Utshovঅধ্যায় 29
29.1
বৈশংপায়ন উবাচ
অব্যাহরতি কৌন্তেয়ে ধর্মপুত্রে যুধিষ্ঠিরে
গুডাকেশো হৃষীকেশমভ্যভাষত পাণ্ডবঃ
29.2
জ্ঞাতিশোকাভিসংতপ্তো ধর্মরাজঃ পরংতপঃ
এষ শোকার্ণবে মগ্নস্তমাশ্বাসয় মাধব
29.3
সর্বে স্ম তে সংশয়িতাঃ পুনরেব জনার্দন
অস্য শোকং মহাবাহো প্রণাশয়িতুমর্হসি
29.4
এবমুক্তস্তু গোবিন্দো বিজয়েন মহাত্মনা
পর্যবর্তত রাজানং পুণ্ডরীকেক্ষণোঽচ্যুতঃ
29.5
অনতিক্রমণীয়ো হি ধর্মরাজস্য কেশবঃ
বাল্যাত্প্রভৃতি গোবিন্দঃ প্রীত্যা চাভ্যধিকোঽর্জুনাৎ
29.6
সংপ্রগৃহ্য মহাবাহুর্ভুজং চন্দনভূষিতম্
শৈলস্তম্ভোপমং শৌরিরুবাচাভিবিনোদয়ন্
29.7
শুশুভে বদনং তস্য সুদংষ্ট্রং চারুলোচনম্
ব্যাকোশমিব বিস্পষ্টং পদ্মং সূর্যবিবোধিতম্
29.8
মা কৃথাঃ পুরুষব্যাঘ্র শোকং ত্বং গাত্রশোষণম্
ন হি তে সুলভা ভূয়ো যে হতাস্মিন্রণাজিরে
29.9
স্বপ্নলব্ধা যথা লাভা বিতথাঃ প্রতিবোধনে
এবং তে ক্ষত্রিয়া রাজন্যে ব্যতীতা মহারণে
29.10
সর্বে হ্যভিমুখাঃ শূরা বিগতা রণশোভিনঃ
নৈষাং কশ্চিত্পৃষ্ঠতো বা পলায়ন্বাপি পাতিতঃ
29.11
সর্বে ত্যক্ত্বাত্মনঃ প্রাণান্যুদ্ধ্বা বীরা মহাহবে
শস্ত্রপূতা দিবং প্রাপ্তা ন তাঞ্শোচিতুমর্হসি
29.12
অত্রৈবোদাহরন্তীমমিতিহাসং পুরাতনম্
সৃঞ্জয়ং পুত্রশোকার্তং যথায়ং প্রাহ নারদঃ
29.13
সুখদুঃখৈরহং ত্বং চ প্রজাঃ সর্বাশ্চ সৃঞ্জয়
অবিমুক্তং চরিষ্যামস্তত্র কা পরিদেবনা
29.14
মহাভাগ্যং পরং রাজ্ঞাং কীর্ত্যমানং ময়া শৃণু
গচ্ছাবধানং নৃপতে ততো দুঃখং প্রহাস্যসি
29.15
মৃতান্মহানুভাবাংস্ত্বং শ্রুত্বৈব তু মহীপতীন্
শ্রুত্বাপনয় সংতাপং শৃণু বিস্তরশশ্চ মে
29.16
আবিক্ষিতং মরুত্তং মে মৃতং সৃঞ্জয় শুশ্রুহি
যস্য সেন্দ্রাঃ সবরুণা বৃহস্পতিপুরোগমাঃ
দেবা বিশ্বসৃজো রাজ্ঞো যজ্ঞমীয়ুর্মহাত্মনঃ
29.17
যঃ স্পর্ধামনয়চ্ছক্রং দেবরাজং শতক্রতুম্
শক্রপ্রিয়ৈষী যং বিদ্বান্প্রত্যাচষ্ট বৃহস্পতিঃ
সংবর্তো যাজয়ামাস যং পীডার্থং বৃহস্পতেঃ
29.18
