Utshovঅধ্যায় 28
28.1
বৈশংপায়ন উবাচ
জ্ঞাতিশোকাভিতপ্তস্য প্রাণানভ্যুত্সিসৃক্ষতঃ
জ্যেষ্ঠস্য পাণ্ডুপুত্রস্য ব্যাসঃ শোকমপানুদৎ
28.2
ব্যাস উবাচ
অত্রাপ্যুদাহরন্তীমমিতিহাসং পুরাতনম্
অশ্মগীতং নরব্যাঘ্র তন্নিবোধ যুধিষ্ঠির
28.3
অশ্মানং ব্রাহ্মণং প্রাজ্ঞং বৈদেহো জনকো নৃপঃ
সংশয়ং পরিপপ্রচ্ছ দুঃখশোকপরিপ্লুতঃ
28.4
জনক উবাচ
আগমে যদি বাপায়ে জ্ঞাতীনাং দ্রবিণস্য চ
নরেণ প্রতিপত্তব্যং কল্যাণং কথমিচ্ছতা
28.5
অশ্মোবাচ
উত্পন্নমিমমাত্মানং নরস্যানন্তরং ততঃ
তানি তান্যভিবর্তন্তে দুঃখানি চ সুখানি চ
28.6
তেষামন্যতরাপত্তৌ যদ্যদেবোপসেবতে
তত্তদ্ধি চেতনামস্য হরত্যভ্রমিবানিলঃ
28.7
অভিজাতোঽস্মি সিদ্ধোঽস্মি নাস্মি কেবলমানুষঃ
ইত্যেবং হেতুভিস্তস্য ত্রিভিশ্চিত্তং প্রসিচ্যতি
28.8
স প্রসিক্তমনা ভোগান্বিসৃজ্য পিতৃসংচিতান্
পরিক্ষীণঃ পরস্বানামাদানং সাধু মন্যতে
28.9
তমতিক্রান্তমর্যাদমাদদানমসাংপ্রতম্
প্রতিষেধন্তি রাজানো লুব্ধা মৃগমিবেষুভিঃ
28.10
যে চ বিংশতিবর্ষা বা ত্রিংশদ্বর্ষাশ্চ মানবাঃ
পরেণ তে বর্ষশতান্ন ভবিষ্যন্তি পার্থিব
28.11
তেষাং পরমদুঃখানাং বুদ্ধ্যা ভেষজমাদিশেৎ
সর্বপ্রাণভৃতাং বৃত্তং প্রেক্ষমাণস্ততস্ততঃ
28.12
মানসানাং পুনর্যোনির্দুঃখানাং চিত্তবিভ্রমঃ
অনিষ্টোপনিপাতো বা তৃতীয়ং নোপপদ্যতে
28.13
এবমেতানি দুঃখানি তানি তানীহ মানবম্
বিবিধান্যুপবর্তন্তে তথা সাংস্পর্শকানি চ
28.14
জরামৃত্যূ হ ভূতানি খাদিতারৌ বৃকাবিব
বলিনাং দুর্বলানাং চ হ্রস্বানাং মহতামপি
28.15
ন কশ্চিজ্জাত্বতিক্রামেজ্জরামৃত্যূ হ মানবঃ
অপি সাগরপর্যন্তাং বিজিত্যেমাং বসুংধরাম্
28.16
সুখং বা যদি বা দুঃখং ভূতানাং পর্যুপস্থিতম্
প্রাপ্তব্যমবশৈঃ সর্বং পরিহারো ন বিদ্যতে
28.17
পূর্বে বয়সি মধ্যে বাপ্যুত্তমে বা নরাধিপ
অবর্জনীয়াস্তেঽর্থা বৈ কাঙ্ক্ষিতাশ্চ ততোঽন্যথা
28.18
সুপ্রিয়ৈর্বিপ্রয়োগশ্চ সংপ্রয়োগস্তথাপ্রিয়ৈঃ
অর্থানর্থৌ সুখং দুঃখং বিধানমনুবর্ততে
28.19
প্রাদুর্ভাবশ্চ ভূতানাং দেহন্যাসস্তথৈব চ
প্রাপ্তিব্যায়াময়োগশ্চ সর্বমেতত্প্রতিষ্ঠিতম্
28.20
গন্ধবর্ণরসস্পর্শা নিবর্তন্তে স্বভাবতঃ
