অধ্যায় 33

33.1

যুধিষ্ঠির উবাচ
হতাঃ পুত্রাশ্চ পৌত্রাশ্চ ভ্রাতরঃ পিতরস্তথা
শ্বশুরা গুরবশ্চৈব মাতুলাঃ সপিতামহাঃ

ক্ষত্রিয়াশ্চ মহাত্মানঃ সংবন্ধিসুহৃদস্তথা
বয়স্যা জ্ঞাতয়শ্চৈব ভ্রাতরশ্চ পিতামহ

বহবশ্চ মনুষ্যেন্দ্রা নানাদেশসমাগতাঃ
ঘাতিতা রাজ্যলুব্ধেন ময়ৈকেন পিতামহ

তাংস্তাদৃশানহং হত্বা ধর্মনিত্যান্মহীক্ষিতঃ
অসকৃত্সোমপান্বীরান্কিং প্রাপ্স্যামি তপোধন

দহ্যাম্যনিশমদ্যাহং চিন্তয়ানঃ পুনঃ পুনঃ
হীনাং পার্থিবসিংহৈস্তৈঃ শ্রীমদ্ভিঃ পৃথিবীমিমাম্

দৃষ্ট্বা জ্ঞাতিবধং ঘোরং হতাংশ্চ শতশঃ পরান্
কোটিশশ্চ নরানন্যান্পরিতপ্যে পিতামহ

কা নু তাসাং বরস্ত্রীণামবস্থাদ্য ভবিষ্যতি
বিহীনানাং স্বতনয়ৈঃ পতিভির্ভ্রাতৃভিস্তথা

অস্মানন্তকরান্ঘোরান্পাণ্ডবান্বৃষ্ণিসংহিতান্
আক্রোশন্ত্যঃ কৃশা দীনা নিপতন্ত্যশ্চ ভূতলে

অপশ্যন্ত্যঃ পিতৄন্ভ্রাতৄন্পতীন্পুত্রাংশ্চ যোষিতঃ
ত্যক্ত্বা প্রাণান্প্রিয়ান্সর্বা গমিষ্যন্তি যমক্ষয়ম্

বত্সলত্বাদ্দ্বিজশ্রেষ্ঠ তত্র মে নাস্তি সংশয়ঃ
ব্যক্তং সৌক্ষ্ম্যাচ্চ ধর্মস্য প্রাপ্স্যামঃ স্ত্রীবধং বয়ম্

তে বয়ং সুহৃদো হত্বা কৃত্বা পাপমনন্তকম্
নরকে নিপতিষ্যামো হ্যধঃশিরস এব চ

শরীরাণি বিমোক্ষ্যামস্তপসোগ্রেণ সত্তম
আশ্রমাংশ্চ বিশেষাংস্ত্বং মমাচক্ষ্ব পিতামহ