যস্মিন্প্রশাসতি সতাং নৃপতৌ নৃপসত্তম
অকৃষ্টপচ্যা পৃথিবী বিবভৌ চৈত্যমালিনী
29.19
আবিক্ষিতস্য বৈ সত্রে বিশ্বে দেবাঃ সভাসদঃ
মরুতঃ পরিবেষ্টারঃ সাধ্যাশ্চাসন্মহাত্মনঃ
29.20
মরুদ্গণা মরুত্তস্য যত্সোমমপিবন্ত তে
দেবান্মনুষ্যান্গন্ধর্বানত্যরিচ্যন্ত দক্ষিণাঃ
29.21
স চেন্মমার সৃঞ্জয় চতুর্ভদ্রতরস্ত্বয়া
পুত্রাত্পুণ্যতরশ্চৈব মা পুত্রমনুতপ্যথাঃ
29.22
সুহোত্রং চেদ্বৈতিথিনং মৃতং সৃঞ্জয় শুশ্রুম
যস্মৈ হিরণ্যং ববৃষে মঘবান্পরিবত্সরম্
29.23
সত্যনামা বসুমতী যং প্রাপ্যাসীজ্জনাধিপ
হিরণ্যমবহন্নদ্যস্তস্মিঞ্জনপদেশ্বরে
29.24
কূর্মান্কর্কটকান্নক্রান্মকরাঞ্শিংশুকানপি
নদীষ্বপাতয়দ্রাজন্মঘবা লোকপূজিতঃ
29.25
হৈরণ্যান্পতিতান্দৃষ্ট্বা মত্স্যান্মকরকচ্ছপান্
সহস্রশোঽথ শতশস্ততোঽস্ময়ত বৈতিথিঃ
29.26
তদ্ধিরণ্যমপর্যন্তমাবৃত্তং কুরুজাঙ্গলে
ঈজানো বিততে যজ্ঞে ব্রাহ্মণেভ্যঃ সমাহিতঃ
29.27
স চেন্মমার সৃঞ্জয় চতুর্ভদ্রতরস্ত্বয়া
পুত্রাত্পুণ্যতরশ্চৈব মা পুত্রমনুতপ্যথাঃ
অদক্ষিণময়জ্বানং শ্বৈত্য সংশাম্য মা শুচঃ
29.28
অঙ্গং বৃহদ্রথং চৈব মৃতং শুশ্রুম সৃঞ্জয়
যঃ সহস্রং সহস্রাণাং শ্বেতানশ্বানবাসৃজৎ
29.29
সহস্রং চ সহস্রাণাং কন্যা হেমবিভূষিতাঃ
ঈজানো বিততে যজ্ঞে দক্ষিণামত্যকালয়ৎ
29.30
শতং শতসহস্রাণাং বৃষাণাং হেমমালিনাম্
গবাং সহস্রানুচরং দক্ষিণামত্যকালয়ৎ
29.31
অঙ্গস্য যজমানস্য তদা বিষ্ণুপদে গিরৌ
অমাদ্যদিন্দ্রঃ সোমেন দক্ষিণাভির্দ্বিজাতয়ঃ
29.32
যস্য যজ্ঞেষু রাজেন্দ্র শতসংখ্যেষু বৈ পুনঃ
দেবান্মনুষ্যান্গন্ধর্বানত্যরিচ্যন্ত দক্ষিণাঃ
29.33
ন জাতো জনিতা চান্যঃ পুমান্যস্তত্প্রদাস্যতি
যদঙ্গঃ প্রদদৌ বিত্তং সোমসংস্থাসু সপ্তসু
29.34
স চেন্মমার সৃঞ্জয় চতুর্ভদ্রতরস্ত্বয়া
পুত্রাত্পুণ্যতরশ্চৈব মা পুত্রমনুতপ্যথাঃ
29.35
শিবিমৌশীনরং চৈব মৃতং শুশ্রুম সৃঞ্জয়
য ইমাং পৃথিবীং কৃত্স্নাং চর্মবত্সমবেষ্টয়ৎ
29.36
মহতা রথঘোষেণ পৃথিবীমনুনাদয়ন্