তথৈব সুখদুঃখানি বিধানমনুবর্ততে
28.21
আসনং শয়নং যানমুত্থানং পানভোজনম্
নিয়তং সর্বভূতানাং কালেনৈব ভবন্ত্যুত
28.22
বৈদ্যাশ্চাপ্যাতুরাঃ সন্তি বলবন্তঃ সুদুর্বলাঃ
স্ত্রীমন্তশ্চ তথা ষণ্ঢা বিচিত্রঃ কালপর্যয়ঃ
28.23
কুলে জন্ম তথা বীর্যমারোগ্যং ধৈর্যমেব চ
সৌভাগ্যমুপভোগশ্চ ভবিতব্যেন লভ্যতে
28.24
সন্তি পুত্রাঃ সুবহবো দরিদ্রাণামনিচ্ছতাম্
বহূনামিচ্ছতাং নাস্তি সমৃদ্ধানাং বিচেষ্টতাম্
28.25
ব্যাধিরগ্নির্জলং শস্ত্রং বুভুক্ষা শ্বাপদং বিষম্
রজ্জ্বা চ মরণং জন্তোরুচ্চাচ্চ পতনং তথা
28.26
নির্যাণং যস্য যদ্দিষ্টং তেন গচ্ছতি হেতুনা
দৃশ্যতে নাভ্যতিক্রামন্নতিক্রান্তো ন বা পুনঃ
28.27
দৃশ্যতে হি যুবৈবেহ বিনশ্যন্বসুমান্নরঃ
দরিদ্রশ্চ পরিক্লিষ্টঃ শতবর্ষো জনাধিপ
28.28
অকিংচনাশ্চ দৃশ্যন্তে পুরুষাশ্চিরজীবিনঃ
সমৃদ্ধে চ কুলে জাতা বিনশ্যন্তি পতংগবৎ
28.29
প্রায়েণ শ্রীমতাং লোকে ভোক্তুং শক্তির্ন বিদ্যতে
কাষ্ঠান্যপি হি জীর্যন্তে দরিদ্রাণাং নরাধিপ
28.30
অহমেতত্করোমীতি মন্যতে কালচোদিতঃ
যদ্যদিষ্টমসংতোষাদ্দুরাত্মা পাপমাচরন্
28.31
স্ত্রিয়োঽক্ষা মৃগয়া পানং প্রসঙ্গান্নিন্দিতা বুধৈঃ
দৃশ্যন্তে চাপি বহবঃ সংপ্রসক্তা বহুশ্রুতাঃ
28.32
ইতি কালেন সর্বার্থানীপ্সিতানীপ্সিতানি চ
স্পৃশন্তি সর্বভূতানি নিমিত্তং নোপলভ্যতে
28.33
বায়ুমাকাশমগ্নিং চ চন্দ্রাদিত্যাবহঃক্ষপে
জ্যোতীংষি সরিতঃ শৈলান্কঃ করোতি বিভর্তি বা
28.34
শীতমুষ্ণং তথা বর্ষং কালেন পরিবর্ততে
এবমেব মনুষ্যাণাং সুখদুঃখে নরর্ষভ
28.35
নৌষধানি ন শাস্ত্রাণি ন হোমা ন পুনর্জপাঃ
ত্রায়ন্তে মৃত্যুনোপেতং জরয়া বাপি মানবম্
28.36
যথা কাষ্ঠং চ কাষ্ঠং চ সমেয়াতাং মহোদধৌ
সমেত্য চ ব্যতীয়াতাং তদ্বদ্ভূতসমাগমঃ
28.37
যে চাপি পুরুষৈঃ স্ত্রীভির্গীতবাদ্যৈরুপস্থিতাঃ
যে চানাথাঃ পরান্নাদাঃ কালস্তেষু সমক্রিয়ঃ
28.38
মাতৃপিতৃসহস্রাণি পুত্রদারশতানি চ
সংসারেষ্বনুভূতানি কস্য তে কস্য বা বয়ম্
28.39
নৈবাস্য কশ্চিদ্ভবিতা নায়ং ভবতি কস্যচিৎ
পথি সংগতমেবেদং দারবন্ধুসুহৃদ্গণৈঃ
28.40
ক্বাসং ক্বাস্মি গমিষ্যামি কো ন্বহং কিমিহাস্থিতঃ
