Utshovঅধ্যায় 30
30.1
যুধিষ্ঠির উবাচ
স কথং কাঞ্চনষ্ঠীবী সৃঞ্জয়স্য সুতোঽভবৎ
পর্বতেন কিমর্থং চ দত্তঃ কেন মমার চ
30.2
যদা বর্ষসহস্রায়ুস্তদা ভবতি মানবঃ
কথমপ্রাপ্তকৌমারঃ সৃঞ্জয়স্য সুতো মৃতঃ
30.3
উতাহো নামমাত্রং বৈ সুবর্ণষ্ঠীবিনোঽভবৎ
তথ্যং বা কাঞ্চনষ্ঠীবীত্যেতদিচ্ছামি বেদিতুম্
30.4
বাসুদেব উবাচ
অত্র তে কথয়িষ্যামি যথা বৃত্তং জনেশ্বর
নারদঃ পর্বতশ্চৈব প্রাগৃষী লোকপূজিতৌ
30.5
মাতুলো ভাগিনেয়শ্চ দেবলোকাদিহাগতৌ
বিহর্তুকামৌ সংপ্রীত্যা মানুষ্যেষু পুরা প্রভূ
30.6
হবিঃপবিত্রভোজ্যেন দেবভোজ্যেন চৈব হ
নারদো মাতুলশ্চৈব ভাগিনেয়শ্চ পর্বতঃ
30.7
তাবুভৌ তপসোপেতাববনীতলচারিণৌ
ভুঞ্জানৌ মানুষান্ভোগান্যথাবত্পর্যধাবতাম্
30.8
প্রীতিমন্তৌ মুদা যুক্তৌ সময়ং তত্র চক্রতুঃ
যো ভবেদ্ধৃদি সংকল্পঃ শুভো বা যদি বাশুভঃ
অন্যোন্যস্য স আখ্যেয়ো মৃষা শাপোঽন্যথা ভবেৎ
30.9
তৌ তথেতি প্রতিজ্ঞায় মহর্ষী লোকপূজিতৌ
সৃঞ্জয়ং শ্বৈত্যমভ্যেত্য রাজানমিদমূচতুঃ
30.10
আবাং ভবতি বত্স্যাবঃ কংচিত্কালং হিতায় তে
যথাবত্পৃথিবীপাল আবয়োঃ প্রগুণীভব
তথেতি কৃত্বা তৌ রাজা সত্কৃত্যোপচচার হ
30.11
ততঃ কদাচিত্তৌ রাজা মহাত্মানৌ তথাগতৌ
অব্রবীত্পরমপ্রীতঃ সুতেয়ং বরবর্ণিনী
30.12
একৈব মম কন্যৈষা যুবাং পরিচরিষ্যতি
দর্শনীয়ানবদ্যাঙ্গী শীলবৃত্তসমন্বিতা
সুকুমারী কুমারী চ পদ্মকিঞ্জল্কসংনিভা
30.13
পরমং সৌম্য ইত্যুক্তস্তাভ্যাং রাজা শশাস তাম্
কন্যে বিপ্রাবুপচর দেববত্পিতৃবচ্চ হ
30.14
সা তু কন্যা তথেত্যুক্ত্বা পিতরং ধর্মচারিণী
যথানিদেশং রাজ্ঞস্তৌ সত্কৃত্যোপচচার হ
30.15
তস্যাস্তথোপচারেণ রূপেণাপ্রতিমেন চ
নারদং হৃচ্ছয়স্তূর্ণং সহসৈবান্বপদ্যত
30.16
ববৃধে চ ততস্তস্য হৃদি কামো মহাত্মনঃ
যথা শুক্লস্য পক্ষস্য প্রবৃত্তাবুডুরাট্ছনৈঃ
30.17
ন চ তং ভাগিনেয়ায় পর্বতায় মহাত্মনে
শশংস মন্মথং তীব্রং ব্রীডমানঃ স ধর্মবিৎ
30.18
তপসা চেঙ্গিতেনাথ পর্বতোঽথ বুবোধ তৎ
কামার্তং নারদং ক্রুদ্ধঃ শশাপৈনং ততো ভৃশম্
30.19
কৃত্বা সময়মব্যগ্রো ভবান্বৈ সহিতো ময়া
যো ভবেদ্ধৃদি সংকল্পঃ শুভো বা যদি বাশুভঃ
30.20
অন্যোন্যস্য স আখ্যেয় ইতি তদ্বৈ মৃষা কৃতম্
ভবতা বচনং ব্রহ্মংস্তস্মাদেতদ্বদাম্যহম্
30.21
ন হি কামং প্রবর্তন্তং ভবানাচষ্ট মে পুরা
সুকুমার্যাং কুমার্যাং তে তস্মাদেষ শপাম্যহম্
30.22