একচ্ছত্রাং মহীং চক্রে জৈত্রেণৈকরথেন যঃ
29.37
যাবদদ্য গবাশ্বং স্যাদারণ্যৈঃ পশুভিঃ সহ
তাবতীঃ প্রদদৌ গাঃ স শিবিরৌশীনরোঽধ্বরে
29.38
নোদ্যন্তারং ধুরং তস্য কংচিন্মেনে প্রজাপতিঃ
ন ভূতং ন ভবিষ্যন্তং সর্বরাজসু ভারত
অন্যত্রৌশীনরাচ্ছৈব্যাদ্রাজর্ষেরিন্দ্রবিক্রমাৎ
29.39
স চেন্মমার সৃঞ্জয় চতুর্ভদ্রতরস্ত্বয়া
পুত্রাত্পুণ্যতরশ্চৈব মা পুত্রমনুতপ্যথাঃ
অদক্ষিণময়জ্বানং তং বৈ সংশাম্য মা শুচঃ
29.40
ভরতং চৈব দৌঃষন্তিং মৃতং সৃঞ্জয় শুশ্রুম
শাকুন্তলিং মহেষ্বাসং ভূরিদ্রবিণতেজসম্
29.41
যো বদ্ধ্বা ত্রিংশতো হ্যশ্বান্দেবেভ্যো যমুনামনু
সরস্বতীং বিংশতিং চ গঙ্গামনু চতুর্দশ
29.42
অশ্বমেধসহস্রেণ রাজসূয়শতেন চ
ইষ্টবান্স মহাতেজা দৌঃষন্তির্ভরতঃ পুরা
29.43
ভরতস্য মহত্কর্ম সর্বরাজসু পার্থিবাঃ
খং মর্ত্যা ইব বাহুভ্যাং নানুগন্তুমশক্নুবন্
29.44
পরং সহস্রাদ্যো বদ্ধ্বা হয়ান্বেদীং বিচিত্য চ
সহস্রং যত্র পদ্মানাং কণ্বায় ভরতো দদৌ
29.45
স চেন্মমার সৃঞ্জয় চতুর্ভদ্রতরস্ত্বয়া
পুত্রাত্পুণ্যতরশ্চৈব মা পুত্রমনুতপ্যথাঃ
29.46
রামং দাশরথিং চৈব মৃতং শুশ্রুম সৃঞ্জয়
যোঽন্বকম্পত বৈ নিত্যং প্রজাঃ পুত্রানিবৌরসান্
29.47
বিধবা যস্য বিষয়ে নানাথাঃ কাশ্চনাভবন্
সর্বস্যাসীত্পিতৃসমো রামো রাজ্যং যদান্বশাৎ
29.48
কালবর্ষাশ্চ পর্জন্যাঃ সস্যানি রসবন্তি চ
নিত্যং সুভিক্ষমেবাসীদ্রামে রাজ্যং প্রশাসতি
29.49
প্রাণিনো নাপ্সু মজ্জন্তি নানর্থে পাবকোঽদহৎ
ন ব্যালজং ভয়ং চাসীদ্রামে রাজ্যং প্রশাসতি
29.50
আসন্বর্ষসহস্রাণি তথা পুত্রসহস্রিকাঃ
অরোগাঃ সর্বসিদ্ধার্থাঃ প্রজা রামে প্রশাসতি
29.51
নান্যোন্যেন বিবাদোঽভূত্স্ত্রীণামপি কুতো নৃণাম্
ধর্মনিত্যাঃ প্রজাশ্চাসন্রামে রাজ্যং প্রশাসতি
29.52
নিত্যপুষ্পফলাশ্চৈব পাদপা নিরুপদ্রবাঃ
সর্বা দ্রোণদুঘা গাবো রামে রাজ্যং প্রশাসতি
29.53
স চতুর্দশ বর্ষাণি বনে প্রোষ্য মহাতপাঃ
দশাশ্বমেধাঞ্জারূথ্যানাজহার নিরর্গলান্
29.54
