Utshovঅধ্যায় 31
31.1
বৈশংপায়ন উবাচ
ততো রাজা পাণ্ডুসুতো নারদং প্রত্যভাষত
ভগবঞ্শ্রোতুমিচ্ছামি সুবর্ণষ্ঠীবিসংভবম্
31.2
এবমুক্তঃ স চ মুনির্ধর্মরাজেন নারদঃ
আচচক্ষে যথা বৃত্তং সুবর্ণষ্ঠীবিনং প্রতি
31.3
এবমেতন্মহারাজ যথায়ং কেশবোঽব্রবীৎ
কার্যস্যাস্য তু যচ্ছেষং তত্তে বক্ষ্যামি পৃচ্ছতঃ
31.4
অহং চ পর্বতশ্চৈব স্বস্রীয়ো মে মহামুনিঃ
বস্তুকামাবভিগতৌ সৃঞ্জয়ং জয়তাং বরম্
31.5
তত্র সংপূজিতৌ তেন বিধিদৃষ্টেন কর্মণা
সর্বকামৈঃ সুবিহিতৌ নিবসাবোঽস্য বেশ্মনি
31.6
ব্যতিক্রান্তাসু বর্ষাসু সময়ে গমনস্য চ
পর্বতো মামুবাচেদং কালে বচনমর্থবৎ
31.7
আবামস্য নরেন্দ্রস্য গৃহে পরমপূজিতৌ
উষিতৌ সময়ে ব্রহ্মংশ্চিন্ত্যতামত্র সাংপ্রতম্
31.8
ততোঽহমব্রুবং রাজন্পর্বতং শুভদর্শনম্
সর্বমেতত্ত্বয়ি বিভো ভাগিনেয়োপপদ্যতে
31.9
বরেণ ছন্দ্যতাং রাজা লভতাং যদ্যদিচ্ছতি
আবয়োস্তপসা সিদ্ধিং প্রাপ্নোতু যদি মন্যসে
31.10
তত আহূয় রাজানং সৃঞ্জয়ং শুভদর্শনম্
পর্বতোঽনুমতং বাক্যমুবাচ মুনিপুংগবঃ
31.11
প্রীতৌ স্বো নৃপ সত্কারৈস্তব হ্যার্জবসংভৃতৈঃ
আবাভ্যামভ্যনুজ্ঞাতো বরং নৃবর চিন্তয়
31.12
দেবানামবিহিংসায়াং যদ্ভবেন্মানুষক্ষমম্
তদ্গৃহাণ মহারাজ পূজার্হো নৌ মতো ভবান্
31.13
সৃঞ্জয় উবাচ
প্রীতৌ ভবন্তৌ যদি মে কৃতমেতাবতা মম
এষ এব পরো লাভো নির্বৃত্তো মে মহাফলঃ
31.14
নারদ উবাচ
তমেবংবাদিনং ভূয়ঃ পর্বতঃ প্রত্যভাষত
বৃণীষ্ব রাজন্সংকল্পো যস্তে হৃদি চিরং স্থিতঃ
31.15
সৃঞ্জয় উবাচ
অভীপ্সামি সুতং বীরং বীর্যবন্তং দৃঢব্রতম্
আয়ুষ্মন্তং মহাভাগং দেবরাজসমদ্যুতিম্
31.16
পর্বত উবাচ
ভবিষ্যত্যেষ তে কামো ন ত্বায়ুষ্মান্ভবিষ্যতি
দেবরাজাভিভূত্যর্থং সংকল্পো হ্যেষ তে হৃদি
31.17
সুবর্ণষ্ঠীবনাচ্চৈব স্বর্ণষ্ঠীবী ভবিষ্যতি
রক্ষ্যশ্চ দেবরাজাত্স দেবরাজসমদ্যুতিঃ
31.18
নারদ উবাচ
তচ্ছ্রুত্বা সৃঞ্জয়ো বাক্যং পর্বতস্য মহাত্মনঃ
প্রসাদয়ামাস তদা নৈতদেবং ভবেদিতি
31.19
আয়ুষ্মান্মে ভবেত্পুত্রো ভবতস্তপসা মুনে
ন চ তং পর্বতঃ কিংচিদুবাচেন্দ্রব্যপেক্ষয়া
31.20
তমহং নৃপতিং দীনমব্রুবং পুনরেব তু
স্মর্তব্যোঽহং মহারাজ দর্শয়িষ্যামি তে স্মৃতঃ
31.21
অহং তে দয়িতং পুত্রং প্রেতরাজবশং গতম্
পুনর্দাস্যামি তদ্রূপং মা শুচঃ পৃথিবীপতে
31.22
এবমুক্ত্বা তু নৃপতিং প্রয়াতৌ স্বো যথেপ্সিতম্
সৃঞ্জয়শ্চ যথাকামং প্রবিবেশ স্বমন্দিরম্
31.23
সৃঞ্জয়স্যাথ রাজর্ষেঃ কস্মিংশ্চিত্কালপর্যয়ে
জজ্ঞে পুত্রো মহাবীর্যস্তেজসা প্রজ্বলন্নিব