ব্রহ্মবাদী গুরুর্যস্মাত্তপস্বী ব্রাহ্মণশ্চ সন্
অকার্ষীঃ সময়ভ্রংশমাবাভ্যাং যঃ কৃতো মিথঃ
30.23
শপ্স্যে তস্মাত্সুসংক্রুদ্ধো ভবন্তং তং নিবোধ মে
সুকুমারী চ তে ভার্যা ভবিষ্যতি ন সংশয়ঃ
30.24
বানরং চৈব কন্যা ত্বাং বিবাহাত্প্রভৃতি প্রভো
সংদ্রক্ষ্যন্তি নরাশ্চান্যে স্বরূপেণ বিনাকৃতম্
30.25
স তদ্বাক্যং তু বিজ্ঞায় নারদঃ পর্বতাত্তদা
অশপত্তমপি ক্রোধাদ্ভাগিনেয়ং স মাতুলঃ
30.26
তপসা ব্রহ্মচর্যেণ সত্যেন চ দমেন চ
যুক্তোঽপি ধর্মনিত্যশ্চ ন স্বর্গবাসমাপ্স্যসি
30.27
তৌ তু শপ্ত্বা ভৃশং ক্রুদ্ধৌ পরস্পরমমর্ষণৌ
প্রতিজগ্মতুরন্যোন্যং ক্রুদ্ধাবিব গজোত্তমৌ
30.28
পর্বতঃ পৃথিবীং কৃত্স্নাং বিচচার মহামুনিঃ
পূজ্যমানো যথান্যায়ং তেজসা স্বেন ভারত
30.29
অথ তামলভত্কন্যাং নারদঃ সৃঞ্জয়াত্মজাম্
ধর্মেণ ধর্মপ্রবরঃ সুকুমারীমনিন্দিতাম্
30.30
সা তু কন্যা যথাশাপং নারদং তং দদর্শ হ
পাণিগ্রহণমন্ত্রাণাং প্রয়োগাদেব বানরম্
30.31
সুকুমারী চ দেবর্ষিং বানরপ্রতিমাননম্
নৈবাবমন্যত তদা প্রীতিমত্যেব চাভবৎ
30.32
উপতস্থে চ ভর্তারং ন চান্যং মনসাপ্যগাৎ
দেবং মুনিং বা যক্ষং বা পতিত্বে পতিবত্সলা
30.33
ততঃ কদাচিদ্ভগবান্পর্বতোঽনুসসার হ
বনং বিরহিতং কিংচিত্তত্রাপশ্যত্স নারদম্
30.34
ততোঽভিবাদ্য প্রোবাচ নারদং পর্বতস্তদা
ভবান্প্রসাদং কুরুতাং স্বর্গাদেশায় মে প্রভো
30.35
তমুবাচ ততো দৃষ্ট্বা পর্বতং নারদস্তদা
কৃতাঞ্জলিমুপাসীনং দীনং দীনতরঃ স্বয়ম্
30.36
ত্বয়াহং প্রথমং শপ্তো বানরস্ত্বং ভবিষ্যসি
ইত্যুক্তেন ময়া পশ্চাচ্ছপ্তস্ত্বমপি মত্সরাৎ
অদ্যপ্রভৃতি বৈ বাসং স্বর্গে নাবাপ্স্যসীতি হ
30.37
তব নৈতদ্ধি সদৃশং পুত্রস্থানে হি মে ভবান্
নিবর্তয়েতাং তৌ শাপমন্যোঽন্যেন তদা মুনী
30.38
শ্রীসমৃদ্ধং তদা দৃষ্ট্বা নারদং দেবরূপিণম্
সুকুমারী প্রদুদ্রাব পরপত্যভিশঙ্কয়া
30.39
তাং পর্বতস্ততো দৃষ্ট্বা প্রদ্রবন্তীমনিন্দিতাম্
অব্রবীত্তব ভর্তৈষ নাত্র কার্যা বিচারণা
30.40
ঋষিঃ পরমধর্মাত্মা নারদো ভগবান্প্রভুঃ
তবৈবাভেদ্যহৃদয়ো মা তে ভূদত্র সংশয়ঃ
30.41
সানুনীতা বহুবিধং পর্বতেন মহাত্মনা
শাপদোষং চ তং ভর্তুঃ শ্রুত্বা স্বাং প্রকৃতিং গতা
পর্বতোঽথ যয়ৌ স্বর্গং নারদোঽথ যয়ৌ গৃহান্
30.42
প্রত্যক্ষকর্মা সর্বস্য নারদোঽয়ং মহানৃষিঃ
এষ বক্ষ্যতি বৈ পৃষ্টো যথা বৃত্তং নরোত্তম