শ্যামো যুবা লোহিতাক্ষো মত্তবারণবিক্রমঃ
দশ বর্ষসহস্রাণি রামো রাজ্যমকারয়ৎ
29.55
স চেন্মমার সৃঞ্জয় চতুর্ভদ্রতরস্ত্বয়া
পুত্রাত্পুণ্যতরশ্চৈব মা পুত্রমনুতপ্যথাঃ
29.56
ভগীরথং চ রাজানং মৃতং শুশ্রুম সৃঞ্জয়
যস্যেন্দ্রো বিততে যজ্ঞে সোমং পীত্বা মদোত্কটঃ
29.57
অসুরাণাং সহস্রাণি বহূনি সুরসত্তমঃ
অজয়দ্বাহুবীর্যেণ ভগবান্পাকশাসনঃ
29.58
যঃ সহস্রং সহস্রাণাং কন্যা হেমবিভূষিতাঃ
ঈজানো বিততে যজ্ঞে দক্ষিণামত্যকালয়ৎ
29.59
সর্বা রথগতাঃ কন্যা রথাঃ সর্বে চতুর্যুজঃ
রথে রথে শতং নাগাঃ পদ্মিনো হেমমালিনঃ
29.60
সহস্রমশ্বা একৈকং হস্তিনং পৃষ্ঠতোঽন্বয়ুঃ
গবাং সহস্রমশ্বেঽশ্বে সহস্রং গব্যজাবিকম্
29.61
উপহ্বরে নিবসতো যস্যাঙ্কে নিষসাদ হ
গঙ্গা ভাগীরথী তস্মাদুর্বশী হ্যভবত্পুরা
29.62
ভূরিদক্ষিণমিক্ষ্বাকুং যজমানং ভগীরথম্
ত্রিলোকপথগা গঙ্গা দুহিতৃত্বমুপেয়ুষী
29.63
স চেন্মমার সৃঞ্জয় চতুর্ভদ্রতরস্ত্বয়া
পুত্রাত্পুণ্যতরশ্চৈব মা পুত্রমনুতপ্যথাঃ
29.64
দিলীপং চৈবৈলবিলং মৃতং শুশ্রুম সৃঞ্জয়
যস্য কর্মাণি ভূরীণি কথয়ন্তি দ্বিজাতয়ঃ
29.65
ইমাং বৈ বসুসংপন্নাং বসুধাং বসুধাধিপঃ
দদৌ তস্মিন্মহায়জ্ঞে ব্রাহ্মণেভ্যঃ সমাহিতঃ
29.66
তস্যেহ যজমানস্য যজ্ঞে যজ্ঞে পুরোহিতঃ
সহস্রং বারণান্হৈমান্দক্ষিণামত্যকালয়ৎ
29.67
যস্য যজ্ঞে মহানাসীদ্যূপঃ শ্রীমান্হিরণ্ময়ঃ
তং দেবাঃ কর্ম কুর্বাণাঃ শক্রজ্যেষ্ঠা উপাশ্রয়ন্
29.68
চষালো যস্য সৌবর্ণস্তস্মিন্যূপে হিরণ্ময়ে
ননৃতুর্দেবগন্ধর্বাঃ ষট্সহস্রাণি সপ্তধা
29.69
অবাদয়ত্তত্র বীণাং মধ্যে বিশ্বাবসুঃ স্বয়ম্
সর্বভূতান্যমন্যন্ত মম বাদয়তীত্যয়ম্
29.70
এতদ্রাজ্ঞো দিলীপস্য রাজানো নানুচক্রিরে
যত্স্ত্রিয়ো হেমসংপন্নাঃ পথি মত্তাঃ স্ম শেরতে
29.71
রাজানমুগ্রধন্বানং দিলীপং সত্যবাদিনম্
যেঽপশ্যন্সুমহাত্মানং তেঽপি স্বর্গজিতো নরাঃ
29.72
ত্রয়ঃ শব্দা ন জীর্যন্তে দিলীপস্য নিবেশনে
স্বাধ্যায়ঘোষো জ্যাঘোষো দীয়তামিতি চৈব হি