কস্মাত্কমনুশোচেয়মিত্যেবং স্থাপয়েন্মনঃ
অনিত্যে প্রিয়সংবাসে সংসারে চক্রবদ্গতৌ
28.41
ন দৃষ্টপূর্বং প্রত্যক্ষং পরলোকং বিদুর্বুধাঃ
আগমাংস্ত্বনতিক্রম্য শ্রদ্ধাতব্যং বুভূষতা
28.42
কুর্বীত পিতৃদৈবত্যং ধর্মাণি চ সমাচরেৎ
যজেচ্চ বিদ্বান্বিধিবত্ত্রিবর্গং চাপ্যনুব্রজেৎ
28.43
সংনিমজ্জজ্জগদিদং গম্ভীরে কালসাগরে
জরামৃত্যুমহাগ্রাহে ন কশ্চিদববুধ্যতে
28.44
আয়ুর্বেদমধীয়ানাঃ কেবলং সপরিগ্রহম্
দৃশ্যন্তে বহবো বৈদ্যা ব্যাধিভিঃ সমভিপ্লুতাঃ
28.45
তে পিবন্তঃ কষায়াংশ্চ সর্পীংষি বিবিধানি চ
ন মৃত্যুমতিবর্তন্তে বেলামিব মহোদধিঃ
28.46
রসায়নবিদশ্চৈব সুপ্রয়ুক্তরসায়নাঃ
দৃশ্যন্তে জরয়া ভগ্না নগা নাগৈরিবোত্তমৈঃ
28.47
তথৈব তপসোপেতাঃ স্বাধ্যায়াভ্যসনে রতাঃ
দাতারো যজ্ঞশীলাশ্চ ন তরন্তি জরান্তকৌ
28.48
ন হ্যহানি নিবর্তন্তে ন মাসা ন পুনঃ সমাঃ
জাতানাং সর্বভূতানাং ন পক্ষা ন পুনঃ ক্ষপাঃ
28.49
সোঽয়ং বিপুলমধ্বানং কালেন ধ্রুবমধ্রুবঃ
নরোঽবশঃ সমভ্যেতি সর্বভূতনিষেবিতম্
28.50
দেহো বা জীবতোঽভ্যেতি জীবো বাভ্যেতি দেহতঃ
পথি সংগতমেবেদং দারৈরন্যৈশ্চ বন্ধুভিঃ
28.51
নায়মত্যন্তসংবাসো লভ্যতে জাতু কেনচিৎ
অপি স্বেন শরীরেণ কিমুতান্যেন কেনচিৎ
28.52
ক্ব নু তেঽদ্য পিতা রাজন্ক্ব নু তেঽদ্য পিতামহঃ
ন ত্বং পশ্যসি তানদ্য ন ত্বাং পশ্যন্তি তেঽপি চ
28.53
ন হ্যেব পুরুষো দ্রষ্টা স্বর্গস্য নরকস্য বা
আগমস্তু সতাং চক্ষুর্নৃপতে তমিহাচর
28.54
চরিতব্রহ্মচর্যো হি প্রজায়েত যজেত চ
পিতৃদেবমহর্ষীণামানৃণ্যায়ানসূয়কঃ
28.55
স যজ্ঞশীলঃ প্রজনে নিবিষ্টঃ; প্রাগ্ব্রহ্মচারী প্রবিভক্তপক্ষঃ
আরাধয়ন্স্বর্গমিমং চ লোকং; পরং চ মুক্ত্বা হৃদয়ব্যলীকম্
28.56
সম্যগ্ঘি ধর্মং চরতো নৃপস্য; দ্রব্যাণি চাপ্যাহরতো যথাবৎ
প্রবৃত্তচক্রস্য যশোঽভিবর্ধতে; সর্বেষু লোকেষু চরাচরেষু
28.57
ব্যাস উবাচ
ইত্যেবমাজ্ঞায় বিদেহরাজো; বাক্যং সমগ্রং পরিপূর্ণহেতুঃ
অশ্মানমামন্ত্র্য বিশুদ্ধবুদ্ধি;র্যয়ৌ গৃহং স্বং প্রতি শান্তশোকঃ
28.58
তথা ত্বমপ্যচ্যুত মুঞ্চ শোক;মুত্তিষ্ঠ শক্রোপম হর্ষমেহি
ক্ষাত্রেণ ধর্মেণ মহী জিতা তে; তাং ভুঙ্ক্ষ্ব কুন্তীসুত মা বিষাদীঃ