Utshovঅধ্যায় 32
32.1
বৈশংপায়ন উবাচ
তূষ্ণীংভূতং তু রাজানং শোচমানং যুধিষ্ঠিরম্
তপস্বী ধর্মতত্ত্বজ্ঞঃ কৃষ্ণদ্বৈপায়নোঽব্রবীৎ
32.2
প্রজানাং পালনং ধর্মো রাজ্ঞাং রাজীবলোচন
ধর্মঃ প্রমাণং লোকস্য নিত্যং ধর্মানুবর্তনম্
32.3
অনুতিষ্ঠস্ব বৈ রাজন্পিতৃপৈতামহং পদম্
ব্রাহ্মণেষু চ যো ধর্মঃ স নিত্যো বেদনিশ্চিতঃ
32.4
তত্প্রমাণং প্রমাণানাং শাশ্বতং ভরতর্ষভ
তস্য ধর্মস্য কৃত্স্নস্য ক্ষত্রিয়ঃ পরিরক্ষিতা
32.5
তথা যঃ প্রতিহন্ত্যস্য শাসনং বিষয়ে নরঃ
স বাহুভ্যাং বিনিগ্রাহ্যো লোকয়াত্রাবিঘাতকঃ
32.6
প্রমাণমপ্রমাণং যঃ কুর্যান্মোহবশং গতঃ
ভৃত্যো বা যদি বা পুত্রস্তপস্বী বাপি কশ্চন
পাপান্সর্বৈরুপায়ৈস্তান্নিয়চ্ছেদ্ঘাতয়েত বা
32.7
অতোঽন্যথা বর্তমানো রাজা প্রাপ্নোতি কিল্বিষম্
ধর্মং বিনশ্যমানং হি যো ন রক্ষেত্স ধর্মহা
32.8
তে ত্বয়া ধর্মহন্তারো নিহতাঃ সপদানুগাঃ
স্বধর্মে বর্তমানস্ত্বং কিং নু শোচসি পাণ্ডব
রাজা হি হন্যাদ্দদ্যাচ্চ প্রজা রক্ষেচ্চ ধর্মতঃ
32.9
যুধিষ্ঠির উবাচ
ন তেঽভিশঙ্কে বচনং যদ্ব্রবীষি তপোধন
অপরোক্ষো হি তে ধর্মঃ সর্বধর্মভৃতাং বর
32.10
ময়া হ্যবধ্যা বহবো ঘাতিতা রাজ্যকারণাৎ
তান্যকার্যাণি মে ব্রহ্মন্দহন্তি চ তপন্তি চ
32.11
ব্যাস উবাচ
ঈশ্বরো বা ভবেত্কর্তা পুরুষো বাপি ভারত
হঠো বা বর্ততে লোকে কর্মজং বা ফলং স্মৃতম্
32.12
ঈশ্বরেণ নিয়ুক্তা হি সাধ্বসাধু চ পার্থিব
কুর্বন্তি পুরুষাঃ কর্ম ফলমীশ্বরগামি তৎ
32.13
যথা হি পুরুষশ্ছিন্দ্যাদ্বৃক্ষং পরশুনা বনে
ছেত্তুরেব ভবেত্পাপং পরশোর্ন কথংচন
32.14
অথ বা তদুপাদানাত্প্রাপ্নুয়ুঃ কর্মণঃ ফলম্
দণ্ডশস্ত্রকৃতং পাপং পুরুষে তন্ন বিদ্যতে
32.15
ন চৈতদিষ্টং কৌন্তেয় যদন্যেন ফলং কৃতম্
প্রাপ্নুয়াদিতি তস্মাচ্চ ঈশ্বরে তন্নিবেশয়
32.16
অথ বা পুরুষঃ কর্তা কর্মণোঃ শুভপাপয়োঃ
ন পরং বিদ্যতে তস্মাদেবমন্যচ্ছুভং কুরু
32.17
ন হি কশ্চিত্ক্বচিদ্রাজন্দিষ্টাত্প্রতিনিবর্ততে
দণ্ডশস্ত্রকৃতং পাপং পুরুষে তন্ন বিদ্যতে
32.18
যদি বা মন্যসে রাজন্হঠে লোকং প্রতিষ্ঠিতম্
এবমপ্যশুভং কর্ম ন ভূতং ন ভবিষ্যতি
32.19
অথাভিপত্তির্লোকস্য কর্তব্যা শুভপাপয়োঃ
অভিপন্নতমং লোকে রাজ্ঞামুদ্যতদণ্ডনম্
32.20
অথাপি লোকে কর্মাণি সমাবর্তন্ত ভারত
শুভাশুভফলং চেমে প্রাপ্নুবন্তীতি মে মতিঃ
32.21
এবং সত্যং শুভাদেশং কর্মণস্তত্ফলং ধ্রুবম্
ত্যজ তদ্রাজশার্দূল মৈবং শোকে মনঃ কৃথাঃ
32.22
স্বধর্মে বর্তমানস্য সাপবাদেঽপি ভারত
এবমাত্মপরিত্যাগস্তব রাজন্ন শোভনঃ
32.23
বিহিতানীহ কৌন্তেয় প্রায়শ্চিত্তানি কর্মিণাম্
শরীরবাংস্তানি কুর্যাদশরীরঃ পরাভবেৎ
32.24
তদ্রাজঞ্জীবমানস্ত্বং প্রায়শ্চিত্তং চরিষ্যসি
প্রায়শ্চিত্তমকৃত্বা তু প্রেত্য তপ্তাসি ভারত