29.73
স চেন্মমার সৃঞ্জয় চতুর্ভদ্রতরস্ত্বয়া
পুত্রাত্পুণ্যতরশ্চৈব মা পুত্রমনুতপ্যথাঃ
29.74
মান্ধাতারং যৌবনাশ্বং মৃতং শুশ্রুম সৃঞ্জয়
যং দেবা মরুতো গর্ভং পিতুঃ পার্শ্বাদপাহরন্
29.75
সংবৃদ্ধো যুবনাশ্বস্য জঠরে যো মহাত্মনঃ
পৃষদাজ্যোদ্ভবঃ শ্রীমাংস্ত্রিলোকবিজয়ী নৃপঃ
29.76
যং দৃষ্ট্বা পিতুরুত্সঙ্গে শয়ানং দেবরূপিণম্
অন্যোন্যমব্রুবন্দেবাঃ কময়ং ধাস্যতীতি বৈ
29.77
মামেব ধাস্যতীত্যেবমিন্দ্রো অভ্যবপদ্যত
মান্ধাতেতি ততস্তস্য নাম চক্রে শতক্রতুঃ
29.78
ততস্তু পয়সো ধারাং পুষ্টিহেতোর্মহাত্মনঃ
তস্যাস্যে যৌবনাশ্বস্য পাণিরিন্দ্রস্য চাস্রবৎ
29.79
তং পিবন্পাণিমিন্দ্রস্য সমামহ্না ব্যবর্ধত
স আসীদ্দ্বাদশসমো দ্বাদশাহেন পার্থিব
29.80
তমিয়ং পৃথিবী সর্বা একাহ্না সমপদ্যত
ধর্মাত্মানং মহাত্মানং শূরমিন্দ্রসমং যুধি
29.81
য আঙ্গারং হি নৃপতিং মরুত্তমসিতং গয়ম্
অঙ্গং বৃহদ্রথং চৈব মান্ধাতা সমরেঽজয়ৎ
29.82
যৌবনাশ্বো যদাঙ্গারং সমরে সময়োধয়ৎ
বিস্ফারৈর্ধনুষো দেবা দ্যৌরভেদীতি মেনিরে
29.83
যতঃ সূর্য উদেতি স্ম যত্র চ প্রতিতিষ্ঠতি
সর্বং তদ্যৌবনাশ্বস্য মান্ধাতুঃ ক্ষেত্রমুচ্যতে
29.84
অশ্বমেধশতেনেষ্ট্বা রাজসূয়শতেন চ
অদদাদ্রোহিতান্মত্স্যান্ব্রাহ্মণেভ্যো মহীপতিঃ
29.85
হৈরণ্যান্যোজনোত্সেধানায়তান্দশয়োজনম্
অতিরিক্তান্দ্বিজাতিভ্যো ব্যভজন্নিতরে জনাঃ
29.86
স চেন্মমার সৃঞ্জয় চতুর্ভদ্রতরস্ত্বয়া
পুত্রাত্পুণ্যতরশ্চৈব মা পুত্রমনুতপ্যথাঃ
29.87
যয়াতিং নাহুষং চৈব মৃতং শুশ্রুম সৃঞ্জয়
য ইমাং পৃথিবীং সর্বাং বিজিত্য সহসাগরাম্
29.88
শম্যাপাতেনাভ্যতীয়াদ্বেদীভিশ্চিত্রয়ন্নৃপ
ঈজানঃ ক্রতুভিঃ পুণ্যৈঃ পর্যগচ্ছদ্বসুংধরাম্
29.89
ইষ্ট্বা ক্রতুসহস্রেণ বাজিমেধশতেন চ
তর্পয়ামাস দেবেন্দ্রং ত্রিভিঃ কাঞ্চনপর্বতৈঃ
29.90
ব্যূঢে দেবাসুরে যুদ্ধে হত্বা দৈতেয়দানবান্
ব্যভজত্পৃথিবীং কৃত্স্নাং যয়াতির্নহুষাত্মজঃ
29.91