31.24
ববৃধে স যথাকালং সরসীব মহোত্পলম্
বভূব কাঞ্চনষ্ঠীবী যথার্থং নাম তস্য তৎ
31.25
তদদ্ভুততমং লোকে পপ্রথে কুরুসত্তম
বুবুধে তচ্চ দেবেন্দ্রো বরদানং মহাত্মনোঃ
31.26
ততস্ত্বভিভবাদ্ভীতো বৃহস্পতিমতে স্থিতঃ
কুমারস্যান্তরপ্রেক্ষী বভূব বলবৃত্রহা
31.27
চোদয়ামাস বজ্রং স দিব্যাস্ত্রং মূর্তিসংস্থিতম্
ব্যাঘ্রো ভূত্বা জহীমং ত্বং রাজপুত্রমিতি প্রভো
31.28
বিবৃদ্ধঃ কিল বীর্যেণ মামেষোঽভিভবিষ্যতি
সৃঞ্জয়স্য সুতো বজ্র যথৈনং পর্বতো দদৌ
31.29
এবমুক্তস্তু শক্রেণ বজ্রঃ পরপুরংজয়ঃ
কুমারস্যান্তরপ্রেক্ষী নিত্যমেবান্বপদ্যত
31.30
সৃঞ্জয়োঽপি সুতং প্রাপ্য দেবরাজসমদ্যুতিম্
হৃষ্টঃ সান্তঃপুরো রাজা বননিত্যোঽভবত্তদা
31.31
ততো ভাগীরথীতীরে কদাচিদ্বননির্ঝরে
ধাত্রীদ্বিতীয়ো বালঃ স ক্রীডার্থং পর্যধাবত
31.32
পঞ্চবর্ষকদেশীয়ো বালো নাগেন্দ্রবিক্রমঃ
সহসোত্পতিতং ব্যাঘ্রমাসসাদ মহাবলঃ
31.33
তেন চৈব বিনিষ্পিষ্টো বেপমানো নৃপাত্মজঃ
ব্যসুঃ পপাত মেদিন্যাং ততো ধাত্রী বিচুক্রুশে
31.34
হত্বা তু রাজপুত্রং স তত্রৈবান্তরধীয়ত
শার্দূলো দেবরাজস্য মায়য়ান্তর্হিতস্তদা
31.35
ধাত্র্যাস্তু নিনদং শ্রুত্বা রুদত্যাঃ পরমার্তবৎ
অভ্যধাবত তং দেশং স্বয়মেব মহীপতিঃ
31.36
স দদর্শ গতাসুং তং শয়ানং পীতশোণিতম্
কুমারং বিগতানন্দং নিশাকরমিব চ্যুতম্
31.37
স তমুত্সঙ্গমারোপ্য পরিপীডিতবক্ষসম্
পুত্রং রুধিরসংসিক্তং পর্যদেবয়দাতুরঃ
31.38
ততস্তা মাতরস্তস্য রুদন্ত্যঃ শোককর্শিতাঃ
অভ্যধাবন্ত তং দেশং যত্র রাজা স সৃঞ্জয়ঃ
31.39
ততঃ স রাজা সস্মার মামন্তর্গতমানসঃ
তচ্চাহং চিন্তিতং জ্ঞাত্বা গতবাংস্তস্য দর্শনম্
31.40
স ময়ৈতানি বাক্যানি শ্রাবিতঃ শোকলালসঃ
যানি তে যদুবীরেণ কথিতানি মহীপতে
31.41
সংজীবিতশ্চাপি ময়া বাসবানুমতে তদা
ভবিতব্যং তথা তচ্চ ন তচ্ছক্যমতোঽন্যথা
31.42
অত ঊর্ধ্বং কুমারঃ স স্বর্ণষ্ঠীবী মহায়শাঃ
চিত্তং প্রসাদয়ামাস পিতুর্মাতুশ্চ বীর্যবান্
31.43
কারয়ামাস রাজ্যং স পিতরি স্বর্গতে বিভুঃ
বর্ষাণামেকশতবত্সহস্রং ভীমবিক্রমঃ
31.44
তত ইষ্ট্বা মহায়জ্ঞৈর্বহুভির্ভূরিদক্ষিণৈঃ
তর্পয়ামাস দেবাংশ্চ পিতৄংশ্চৈব মহাদ্যুতিঃ
31.45
উত্পাদ্য চ বহূন্পুত্রান্কুলসংতানকারিণঃ
কালেন মহতা রাজন্কালধর্মমুপেয়িবান্
31.46
স ত্বং রাজেন্দ্র সংজাতং শোকমেতন্নিবর্তয়
যথা ত্বাং কেশবঃ প্রাহ ব্যাসশ্চ সুমহাতপাঃ
31.47
পিতৃপৈতামহং রাজ্যমাস্থায় দুরমুদ্বহ
ইষ্ট্বা পুণ্যৈর্মহায়জ্ঞৈরিষ্টাঁল্লোকানবাপ্স্যসি