথিবীং লব্ধ্বা ব্রাহ্মণা বেদপারগাঃ
সংশ্রিতা দানবানাং বৈ সাহ্যার্থে দর্পমোহিতাঃ
34.17
শালাবৃকা ইতি খ্যাতাস্ত্রিষু লোকেষু ভারত
অষ্টাশীতিসহস্রাণি তে চাপি বিবুধৈর্হতাঃ
34.18
ধর্মব্যুচ্ছিত্তিমিচ্ছন্তো যেঽধর্মস্য প্রবর্তকাঃ
হন্তব্যাস্তে দুরাত্মানো দেবৈর্দৈত্যা ইবোল্বণাঃ
34.19
একং হত্বা যদি কুলে শিষ্টানাং স্যাদনাময়ম্
কুলং হত্বাথ রাষ্ট্রং বা ন তদ্বৃত্তোপঘাতকম্
34.20
অধর্মরূপো ধর্মো হি কশ্চিদস্তি নরাধিপ
ধর্মশ্চাধর্মরূপোঽস্তি তচ্চ জ্ঞেয়ং বিপশ্চিতা
34.21
তস্মাত্সংস্তম্ভয়াত্মানং শ্রুতবানসি পাণ্ডব
দেবৈঃ পূর্বগতং মার্গমনুয়াতোঽসি ভারত
34.22
ন হীদৃশা গমিষ্যন্তি নরকং পাণ্ডবর্ষভ
ভ্রাতৄনাশ্বাসয়ৈতাংস্ত্বং সুহৃদশ্চ পরংতপ
34.23
যো হি পাপসমারম্ভে কার্যে তদ্ভাবভাবিতঃ
কুর্বন্নপি তথৈব স্যাত্কৃত্বা চ নিরপত্রপঃ
34.24
তস্মিংস্তত্কলুষং সর্বং সমাপ্তমিতি শব্দিতম্
প্রায়শ্চিত্তং ন তস্যাস্তি হ্রাসো বা পাপকর্মণঃ
34.25
ত্বং তু শুক্লাভিজাতীয়ঃ পরদোষেণ কারিতঃ
অনিচ্ছমানঃ কর্মেদং কৃত্বা চ পরিতপ্যসে
34.26
অশ্বমেধো মহায়জ্ঞঃ প্রায়শ্চিত্তমুদাহৃতম্
তমাহর মহারাজ বিপাপ্মৈবং ভবিষ্যসি
34.27
মরুদ্ভিঃ সহ জিত্বারীন্মঘবান্পাকশাসনঃ
একৈকং ক্রতুমাহৃত্য শতকৃত্বঃ শতক্রতুঃ
34.28
পূতপাপ্মা জিতস্বর্গো লোকান্প্রাপ্য সুখোদয়ান্
মরুদ্গণবৃতঃ শক্রঃ শুশুভে ভাসয়ন্দিশঃ
34.29
স্বর্গলোকে মহীয়ন্তমপ্সরোভিঃ শচীপতিম্
ঋষয়ঃ পর্যুপাসন্তে দেবাশ্চ বিবুধেশ্বরম্
34.30
সোঽয়ং ত্বমিহ সংক্রান্তো বিক্রমেণ বসুংধরাম্
নির্জিতাশ্চ মহীপালা বিক্রমেণ ত্বয়ানঘ
34.31
তেষাং পুরাণি রাষ্ট্রাণি গত্বা রাজন্সুহৃদ্বৃতঃ
ভ্রাতৄন্পুত্রাংশ্চ পৌত্রাংশ্চ স্বে স্বে রাজ্যেঽভিষেচয়
34.32
বালানপি চ গর্ভস্থান্সান্ত্বানি সমুদাচরন্
রঞ্জয়ন্প্রকৃতীঃ সর্বাঃ পরিপাহি বসুংধরাম্
34.33
কুমারো নাস্তি যেষাং চ কন্যাস্তত্রাভিষেচয়
কামাশয়ো হি স্ত্রীবর্গঃ শোকমেবং প্রহাস্যতি
34.34
এবমাশ্বাসনং কৃত্বা সর্বরাষ্ট্রেষু ভারত
যজস্ব বাজিমেধেন যথেন্দ্রো বিজয়ী পুরা
34.35
অশোচ্যাস্তে মহাত্মানঃ ক্ষত্রিয়াঃ ক্ষত্রিয়র্ষভ
স্বকর্মভির্গতা নাশং কৃতান্তবলমোহিতাঃ
34.36
অবাপ্তঃ ক্ষত্রধর্মস্তে রাজ্যং প্রাপ্তমকল্মষম্
চরস্ব ধর্মং কৌন্তেয় শ্রেয়ান্যঃ প্রেত্য ভাবিকঃ