অন্তেষু পুত্রান্নিক্ষিপ্য যদুদ্রুহ্যুপুরোগমান্
পূরুং রাজ্যেঽভিষিচ্য স্বে সদারঃ প্রস্থিতো বনম্
29.92
স চেন্মমার সৃঞ্জয় চতুর্ভদ্রতরস্ত্বয়া
পুত্রাত্পুণ্যতরশ্চৈব মা পুত্রমনুতপ্যথাঃ
29.93
অম্বরীষং চ নাভাগং মৃতং শুশ্রুম সৃঞ্জয়
যং প্রজা বব্রিরে পুণ্যং গোপ্তারং নৃপসত্তম
29.94
যঃ সহস্রং সহস্রাণাং রাজ্ঞাময়ুত যাজিনাম্
ঈজানো বিততে যজ্ঞে ব্রাহ্মণেভ্যঃ সমাহিতঃ
29.95
নৈতত্পূর্বে জনাশ্চক্রুর্ন করিষ্যন্তি চাপরে
ইত্যম্বরীষং নাভাগমন্বমোদন্ত দক্ষিণাঃ
29.96
শতং রাজসহস্রাণি শতং রাজশতানি চ
সর্বেঽশ্বমেধৈরীজানাস্তেঽভ্যয়ুর্দক্ষিণায়নম্
29.97
স চেন্মমার সৃঞ্জয় চতুর্ভদ্রতরস্ত্বয়া
পুত্রাত্পুণ্যতরশ্চৈব মা পুত্রমনুতপ্যথাঃ
29.98
শশবিন্দুং চৈত্ররথং মৃতং শুশ্রুম সৃঞ্জয়
যস্য ভার্যাসহস্রাণাং শতমাসীন্মহাত্মনঃ
29.99
সহস্রং তু সহস্রাণাং যস্যাসঞ্শাশবিন্দবঃ
হিরণ্যকবচাঃ সর্বে সর্বে চোত্তমধন্বিনঃ
29.100
শতং কন্যা রাজপুত্রমেকৈকং পৃষ্ঠতোঽন্বয়ুঃ
কন্যাং কন্যাং শতং নাগা নাগং নাগং শতং রথাঃ
29.101
রথং রথং শতং চাশ্বা দেশজা হেমমালিনঃ
অশ্বমশ্বং শতং গাবো গাং গাং তদ্বদজাবিকম্
29.102
এতদ্ধনমপর্যন্তমশ্বমেধে মহামখে
শশবিন্দুর্মহারাজ ব্রাহ্মণেভ্যঃ সমাদিশৎ
29.103
স চেন্মমার সৃঞ্জয় চতুর্ভদ্রতরস্ত্বয়া
পুত্রাত্পুণ্যতরশ্চৈব মা পুত্রমনুতপ্যথাঃ
29.104
গয়মামূর্তরয়সং মৃতং শুশ্রুম সৃঞ্জয়
যঃ স বর্ষশতং রাজা হুতশিষ্টাশনোঽভবৎ
29.105
যস্মৈ বহ্নির্বরান্প্রাদাত্ততো বব্রে বরান্গয়ঃ
দদতো মেঽক্ষয়া চাস্তু ধর্মে শ্রদ্ধা চ বর্ধতাম্
29.106
মনো মে রমতাং সত্যে ত্বত্প্রসাদাদ্ধুতাশন
লেভে চ কামাংস্তান্সর্বান্পাবকাদিতি নঃ শ্রুতম্
29.107
দর্শেন পৌর্ণমাসেন চাতুর্মাস্যৈঃ পুনঃ পুনঃ
অয়জত্স মহাতেজাঃ সহস্রং পরিবত্সরান্
29.108
শতং গবাং সহস্রাণি শতমশ্বশতানি চ
উত্থায়োত্থায় বৈ প্রাদাত্সহস্রং পরিবত্সরান্
29.109
তর্পয়ামাস সোমেন দেবান্বিত্তৈর্দ্বিজানপি
