Utshovঅধ্যায় 27
27.1
যুধিষ্ঠির উবাচ
অভিমন্যৌ হতে বালে দ্রৌপদ্যাস্তনয়েষু চ
ধৃষ্টদ্যুম্নে বিরাটে চ দ্রুপদে চ মহীপতৌ
27.2
বসুষেণে চ ধর্মজ্ঞে ধৃষ্টকেতৌ চ পার্থিবে
তথান্যেষু নরেন্দ্রেষু নানাদেশ্যেষু সংয়ুগে
27.3
ন বিমুঞ্চতি মাং শোকো জ্ঞাতিঘাতিনমাতুরম্
রাজ্যকামুকমত্যুগ্রং স্ববংশোচ্ছেদকারকম্
27.4
যস্যাঙ্কে ক্রীডমানেন ময়া বৈ পরিবর্তিতম্
স ময়া রাজ্যলুব্ধেন গাঙ্গেয়ো বিনিপাতিতঃ
27.5
যদা হ্যেনং বিঘূর্ণন্তমপশ্যং পার্থসায়কৈঃ
কম্পমানং যথা বজ্রৈঃ প্রেক্ষমাণং শিখণ্ডিনম্
27.6
জীর্ণং সিংহমিব প্রাংশুং নরসিংহং পিতামহম্
কীর্যমাণং শরৈস্তীক্ষ্ণৈর্দৃষ্ট্বা মে ব্যথিতং মনঃ
27.7
প্রাঙ্মুখং সীদমানং চ রথাদপচ্যুতং শরৈঃ
ঘূর্ণমানং যথা শৈলং তদা মে কশ্মলোঽভবৎ
27.8
যঃ স বাণধনুষ্পাণির্যোধয়ামাস ভার্গবম্
বহূন্যহানি কৌরব্যঃ কুরুক্ষেত্রে মহামৃধে
27.9
সমেতং পার্থিবং ক্ষত্রং বারাণস্যাং নদীসুতঃ
কন্যার্থমাহ্বয়দ্বীরো রথেনৈকেন সংয়ুগে
27.10
যেন চোগ্রায়ুধো রাজা চক্রবর্তী দুরাসদঃ
দগ্ধঃ শস্ত্রপ্রতাপেন স ময়া যুধি ঘাতিতঃ
27.11
স্বয়ং মৃত্যুং রক্ষমাণঃ পাঞ্চাল্যং যঃ শিখণ্ডিনম্
ন বাণৈঃ পাতয়ামাস সোঽর্জুনেন নিপাতিতঃ
27.12
যদৈনং পতিতং ভূমাবপশ্যং রুধিরোক্ষিতম্
তদৈবাবিশদত্যুগ্রো জ্বরো মে মুনিসত্তম
যেন সংবর্ধিতা বালা যেন স্ম পরিরক্ষিতাঃ
27.13
স ময়া রাজ্যলুব্ধেন পাপেন গুরুঘাতিনা
অল্পকালস্য রাজ্যস্য কৃতে মূঢেন ঘাতিতঃ
27.14
আচার্যশ্চ মহেষ্বাসঃ সর্বপার্থিবপূজিতঃ
অভিগম্য রণে মিথ্যা পাপেনোক্তঃ সুতং প্রতি
27.15
তন্মে দহতি গাত্রাণি যন্মাং গুরুরভাষত
সত্যবাক্যো হি রাজংস্ত্বং যদি জীবতি মে সুতঃ
সত্যং মা মর্শয়ন্বিপ্রো ময়ি তত্পরিপৃষ্টবান্
27.16
কুঞ্জরং চান্তরং কৃত্বা মিথ্যোপচরিতং ময়া
সুভৃশং রাজ্যলুব্ধেন পাপেন গুরুঘাতিনা
27.17
সত্যকঞ্চুকমাস্থায় ময়োক্তো গুরুরাহবে
অশ্বত্থামা হত ইতি কুঞ্জরে বিনিপাতিতে
কান্নু লোকান্গমিষ্যামি কৃত্বা তত্কর্ম দারুণম্
27.18
অঘাতয়ং চ যত্কর্ণং সমরেষ্বপলায়িনম্
জ্যেষ্ঠং ভ্রাতরমত্যুগ্রং কো মত্তঃ পাপকৃত্তমঃ
27.19
অভিমন্যুং চ যদ্বালং জাতং সিংহমিবাদ্রিষু
প্রাবেশয়মহং লুব্ধো বাহিনীং দ্রোণপালিতাম্
27.20
তদাপ্রভৃতি বীভত্সুং ন শক্নোমি নিরীক্ষিতুম্
কৃষ্ণং চ পুণ্ডরীকাক্ষং কিল্বিষী ভ্রূণহা যথা
27.21
দ্রৌপদীং চাপ্যদুঃখার্হাং পঞ্চপুত্রবিনাকৃতাম্
শোচামি পৃথিবীং হীনাং পঞ্চভিঃ পর্বতৈরিব
27.22
সোঽহমাগস্করঃ পাপঃ পৃথিবীনাশকারকঃ
আসীন এবমেবেদং শোষয়িষ্যে কলেবরম্
27.23
প্রায়োপবিষ্টং জানীধ্বমদ্য মাং গুরুঘাতিনম্
জাতিষ্বন্যাস্বপি যথা ন ভবেয়ং কুলান্তকৃৎ
27.24
ন ভোক্ষ্যে ন চ পানীয়মুপয়োক্ষ্যে কথংচন
শোষয়িষ্যে প্রিয়ান্প্রাণানিহস্থোঽহং তপোধন
27.25
যথেষ্টং গম্যতাং কামমনুজানে প্রসাদ্য বঃ
সর্বে মামনুজানীত ত্যক্ষ্যামীদং কলেবরম্
27.26
বৈশংপায়ন উবাচ
তমেবংবাদিনং পার্থং বন্ধুশোকেন বিহ্বলম্
মৈবমিত্যব্রবীদ্ব্যাসো নিগৃহ্য মুনিসত্তমঃ
27.27
অতিবেলং মহারাজ ন শোকং কর্তুমর্হসি
পুনরুক্তং প্রবক্ষ্যামি দিষ্টমেতদিতি প্রভো
27.28
সংয়োগা বিপ্রয়োগাশ্চ জাতানাং প্রাণিনাং ধ্রুবম্
বুদ্বুদা ইব তোয়েষু ভবন্তি ন ভবন্তি চ
27.29
সর্বে ক্ষয়ান্তা নিচয়াঃ পতনান্তাঃ সমুচ্ছ্রয়াঃ
সংয়োগা বিপ্রয়োগান্তা মরণান্তং হি জীবিতম্
27.30
সুখং দুঃখান্তমালস্যং দাক্ষ্যং দুঃখং সুখোদয়ম্
ভূতিঃ শ্রীর্হ্রীর্ধৃতিঃ সিদ্ধির্নাদক্ষে নিবসন্ত্যুত
27.31
নালং সুখায় সুহৃদো নালং দুঃখায় দুর্হৃদঃ
ন চ প্রজ্ঞালমর্থেভ্যো ন সুখেভ্যোঽপ্যলং ধনম্
27.32
যথা সৃষ্টোঽসি কৌন্তেয় ধাত্রা কর্মসু তত্কুরু
অত এব হি সিদ্ধিস্তে নেশস্ত্বমাত্মনা নৃপ