পিতৄন্স্বধাভিঃ কামৈশ্চ স্ত্রিয়ঃ স্বাঃ পুরুষর্ষভ
29.110
সৌবর্ণাং পৃথিবীং কৃত্বা দশব্যামাং দ্বিরায়তাম্
দক্ষিণামদদদ্রাজা বাজিমেধমহামখে
29.111
যাবত্যঃ সিকতা রাজন্গঙ্গায়াঃ পুরুষর্ষভ
তাবতীরেব গাঃ প্রাদাদামূর্তরয়সো গয়ঃ
29.112
স চেন্মমার সৃঞ্জয় চতুর্ভদ্রতরস্ত্বয়া
পুত্রাত্পুণ্যতরশ্চৈব মা পুত্রমনুতপ্যথাঃ
29.113
রন্তিদেবং চ সাঙ্কৃত্যং মৃতং শুশ্রুম সৃঞ্জয়
সম্যগারাধ্য যঃ শক্রং বরং লেভে মহায়শাঃ
29.114
অন্নং চ নো বহু ভবেদতিথীংশ্চ লভেমহি
শ্রদ্ধা চ নো মা ব্যগমন্মা চ যাচিষ্ম কংচন
29.115
উপাতিষ্ঠন্ত পশবঃ স্বয়ং তং সংশিতব্রতম্
গ্রাম্যারণ্যা মহাত্মানং রন্তিদেবং যশস্বিনম্
29.116
মহানদী চর্মরাশেরুত্ক্লেদাত্সুস্রুবে যতঃ
ততশ্চর্মণ্বতীত্যেবং বিখ্যাতা সা মহানদী
29.117
ব্রাহ্মণেভ্যো দদৌ নিষ্কান্সদসি প্রততে নৃপঃ
তুভ্যং তুভ্যং নিষ্কমিতি যত্রাক্রোশন্তি বৈ দ্বিজাঃ
সহস্রং তুভ্যমিত্যুক্ত্বা ব্রাহ্মণান্স্ম প্রপদ্যতে
29.118
অন্বাহার্যোপকরণং দ্রব্যোপকরণং চ যৎ
ঘটাঃ স্থাল্যঃ কটাহাশ্চ পাত্র্যশ্চ পিঠরা অপি
ন তত্কিংচিদসৌবর্ণং রন্তিদেবস্য ধীমতঃ
29.119
সাঙ্কৃতে রন্তিদেবস্য যাং রাত্রিমবসদ্গৃহে
আলভ্যন্ত শতং গাবঃ সহস্রাণি চ বিংশতিঃ
29.120
তত্র স্ম সূদাঃ ক্রোশন্তি সুমৃষ্টমণিকুণ্ডলাঃ
সূপভূয়িষ্ঠমশ্নীধ্বং নাদ্য মাংসং যথা পুরা
29.121
স চেন্মমার সৃঞ্জয় চতুর্ভদ্রতরস্ত্বয়া
পুত্রাত্পুণ্যতরশ্চৈব মা পুত্রমনুতপ্যথাঃ
29.122
সগরং চ মহাত্মানং মৃতং শুশ্রুম সৃঞ্জয়
ঐক্ষ্বাকং পুরুষব্যাঘ্রমতিমানুষবিক্রমম্
29.123
ষষ্টিঃ পুত্রসহস্রাণি যং যান্তং পৃষ্ঠতোঽন্বয়ুঃ
নক্ষত্ররাজং বর্ষান্তে ব্যভ্রে জ্যোতির্গণা ইব
29.124
একচ্ছত্রা মহী যস্য প্রণতা হ্যভবত্পুরা
যোঽশ্বমেধসহস্রেণ তর্পয়ামাস দেবতাঃ
29.125
যঃ প্রাদাত্কাঞ্চনস্তম্ভং প্রাসাদং সর্বকাঞ্চনম্
পূর্ণং পদ্মদলাক্ষীণাং স্ত্রীণাং শয়নসংকুলম্
29.126
দ্বিজাতিভ্যোঽনুরূপেভ্যঃ কামানুচ্চাবচাংস্তথা
যস্যাদেশেন তদ্বিত্তং ব্যভজন্ত দ্বিজাতয়ঃ
29.127
খানয়ামাস যঃ কোপাত্পৃথিবীং সাগরাঙ্কিতাম্
যস্য নাম্না সমুদ্রশ্চ সাগরত্বমুপাগতঃ
29.128
স চেন্মমার সৃঞ্জয় চতুর্ভদ্রতরস্ত্বয়া
পুত্রাত্পুণ্যতরশ্চৈব মা পুত্রমনুতপ্যথাঃ
29.129
রাজানং চ পৃথুং বৈন্যং মৃতং শুশ্রুম সৃঞ্জয়
যমভ্যষিঞ্চন্সংভূয় মহারণ্যে মহর্ষয়ঃ
29.130
প্রথয়িষ্যতি বৈ লোকান্পৃথুরিত্যেব শব্দিতঃ
ক্ষতাচ্চ নস্ত্রায়তীতি স তস্মাত্ক্ষত্রিয়ঃ স্মৃতঃ
29.131
পৃথুং বৈন্যং প্রজা দৃষ্ট্বা রক্তাঃ স্মেতি যদব্রুবন্
ততো রাজেতি নামাস্য অনুরাগাদজায়ত
29.132
অকৃষ্টপচ্যা পৃথিবী পুটকে পুটকে মধু
সর্বা দ্রোণদুঘা গাবো বৈন্যস্যাসন্প্রশাসতঃ
29.133
অরোগাঃ সর্বসিদ্ধার্থা মনুষ্যা অকুতোভয়াঃ
যথাভিকামমবসন্ক্ষেত্রেষু চ গৃহেষু চ
29.134
আপঃ সংস্তম্ভিরে যস্য সমুদ্রস্য যিয়াসতঃ
সরিতশ্চানুদীর্যন্ত ধ্বজসঙ্গশ্চ নাভবৎ
29.135
হৈরণ্যাংস্ত্রিনলোত্সেধান্পর্বতানেকবিংশতিম্
ব্রাহ্মণেভ্যো দদৌ রাজা যোঽশ্বমেধে মহামখে
29.136
স চেন্মমার সৃঞ্জয় চতুর্ভদ্রতরস্ত্বয়া
পুত্রাত্পুণ্যতরশ্চৈব মা পুত্রমনুতপ্যথাঃ
29.137
কিং বৈ তূষ্ণীং ধ্যায়সি সৃঞ্জয় ত্বং; ন মে রাজন্বাচমিমাং শৃণোষি
ন চেন্মোঘং বিপ্রলপ্তং ময়েদং; পথ্যং মুমূর্ষোরিব সম্যগুক্তম্
29.138
সৃঞ্জয় উবাচ
শৃণোমি তে নারদ বাচমেতাং; বিচিত্রার্থাং স্রজমিব পুণ্যগন্ধাম্
রাজর্ষীণাং পুণ্যকৃতাং মহাত্মনাং; কীর্ত্যা যুক্তাং শোকনির্ণাশনার্থম্
29.139
ন তে মোঘং বিপ্রলপ্তং মহর্ষে; দৃষ্ট্বৈব ত্বাং নারদাহং বিশোকঃ
শুশ্রূষে তে বচনং ব্রহ্মবাদি;ন্ন তে তৃপ্যাম্যমৃতস্যেব পানাৎ
29.140
অমোঘদর্শিন্মম চেত্প্রসাদং; সুতাঘদগ্ধস্য বিভো প্রকুর্যাঃ
মৃতস্য সংজীবনমদ্য মে স্যা;ত্তব প্রসাদাত্সুতসংগমশ্চ
29.141
নারদ উবাচ
যস্তে পুত্রো দয়িতোঽয়ং বিয়াতঃ; স্বর্ণষ্ঠীবী যমদাত্পর্বতস্তে
পুনস্তে তং পুত্রমহং দদামি; হিরণ্যনাভং বর্ষসহস্রিণং চ